අයියගෙ උපන් දිනය වෙනුවෙන් තමා මේ කතාව දාන්නේ…
කවදද නංගිව ගේන්නේ?
ගොඩක් කල් යයිද?
නංගියෙක්ව ගේනව කිව්ව දවසෙ ඉදන් එයා එහෙමලු ගේනකන්ම කනක් ඇහෙන්න නෑලු
අම්මේ නංගි ඇහැරලෝ
නංගිගෙ මදුරුවෙක් කනෝ
අම්මෙ නංගි චූ දාලා
නංගිව ගෙනාවට පස්සෙ එයාට වෙන වැඩක් තිබුනෙ නැති තරම්ලු එයා හරි ආස උනාලු නංගියෙක් ඉන්න ලොකු අයියා කෙනෙක් කියනවට
ඒත් අවුරුදු 3යි ඒ ලොකු අයියට
මට පුලුවන් නංගිව බලාගන්න
මම වඩාගන්නම් එයාව
නංගි චුට්ට චුට්ට ලොකු වෙනකොට එයාට ඕනෙ උනා එයා දන්න හැමදේම නංගිටත් ඉක්මනටම කියල දෙන්න
නංගි දන්නවද කාන්දමක් කියන්නෙ මොකක්ද කියල
නෑ
කලු පාට පොඩි කැල්ලක් වගේ එකක්.ඒක නට්‍රාජ් කවකටු පෙට්ටියකට ලං කලාම එකට ඇලෙනව
මට ඒකක් බලන්න ඕනේ
හරි මම හෙට ඉස්කෝලෙන් අරන් එන්නම්
කිව්ව වගේම අරගෙන ආව හැබැයි නංගි ඒක ආයෙ යවන්න නම් කැමති උනේ නෑ
ආයෙත් දවසක
නංගි දන්නවද සූර්‍යග්‍රහනයක් කියන්නෙ මොකක්ද කියල
නෑමොකක්ද ඒ
මාත් හරියට දන් නෑ හැබැයි ඒක වෙනකොට ඔක්කොම කලුවර වෙනවලු
හෑ දවල්ටත්
දවල් වෙලාවක එකපාරටම කලුවර වෙනව කිව්වම මට ඒක හිතාගන්නවත් බැරි උනා
ඒත් එදා ඉදන් අපේ හැමසෙල්ලමකට සූර්‍යග්‍රහනය කියන දේ ගාවගන්න මට ඕනෙ උනා
තවත් ටික ටික ලොකුවෙනකොට නංගි නම් කුකුල් කේන්තිකාරියක් වෙන්න පටන් ගත්තා අවුස්සගන්න හරි ලේසි
එහෙමත් දවසක ගෙදරට ආපු කෙනෙක්
අයියා නම් බෝලෙ වගේ මොකද මෙ නංගිට අම්මල කන්න දෙන් නැද්ද ඇඟේ කටු ටික විතරයි
නංගි නිදන් ඉන්නවෙලාවට අම්මල මට රස රස කෑම ගෙනත් දෙනව ඒවා මෙයාට කන්න නෑනෙ ඒකයි ඔය කෙට්ටු වෙන්නෙ
ඔන්න ඉතින් නංගිගේ මූන දෙක වෙනව
බලන්න අපේ පවුලෙන්ම ඔයා විතරයි සුදු ඒ කියන්නෙ ඔයා හදාගන්න ගත්ත කෙනෙක්
නංගිව කේන්ති ගස්සන එක අයියට නම් මාර ආතල් එකක් උනා ඉතින් ගෙදර දෙන්නගෙ වලියක් නැති දවසක් නෑ
තව ටිකක් ලොකු වෙද්දි නංගිව අවුස්සන්න ලේසි විදිහක් එයාට අහුවුනා නංගි ගුටියක් කන වෙලාවට බොරුවට නංගිට පේන්න හිනා වෙනවා
අම්මො ඉතින් එක යුද්ධයයි
හැබැයි අයියා ගුටි කන දවසට නංගි නම් කවදාවත් හිනා
උන් නෑ
මොකද අයියත් ගුටි කන දවසක් එනව කියන්නෙ නංගි අනිවාරෙන්ම එදාට ගුටි කනව
තවත් ටිකක් ලොකු වෙනකොට ශිෂ්‍යත්වේ පාස් උන එකට ඔන්න ගෙදරට කම්පියුටර් එකක් ගෙනාව
අයියාගෙ වැඩේ ඉතින් කම්පියුටර් එකට ගේම් දාන එක
අයි.ජී.අයි.කියල ගේම් එකක් දැම්ම ගහමුද
හාපො මම බයයි ඔය වෙඩි තියෙන ඒවට
මාත් එක්කනෙ ගහන්නෙ ගහමු ගහමු
අන්තිමෙ දෙන්නම එකතුවෙලා අයි.ජී.අයි මිෂන් 14 ගැහුවා
ඊටපස්සෙ හම්බුනේ වයිස් සිටි කියල එකක් ඒකටනම් ඇත්තටම ආස හිතුනා
ඒත් අයියට ඕනෙ උනේ කාර් එකක නැගල මිනිස්සු හප්පන්නෙ නැතිව විනීත රියදුරෙක් වගේ නගරෙ පුරාම යන්න
ඒත් නංගිට ඕනෙ උනේ කාර් එකක නැගල යන ගමන් හම්බෙන හැම දේකම කාර් එක හප්පල අන්තිමට කාර් එක ගිනිගන්නකොට පුපුරන්න කලින් එලියට පනින්න ඒකතමා ආතල් එක නැත්තන් පොලිස් තරු අවුස්සල පොලිසිය පන්නද්දි පන කඩාගෙන දුවන්න
ටික දවසකින් නංගි ශිෂ්‍යත්වට හොද ලකුනක් ගත්ත හින්දා දුර ඉස්කෝලෙකට දාන්න තීරනය උනා
හොස්ටල් ඉන්නත් සිද්ද උනා
ටීවි නැති කම්පියුටර් නැති හොස්ටල් එකකට යන්න වෙනවා කිව්වම ඒ කාලෙ ඒක ටිකක් ලොකු බරක්
අයියට දැන් තනියම තමා ගේම් ගහන්න වෙන්නෙ මම නැතුව
ඉතින් හොදයිනෙ ඕයි මම මුලු දවසම ගේම් ගහනවා ඉන්නවකෝ
ආයෙත් කේන්ති ඉතින්
ඒත් අම්මල කිව්වෙ මම හොස්ටල් එකට ගියාට පස්සෙ එයා කම්පියුටර් එක පැත්තෙවත් ගියෙ නෑලු
එයාට ඔයා නැතුව පාලුවෙන් ඉන්නෙ
පුදුමත් හිතුනා මට
ඒත් අයියා කම්පියුටර් එකෙන් ටික ටික ඈත් වෙන එකත් හොදයි දැන් එයා පාඩම් එහෙම කරන්න ඕනෙනෙ
හැබැයි වීකෙන්ඩ් එකට ආයෙත් පුරුදු විදිහටම දෙන්න සෙල්ලම් කලා ගෙම් ගැහුවා ජොලියේ හිටියා
දැන් අයියා අපිව දාල ගිහිල්ලා අවුරුදු 7 කට කිට්ටුයි
ඒක හදිසියේ උන දෙයක්
එයා හිටියනම් මේ වෙනකොට අවුරුදු 24ක්
ඒත් ඉස්සර කාලෙ රන්ඩු වෙවි යාලුවෙවි හිටපු හැටි මතක් වෙනකොට තාමත් මගේ කට කොනට හිනාවක් එනව එයා නැති පාලුවත් හිතේ මුල්ලක තියෙනව
තාමත් වෙලාවකට කනට ඇහෙනව ඇහෙනව වගේ
මෙහ් නංගි
මොකෝ
අම්මගෙන් අහන්නකො ගේම් ගහන්නද කියල
මට බෑ
අප්පෝ ඔයා වැඩිය ගෙදර නැති හින්දා ඔයා ඇහුවොත් හා කියනව අහනවකො
හා හා ඉන්නව අහල එනකන්
උපුටා ගැනීම: Dulanji Mallikarachchi