” සමාධි නහයෙන් අඩන්නේ නැතුව හිටපන්..උබට හොද කොල්ලෙක්ගේ ලයින් පාර ඉක්මනට වැටෙයි.උබ ඒක ගැන හිතන්නේ නැතුව මේ පාර විභාගේ ගොඩ දාගනින්කෝ.අපාරාදෙනේ බන් දෙවෙනි පාර කරලත් උසස් පෙළ ගොඩ දාගන්න බැරි උනොත් ” කාංචනා එහෙම කිවුවේ මම හැමදාම අනිත් අයගේ කොල්ලෝ දැකල හූල්ලන එක බලන් ඉන්න බැරි තැන.දෙවෙනි පාර උසස් පෙළ කරන්න ගත්තේ මේ පාර නම් කොහොම හරි කැම්පස් යන්න පාස් වෙනව කියල දැඩි සිතුවිල්ලෙන්.වරද්දන්නේ නැතුව ටියුශන් පංති යන්න ගත්තේ ඒක නිසාමයි.
කාංචනාගේ කටම හින්දද කොහේද කොල්ලෙක් මට ලයින් දාන්න ගත්තා.මට ඒක තේරුනේ ටියුශන් පංති ඉවර වෙලා බස් හොල්ට් එකේ ඉන්නකොට ටිකක් ඈතට වෙන්න බයික් එකකින් කොල්ලෙක් ඇවිල්ලා අපි දිහා බලන් ඉන්න ගත්තා.මට හිතුනේ මාත් එක්ක ඉන්න වෙන කෙල්ලෙක්ට ලයින් දානව කියලා.ඒත් දවසක් මං තනියම ඉන්නකොටත් ඒ කොල්ලා බයික් එකෙන් ඇවිල්ලා මා දිහා බලන් හිටියා.අවුරුදු ගානකට පස්සේ කොල්ලෙක් මට ලයින් දානවමයි.කොල්ලත් අවුලක් නෑ පෙනුම එහෙම.හොදට ඇගපත එහෙම තිබුණා.ඈතට පේන හින්ද ද කොහේද ටිකක් කලුයි වගේ මං දැක්කේ.ඒත් ලගට සුදු ඇති කියල මගේ යටි හිත කිවුවා.මමත් ඉතින් ආඩම්බරකම් පෙන්නන්න ගියේ නෑ.හොරෙන් හොරෙන් මාත් එයා දිහා බැලුවා.
අදට මාස තුනක් වෙනවා එයා මගේ පස්සෙන් එන්න ඇරගෙන.ඒත් නමක් ගමක් වත් මං තාම දන්නේ නෑ.එයාටත් බය ඇති එක පාරට මාත් එක්ක කතා කරන්න.ඒක නිසාද කොහේද මාව බලන්න ඇවිල්ලා බයෙන් වටපිට බලන්නේ.එයාටත් ලැජ්ජ ඇති කවුරු හරි දකියි කියලා එයා මට ලයින් දානව.මං කාංචනාට විතරක් කිවුවා මේක ගැන.කාංචනත් කොල්ලව දැකල මට කිවුවේ ” මං කිවුවේ උබට හූල්ලන්නේ නැතුව හිටපන්..උබට හොද කොල්ලෙක් සෙට් වෙයි කියලා..”
දැන් මට රෑට නින්ද යන්නෙත් නෑ.එයාවම මතක් වෙනවා.අපි දෙන්න යාලු වෙලා ඇවිදින්න යන තැන් ටික මතක් වෙනවා.එයත් එක්ක කතා කරන දේවල් මතක් කරනවා.ඒත් එයත් එක්ක කතා කරන්නේ කොහොමද කියන එක මගේ හිතට වදයක් උනා.මොකද එයා ඉස්සර වෙන්නෙත් නෑ මාත් එක්ක කතා කරන්න.හැමදාම ඇවිල්ලා මං දිහා බලන් ඉන්න එක විතරයි කරන්නේ. කමක් නෑ මමම හෙට එයත් එක්ක කොහොම හරි කතා කරනව කියලා හිතා ගත්තා.
ටියුශන් පංති ඇරිලා බස් හෝල්ට් එකට එනකොට එයා ඇවිල්ලා හිටියා.මං හෙමිහිට යාලුවෝ ටික මග ඇරලා එයා ඉන්න පැත්තට ගියා.එයාව පාස් කරගෙන පාක් එක පැත්තට මං ගියේ එයාට ඇස් වලින් එන්න කියාගෙන.ඒක තේරිලාද කොහේද එයා බයික් එකට නැගල මගේ පස්සෙන් ඇවිල්ලා මට ඉස්සරහින් බයික් එක නතර කලා.මට ඉතින් හීන් දාඩිය දැම්මා මොකද ලයින් දාපු කොල්ලෙක් එක්ක පලවෙනි පාරට කතා කරන්න යන නිසා.
එයා මගේ ඉස්සරහට ඇවිල්ලා හිට ගත්තා.මං හිතුවට වඩා එයා උසයි.එහා පැත්තේ තියෙන ජූස් බාර් එකට ජූස් එකක් බොන්න යන්න කතා කරනව කියල හිතා ගත්තා.”අයියේ.. අපි ජූස් එකක් බොන ගමන් කතා කරමුද මගේ යාලුවන්ට පේනවා..” මංම ඉස්සර වෙලා ඇහුවා.”ජූස්??..” එක පාරට එයාගේ හඩ සැර උනා.”ජූස් නෙමෙයි.. මගෙන් මැරුන් නොකා කෑගහන්නේ නැතුව උබේ ඔය කරේ තියෙන මාලේ මට ගලවල දීපන්..” එයා මට එහෙම කිවුවේ පිහියක් පෙන්නන ගමන්.” දීපන් මෙහෙට ” කියද්දී තමා මං දැක්කේ එයාගේ කටේ ඉස්සරහ දතකුත් නෑ කියල.එහෙම කියල මගේ කරේ තිබ්බ මාලේ කඩා ගෙන බයික් එකේ නැගල යන්න ගියා.මගේ ඇස් නිලංකාර වෙලා ඇගට පන නැති වෙනව විතරයි මතක.ඇස් අරිද්දී මං හිටියේ කාංචනාගේ උකුල උඩ ඔලුව තියාගෙන. ජුස් බාර් එකේ බංකුවක් උඩ.
උපුටා ගැනීම: Danushka Munasinghe Hewayalage