ඒ දවස් වල නුවර ටවුන් එකේ තැනින් තැන අත බලා සාත්තර කියපු අය හිටියා. ඒ අතරින් මට හොඳටම මතක මහනුවර සීවලී පොත් සාප්පුව ළඟ අත බලලා සාත්තර කියපු කෙනාව. සමහරදාට එයා සීවලී පොත් සාප්පුව ඉස්සරහා මැකලම් එක ළඟ තියන පටුපාර ළඟත් ඉන්නවා. මම අම්මත් එක්ක පොත් ගන්න සීවලී පොත් සාප්පුවට යනකොටත්, අප්පච්චිත් එක්ක මැකලම් වයින් ස්ටෝර්ස් එකට යනකොටත් පරණ බ්‍රිස්ටල් බෝඩ් එකක අතක් ඇදලා බිත්තියට හේත්තු කරගෙන ඉන්න ඒ පුද්ගලයා දිහා බලන්න අමතක කරන්නේ නැහැ. සාත්තර නොබලන වෙලාවට එයා පරණ ලී ස්ටූල් එකක වාඩි වෙලා දැහැනකට සම වැදිලා වගේ සාත්තර පොත් අස්සේ ඇස් දෙකම හංඟාගෙන හිටියේ.
ඉතිං ඔය බ්‍රිස්ටල් බෝඩ් එකේ ඇදලා තිබ්බ මහ විසාල අතේ රේඛා, මණ්ඩල එහෙම ළකුණු කරලා තියනවා. ඒ කාලේ පත්තර වලත් ඉඳ හිට ඔය අල්ලේ රේඛා සාත්තර ගැන ලිපි පලවුනා. ඒත් කවදාවත් ඒවායේ මම කැමති පලාපල වලට හරියන්න මගේ අල්ලේ රේඛා තිබිලා නැහැ. බොරු කියන්න ඕන නෑනේ, ඒ වෙලාවට මට මගේ අතේ රේඛා අලුතින් හදාගන්න හිතිලත් තියනවා. එදත්, අදත් මගේ අල්ලේ රේඛා වලින් අබිලික්ම රේඛාව තමයි ධන රේඛාව. ඒකේ ගන්නම දෙයක් නැහැ. ජීවන රේඛාවත් මට ඕන විදිහට නැහැ. ටිකක් හරි හොඳට තියෙන්නේ හෘද රේඛාව විතරයි. බඳින්න කලින් නම් මගේ හෘද රේඛාවට ලොකු ඉල්ලුමක් තිබ්බා. ඒත් බැන්දට පස්සේ ඉල්ලුමට සැපයුම නැතිවෙන කොට හර්ද රේඛාව කන්නද කියලා අහන අය වුනත් ඕනතරම් බිහි වෙන්න පුළුවන්…!
ඔය කාලෙම අපේ ඉස්කෝලේ කොල්ලොත් හස්ථි කාන්ත මන්තරේ වගේ මතුරපු එකම එක රේඛා සාස්තරයක් තිබ්බා. හැබැයි ඒ සාත්තරෙන් වැඩිපුරම කිව්වේ අල්ලේ රේඛා තියෙන අයට වඩා නැති අය ගැන. ඉතිං ඔය සාස්තර ගැනත් කියන්න ගියොත් දවස් ගාණක් කියන්න දේවල් තියනවා.
පස්සේ පස්සේ මටත් හොඳ හොඳ සාත්තර කාරයෝ ඇසුරු කරන්න ලැබිලා තියනවා. ඒ අතරින් එක්කෙනෙක්ට හස්ථ රේඛා පොත් වල තියන හැමදේම පාඩම්. ඒත් මිනිහා සාත්තර කියන්නේ අත බලලා පොතේ තියන විදිහට නෙමෙයි. එයා ඇත්තටම සාත්තර කියන්නේ ඇඟ දිහා බලලා. ඒ නිසා මිනිහාගේ සාත්තර වරදින්නේම නැති තරම්. මිනිහා අත දිහා බලාගෙන ඉන්නවා වගේ පෙන්නුවාට ඇත්තටම බලන්නේ වෙන වෙන දේවල් දිහා.
ඒ කිව්වේ සාත්තර අහන්න එන මනුස්සයා ඇඳගෙන ඉන්න විදිහ, කථා කරන විදිහ, ගිලගන්න හදන වචන, ඒ අය බලන විදිහ, ඒ අයගේ අතේ තියෙන බඩු මල්ල වගේ දේවල් දිහා. මිනිහෙක්ගේ ඇඟ දිහායි, ඉරියව් දිහායි බලපු ගමන් මේ සාත්තර කාරයාට ආය අත බලන්න ඕනත් නැහැ. හැබැයි පොතේ හැටියට සාත්තර කියන අපි දන්න සාදු කෙනෙකුත් ඉන්නවා. සිවුර නිසා එයාට එන සෙනඟ වැඩියි. ආදායමත් වැඩියි. හැබැයි එයාගේ පලාපල වගේ නෙමෙයි ඇඟ බලා සාත්තර කියන කෙනාගේ සාත්තර හරියට කිරි ගහට ඇන්නා වගේ.
ඒත් ඉතිං මට හිතෙන්නේ ළඟදීම දවසක දැන් ඔය ඉන්න සාත්තරකාරයෝ ඔක්කෝගෙම ජොබ් වලට තට්ටු වෙන්ට පුළුවන්. මොකද ඒ හැමෝටම වඩා ටක්කෙටම සාත්තර කියන්න පුළුවන් ක්‍රමවේදයක් හැදෙන නිසා. කොටින්ම ඒ ක්‍රමයට අනුව අද රෑට ඔබ කන්නේ මොනවද, කරන්නේ මොනවද කියලා වුනත් හරියටම අනාවැකි කියන්න පුළුවන් වෙන නිසා.
ඇත්තටම සාත්තර කීම කියන්නේ මහා ලොකු සාත්තරයකුත් නෙමෙයි. එතන තියෙන්නේ පොඩි ඩේටා ඇනලයිසින් පාරක් විතරයි. පාරම්පරිකව නම් ඔය ඩේටා ඇනලයිස් කලේ අල්ලේ රේඛා දිහා හරි, ඉපදිච්ච වෙලාවේ ග්‍රහචාරේ වගේ දේවල් දිහා හරි බලලා. ඒවා ෆයින් ටියුන් කරන ක්‍රමත් තිබ්බා. ඒ කිව්වේ අංග සාස්ත්‍රය, අංක සාස්ත්‍රය වගේ දේවල්. ඒ අවශේෂ සාස්ත්‍රත් ප්‍රගුණ කරපු අයගේ අනාවැකි වලින් හැර අනික් අයගේ අනාවැකි වලින් 100% ක් ප්‍රතිපල බලාපොරොත්තු වෙන්න අමාරුයි. ඒත් දැන් එහෙම නෙමෙයි. ඕනෑම කෙනෙක්ගේ ඩේටා ඇනලයිස් කරන්න තප්පරයක්වත් යන්නේ නැති තරම්.
ඒක වෙන්නේ මෙහෙම.
දැන් අපි ගැන හොඳින්ම දන්නේ කවුද ? අද අපි ගැන අපිටත් වඩා හොඳටම දන්න අය ඉන්න බව ඔබ දන්නවාද ? ඒ අයගෙන් දෙන්නෙක් උඩින්ම ඉන්නවා.
ඉන් එක්කෙනෙක් තමයි ගූගල්. අනික් කෙනා තමයි ෆේස් බුක්.
සාමාන්‍යයෙන් බොහෝමයක් අයට මූණු දෙකක් තියනවා. එකක් එළියට පේන මූණ. අනික ඇතුළට පේන මූණ. හරියටම සාත්තර කියන්න නම් අර එළියට නොපෙනෙන මූණ බලන්න හැකියාවක් සාත්තරකාරයාට තියෙන්න ඕන. කාටවත් වඩා හොඳටම ඔය වැඩේ අද ගූගුල්ටයි, ෆේස්බුක් එකටයි කරන්න පුළුවන්.
හොඳම උදාහරණයකින් මේ කථාව අදට නවත්තන්නම්.
මේ ළඟදී මගේ අතිජාත මිත්‍රයෙක්ගේ කොම්පියුටරේ ලෙඩ දෙන්න ගත්තා. බැලුවාම ඒකට වෛරස් ගිහින්. බැරිම තැන යාළුවා එයාගේ අවුරුදු දාහතරේ පුතාට කොම්පියුටරේ දීලා “පුතේ… මේ කොම්පියුටරේ වැඩ කරන්නේ නැහැ… ටිකක් බලලා දෙන්න” කියලා කිව්වා.
ඉතිං යාළුවාගේ පුතා කොම්පියුටරේ ආපහු යථා තත්ත්වෙට අරගෙන තාත්තට ගෙනත් දුන්නා.
පුතා රෙපෑර් කරපු කම්පියුටරේ අතට අරගත්ත යාළුවා “මොකක්ද පුතේ කොම්පුයුටරේට වෙලා තිබ්බේ?” කියලා අහලා.
උත්තරෙත් එක්ක වෙලාවේ කොල්ලා තාත්තට ලයිෆ් ලෙසන් එකකුත් දීලා.
“තාත්තේ ඔය නරක සයිට් වලට වැඩිය යන්න එපා…!”
———————————————————
උපුටා ගැනීම: සාමන්ත තැන්නගේ – Saamantha Tennege | 2021 පෙබරවාරි 07