ජීවිතයේ අමරණීය මොහොතක් එන්නෙ හූ කියාගෙන නෙමේ. මේ හිටි හැටියෙ දඩාස්ස් ගාල දොර පොල්ලෙන් ගැහුව වගේ තමා යහපත් සුවච කීකරු නිර්මල අති උතුම් සැදැහැවත් නිකැලැල් අති රමණීය සුන්දර මනස්කාන්ත ගුණ ගරුක වචනෙකින් වත් වැරදි නොකරන හොඳම හොඳ පෙරාපු රත්තරන් වගේ ඉන්න යහපත් ආදර්ශමත් ස්වාමිපුරුෂයන්ට උදා වෙන්නෙ
මොකද මං එහෙම කියන්නෙ යහපත් ස්වාමිපුරුෂයන් වෙච්ච අපිට ඔය අපේ බිරින්දෑවරු බනින්නෙ දොස් කියන්නෙ තරහට නෙමේ ආදරේට
දැන් අපි විමසා බලමු බනින්න දොස් කියන්න හේතු මොනවද කියල
කිසිම හේතුවක් නෑ.
අනිවාර්යයෙන්ම හේතු ඕන් නෑ බිරිඳකට තම ස්වාමිපුරුෂයාට බනින්න. එකම හේතුව ස්වාමිපුරුෂයන් වෙච්ච අපේ අහේතුව. ඉතිං බිරිඳක් ඔහොම බැනගෙන බැනගෙන යනව නම් ඔබ කලබල වෙන්න හොඳ නෑ. මං උදාහරණයක් දෙන්නම් මේක උදාහරණයක් විතරමයි ඔන්න…
ඔබ දැක ඇති අංගොඩ පිස්සන් කොටුවෙ පිස්සො කලබල උනාට ඩොක්ටර් කවදාවත් කලබල වෙන් නෑ.. ආන් ඒ වගේ ඔබ නිතරම කල්පනා කරන්න ඔව් මං ඩොක්ටර් කෙනෙක් මං කලබල විය යුතු නෑ. ඇයි මං කලබල වෙන්නෙ. ආන් ඒ විඳියට හිතට කා වද්දන්න මම තමයි ඩොක්ටර් මම තමයි ඩොක්ටර් කියල. සරල විසඳුමක් දුන්නෙ ඔන්න. හෙට උදේම කහ පාට මල් පිපෙන රත්තරන් පාට ගහකට වැඳ නමස්කාර කරල මං කියපු දේ ක්‍රියාත්මක කරන්න.
ඔබට ජය නියතයි…
අනිත් කාරණය අල්ල්පු ගෙදර අයගෙ ඇස් වහ කට වහ වදී කියල බයට. ඒ නිසා තමයි නිතරම රංඩු වෙවී වගේ ඉන්නෙ.. ඒ තරහට නෙමේ ආදරේට ආදරේට ඒ නිසා කලබල වෙන්න එපා.
දෙවෙනි කාරණය නම් හදිසියේම බිරිඳ ඔබට දෙනවා ටීං ටීං කියල ඇදල ලෝස් බෝස් නැතුව ඔබේ පඩියෙන් මාටිය ගහපු දාහේ කොල පහක් දීල මෙන්න මෙහෙම කියනව කියල හිතන්න.
” හුඟ කාලෙකින් ඔයා බියර් එකක්වත් බිව්වෙ නෑනේ.. මේන් පන්දාහක්ම තියෙනවා කැමති නම් පොඩ්ඩක් බිව්වට කමක් නෑ “
ඔබේ හිත සලිත වෙලා යයි ඇස් අදහා ගන්න බැරුව හුස්ම හිර උනා වගේ දැනෙයි. බිරිඳව වඩාගෙන ගේ වටේ දුවන්න හිතෙයි. මිඳුලට පැනල බඩ පිනුම් ගහගෙන ගහගෙන යන්න හිතෙයි.
පාරට පැනල මුළු ගමටම ඇහෙන්න කෑ ගහල
” ඔයාට මං ආදරෙයි වස්තුවේ මගෙ පණ ඔයා තමයි රත්තරනේ “
කියල කෑ ගහන්න හිතෙයි. නිකන් හිතන්න ඒ වගේ අවස්ථාවක් උදා උනොත් සතුට ඉවස ගන්න බැරුව, දරා ගන්න බැරුව මොකකින් මොකක් වෙයිද කියල හිතා ගන්න බෑ නේද…?? කොහොම දරන්නද අපේ මල් වගේ හිත් වලට.
ඒත් කියන්න සංතෝෂයි මිත්‍රවරුනි මිත්‍රවරියනි ස්වාමිපුරුෂයන් සිය බිලියන හතලිස් හය බිලියන හැට අට ලක්ෂ අසු හත්දාල් දෙමිලියන විසි එක් ලස්ස අනූ හය දාස් දෙසිය තිස් එකයි දශම අරික්කාලකින් එක් ස්වාමිපුරුෂයෙකුට පමණක් හිමිවෙන ඒ අති දුර්ලභ ආත්ම කෙල කෝටි පනස් ලක්ෂයකට එක් වතාවක් පමණක් හිමිවෙන ඒ අති රමණීය මොහොත මට උදා උනා.
ඉතිං මට හෙනම හෙන සංතෝෂයි පට්ටම පට්ට සංතෝෂයි. බිරිඳ වැඩට ගියා සියළු අඩුම කුඩුම හදල දීලා. මාත් අර ගෙනාපුවායින් එකක් කඩාගෙන පොතක් බලන්න ගත්තා. ඒ පොත කියවගෙන යද්දි එක තැනක ඇස් නතර උනා.
” තම බිරිඳ යම්කිසි ආයෝජනයක් කරන්නෙ පවුලේ දියුණුව හෝ තම දියුණුව ඉස්ඨ සිද්ද කර ගැනීම උදෙසාය.
ඔන්න හොඳම එක.
එසේ යම් ආයෝජනයක් කරයි නම් අඩුම වශයෙන් එම ආයෝජනය මෙන් පස් ගුණයක්වත් එම බිරිඳ බලාපොරොත්තු වේ.
ඒක දැක්ක විතරයි මට මීක් ගෑවිල ඉන්නෙ. උපදෙසක් බලාපොරොත්තු වෙමි.
ජය හා සතුට
උපුටා ගැනීම: සිතිජ ආමන්ත