අවුරුද්දට කී රොටි (වැල් වටාරම්)

මගෙ ඔලුවට එක පාරටම ආවෙ කිරි රොටි.

“අර තෝසේ වගේ?” මම ඇහුවා.

“නෑ…. නෑ….. මම කියන්නෙ කිරි රොටි නෙමේ. මම කියන්නේ කී රොටි.” හාමුදුරුවො කීවා.

යාන්තම් අහලා තියනවා වගේ….ඒත් හරි මතකයක් නෑ.

“මට මතකයක් නම් නෑ.”මම කීවා.

“හැබැයි මම මගෙ ඊලඟ දානෙට මම කී රොටි හදනවා. “

එදා දවසම මම අන්තර්ජාලය පුරා සක්මන් කලා. ම්හු! කොහේවත් නෑ කී රොටි…..

ඔව්! ඔව්! දැන් නම් අන්තර්ජාලයෙන් ඕනෑම කැවිලි වර්ගයක් හදන්න ඉගනගන්න පුලුවන් කම තියනවා. දක්‍ෂ නෝනාවරු වගේම මහත්වරුත් බොහෝම පැහැදිලිව පියවරෙන් පියවරට අපේ සම්ප්‍රාදායික ආහාර හදන හැටි කියා දෙනවා. ඒ ගැන මට බොහෝම සතුටුයි. ඒත් මට කී රොටි හදන්න ඉගනගන්න ඕනෑවුන දවස්වල කී රොටි ගැන කිසිම විස්තරයක් අන්තර්ජාලයෙන් හොයාගන්න බැරිවුණා.

එහෙම කියලා කී රොටි නොහදා කොහොමද? මම දන්න කියන හැමෝටම කතා කර කර කී රොටි ගැන විස්තර ඇහුවා.

සමහර අය කී රොටි කාලා තිබුණා, නමුත් හදනහැටි දැනගෙන හිටියේ නෑ.ඒත් ඒ අයත් වැඩේට බැස්සා.ගමේ නැන්දලාට පුංචි අම්මලාට කතා කර කර ඒ අයත් කී රොටි හදන විදිහ ගැන විස්තර හෙවුවා.

ලංකාවේ සංස්කෘතිය අලුත් පරම්පරාවට ගෙනියන්න අපට බෙහෙවින් උදව් වන අපේ හාමුදුරුවරු පවා මේ වැඩේදි මට බෙහෙවින් උදව් වුණා.

මම මේ විදිහට කී රොටි ගැන බොහෝම විස්තර හොයා ගත්තා.

ඇත්තම කීවොත් මේ කී රොටි පලාතෙන් පලාතට වෙනස්!

ඒ කොහොමද?

රොටිය කොයි පලාතෙත් හදන්නෙ එකම ක්‍රමයට​. හිතන්න ආප්ප වාටිය නැතුව හැදුවොත්!

ඔව්! වාටිය නැතුව හදන ආප්ප තමා කී රොටි හදන්න අරගන්නේ.

සමහර පලාත්වල වාටිය නැති මේ ආප්ප වලට කියන්නේ ගෙඩි ආප්ප කියලා.ඔව්! ගෙඩි ආප්ප කොහෙත් එකයි!

කී රොටි පලාතෙන් පලාතට වෙනස් වෙන්නෙ ඒකට හදන හොද්ද හින් දා.

ඒකට කියන්නේ කිරිපැණි ‍හොද්ද!

සුදු ළූණු, ගම්මිරිස්, කරාබු, එනසල් යාන්තමට කබල් ගාල ගලේ අඹරල ඒකට ලුණු, කිතුල් පැණි, පොල් කිරි එකතු කරල, ගෙඩි ආප්ප මිශ්‍රනෙන් මේස හැන්දකුත් එක් කරලා උයලා ගන්න කිරි පැණි ‍හොද්ද කදිමයි!

ඒත් සමහර පලාත් වල මේ කලමනා කබලේ බදින්නේ නැතිවම අඹරලා ගන්නවා.

තවත් සමහර පලාත් වල මේ කලමනා වලට අමතරව ඉඟුරුත් අඹරලා එකතු කරනවා.

සමහරු ලුණු, කිතුල් පැණි, පොල් කිරි හා ගෙඩි ආප්ප මිශ්‍රනෙන් මේස හැන්ද එක් කරලා උයලා ගන්න කිරි පැණි ‍හොද්දට එක් කරන්නේ ගම්මිරිස්, කරාබු හා ඉඟුරු පමණයි!

සමහරු සුදු ළූණු දාන්නේම නෑ.

සමහරු මිශ්‍රණයට බැදපු සූදුරුත් එකතු කරනවා.

ඒ වගේම සමහරු ගෙඩි ආප්ප මිශ්‍රනෙන් මේස හැන්දක් නොදා බැදපු හාල් පිටි මේස හැන්දක් එකතු කරනවා.

මේ කොයි ක්‍රමයත් රසයි!

කොහොමද දන්නේ?

මම කිරි පැණි ‍හොද්ද මේ හැම විදිහටම හදලා බැලුවා.

දැන් කොහොමද මේක කී රොටි කරන්නේ?

ගෙඩි ආප්ප හදලා උණුවෙන්ම මේ කිරි පැණි ‍හොද්දට දාන්න ඕනේ.එතකොට අර කිරි පැණි හොද්ද ගෙඩි ආප්පෙට උරාගෙන මූදු හත්තක් වගේ මෙළෙක් වෙනවා. පැණි බේරෙන කී රොටි!

මේ ඔක්කෝටම වඩා වෙනස් කිරි පැණි හොද්දක් ගැනත් මට දැනගන්න ලැබුණා. ඒ කිරි පැණි හොද්ද උයන්නේ නෑ. මුදවපු කිරි හා පැණි එක්කොට ගෙඩි ආප්ප ඒකට දානවා!ඒකත් වෙනසක්!

කී රොටිවලට ගෙඩි ආප්ප හදන්න වෙනම තැටියක් තියනවා. නමුත් සාමාන්‍ය තාච්චියෙත් හදාගන්න පුලුවන්.

අද බොහෝ දෙනා පැණි රස කන්න කැමති වුණත් පැණි රස කන්නේ බොහෝම අඩුවෙන්. ඒ නිසා මම කී රොටි තැටියක් තිබිලත් කී රොටි හදනවිට පනියාරම් තැටියට සමාන තැටියක් භාවිතා කරනවා. ඒකෙන් මට ගෙඩි ආප්ප කීපයක් එකවර හදාගන්න පුලුවන්.

මගේ යෙහෙලියක් කීව විදිහට ඇගේ ගම් පලාතේ කී රොටි හදන්නේ අවුරුද්දේ හිසතෙල් ගාන දවසටලු!

ඒකට හේතුවකුත් තියනවා!

දවස් ගාණක් තිස්සේ කැවුම්, කොකිස්, අතිරස වැනි තෙල් කෑම කාලා ඉන්න උදවියට සුදු ළූණු, ගම්මිරිස්, කරාබු, එනසල්,බැදපු සූදුරු,ඉඟුරු දාලා හදන මේ කිරි පැණි හොද්ද නිසා බඩේ අජීරණ එහෙම හැදෙන්නේ නැතිලු.

ඔව්! එහෙම වෙන්න පුලුවන්!

එරබොදු මල් මොට්ටු මොට්ටු….

අවුරුද්දත් කිට්ටු කිට්ටු…..

තව සති කීපයකින් එලඹෙන අලුත් අවුරුද්ද ඔබ සැමට සෞභාග්‍යමත් අවුරුද්දක්ම වේවා!