බලලා ඩිලීට් කරන්න අයියේ කියලා එව්වම බලලා ඩිලිට් කරන්න. (වැල් වටාරම්)

අන්න ඒක නිසා දෙන්නෙක් ආදරේ කරනකොට එයාලා දෙන්නා අතරේ “බලලා ඩිලීට් කරන්න අයියේ” වර්ගයෙ ෆොටෝ සහ වීඩියො ශෙයාර් වෙන එක හරිම සාමාන්‍යයි. අනිවාර්ය නෑ – සාමාන්‍යයි. දෙන්නගේ කැමැත්ත අනුව ඒවා වෙනවා. කැමති නැත්නම් “බදිනකන් ඒවා දෙන්න බෑ අයියේ” හරි “දැම්ම ඒවා බෑ මැට්ටෝ” කියලා හරි කියනවා. එතකොට ඔය සමහර අය ඉන්නවනෙ එයාල ඩිස්ටි ඩිඩින් කරන ඒවා වීඩියෝ කරලා පස්සේ බලන්න ආස අය. මේකට අපි කියනවා ඒක එක්තරා ආකාරයක self-eroticism එකක් කියලා. ඒ කියන්නේ අපි ලිංගිකව හැසිරෙන විදිය අපිම වීඩියෝ කරලා බලන එකත් එක්තරා ආකාරයක ලිංගික උද්දිපනයක්. අනික බලන්න අපි හරි ආසයිනේ අපේ ෆෝන් එකෙන් දේවල් ෆොටෝ ගහලා වීඩියෝ කරලා තියාගන්න. ඒ දේවල් අපිට පස්සේ ආපහු බලන්න ආස හිතෙන මතකයක්නේ. ආන්න ඒකම තමයි කෙනෙක්ට තමන්ගේ නිරුවත ෆොටෝ ගහන්න වීඩියෝ කරන්න හිතෙන හේතුව. ඉතින් එකත් සාමාන්‍යයි.

පුද්ගලික අවකාශවල සහ පොදු සමාජය අතරෙ වෙනස තේරුම් ගන්න.

තමන් ආදරේ කරන කොල්ලා ආසයි කියපු නිසා සහ තමන්ටත් ආස නිසා ඒ කොල්ලගේ වට්ස්ඇප් එකට තමන්ගේ නිරුවත් ෆොටෝ එකක් යවන කෙල්ලකේ ගැන හිතන්න. එයා තමන් අතිශයින්ම විශ්වාස කරන කොල්ලෙක්ට ඒක යැව්වා එතනින් ඉවරයි. එහෙම යවපු ඒ ගෑල්ලමයම ඊලග දවසේ ෆේස්බුක් එකේ Profile picture එක විදියට ෆොටෝ එකක් දාන්න ගියාම මේ බ්ලවුස් එකේ කර කැපිලා වැඩිද, පපුව ඕනවට වඩා ඉස්සිලා පේනවද, සාය කොට වැඩිද ආදී වශයෙන් සිය දහස් වාරයක් කල්පනා කරනවා වෙන්න පුලුවන්. ඒකේ තේරුම ඒ කෙල්ල වට්ස්ඇප් එකේ මගුල් නටලා ලෝකෙට පත්තිනි අම්මා වෙනවා කියන එක ද? ඔව්. පැහැදිලිවම ඒක තමා තේරුම.

හොඳ වචන වලින් කියනවනම් ඒ කියන්නෙ පුද්ගලික ජීවිතේදී කාටවත් කරදර නොකර තමන්ට අභිමත විදියට හැසිරෙන්නත් ඒ ඉවර වෙලා සමාජයට ආවාම සමාජයේ ඉන්න ඕන විදියට එතන ඉන්නත් හැමෝටම අයිතිය තියෙනවා. වට්ස්ඇප් පර්සනල් චැට් එකක් කියන්නේ පුද්ගලික දෙයක්. ඒක පාවිච්චි කරන කාන්තාවකට ඒකේ තමන් කැමති දෙයක් කරගන්න පුලුවන්. ඉතින් ලිංගිකත්වය විදින්නත් සමහරු ඒක භාවිත කරනවා. ඒ කරලා එතනින් එලියට ඇවිල්ලා සාමාන්‍ය කාන්තාවක් වගේ ගෞරවාන්විතව ඉන්නත් එයාට පුලුවන්. වට්ස්ඇප් එකේ කොල්ලට ෆොටෝ එකක් යවපු ගෑල්ලමයෙක් පොදු අවකාශයක් වෙච්චි ෆේස්බුක් හෝ බාහිර සමාජය ඉස්සරහට ඇවිත් එතනත් හැසිරෙන්න ඕන වට්ස්ඇප් එකේ හැසිරුන විදියටමද? නැහැනේ. ඒක හරියට කාමරයක් ඇතුලෙ පිරිමියෙක් ඉස්සරහා නිරුවත් වෙන ගැහැණියක් එළියට බහිද්දි පිළිවෙලට ඇදලා කරලා යනවා වගේම සාමාන්‍ය දෙයක්. ඒ ගැහැණිය කාමරේ ඇතුලෙදි හෝ වට්ස්ඇප් එකේදි කරපු දේ අයිති වෙන්නේ පොදු සමාජයට නෙවෙයි ඒ ගැහැණියගේ පුද්ගලික අවකාශයට.

බලලා ඩිලීට් කරන්න අයියේ කියන එක හරියට තේරුම් ගන්න.

“බලලා ඩිලීට් කරන්න අයියේ” කියන වචන ටික ඇතුලේ තියෙනවා ලොකු බරපතල තේරුමක්. ඒකට අපි කියනවා ‘කැමැත්ත’ එහෙම නැත්නම් ‘අභිමතය’ කියලා – සිංහලෙන් නම් Consent. Consent එක කියන්නේ යම් පුද්ගලයෙක් යම් කිසි දෙයකට ස්වේච්ඡාවෙන් (කැමැත්තෙන්) එකගවීම. මේ කැමැත්ත කියන එක නියතයක් නෙවෙයි. ඒ කියන්නේ ඒක ඕනෑම මොහොතක වෙනස් වෙනවා හොදේ.

ඔන්න හිතන්න වැඩිය තේ බොන්න කැමති නැති මහත්තයෙක් ඉන්නවා. සිකුරාදා දවසක හවසක එයාගේ නෝනා අහනවා “බබා ඔයාට තේ එකක් හදලා දුන්නොත් බොනවද කියලා?” එතකොට මහත්තයටත් වෙනදා නොබිව්වට ඒ වෙලාවේ තේ එකක් බොන්න කැමති හිතිලා කියනවා “එලම සුදාම්මි අපි බොමු” කියලා. ඔන්න දැන් එයා තේ එකක් බොන්න කැමැත්ත පළකරලා ඉවරයි. සුදාම්මිට දැන් තේ එකක් හදලා දෙන්න පුලුවන්. එහෙම නැතිව නෝනම හිතලා තේ එකක් හදලා ලඟට ගෙනත් බීපන් මිනිහෝ කිව්වොත් එතකොට ඒක ‘බලහත්කාරය’ බවට පත් වෙනවා. දැන් ඒ මහත්තයා ගිය සිකුරාදා නෝනා හදන තේ එකක් බොන්න කැමති උන පළියට ඒකෙන් අදහස් වෙන්නේ නෑ හැම තිස්සේම තේ බිබී ඉන්න එයා කැමතියි කියලා. එදා ඒ දීපු කැමැත්ත එදා දවසේ තත්ත්වය හැටියට දිපු කැමැත්තක්. කැමැත්ත කියන්නේ මොකද්ද? නියතයක් නෙවෙයි. නෝනට අයිතියක් නෑ මහ රෑත් එයා ලගට ගිහින් සිකුරාදත් තේ බිව්වනේ…දැනුත් බොමු කියලා කටට උණු තේ වක්කරන්න. එදා නෝනා හදන තේ බිව්වා කියන එකෙන් අදහස් වෙන්නේ නෑ ගමේ හැම තැනින්ම ඕනම වෙලාවක තේ බොන්න මහත්තයා කැමැත්තෙන් ඉන්නවා කියලා.

ඔන්න ඔය කැමැත්ත කියන එක ලිංගික සම්බන්ධතාවලට ආවාම ඒක මාරම බලගතු දෙයක් වෙනවා. කොච්චර බලගතු දෙයක්ද කියනවානම් කැමැත්ත නැති තැන හිරේ විලංගුවේ ගිහින් තමා නතර වෙන්නේ. දැන් බලන්න ලංකාවේ දණ්ඩ නීති සංග්‍රහයේ 363 වගන්තියේ තියෙනවා ස්ත්‍රියකගේ කැමැත්තකින් තොරව එයා එක්ක ලිංගිකව හැසිරුණොත් කුදලාන ගිහින් අඩුම හත් අවුරුද්දකට බරපතල වැඩ එක්ක අච්චු කරනවා කියලා. ඇයි ඒ? ඇයි ඒ කියන්නේ වදේ ඒ කාන්තාවගේ කැමැත්ත නැතිවනේ කරේ. එතකොට ඒක බලහත්කාරය පෑමක්…ස්ත්‍රී දූෂණයක්…අපරාධ වරදක්.

ඔය විදියට ඉතින් “බලලා ඩිලිට් කරන්න අයියේ” කියලා එවන ඒවත් තේරුම් ගමු හා ද? හා….ඒ ජාතියේ ෆොටෝ සහ වීඩියෝ සම්පූර්ණයෙන්ම ඒ ෆොටෝවලට පෙනී ඉන්න සුදාම්මිගේ Consent එක මත පදනම්ව එවන දෙයක්. එවන්න ඕන එයාගේ කැමැත්තෙන්. පිරිමි ළමයි ඔයාල ඒ ජාතියේ ෆොටෝ එකක් ඉල්ලන්න…ඒත් එව්වේ නැත්නම් මම වහ බොනවා මැණික කියලා බල කරන්න එපා.

එක පාරක් එවන්න කැමති උනා කියලා ඉල්ලන හැම පාරම ඒවා එවන්න එයා කැමතිද? නැහැ.

ඔයාට එවන්න කැමති උනාට ගමේ හැමෝටම ඒවා යවන්න එයා කැමතිද?

නැහැ.

ඔයාට එව්ව එක ගමේ කොල්ලයි බල්ලයි සේරම එක්ක ශෙයාර් කරගන්නවට එයා කැමතිද?

නැහැ.

මගේ ෆෝන් එකටනේ එව්වේ ඒ නිසා මම ඒවා මට ඕන තැන්වලට අප්ලෝඩ් කරනවා කියලා කියන්න ඔයාට අයිතියක් තියෙනවද?

නැහැ.

කොටින්ම හරිම කැත විදියට ගෑල්ලමයා ඔයා එක්ක තිබ්බ සම්බන්ධෙ නතර කරලා ගියා කියලා හිතන්න. එතකොට ඒ ෆොටෝ බාහිර සමාජයට දාන්න ඔයාට අයිතියක් තියෙනවද?

නැහැ.

බලලා ඩිලිට් කරන්න කියලා මිසක් බලලා යාලුවොන්ටත් යවන්න අයියේ කියලා කිව්වේ නැහැනේ. හරි සරලයි. ඕක තමා Consent කියන්නේ.

ලොකේ දියුණු රටවල (ඒ කිව්වේ එක එකාගේ මූණු ගල් පොතුවලින් මතු වෙලා කියලා Prime time news වල පෙන්නන ටීවී චැනල් නැති රටවල) පරිපූර්ණ ලිංගික අධ්‍යාපනය කියන එක සකස් වෙන්නෙම ළමයින්ට පොඩි කාලේ ඉදන්ම මෙන්න මේ කැමැත්ත කියන සංකල්පය, එකේ වැදගත්කම සහ සීමාවන් ගැන තේරුම් කරලා දීම මූලික අවශ්‍යතාවයක් කියලා සලකලා. මොකෝ ඒ මූලික සංකල්පය නිවැරදිව තේරුම් ගන්නේ නැතිව හැදෙන ඕනෑම පුද්ගලයෙක් අනිවාර්යයෙන්ම potential sex offender කෙනෙක්. ඒ කියන්නේ ඕනෑම අවස්ථාවක ඕනෑම තැනෙක ලිංගිකත්වය සම්බන්ධයෙන් බලහත්කාරය භාවිත කරන අපරාධකරුවෙක් වෙන්න සම්භාවිතාවයක් තියෙන කෙනෙක්.

ලීක් වෙච්ච එව්වා කියලා ජාතියක් නෑ.

ගෑල්ලමයෙක් තමන්ගේ කොල්ලට යවපු  ෆොටෝ එකක් ලීක් වෙලා කිව්වම ඒකේ තේරුම මොකද්ද? ඒකේ තේරුම නිකන් හිල් වෙච්ච පයිප්පෙකින් වතුර කාන්දු වෙනවා වගේ අනේ කවුරුත් දන්නේම නැතිව ඒවා ඉබේ ඉන්ටර්නෙට් එකට ගලාන ගිහින් කියන එක. ඒ වචනේ ඇතුලෙම තියෙනවා නිකන් ඒක කාගෙවත් වරදක් නෙවෙයි වගේ දෙයක්. එහෙම නැත්නම් එච්චර සෙන්සිටිව් දෙයක්වත් පරිස්සම් කරගන්න බැරි තරම් නොසැලකිල්ල වගේ. ඒත් එහෙම නෙවෙයිනේ වෙන්නේ.

වෙන්නේ කවුරු හරි මේවා අරගෙන වට්ස්ඇප් ගෲප්වලට දානවා. ඉන්ටර්නෙට් එකට අප්ලෝඩ් කරනවා. කරලා කියනවා උන්ට ෆොටෝ ගහන්න හොද නම් අපි බැලුවම මොකෝ කියලා.

ගොඩාක් වෙලාවට මේ දාන්නේ බූට් එකක් කාපු කොල්ලා. උඹට මම කරන්නම් හොද වැඩක් කියලා ෆොටෝ ටික දානවා ගෲප්වලට. නැත්නම් ෆෝන් එක හදන්න දීපු කමියුනිකේෂන් එකේ අයියා කැඩිච්ච ෆෝන් එක හදන වැඩේ කරලා නිකන් ඉන්නේ නැතිව “යකෝ මේ අර අහවලී නේද මේකි පාරේ යන්නෙ නම් සිල් ගත්තා වගේ හිටපිය දෙන්න” කියලා ෆොටෝ ටික වටේ යවනවා.

ඒ නිසා මේ ‘ලීක් වෙනවා’ කියලා කිව්වට ඇත්තටම වෙන්නේ යම් කෙනෙක්ගෙන් පළිගන්න, ඒ කෙනාට අනර්ථයක් කරන්න බලාන, ඒ ඡායාරූප / වීඩියෝවලට අයිතියක් නැති මිනිස්සු විසින් හිතා මතා සැලසුම් සහගතව බාහිර සමාජයට ඒ ඡායාරූප / වීඩියෝ නිදහස්කිරීම. ඒ නිදහස් කරන්නේ ඒවා තවත් කෙනෙක්ගේ ලිංගික තෘප්තියට භාවිත වෙනවා කියලා දැන දැනම එහෙමම වේවා කියලා හිතාන. අදාළ ඡායාරූපවල ඉන්න කෙනා ගැන වෛරයක් ඊර්ෂ්‍යාවක් අනිවාර්යයෙන්ම එතන තියෙනවා.

එනයින් මගේ රත්තරන් යාලුවනේ ලීක් වෙච්ච එව්වා කියලා දෙයක් නෑ. ඒවා නිරුවත් ඡායාරූපත් නෙවෙයි. නිරුවත් ඡායාරූප කියන්නේ Nude photography කියලත් හදුන්වන කලාවක්. මෙතන තියෙන්නේ revenge porn කියලා දෙයක් විතරයි.

උපුටා ගැනීම: – https://m.facebook.com/madhavis.bedroomtalks/