බිත්තර (වැල්වටාරම්)

බිත්තර ටිකක් ගමු නේද කියල රුචිර වාහනේ නැවැත්තුව.

මනුස්සයෙක් දුවගෙන ආව.

“කීයද බිත්තර ?”

“රුපියල් 14 සර්.”

“අපෝ වැඩිනෙ. මගදි

දැක්කනෙ 13 ටත් තියෙනව.”

“අනේ මහත්තය මං ගත්තෙත් 14ට. නොහිතපු විදිහට බිත්තර මිල අඩු කළා.

ගත්තු ගානටවත් දීල දාල මේක ඉවර කර ගන්ඩෙපායැ සර්.”

“හ්ම්…60ක් දෙන්න. 13.50 ගානෙ දාන්න.”

මනුස්සය බැගෑපත් බැල්මක් හෙලල වාහනේට දිව්ව.

“ඇයි රුචිර ඔයා එහෙම කිව්වෙ.පව්නෙ. 14 ටම ගත්ත නං ඉවරනෙ.” ශානිකාට හරි දුකයි.

“අනෙ උංගෙ බොරුනෙ. 14 ට ගෙනත් 14 ටම දෙන්න උංට පිස්සුයැ.”

” අනේ පව් රුචිර. ඔන්නොහෙ 14ම දෙන්න අනේ. රුපියල් තිහනෙ. මං ඔයා නං මං 15 ගානෙ ගෙවනව. සුපර් මාකට් ගියා නං කීයක්ද..?”

” මේ ඔයා කට වහං ඉන්න.

ඔයාට නං මොකද…! රුපියල් තිහේ ඒව දං දෙන්න මට පිස්සුයැ. අනික සත පනහ පනහ එකතු වෙලා තමයි ලක්ෂ පනහ හැදෙන්නෙ.”

එතකොටම බිත්තර ටික අරං ආපු අර මනුස්සය බෙන්ස් එකේ ජනෙල් වීදුරුවෙං ඒ ටික ශානිකා අතට දුන්න.

රුචිර රුපියල් දාහෙ නෝට්ටුවක් දික් කරණ ගමන් කිව්ව

” අටසිය දහයනෙ ගාන…800ක් ගන්න. රුපියල් දහය මොකක්ද ඉතිං..”

-වර්ණාසි-