කැන්ඩ්ල් ලයිට් ඩිනර්ස්. (වැල්වටාරම්)

ඩෙන්මාකයේ මිනිස්සු රාත්‍රී ආහාර ගනිද්දි මේසයේ ලස්සනට ඉටිපන්දම් පත්තු කරන එක සිරිතක්. ඒ කියන්නෙ හැමදාමත් කැන්ඩ්ල් ලයිට් ඩිනර්ස්.

අපිට හිතෙන විදියට සහ අපි අද කරන විදියට විදුලි පහන් නිවල ,ඉටිපන්දම් විතරක් පත්තුකරල කළුවරේ කන ඉටිපන්දම් කෑම වේලක් නොවෙයි. නමුත් මේ රටේ මිනිසුන් රාත්‍රී කෑම හැමවිටම ගන්නෙ පවුලේ හැමෝම මේසයක වාඩි වෙලා මේසයේ ඉටිපන්දම් පත්තු කරල. හැදි ගෑරුප්පු එක්ක .බොහෝවිට ඔවුන් පිලිවෙලට ඇඳලත් ඉන්නවා.

ඩෙන්මාකයේ නිවාස වල ජනෙල් තිර පාවිච්චි නොකිරීමත් පුරාණයේ ඉඳල එන සිරිතක්. ඒකට හේතුව ඉස්සර මේ රටේ බොහෝ පිරිමින් මුහුදු රැකියාවට දවස් ගනනක් ගෙදරින් පිට ගියාම , ගෙදර තනිවෙන ඇඹෙනියට පිට පිරිමින් ගෙදරට ගෙන්වා ගැනීමට නොහැකි පරිසරයක් සැකසීම බව වරක් මගේ භාෂා ගුරුවරියක් කිව්වා. කොහොම නමුත් තවමත් ඒ සිරිත බොහෝ දුරට තියෙනවා. නගරබදව නම් තරමක පාරදෘෂ්‍ය ජනෙල් තිර පාවිච්චි කරන ගෙවල් තියෙනව. නමුත් ගම්බඳව නම් තිර රෙදි නැහැ.

ඉතින් හවසට වාහනේ යද්දි මේ කැන්ඩ්ල් ලයිට් ඩිනර් ගන්න ගෙදරක කෑම මේස හරිම ලස්සනට පෙනෙනවා. විශේෂයෙන් හුඟක් කළුවර සීත කාලයට. හිම වැටුන දවසට තවත් ලස්සනයි.

එය හරි උණුසුම් හැඟීමක් ගෙනෙන නිසාම මමත් දැන් එහෙම රාත්‍රී කෑම මේසයට ඉටිපන්දම් පත්තු කරන්න පුරුදු වෙලා ඉන්නවා.

ඒත් මේ ඉටිපන්දම් භාවිතයට හේතුව ඔබ දන්නවද ?

ඒ තමයි කෑම වලට පෙරේත බැල්ම හෙලන භූතයන් ගින්දරින් බය කිරීම. අතීතයේ තිබුණ ඒ විශ්වාසය අද සිරිතක් වෙලා තියෙන බව මගේ වයසක ඩැනිෂ් මිතුරියක් කිව්වා.

පුංචි කාලෙ කිරිඅම්මගෙ ගෙදරට කෑම හුවමාරු කල මටත් පොල් කටුවක දැම්ම ගිණි අඟුරක් අරගෙන යන්න සිදුවුනා පෙරේතයන්ගෙන් පරිස්සමට.

රටවල් අතර සංනිවේදනය අවම කාලයකත් , ලෝකෙ දෙපැත්තක , ආගම් දෙකක් අදහන රටවල් දෙකක එකම විශ්වාසයක් පැවතීම කෙතරම් අරුමයක්ද මට හිතෙනවා.

ලෝකෙ කොයි රටෙත් කැන්ඩ්ල් ලයිට් ඩිනර් වල මුල් හේතුව භූතයන්ගෙන් කෑම රැක ගැනීමම වෙන්න ඇති.