“අමුතු කතාවක් “(කෙටි කතාවකි) (පෙම් කතා)

එපා වෙනවා කා එක්කද මෙයා මෙච්චර මේ කතා කරන්නේ

මේ ලඟකදී ඉඳන් ප්‍රමෝද්ගේ ජංගම දුරකථනය කොයි වෙලාවෙත් බිසී

මල්කිට ඕක දැනිලා තිබුණත් ඒ ගැන අහන්න ගියේ නෑ

ඒ වෙනුවට මල්කි කළේ ප්‍රමෝද්ගේ අම්ම එක්ක කතා කරපු එක

අම්මගේ දුරකථනයට කතා කරලා ප්‍රමෝද්ට කියන්න තිබ්බ පණිවිඩය කියන එක

“ඇයි පුතේ අපේ ළමයගේ පෝන් එක ඕෆ් ද?”

සමහර වෙලාවට ප්‍රමෝද් ගේ අම්මා මල්කිගෙන් අහනවා

“නැහැ අම්මා එයාගේ ෆෝන් එක දිගින් දිගටම බිසී…කවුරු හරි යාලුවෙක් කතා කරනවා ඇති අම්මා එයාට පණිවිඩය කියන්නකො “

මල්කි ඒ හැම අවස්ථාවකම දීපු උත්තරේ ඒක තමා

මල්කි ට වයස අවුරුදු 24 යි

ප්‍රමෝත් මල්කි ට වැඩිය අවුරුදු දෙකක් වැඩිමල්

ඔහුට අවුරුදු 26 යි

මේ දෙන්නාගේ ප්‍රේම සම්බන්ධයටත් දැන් සෑහෙන කාලයක් වෙනවා

දෙන්න ගියේ ටවුන් එකේ එක ළඟ තිබුණු ඉස්කෝල දෙකකට

හැබැයි මල්කි පාසලෙන් ඉවත් උනහම තමයි දෙන්නා අතර ප්‍රේම සම්බන්ධය ඇති වුණේ

කලින් ඉඳන් දෙන්නම එක බස් එකේ එහෙම ආවා ගියාට දැකලා තිබුනට උසස් පෙළ කරලා අවසන් වුණාට පස්සේ ප්‍රමෝද් වැඩ කරපු ෆැක්ට්‍රි එකේම වැඩට මල්කි ආවහම තමා මේ දෙන්න අතර බැඳීමක් ඇති වුණේ

ඒ කියන්නේ දැන් අවුරුදු හතරක්

නමුත් ඊට කලින් ඉදන්ම දෙන්න දැනගෙන හිටියා

ඒ නිසා ප්‍රේම සම්බන්ධයට කෙසේ වෙතත් දැන හැඳුනුම්කමට නම් දැන් සෑහෙන කාලයක්

දෙන්නම මධ්‍යම පාන්තිකයෝ

ප්‍රමෝද් පවුලේ වැඩිමලා

එයාට නංගිලා දෙන්නෙකුයි මල්ලියෙකුයි ඉන්නවා

තාත්තා මේසන් වැඩ කරන්නේ

අම්මත් ගෙදරට වෙලා කොට්ට උර මහනවා

පුංචිම නංගී මල්ලී දෙන්නා තාම ඉස්කෝලේ යනවා

ලොකු නංගී විතරක් පොඩි ජොබ් එකක් කරනවා

මල්කි එයාගේ පවුලේ දෙවැනියා

අක්කා බැඳලා තව නංගි කෙනෙකුයි මල්ලි කෙනෙකුයි ඉන්නවා

එයාලත් පෝසතුන් නෙමෙයි

මල්කි ගේ තාත්ත රට

අම්මා ගෙදරට වෙලා ළමයි බලන් ඉන්නවා

ලොකුවට කරදරයක් තිබුනෙ නැතත් මහලොකු ධනවතුන් නෙමෙයි

ඉතින් මල්කි ප්‍රමෝදගේ ෆැක්ට්‍රි එකේම quality checker කෙනෙක් විදිහට තමා සේවයට ගියේ

ප්‍රමෝද් ඒකේ maintenance අන්ශයේ

කොහොම වුණත් විදුලිය ආශ්‍රිත පාඨමාලාවක් හදාරලා තිබුණා ප්‍රමෝද් රැකියාවට යන්න කලින්

දෙන්නටම විවාහ වෙන්න සුදුසු ආර්ථික තත්ත්වයක් නම් මේ වෙද්දිත් ඇතිවෙලා තිබුණේ නැහැ

විශේෂයෙන් ප්‍රමෝද්ට විවාහ වෙන්න නම් අඩු තරමේ ලොකු නංගිව බන්දලා දීලා ඉන්න වෙනවා

ඒ නිසා විවාහ වෙන වයස වුනත් ඒ ගැන නම් හිතන්න වෙන පාටක් තිබුනේ නෑ අඩුම තරමේ තව අවුරුදු තුනක් හෝ හතරක් යනකන්

දෙන්නම එකම ස්ථානයේ සේවය කරන නිසා දෙන්නට දෙන්නා කතා කරන්න නොලැබුණත් සතියට දින හයක් දකිනවා

යමින් එමින් ගමන් එකම බස් එකේ යන්න පුළුවන් වෙනවා

උදේ 7.30 වෙනකොට ෆැක්ට්‍රියේ වැඩ පටන් ගන්නවා

ඕටී නැති දවසට පහමාර වෙද්දි ඕෆ් වෙනවා

හුඟක් වෙලාවට ප්‍රමෝද්ට නම් හවස 6.30 හත විතර වෙනකම් වැඩ

මල්කිට කලාතුරකින් තමයි එහෙම වැඩ වැටෙන්නේ

ඉතින් දෙන්න එකට වැඩට ආවට යන්නේ වෙන වෙන ම

හුඟක් වෙලාවට මල්කි ගෙදර ගිහිල්ලා රෑ වෙලා ප්‍රමෝද්ට කෝල් එකක් ගන්නවා

ඒ ඔහු කරදරයක් නැතුව වැඩ ඇරිල ගෙදර ආව ද කියලා බලන්න

උදේට දවල්ට කෑම ෆැක්ට්‍රියෙන් දුන්නත් ඒ කෑම හුඟක් දුරට නීරස නිසා මල්කි උදේටත් දවල්ටත් මොනව හරි හදාගෙන යනවා ප්‍රමෝද්ටත් එක්ක

දෙන්න උදේ සහ දවල් ආහාර ගන්නෙ එකට ඉඩ ලැබෙන හැම වතාවකම

නමුත් සමහර වෙලාවට වැඩ වැටෙන හැටියට දෙන්නට වෙන වෙනම කෑම ගන්න වෙන වෙලාවලුත් තියනවා

ප්‍රමෝද් හිටපු හැටියේ අලුත් ජංගම දුරකථනයක් අරගෙන කියලා මල්කි අදයි දැක්කේ

“අනේ මේ හරි ගණන් ෆෝන් එකක් නේ …ඔයා මට කියන්නෙත් නැතුව අරගෙන කවද්ද ගත්තේ “

“මං ගත්තෙ නෑ අනේ ඉස්සර අපේ පන්තියේ උන්න යාලුවෙක් දුන්නෙ.ඌ කොරියා ගියා නිවාඩුට ලංකාවට ආපු වෙලාවේ ඌ මට මේක දුන්නා “

“කවද්ද දුන්නේ ?”

“ගිය ඉරිදා උන්ගේ ගෙදර පාර්ටියක් දුන්නා අපිට …ඉතිං මායි තව යාලුවො වගේකුයි ගියා….”

ඔව් ෆෝන් එක මිලාධික එකක් බව මල්කිට තේරුම් ගියා…කොහොමටවත් ඒ වගේ වටින ෆෝන් එකක් ගන්න ප්‍රමෝද් ගාව මුදල් නැති බව මල්කි දන්නවා.එකතු කරගත්තු සල්ලියකුත් නෑ…තිබුණත් ෆෝන් එකක් ගන්නවට වැඩිය තව හුඟක් වැඩ තියෙනවා කරගන්න සල්ලි වලින් ඔහුට

කොහොම හරි මේ අලුත් ෆෝන් එකේ හැටියක් ද මන්දා ඒක තිස්සෙම බිසී..

අන්තිමේ දවසක් අහපුවාම ප්‍රමෝද් මල්කිට කිව්වේ කොරියා හිටපු යාළුවා නිවාඩුව ඉවර වෙලා ආපහු ගිය බවත් ඔහුට මෙහි ඉඩමක් ගන්නට අවශ්‍ය වී ඇති බවත් …හොඳ ඉඩමක් තියෙනවා නම් හොයලා කියන්න කියලා තමුන්ට කියපු බවත් ඒ විස්තර අහන්න ඔහු නිතර ම කෝල් කරනවා කියලා

ළඟකදි ඉඳලා ප්‍රමෝද් ගාවින් මාර සුවඳක් හමන්න ගත්තා….

අනේ ඔයා ශෝක් පර්ෆියුම් එකක් අරගෙන නේ…හරි සුවඳයි

ඒකත් බැරවුණේ කොරියා යාලුවගෙ ගිණුමට

එතන ඉඳන් හැමතිස්සෙම තිස්සේම මොනව හරි අලුත් දෙයක් ප්‍රමෝද්ගෙන් පේන්න ගත්තා

අලුත් අලුත් ඇඳුම්

අලුත් අලුත් සපත්තු

අලුත් අලුත් ආභරණ පවා

ඒ හැම එකක්ම එයාට ලැබිලා තිබුණෙ කොරියා යාළුවාගෙන්

හැබැයි කොරියා යාලුව දීලා තිබුණු අර පර්ෆියුම් එක… එක දවසක් ප්‍රමෝද්ගේ ගෙදර ගියාම ඔහුගේ කාමරේ මේසෙ උඩ තිබිලා අතට අරගෙන මල්කි බැලුවා

ඒක ඉතාලි සෙන්ට් එකක්

කොරියා යහළුවා ගෙනත් දීල තිබුනෙ ඉතාලි සෙන්ට් එකක් …..

ඒ වගේම දැන් නිතර නිතර ප්‍රමෝද් පාවිච්චි කරපු හුඟක් දේවල් කොරියා යාලුවා දුන්න කිව්වට ඒවායින් හුඟක් වෙලාවට දැකගන්න පුලුවන් වුණේ යුරෝපා ලක්ෂණ. විශේෂයෙන් ඉතාලි සුවඳ

මල්කි ගේ ඉස්කෝලෙ කාලෙදී හොඳම යාළුවාගෙ තාත්තා සේවය කළේ ඉතාලියෙ

මල්කි නිතරම යාළුවගේ ගෙදර ආවා ගියා

ඔවුන් පදිංචි වෙලා හිටියේ වෙන්නප්පුව ප්‍රදේශයේ

ඉතින් යාළුවා පාවිච්චි කරපු බොහෝ දේවල් ඉතාලියෙන් ගෙනාපුව

මේ ඉතාලි දේවල් ගැන හුරුපුරුදු බව එහෙම නැත්තං ඉව මල්කිට ලැබුණේ යාලුවගෙ ආශ්‍රයෙන්

ඒ හින්දා ප්‍රමෝද්ගේ යාළුවා කොරියාවේ නෙමේ ඉතාලියේ ඉන්න කවුරු හරි කියලා මල්කිට හිතුනා

එතකොට ඇයි මෙයා ඒ යාළුවා කොරියාවේ ඉන්නව කියන්නේ

කොහොම වුනත් මල්කි ටිකක් විමසිල්ලෙන් හිටියා

මල්කි හෙමින් සීරුවෙ බලාගත්තා කොහොමද කියලා ප්‍රමෝද් තමන්ගේ ජංගම දුරකථනයේ ලොක් එක අරින්නේ

ඊට පස්සේ හෙමින් සීරුවේ කල්පනාවෙන් හිටියා

කෑම කාලා ඊට පස්සේ දුම් වැටියක් උරන එක ප්‍රමෝද් පුරුද්දක් වශයෙන් කරන දෙයක්

කෑම පැයේදී කෑම කා අවසන් වූ පසුව ෆැක්ට්‍රියේ වොශ් රූම් එක තුළට යන ඔහු මේ දුම්වැටිය උරන්නට සෑහෙන කාලයක් ගන්නවා

ඔහුගේ මේ පුරුද්දට මල්කි කොපමණ විරුද්ධ වුණත් ඔහු කවදාවත් ඒ පුරුද්ද අතෑර ගත්තෙ නෑ

ඒ යද්දි ඔහු ඔහුගේ ජංගම දුරකතනය ගෙන යන පුරුද්දකුත් නැහැ

ඒක සාමාන්‍යයෙන් මල්කි ගාව හෝ ලොකරයේ දමා හෝ තමා ඔහු යන්නේ

එදත් ඒ වගේ දවසක්

ලොක් කරන ලද ජංගම දුරකථනය මල්කි ළඟ දමා ප්‍රමෝද් දුම්වැටියක් උරන කාර්යය සඳහා පිටවී ගියා

ඇසිල්ලකින් මල්කි ඔහුගේ දුරකථනය පරික්ෂා කරන්නට ගත්තා

ඔහුට ලැබුණු ඇමතුම් ඇය මුලින්ම පරීක්ෂා කළා

ඔහුට ලැබුණු ඇමතුම් මෙන් ම මග හැරී ගිය ඇමතුම් සියල්ලම ‘කොරියා ෆ්රෙන්ඩ්’ගෙන්ම වීම මල්කිගෙ හිතේ ඇති කළේ මහත් කුකුසක්

අනතුරුව ඈ ඒ නමින් සඳහන් අංකය පරීක්ෂා කළා. එය දේශීය ජංගම දුරකථන අංකයක්

ඊට අමතර ව “කොරියා ෆ්‍රෙන්ඩ් 2″ නමින් තවත් අංකයකින් ද ඔහුට ඇමතුම් ලැබී තිබුණා

එය වෙන්නප්පුව ප්‍රදේශයේ ගෘහස්ථ දුරකථන අංකයක්

මල්කි ඒ නොම්බර දෙකම තමන්ගෙ දුරකථනයේ ගබඩා කර ගත්තා

ඊළඟට ඇය ඔහුගේ ෆේස්බුක් ගිණුමට ලොග් උනා

එහි තිබූ චැට් පිරික්සන්නට ගත්තා

ට්‍රිලීෂියා ඩී සොයිසා නමින් උන් කාන්තාවක් හා ඔහු දිගින් දිගටම චැට් කර තිබුණා

ඒවා ඉතාම ප්‍රේමණීය හා රාගාන්විත චැට්

profile pictureහි දැක්වෙන අන්දමට ඈ තරුණ ළදක් නොව මැදි වයස් කාන්තාවක් බව මල්කී අවබෝධ කරගත්තා

ඇගේ ගිණුමට ගොස් පරික්ෂා කර බලද්දී තරුණ පුතෙකුත්…විවාහ වන වයසේ හෝ විවාහ වූ දියණිවරු සිටින මවක් බව මල්කිට පෙනුනා

මේ විස්තර දැකීමෙන් මල්කිව සීතල වී ගියා

මෙබඳු තලතුනා වියේ ගැහැනියක් හා ප්‍රේමයක පැටලී ප්‍රමෝද් තමාට මොනතරම් වංක වී ඇද්දැයි සිතමින් මල්කි හදවතින් හඬා වැටුනා

ඒ කෙසේ වෙතත් හදවතට නොව බුද්ධියට තැන දෙමින් මල්කි අවශ්‍ය විස්තර සියල්ල තමන්ගේ ජංගම දුරකථනයේ ගබඩා කර ගත්තා

ප්‍රමෝද් පැමිණෙන්නට පෙර ජංගම දුරකථනය පැත්තකින් තැබූ මල්කි කිසිදු වෙනසක් නොපෙන්වා ඔහු ආ පසුව නැවත රාජකාරිය සඳහා ගියා

දිගින් දිගට ම තමන්ගේ ෆේස්බුක් ගිණුම හරහා මල්කි විසින් අර කාන්තාව ගැන සොයා බැලුවා

එමෙන්ම වරින් වර ප්‍රමෝද්ගේ ජංගම දුරකථනය පරීක්ෂා කරන්නට ඇය අමතක කළේ නෑ

නිතර නිතර වැඩපළෙන් ෂෝට් ලීව් දමමින් ජැන්ඩියට ඇඳ පැළඳ ගෙන එහෙ මෙහෙ යන ප්‍රමෝද් දවස ගානෙම මල්කිව මගහරින්නට වුණා

viber ..whatsapp ..ඉමෝ හරහා අර වැඩිහිටි කාන්තාව හා දිගින් දිගටම ප්‍රමෝද් සබදතාවය පවත්වා ගෙන යන හැටි මල්කි බලා සිටියේ දැඩි වේදනාවෙන්

දිනක් ප්‍රමෝද් ශෝට් ලීව් යන වග කලින්ම දැන ගත් මල්කි ඇයද කෙටි නිවාඩු දමා ගත්තා

ඒ ගැන කිසිවක් ප්‍රමෝද්ට දැනගන්නට ඉඩ නො තබා ඔහු පිටත් ව ගිය පසු ඇයත් හිමින් සීරුවෙ ඔහුගේ පසුපස ඇදුනා

කර්මාන්ත ශාලාව ඉදිරියෙන් පාරේ නවතා තිබූ සුඛෝපභෝගී කාරයක් තුළට ක්ෂණයෙන් නැගගත් ප්‍රමෝද් පිටත් වී යන විට මල්කි ද අසල තිබූ ත්‍රී විලර් රථයකට නැගී ඔවුන් පසු පස හඹා යන ලෙස ත්‍රීවීල් කරුට දැනුම් දුන්නා

ප්‍රමෝද් රැගෙන ගමන් කළ කාරය නතර වුණේ ටවුමෙන් ටිකක් ඈතින් පිහිටා තිබූ තානායම් පොළක් අසල

ඉන්පසුව එයින් බැසගත් දෙදෙනා ඇතුලට ගමන් කළා

ට්‍රිලීෂියා සහ ප්‍රමෝද්

එම රථයේ නොම්මරය ලියා ගත් මල්කි ආපසු නිවසට පැමිණියා

වැඩි විස්තර අසන්නට පැමිණි ත්‍රීවිල් රථ රියදුරාට උඩින් පල්ලෙන් උත්තර දී ගැලවී එන්නට තරම් මල්කි නුවණක්කාර වුණා

මේ ගැන තමන්ගේ හොඳම යාළුවා වන නිමන්තිකාට මල්කි කිව්වා

ඊට පස්සේ කාලේ ගත වුනේ ට්‍රිලීෂියා ගැන විස්තර හොයන්න

ට්‍රිලීෂියා කියන්නේ අවුරුදු 55 ක පමණ කාන්තාවක්

ඇයගේ වැඩිමහල් දියණියන් දෙදෙනා විවාහකයි

වැඩිමල් පුතා රැකියාව කරන්නෙ ඉතාලියේ

ඇයගේ සැමියාත් රැකියාව කරන්නේ ඉතාලියෙ

මල්කිව දිනෙන් දින ම නොසලකා හැරපු ප්‍රමෝද්ට වඩාත් වැදගත් වුණේ අර කාමුක ගැහැනියව

අවසානයේ මේ ගැන නො විමසා සිටින්නට මල්කිට නොහැකි වුණා

මේ ගැන අහන්නට ,විමසන්නට යෑමෙන් නිතර දෙදෙනා අතර ගැටුම් ඇති වුණා

වාචික ප්‍රහාර ශාරීරික පහර දීම් දක්වාම දුර දිග ගියා

මේ නිසා මල්කි ගත කළේ හැඬු කඳුලින්

ප්‍රමෝද්ට තවදුරටත් මල්කි ආදරේ කළා

ඔහු ඇයගේ ප්‍රථම ප්‍රේමය

තව අවුරුදු තුන හතරකින් විවාහ වෙන්නට සිටියෙ

ගෙවල් දෙකෙන්ම කැමැත්ත ලැබිල තිබුන

මල්කි හා ප්‍රමෝද් අතර ඇති වුණු මේ ගැටුම් මැද්දට එන්නට ප්‍රමෝද්ගේ දෙමවුපියන් කැමැති වුණේ නෑ

එයට හේතුවත් මහාම කුරිරු එකක්

ට්‍රිලීෂියාගේ මුදල් ආධාර යහමින් ප්‍රමෝද් ගේ පවුලේ උදවියට ලැබුන නිසා ප්‍රමෝද් ගේ දෙමව්පියන් ඔවුන්ට විරුද්ධව වචනයක් වත් කතා කිරීමෙන් වැළකුණා

ට්‍රිලීෂියාගේ නවීන පන්නයේ කාරය නිතරම ප්‍රමෝද්ගේ ගෙමිදුලේ නතර කර තිබුණා

මේ ගැන ඔහුගේ දෙමවුපියන්ගේ හැඟීම උනේ ප්‍රමෝද් ට්‍රිලීෂියා හා විවාහ වීමේ අදහසින් ඔහු ආශ්‍රය කරනවා නොව එය හුදෙක් හිතවත්කමක් පමණක් බවයි

හොරාගේ අම්මගෙන් පේන ඇසීම නවතා දැමූ මල්කි ඉතාම ආදරයෙන් ප්‍රමෝද්ට මේ සම්බන්ධය නවතා දමන ලෙස ආයාචනා කලත් ඒ වන විට ප්‍රමෝද්ට මල්කිව පෙනුනේ ඇහේ කුණක් ලෙස යි

“මේ වාතයක් වෙන්නේ නැතුව ඉන්නවද “

අන්තිමේ දුරකථන සංවාද වලට පමණක් සීමාවුණු දෙදෙනාගේ කතා බහ නැත්තට ම නැති වී ගියේ ඉහත දෙබසින් ….

අන්තිමේ ඇඬූ කඳුලින් ම අවසන් තීරණය ගත් මල්කි ට්‍රිලීෂියා මුණ ගැසීමට තීරණය කළා

වැඩට නොයා හදිස්සියේ නිවාඩුවක් දැමු මල්කි තනියම ට්‍රිලීෂියාගේ නිවස බලා පිටත් වුණා

ඒ නිවස විසල් මාලිගාවක්

පිටත ගේට්ටුව ළඟ තිබූ විදුලි සීනුව නාද කළ විට මුරකරු යැයි සිතිය හැකි මිනිසකු විසින් ගේට්ටුවේ කුඩා කවුලුවක් තුළින් එබී බලා ප්‍රශ්නාර්ථ මුහුණක් මවා ගත්තා

“මම ට්‍රිලීෂියා ඇන්ටිව හම්බ වෙන්න ආවේ….”

“ආ නෝනා නම් මේ වෙලාවේ ගෙදර නෑනේ “

“ඉක්මනට ගෙදරට එයිද දන්නේ නැහැ නේද “

“ඒක නම් කියන්න දන්නේ නැහැ …”

“ආ…ඒකට කමක් නෑ මම එනකම් මෙතනින් ඉන්නම් ….ඇන්ටි කිව්වා මම එද්දී එයා කොහේ හරි ගිහින් තිබුනොත් මට මෙහෙ ඉන්න කියලා …එයා එනකම් …මම එයාට උදේ කෝල් කලා …කොහෙද ගමනක් යන්න තියෙනවා කියලා කිව්වා ඉක්මණට එනවා කියලා ඉන්න කිව්වා…මටත් ඒක අමතක උනා “

“එහෙම නම් ඔය නෝනා ඇවිත් ඇතුලට වෙලා ඉඳගෙන ඉන්න “

“නැහැ කමක් නැහැ මම මෙහෙම ඉන්නම් …ඇන්ටි එනවනම් මට පේනවා නේ”

මේ අතරතුරේ ඇතුළෙ සිට කාරයකින් කවුද පැමිණියා .මේ කාරයට පිට වීම පිණිස ගේට්ටුව සම්පූර්ණයෙන්ම විවෘත කරන ලද අතර විදුලිය මගින් සම්පූර්ණයෙන් ඉහලට එසවුනු මහා ගේට්ටුව තුළින් කාරය පිටතට පැමිණියා

පාරට දමා කාරය පාර අයිනේ නතර කර ඉන් බැස ගත්තේ කඩවසම් තරුණයෙක්

ඔහු ගේට්ටුව අසල හිටගෙන සිටින මල්කි අසලට පැමිනියා

“කාව හම්බ වෙන්න ද ?

නොසිතූ නොපැතූ මේ තරුණයා ගේ ප්‍රශ්නය හමුවේ එතෙක් සිත දිරියෙන් සිටි මල්කිගේ සිතේ දිරිය මැකී ගියා

උත්තුංග පරිණාහ තරුණයාගේ දැක්ම පවා මල්කීව සසළ කළා

ඇය ගේ තුම්මුනින් දාඩිය දමා ඇයගේ සිරුර ගැහෙන්නට ගත්තා …

ඇස් දෙකේ කඳුළු පිරුණා

අමාරුවෙන් වචන පටලවාගත් ඇය

“ට්‍රිලීෂියා ඇන්ටිව හම්බෙන්න “

මෙසේ කියනවාත් සමගම මල්කි හඩා වැටෙන්නට වුණා

“ඇතුලට යමු “

සිහිනයෙන් මෙන් නිවස දෙසට ඇදෙන මල්කි පසු පසින් ආ තරුණයා මුරකරු ට එහි ම රැදෙන ලෙසට අතින් සන් කළා

“ට්‍රිලීෂියා කියන්නේ මගේ අම්මා …දැන් කියනවද මට මොකක්ද වෙලා තියෙන්නෙ කියලා …හැබැයි ඔය හොටු පෙරාගෙන අඬන එක නම් නවත්වන්න ඕන …අඬන්නයි කතා කරන්නයි දෙකක් බෑ “

නිවසේ පෝටිකෝවේ වාඩිගත් මල්කි සිදු වූ සියල්ල හෙමින් සීරුවේ ගලපමින් …හඬමින් ද ,හූල්ලමින් ද ධනංජයට හෙවත් ට්‍රිලීෂියාගේ වැඩිමහල් පුතා ට පැවසුවා

“ඔයා ඔය කියන එක ඔප්පු කරන්න පුලුවන්ද? “

ඉන් පසුව මල්කි විසින් ඇය ප්‍රමෝද්ගේ ජංගම දුරකථනය හරහා ලබාගත් ඡායාරූප, ෆේස්බුක් ,වට්ස්ඇප් ,ඉමෝ විස්තර සියල්ලම ධනංජය වෙත ලබා දුන්නා

ධනංජය සේවය කලේ ඉතාලියේ

ඔහු නිවාඩුවට ලංකාවට පැමිණ තාම දවස් කිහිපයයි

ධනංජය ගේ තාත්තා වන ටෙරන්ස් අම්මා වන ට්‍රිලීෂියාට බොහෝ සේ පෙම් කළ නමුත් ට්‍රිලීෂියා අවස්ථා ගණනාවකදීම ටෙරන්ස් ට චපල වුණා

ට්‍රිලිෂියාගේ අනියම්සම්බන්ධතා අතටම අසු වූ නමුත් දරුවන් ගැන සිතා ඇයට ඒ සෑම අවස්ථාවකදීම සමාව දීමට ටෙරන්ස් කටයුතු කළා

අවසානයේ ඇයගේ චපල ගති ඉවසන්නට බැරුව ටෙරන්ස් කාලයක සිට ලංකාවට පැමිණීමෙන් වැළකී ඉන්නෙ

ඔහු අන්තිමට ලංකාවට ආවේ බාල දියණියගේ විවාහ උත්සවය වෙනුවෙන්

දියණිවරු දෙදෙනා ම විවාහ වී ඇති නිසා දැන් ඔහුගේ ඔලුවට ට්‍රිලීෂියා ගේ හැසිරීම එතරම් බරක් නො වේ

වැඩිමල් පුතා තමා හා ඉතාලියේ ම වෙසෙන නිසාත් පොඩි පුතා කොළඹ බෝඩින් වී පෞද්ගලික විශ්ව විද්‍යාලයක අධ්‍යාපනය හදාරන නිසාත් ට්‍රිලීෂියා සිටියේ ඉතාම නිදහස් ජීවිතයක් ගත කරමින්

ඇයට ඒ සඳහා මුදල් තිබුණා

දරුවන් පොඩි කාලේ ඔවුන් මුලු පවුලම සිටියේ ඉතාලියේ

ට්‍රිලීෂියාට ඉතාලියේ සිටි කිහිප දෙනෙකු සමඟත් අනියම් සබඳතා තිබුණා

අන්තිමේ ලංකාවට පදිංචි වෙන්න ආපු දවසෙ ඉඳල ට්‍රිලීෂියා කළේ දිගින් දිගටම විවිධ කාල වල විවිධ පුද්ගලයන් සමඟ අනියම් සබඳතා ඇති කර ගැනීමයි

…………………………………………………………………

හඬා වැලපෙමින් තමන්ට විස්තර කියූ ළාබාල සුන්දර තරුණියගේ හිත සනසා හරියටම දෙදෙනාව කොටුකර ගැනීමට විස්තර සොයා ගන්නා ලෙසට ඇය දැනුවත් කර ධනංජය විසින් ඇයව පිටත් කර හැරියා …..හැබැයි මුලින් ම දුටු අවස්ථාවේ සිට මේ දක්වාත් ඇයව හදවතින් පිටමන් කර හැරීමට ධනංජය අපොහොසත් වුණා

ඇගේ සොඳුරු මුහුණ නිරන්තරයෙන් ඔහු ගේ සිතට මැවි මැවී පෙනුනා

හදිසියේම ඇයගෙන් ආ දුරකථන ඇමතුමකට අනුව තම මවත් ඇයගේ පෙම්වතාත් අනඟ රැඟුමක ට පිටත් ව ගොස්

වහා කාරයේ නැගී මවගේ මවත්, පියාගේ මවත් , පියාගේ බාලම සොහොයුරාත් අතරමගින් කාරයට නගවා ගත් ධනංජය හෝටලය අසලට යන විට මල්කිත් එතනට පැමිණ සිටියා

ඔවුන් හෝටලයේ ලොබියට වී ආහාරපාන ඇණවුම් කරමින් කල් ගත කරන්නට වුණා

අනඟ රැඟුම් අවසානයේ හෝටලයෙන් පිටතට පැමිණෙන ජෝඩුව අවසන් මොහොත දක්වා තමාව අත්අඩංගුවට ගන්නට පැමිණි සිටි මේ සේනාව දුටුවේ නෑ

අවසන් දර්ශනයෙන් සලිත වී ගිය මේ ජෝඩුව කෙලින්ම පොලීසියට රැගෙන යන්නට ධනංජය කටයුතු කළා

නමුත් ඔවුන් දෙදෙනාට කිසිදු ශාරීරික හිරිහැරයක් සිදුනොකිරීමට ධනංජය වගබලා ගත්තා

පොලිසියට ගිය ධනංජය විසින් ප්‍රමෝද්ට අතට අත දෙන ලදී

“මට හරි සන්තෝසයි මචං ….

අපේ තාත්තා අම්මව ඩිවෝස් කරන්න යන්නේ

ඉතිං උඹට පුළුවන් අපේ අම්මව මැරි කරලා මගේ බාප්පා වෙන්න

මම මල්කිව කසාද බඳිනවා

මම කොහොමත් මේ සැරේ ලංකාවට ආවේ මැරි කරන්න හොඳ ගර්ල් කෙනෙක් හොයාගෙන

මට විශේෂයෙන්ම ඕන කළේ අපේ අම්මා වගේ නැතුව හොද චරිතයක් තියෙන අහිංසක කෙල්ලෙක්ව කසාද බඳින්න…

ඉතින් ඒකට මල්කිට වඩා හොඳ සුදුසු කෙල්ලක් නැහැ ….

දැන් මාස දෙකක් ඇතුලත අපි දෙන්නගෙ වෙඩින් එක මම ජයටම ගන්න යන්නේ

අපේ තාත්තාට මේ හදිස්සියේ නිවාඩු ගන්න බැහැ මගේ වෙඩින් එකට එන්න

ඉතින් මගේ බාප්පා විදිහට උඹට තමා මගේ වෙඩින් එකේ තාත්තගේ වැඩ කොටස කරන්න තියෙන්නේ….උබේ අම්මාටත් වැඩිය මගේ අම්මා වැඩිමල් ඇති….ඒත් ඉතින් උඹ මෙච්චර අපූරු මල්කිවත් අත ඇරලා අපේ අම්මගේ පස්සෙ වැටුනේ එයාට කැමති හින්දනේ….ඉතින් අපේ අම්මව ලේලි විදිහට බාර ගන්න උඹලගෙ ගෙදර උනුත් කැමති නිසා නේ තිස්සෙම අපේ අම්මව උඹලගේ ගෙදරට ගෙන්න ගත්තෙ…

ආයෙත් කියන්න ඕනා මට මාර සන්තෝෂයි මටත් වැඩිය අවුරුදු ගාණක් බාල එකෙක් මගේ තාත්තා වෙන එක ගැන ….මතක ඇතිව මගේ වෙඩින් එකේ උබේ යුතුකම් ටික ඉශ්ඨ කරපන් බාප්පෙ ….ගුඩ් ලක්…..”

මෙසේ කියමින් පැමිණ සිටි සැමවත් පොලිස් නිලධාරීන්වත් සිනා සයුරක ගිල්වූ ධනංජය

පොලිස් පැමිණිලි පොතක සියල්ල සටහන් කර මල්කිව සිය දෑතේ පටලවාගෙන පොලිස් ස්ථානයෙන් පිටව ගියා…. තමා ගේ නෑදෑ පිරිවරද සමඟ …

ඉන් දෙමසක් ගත වන තැන… සොඳුරු සුරංගනාවියකසේ හැඳ පැලඳ ගත් මල්කි… අති උත්කර්ෂවත් විවාහ උත්සවයකදී ධනංජයගේ ආදරණීය මනාලිය වී ඉතාලියට පිටත් වී ගියා …..

ඉනුත් කාලෙකට පසු ට්‍රිලීෂියාට දික්කසාදය ලැබුණා ….ටෙරන්ස් ට හා දරුවන්ට අයිතිව තිබූ සියලු දේපල ට්‍රිලීෂියාට අහිමි වුණා

එතකොට ප්‍රමෝද්……????????????