ඇසූ දුටු දේ ….කතා කරල විසද ගැනීම (වැල් වටාරම්)

“නන්ගි මට ඔයා එක්ක පොඩ්ඩක් කතා කරන්න පුළුවන් ද “

ඇය ඉතාමත් විනීතව සංවරව ඇහුවා .

“ඔව් කියන්න “

“නන්ගි ඔයා මොකුත් හිතන්න එපා .මට මේක කෙළින්ම අහන්න ඕන වුනා .සමහර විට වැරදි වැටහීමක් වෙන්නත් පුළුවන් .කතා කරලම විසදගන්නයි හිතුවෙ ” නැවතත් ඇය කිව්වෙ බොහොම සංසුන්ව .

“අනේ කමක් නෑ අක්කෙ කියන්න ” මමත් කිව්වෙ කාන්තාවන් දෙදෙනෙකුට එහෙම කතා කරල විසදගන්න පුළුවන් දේවලුත් ලෝකෙ තියෙන බව දන්න නිසා .

“නන්ගි ඔයාගෙ නම මොකක්ද ? මගෙ මහත්තයගෙ ෆෝන් එකෙන් මේ නම්බර් එකට කෝල් එකක් අරන් තිබුන .ඔයා ඒක ආන්සර් කරල නෑ .නමුත් සේව් කරල තියෙන්නෙ අකුරු දෙකක් .ඒ හින්ද මම මේ ගත්තෙ ඔයා කවුද කියල බලන්න ” ඇය කිව්ව.සාමාන්‍යයෙන් මේ වගේ අවස්ථාවක කාන්තාවක් හැසිරෙන්න ඕන නියම විදිය මම ඇයගෙන් දැක්ක .ඇය මාව කවුද මොනවද කරන්නෙ කියලවත් දන්නෙ නෑ .

“ආ අක්කෙ මම මෙහෙම කෙනෙක් .සමහර විට ඒ වගේ වැඩකට ගන්න ඇති .මොකද මගෙ නම්බර් එක ගොඩක් අය අතේ තියෙනව ” කියල මම කිව්ව .

“නෑ නෑ නන්ගි අපේ එක්කෙනා ජ්‍යොතිෂය වගේ දේවල් පස්සෙ යන කෙනෙක් නෙමේ .ඒකනම් කොහොමවත් වෙන්න බෑ ” මම දැන ගත්ත ඇයගෙ හිත තුල සැකයක් ඇති බව .එය සාමාන්‍යයි .බිරිදකට මෙවන් අවස්ථාවක එය දැඩි වේදනාවක් බව මම දන්නවා .ඒ නිසාම ඇගේ සැකය දුරු කරන්න ඕන කියල මම හිතුව .

“අක්කෙ ඔයා ඔහොමම ලයින් එකේ ඉන්න මට මහත්තයගෙ නම්බර් එක කියන්න .මම අහන්නම් කෝල් එකක් ගත්තද ?කොහෙන්ද නම්බර් එක ගත්තෙ කියල .ඔයාට එතකොට දැන ගන්න පුළුවන් වෙයි .මොකද ඔයා ලයින් එකේ ඉද්දිම මම වෙන ෆෝන් එකකින් ගන්නම් ” ඇය ඉතා කැමැත්තෙන් එයට එකග වුනා .මම ඇයට ඇහෙන විදියට ස්පීකර් ඔන් කරල මහත්තයා ගෙ ෆෝන් එකින් ගත්ත .

“හෙලෝ මේ නම්බර් එකෙන් මගෙ අහවල් නම්බර් එකට මිස් කෝල් එකක් තිබුන .කවුද මේ “කියල මාත් බොහොම පැහැදිලිව ඇහුව .

“මට එහෙම මතක නෑනෙ ආයෙ කියන්න බලන්න නම්බර් එක “

කියල අහල ඒ පුද්ගලයත් ඔහුගෙ දුරකථනයෙන් ඒක හෙව්ව .

“මේකෙ මම අකුරු දෙකක් ගහල තියෙන්නෙ දැන් මට අමතකයි ඒ මොකක්ද කියල .”

“මොනවද ඒ අකුරු දෙක “

“K j කියල තියෙන්නෙ ” ඒක මටත් ප්‍රශ්නයක් නිසා මම ඔහුට මාව හදුන්ව දුන්න .එයාගෙ නෝන එහා ලයින් එකේ අහන් ඉන්නෙ .

ආ මිස් මට දැන් මතක් වුනේ ඔබ තුමියගෙ ලිපියක් පත්තරේක තිබුන . පොරොන්දම් ගැන .ඔබ තුමිය ලියල තිබුනෙ විවාහයට පොරොන්දම් විතරක් ගලපලා මදි කියල .මාත් ඕව පිලිගන්නෙ නෑ .මොකද මගෙ නෝනයි මායි බැන්දෙ ඕව බලල නෙමේ .ඒත් අපි හොදින් ඉන්නවා ඒක නිසා මට ඔබ තුමියට කතා කරන්න ඕන කියල නම්බර් එක දා ගත්තෙ .හරි හරි මන් කෝල් එකක් ගත්ත තමයි ආන්සර් කරේ නෑ .මම පස්සෙ නෝනත් එක්කම ගන්න කියල හිතන් ආයෙ ගත්තෙ නැත්තෙ .මගෙ නෝනටත් කතා කරන්න ඕන කිව්ව .මන් ඒක ගෙදර ගිහින් කිව්වම .එයයි මායි දෙන්නම ගන්නම්කො මිස් වෙලාවක ” එයා ෆෝන් එක තිබ්බ .

එහා ලයින් එකෙන් මම ඇහුව .

“අක්කෙ එහෙම දෙයක් වුනාද ? “

“අනේ ඔව් නෙ නන්ගි .අපේ මහත්තයාට ඕව පේන්න බෑ .ඒ නිසා එයා කිව්ව තමයි මෙහෙම ලිපියක් දැක්ක පත්තරේක වෙලාවක කතා කරමු කියල ඒක තමයි ඔයා කාංචනා නිසා k දාන්න ඇති ජ්‍යොතිෂ කියන එකට j දාන්න ඇත්තෙ ” කියල හරි සතුටින් කිව්ව .එදා මම ඒක ඒ විදියට විසදුවෙ නැත්නම් සැකයෙ බීජය තව තවත් හිතේ පැළවෙයි.ඇය ඒ විදියට සංසුන්ව කතා නොකලනම් කලබල වෙලා මට බැන්න නම් මමත් බැනල ෆෝන් එක තියයි .නොදන්නා දෙන්නෙක් නිකරුනේ විරසක වෙයි .එතුමට ඒ සිද්ධිය අමතක වුනානම් පවුලක දෙදරා යාම එතනින් ඇරඹේවි .මටත් නිකරුනේ කතන්දරයක් හැදේවි .ඒ වගේම අකුරු දෙක බොහෝ දුර යාවි .නමුත් අද වෙද්දි ඒ අක්කයි මායි හොද යාළුවෝ .ඒ අයියටත් මම එදාම කිව්ව ෆෝන් එකේ නමක් සේව් කරගද්දි ඒක පැහැදිලිව ලියන්න .කෙටියෙන් නැතුව ඒක දිගටම ලිව්වනම් ඔය ගැටළුව ඇති නොවෙන්නත් තිබුන .හිතන්න මේ පුන්චි කතාවෙම හිතන්න පැති හතරක් තියෙනවා නේද ? සැකය හිතේ තියන් හිටියොත් හැමදාම ප්‍රශ්නයක් .