බැන්කොක් අකරතැබ්බ.. (වැල් වටාරම්)

බැන්කොක් ගිය මුල්ම කාළෙ එක දිගටම කෑම කෑවෙ පාරෙන් ” මෝ රයිස් ” බත් පිගානක් කුකුළු මසුත් , බිත්තරයකුත් මෑකරල් හරි බණ්ඩක්ක එක්ක හරි බාත් 25යි නැත්නම් 30 යි. වැඩිපුර බත් ටිකක් ඉල්ලුවොත් තව බාත් 10 විතර එකතු වෙනව.

උදේට හොදට පාරෙන් කෑවම දවසම අල්ලන් ඉන්න පුළුවන්. ඉදහිට බාත් 20 ට තියන නැවුම් අයිස් දොඩම් බෝතලයක් නැත්නම් බාත් 30 තියන නැවුම් අයිස් දෙළුම් බෝතලයක්, බාත් තිහේ අයිස් කුරුම්බයක් බීවහම , බාත් දහයෙ සොසේජස් කරලක්, බාත් විස්සෙ ෆිෂ් බෝම්බයක් අතර මැදට කෑවහම ආපහු කන්න ඕන වෙන්නෙ හවස් ජාමයට.

මුල් කාලයෙ කෑවෙ බීවෙ උනත් බොහොම සකසුරුවමින් තමයි. ඔය වෙලාවට පිහිටට ආවෙ 7-11 නැත්නම් FamilyMart සුපර්මාර්කට් නැත්නම් Big C සුපර් මාර්කට් එක. සමහර වෙලාවට බිග් සී එකේ බාත් 12 ට සොසේජස් ෆ්‍රයිඩ් රයිස් එකක් දෙනව. 2009 දි තායි බාත් එක රුපියල් 3.35 යි. එතකොට මේ රයිස් එක රුපියල් 40 යි වෙන්නෙ. 7-11 එකට ගොඩ උනාම පොඩි සැන්ඩ්විච් එකක් බාත් 12යි. තව පොඩි පොඩි බනිස් වගේ කෑම බාත් 10 -15 ගන්න පුළුවන්. කැපචිනෝ, මයිලෝ, කිරිකෝපි, ලටේ බාත් 12 ඉදන් උණු උණුවෙ හදාගෙන බොන්න පුළුවන්.

අපි කැමති බීම එක හදාගෙන ඒක කැෂියර් කෙල්ලට පෙන්නලා බිළ දාගන්න ඕන. සොසෙජස් එකක් බනිස් ගෙඩියකට දාල ඒක මයික්‍රොවේව් එකෙන් රත් කරගෙන ඒකට තක්කාලි. එළවලු දාල මයෝනිස් සෝස් දාල බාත් 18 වගේ ගන්නත් පුළුවන් . කැමති අය 7-11 එක ඇතුළෙ ඉදන්ම කනව බොනව සමහරු කෑම එළියට අරන් යනව.

එදා මා බැන්කොක් ගියේ රෝහණ සමග නොවේ. මගේ මිතුරකු වන ඉන්දික සමගය. දවසම නගරය පුරාම ඇවිද්ද අපි හවස් ජාමය වෙන විට අධික වෙහෙසට පත්ව සිටීමු. තවත් ඇවිදින්නට නොහැකි යැයි ඉන්දික කීවේ ප්‍රටුනාම නයිට් මාරකැට්ටුවේ මා ඇවිදින්නට සැලසුම් කරමින් සිටින අතරතුරදීය.

අතින් කටින් බඩු මළුද එල්ලාගෙන අප රාචදම්‍රී පාරදිගේ ඉදිරියට එන්නට වීමු.

” මචන් බියර් එකක් වත් බොමු නේද ? “

යෝජනාව ඉන්දිකගෙනි.

” හරි කෑන් දෙකක් තුනක් අරන් කාමරේට යමු “

” චෑන් ද සින්හා ද “

” මොකක් හරි කමක් නෑ..”

අපි දෙදෙනාම 7-11 එකකට ගොඩ වීමු. Tong Garden වර්ගයෙන් කජු, රටකජු, අල පෙති පැකට් කිහිපයක් කූඩයකට දාගමු.

” රෑට මොනාද කන්නේ”

” රෑ පල්ලෙහාට ඇවිත් ඇන්ටිගෙ කඩෙක් රයිස් එකක් දා ගමු “

කූඩයත් අයර් කවුන්ටරයට ගිය විට කැෂියර් තරුණිය සිටියේ මාරු කාසි ගනන් කරමිනි.

කූඩය මේසය මත තැබූ මා

” ත්‍රී සින්හා බියර් “

කියා කට ගන්නට ලැබුණේ තත්පර කිහිපයකි. කැෂියර් කෙල්ල අපට කඩා පැන්නේ අප ඇයගේ පාරිභෝගිකයන් යන්න තඹයකටුදු මායිම් නොකරමිනි.

” ටුඩෙයි ස්පෙෂල් බුද්ධා හොලිඩේ “

අසරණ වූ අප චෑන් වෙනුවට දොඩම් යුෂ පැකට් දෙකකුත් ගෙන අසරණව හෝටලය දෙසට යන්නට වීමු.අපි තායිලන්තයට පැමිණ තිබුණේ විශේෂ නිවාඩු දිනයකදීය.

 උපුටා ගැනීම:       සන්ජය දොළමුල්ල