චුල්බුලී සහ පොලිස් බැටේ (ඉස්කෝලෙ කාලෙ රස කතා)

පොළීසියෙ ඉන්න අයියලා අක්කලා නැන්දලා මාමලාගෙන් ඉස්සරලම සමාව ගන්න ඕන සමස්ත පොළිස් ප්‍රජාව වෙනුවෙන්ම.

මේ සිද්දිධිය උනේ සාමාන්‍ය පෙළ ඉවර වෙලා ලැබෙන ඉන්ටර්වල් කාලෙ. අපි එයාට චුලුබුලී කියමුකො. ඔන්න චුලුබුලී කියන්නෙ චුලිබුලිට!!! චුලුබුලී ගියා ඩබල් ඒ ටි කරන්න. කොහොමහරි මෙයාට හිටියා අලුත් යාලුවො සෙට් එකක්. ඒකෙන් එකියක් හැමදාම උදේට ක්ලාස් ඇවිත් යාලුවන්ට මූන පෙන්නලා කැලෑ පාරෙන්ම ස්වර්ගස්ත වෙනවා.

නොදැක් ඉන්න බෑ මට නම්.. ඔබෙ ආදරේ….

නිමලා බොන්න බෑ තහනම්.. ඔබෙ ජීවිතේ…

පෙර කී කතා.. මා මත් කරා…. සුරතල්ල්ල් බලා…ආ…..

නොදැනීම මා කට් උනා….රැකවල් බිදා…..

( තාලයක් තේරුමක් මන්වත් නොදනී. )

කියලා මනමාල බෘංග රාජයා ක්ලාස් එක ඉස්සරහට වෙලා බලන් ඉන්නවා. චුලුබුලීට නම් ඔකව පේන්න බෑ… චුලුබුලිගෙ වම් වකුගඩුවට පත්තු උනා මේකා නම් එච්චර හොද බුවෙක් නෙමෙයි කියලා.

මේකගෙ කලිසම සෙට් කරලා තියෙන්නෙ සහෝදරවරුනි උකුල් ඇටේ දෙපැත්තෙන් ඇල්පෙනෙත්ති ගහලා..

යං කලිසං මං එන්නම් වගේ තමයි.

හැමදාම ඇන්දෙ පච්ච සිරා වගේ පේන්න ෂර්ට් එක උඩට රෝල් කරලා ගෙඩිය බැදලා. පාට පාට මල්වැටිච්ච…. කොටු කොටු පලු වැටිච්ච…. රතු පාට කහ පාට තැඹිලි පාට.. සරම් කෑලි වලින් තමයි මුන්දගෙ ෂර්ට එක මහලා තිබුනෙ. ඒකටම ගැලපෙන ගගනගාමි සපත්තු කුට්ටමකුත් දාලා, බෙල්ලෙ පැත්තෙන් තද කලුපාට ජෙල් පෑනෙන් අහකබලන් ඇදපු නෙප්චූන් තරුවයි අමාවක හදකුයි කොටාගෙන…. බෙල්ලට රිබන් ගැටගහලා තමයි මුන්දැ එන්නෙ. එක දවසක මේකගෙ බෙල්ලෙ, ගැටගහපු ධර්ම චක්‍රයක්…. තව දවසක කුරුසයක්…. තව දවසක ගිරයක්.. ආයෙ දවසක බයිසිකල් හැන්ඩ්ල් එකක්.. තවත් දවසක කුරුම්බැට්ටි මැසිමක්…. ඒ මොක එල්ලන් ආවත් ඊට යටින් දවුලක සයිස් සුරයක් නම වැරදුනේ නෑ.

කොටින්ම මූ ඇවිදනකොට තොරම්බල් කඩේකට ගෙජ්ජි බැදපු හරක් පැනලා වගේ. පොල්ලෙලි පාටට උඩට කරලා බැදපු කොන්ඩයක් තමයි මෑන්ස්ට තිබුනෙ… බට් කරපු කුරුම්බා ගහක් තරමට අතරින් පතර ඒ කොන්ඩේ අතු බෙදිලා තිබුනා. රු. 5 ගෝයා සැෂේ පැකට් එකකින් හැමදාම මේ කොන්ඩෙට ස්ප්‍රෙ කරලා තමයි මේකා එන්නෙ. කීඩෑවෝ මයිටාවො මොස්කිටෝලා ආදී එකී මෙකී නොකී කෘමී ඈයො මේ කොන්ඩේ වාසස්තානෙ කොරගෙන තිබුනා. සිම්ප්ලි මේකගෙ අවුට් ලුක් එක ලොසින්ජරේකට රිබන් ගැටගහලා මොට්ටුවක් තියලා වගේ. මොකද මේකගෙ සයිඩ් එකෙන් තඩි උපන් ලපයක් හීනියට තිබුනා. මේකා ලපේ පාට අවුල් කියලා ලපේටත් තඹ පාටින් පුල්ලි තියාගෙන තමයි හිටියේ. දහ අට ශ්‍රී දඩු මොණරෙකින් තමයි මුන්දෑ ක්ලාස් එක ඉස්සරහට ආවේ. මූ හිතින් උන්නෙ මූ රිතික් මුකර්ජී කියලා. රිතික්ගෙ උඩු ඇන්ද කෙලවර හක්කෙ අටවෙනි දතට සමාන දතක් ඕකගෙ බෙල්ට් එකේ ටික් එකකට අමුනලා තිබුනා කියලා, අපේ කුන්ඩවාලෙ දවසක් ඇවිත් අපිත් එක්ක වරුවක්ම පොරගෙ දත ගැන වර්ණනා කරා.

කොහොමහරි ඔන්න ඉතින් මේ කියන දවසෙත් අර කුන්ඩවාලියව කැන්දන් යන්න මේ පකිස් පරාණෙ දඩු මොනරෙ උඩට වෙලා ඉන්නවා.. එදත් මේකා නූල ගැල උනු සරුංගලේ පත්තරේකින් ඔතලා වගේ කේජු ගිලින්න බලාගෙන ඉස්සරහට වෙලා උන්නා.

අපේ එකිත් දැන් කොන්ඩෙ කඩාදාලා චූටි චූටි කොකිස් අච්චු විස්සක් විතර කොන්ඩෙට ගහලා.. බෑග් එකට අත දාලා තඩි කෙසෙල් කදක් ඇදලා අරන් උල් කරලා රතු පාටින් දෙතොල් කාලා.. තව මොකක්දෝ අරන් ඇහට යටින් දැලි ටිකකුත් ගාලා මූනට පවුඩර් කුඩු ටිකකුත් විසික් කොරලා නිල්ල නග්න ස්වර්ණ කිකිළි වගේ ගවුමත් අරහෙන් මෙහෙන් ඇදගෙන, එහෙක් කොරලා මෙහෙක් කොරලා පහක් දාලා හැරෙකොටම අපි කීවා ඇහැක් විදියට දැන්වත් පලයන් දෙයියෝ… කියලා. මේකිත් දැන් පූසා වෙලේ යනවා වගේ පකිස් පරානෙ ලගට ඇදෙනවා. උණ බම්බුවකට වඩා පොඩ්ඩයි පලල් අපේ එකිත්. දැකුම්කලූ සරීරෙට ෆෝමලින් උලාලා හරි සිරියාවයි.

මොනා උනත් මැචින් කපල් ඩ්‍රසින් අවුල්!

දිල්තෝ පාගල් හේ…. දිල් දිවානී හේ…. කියලා,

උන් දෙන්නා කක්ෂගත උනා, චුලුබුලී ඇතුලු පිරිස ක්ලාස් ගියා. සභාතුමෝ සතුටින් විසර ගිහිල්ලා දවල් වෙනකොට ලන්ච් ටයිම් ඉන්ටර්වල් එක ආවා. ගෙනාපු බත් සේරම එකට එකතු කරලා ටජ්මහල් ප්‍රාසාදය කෝනේ ඉදන් කාගෙන කාගෙන එනවා වගේ බත් කන්ද ගිලිනවා දැන්.. මැදක් කනකොට අර කුන්ඩවාලෙගෙ හොදම යාලුවට කෝල් එකක් ආවා.

ඈ….. මොකක්… දැන් කොහෙද උබ ඉන්නෙ… අඩන්න එපා.. අඩන්න එපා.. හරි හරී අපි එන්නම්..

දැන් කෝල එක ආපු එකී අපිට කීවා යමන් යමන්.. අන්න අරකිට කරදරයක් කියලා.. චුලුබුලීගෙත් ඉතින් නිබ්බා නිබ්බි කාලෙනෙ.. හදවත පත්ල නාරස්සනේකින් කොටලා හිඹුටු වලක් හාරලා ඒකෙන් බුර බුරා නැගෙන මිතුදමේ නාමයෙන් අපිත් ගිල ගිල හිටපු බත් එක ඔතලා කපුටන්ට උසික්කා කොරලා අත හොදන්න කියලා ගියා. එතන්ට කිට්ටු වෙන්න බෑ ඇගිල්ලක් ගහන්න බැරි තරමටම සෙනග.. ඒ අස්සෙ අරකිට මැසේජ් එනවා එකසිය ගානට.

මේක හරියන්නෙ නෑ ඇවිල්ලා අත හෝදමු කියලා චුලුබුලී ඇතුලු පිරිස ක්‍රියාන්විතය බලා යුදපිටිය කොරන්න ගියා. දැන් අරකි අපිට පාර පෙන්න පෙන්න.. එහෙන් යමන්…මෙහෙන් යමන්.. දැන් මෙහෙන් වරෙන්.. දකුනු උකුල වමට දාපන්.. වම් උකුල බිම තියපන්…තියපු උකුල අතට අරන් රෝල් කරලා ඔතාගනින්… කියලා ගියා.

ගිහින් ගිහින් ගිහින් ගිහින් ගිහින් …. (තාම යනවා ) ……. (දැන් මග ) ……….. හරි දැන් ඔන්න පොට් එකට ආවා. එතන තඩියට රන් ආලේපිත පිත්තල අකුරින් බෝඩ් එකක් ගහලා තිබුනා…

“”අහවල් පොළීසිය”” කියලා. හුටා යකෝ පප්පා ගමකට තමා ඇවිත් තියෙන්නෙ.

චුලිබුලි මේ වෙනකොට එක පාරක්වත් පප්පා ගමකට ගිහිල්ලා නැ. ඒ අස්සෙ කුන්ඩවාලියගෙ යාලුවා කියනවා චුලුබුලීට කුන්ඩවාලියගෙ අම්මගෙ රොල් එක කරන්නලු. කුන්ඩවාලියයි චුලිබුලියි නිකන් සුඩානෙයි පැරීසියයි වගේ. චුලුබුලී තමයි පැරීසිය හොදේ. අනික දෙයියනේ ඒ කාලේ ඒ වයසට අම්මෙක් තියා පුංචි අම්මෙක්ගෙ පෙනුමක්වත් නෑ. මයිලක් තරම් හරි මොලෙ තියෙන ඕන උලමෙක්ට තේරෙනවා මේ ඇවිත් ඉන්නෙ අම්මා නෙමෙයි කියලා. කොහොමහරි යෝජ්නාව දෙපයින් ප්‍රතික්ෂේප කරපු චුලිබුලි ඇත්ත කියලා ඇතුලට යන්න ‍යෝජනා කරා. ඒ අනුව ක්‍රියාත්මක උනු පිරිස ගේට් එක ගාව හිටපු පප්පා මාමෙක්ට අපෙ චුලිබුලිව පෙන්නලා ඇහුවා,

“”අන්කල් මෙයාගෙ අම්මා ඇතුලෙ වැඩ කරන්නෙ.. මෙයාට මේ බඩේ අමාරුවක් හැදිලා අම්මට කතා කරන්න ඕනා එක්කන් යන්නද ? “” කියලා..

එතකොට මේ කෑකෝ පප්පා කීවා අම්මගෙ නම කියන්න මන් කොල් එකක් දීලා ගේට් එකට එන්න කියන්නම් කියලා.. දැන් කියපන්කො නමක්….!!

ම්ම්ම්ම් අම්මගෙ නම සුමනා..

ආහ් … එහෙම නමක් තියෙන කෙනෙක්??!!!…

කියලා කල්පනා කරපු පප්පා මාමා ඇහුවා මොන සෙක්ෂන් එකේද කියලා.. චුලිබුලිත් වදින අතකට වැදියන් කියලා කීවා දෙවනි තට්ටුවේ කියලා..

තට්ටු ගනන් තිබ්බ පප්පා ගමක් නෙමෙයි ඒක. චුලිබුලි ඇතුලු පිරිසගේ හොර වැඩේ මාට්ටු උන කැකෝ පප්පා.. සෙට් එකම ෂොපින් උරේකට තියලා සමනල ගැටගයක් ගහලා ගේට් එකෙන් එලියට කරලා තිබ්බා. පප්පා ගම ඉස්සරහින් යන හැම මිනිහම බලනවා දැන් ගැණුළමයි සෙට් එකක් මොකද මේ පප්පා ගමේ ගේට් එක ලගට වෙලා ප්‍රදර්ශනය වෙන්නෙ කියලා. ඒ අස්සෙ පාර ගියපු ඇන්ටියක් සෙට් එකේ එකියක්ගෙන් අහපි,

“” ඔය ළමයි හොර ගමනක් ගිහින්ද ” කියලා..

“” අනේ මේ ඇන්ටෝ…!! යන දේවාලෙක යනවද මෙතන හදුන්කූරු පත්තු නොකර…” කියලා බඩ පොඩ්ඩක් ඉස්සරහට දාලා චුලිබුලි කීවා.

පාරෙ ඉන්න මිනිස්සු එක්කත් මරාගෙන දිලිසි දිලිසි බැබිලි බැබිලි එල් ඊ ඩි රෝල වගේ සෙට් එකම දැන් පාරෙ.

මීට වඩා හොදා ඇරිසෝනාවෙ පත්තරයක් එලාන හිගා කෑවනන්!!

ඔය අස්සෙ සෙට් එකව පප්පා ගමට කැන්දන් ආපු එකීට සේරමලා එකතුවෙලා දෙස් දෙවොල් කැකිරි පුහුල් සේරම එකට පාරෙ තියලා අඹරනවා.. ටිකක් වෙලා ඔලු කහ කහ.. කකුල් කහ කහ… කුරුලෑ කඩ කඩ හිටපු චුලුබුලී ඇතුලු අපත සෙට් එක දිහා අනුකම්පා දෑසින් බලපු කෑකෝ පප්පා ඇවිල්ලා , ඩිරෙක්ටම ඇහුවා

“ඇතුලට අරන් ගියපු සෙට් එකේ යාලුවෙක් ඉන්නවද? ” කියලා.

සෙට් එකම පේලියට බිම බලාගෙන ඔලුව වැනුවා. ඊටපස්සෙ අපිට විනාඩි තුන්සිය හැටක දේශනයක් ලයිව් අහන්න ලැබුනා…… ආයේ… ලව් රිලව් වෙලා රිලව් වලව් වෙලා වලව් කොයිල් වෙන්න.. අදටත් චුලිබුලීලට ඕවා එපා වෙලා ඉන්නෙ ඒ දේසනෙ තිබුනු බරසාර බව හින්දම තමා. ඒ කතාවට ඇඩිලා කදුලු පිහින්න අත උඩට ගන්නකොට දවල්ට කාපු බිත්තර වල සුවද උඩට ගහලා කාපුවා දෝංකාර දුන්නා.

කොහොමහරි පොඩි කෙල්ලක්ගෙ සුකුමාල ජීවිතේ බේරාගන්න චුලිබුලි ඇතුලු පිරිස පිච් එක හදාගෙන පප්පා ගම ඇතුලට ගියා. ඒ උනාට චුලිබුලි ඇතුල්ටම ගියෙ නෑ තව එකෙක් එක්ක මග නැවතුනා. කුන්ඩවාලියගෙ හොදම යාලුවා වන් ටූ ත්‍රී බම්බල් පී කියලා ලොකු පප්පට වැදලා වැදලා කුන්ඩවාලියව එලියට එක්කන් එන්න සටන් වදිනවා. ඒක ඇතුලෙ අහුමුලු වල ලෙන්සු වලින් කොන්ඩා වලින් මූනු වහගෙන ඉහි ඉහි ගාන අක්කලා නන්ගිලා ගොඩායි… චුලුබුලීත් දැන් පැත්තකට වෙලා ඉන්නවා. ඔය ඉන්න අතරෙ අතේ බිත්තර පුසුඹ ඉවසගන්න බැරුව යටි බඩෙන් පිට කොන්දට දුන්නා සිග්නල් එකක්..

අනේ අපතයො අත හෝදගනින්කො කියලා…

ඒකත් හොද අයිඩියා එක කියලා මොලෙ විසින් රික්වෙස්‍ට් එක ඇක්සෙප්ට් කරා. මොකද මාධ්‍ය සාකච්ඡා දැන්ම ඉවරවෙන පාටකුත් නැ… කරන්න කියලා ලොකුවට වැඩකුත් නෑ…

ඔහොම හිතලා දකුනු අත ක්‍රියාතම වෙලා.. ලග තිබ්බා වතුර ටැංකියකට අත එබුවා… ඕකෙ පොඩි කොටු කෑල්ලක් කපලා තිබ්බා.. අවුලක් නෑ වැඩේ පහසුයි , ඒකෙන් අත දාගන්නත් ලේසියි … බලන්න ලස්සනයි ටැංකිය ඇතුලෙන් බුබුලුත් දානවා.. කොල පාටට වැනෙන ගස් දෙක තුනකුත් තිබුනා…. තඩි ගල් දෙක තුනකුත් තිබුනා.. ඒ අස්සෙ මල්වීදියෙ ඇවිදිනවා වගෙ එහාට මෙහාට දුවන සාරිගප්පි විසි තුනකුත් හිටියා…. කාලා අත හෝදන්න කියාපු ප්ලේස් එක. බුබුලු දාන බටේට කට තියලා වතුර බොන්න පුළුවන් උනානම් ඒකත් කොරන්න තිබුනා. එච්චර හදියක් කොරන්න තියා හිතන්නවත් උනේ නෑ… සීන් එක දැකපු පප්පා ගමේ ඇන්ටියක් හූ තිබ්බෙ නැද්ද….

මේන් බලන්න සර්… මේන්… මේන්….මේ ළමයා කරපු වැඩෙ දැක්කද.. දැක්කද දැක්කද… ඕන් තරම… මොන ළමයිද මේ… මේ ළමයින්ට ළමයි කිය්න්න පුළුවන් ද.. මුන් ලොකු වෙලා මොනා කරයිද.. ගෑණු ළමයෙක් නේද… කො තමුන්ගෙ කොල්ලා කියලා ඉස්තොප්පුවෙ හිටපු චුලුබුලී ලගට ආවා..ජය මා කාලිම බලත්වා…!!

කොල්ලා??? ඈහ්… මොන කොල්ලෙක්ද…. ඇන්ටිගෙ අප්පට ගාලු යන්න.. මේ මොන ලැට් එකක්ද ඔලුවෙ පැටලුනෙ කියලා හිතපු චුලුබුලී,…

ඇන්ටිට ටැපලිලා අපි ආවේ ආන් අර කුන්ඩවාලෙ බේරගන්න.. එයාගෙ කොල්ලා තමා අර ඉන්නෙ.. අපිට කරන්න දෙයක් නැ ඇන්ටි.. අපි කීවට ඒකි අහන්නෙ නෑ….. කියලා අංශ හැත්තෑපහක් අත දික් කරලා කොනක හිටපු පකිස් අයියව පෙන්නුවා.

අහෝ.. සන්තානම් මැනියනේ…. රිලීස් කරන්න ඔන්නා මෙන්න කියලා හිටපු කුන්ඩවාලෙ දිහා මූර්තජව බලන් හිටපු ලොකු පප්පා ආයෙ පාරක් ඒකිට කෑ ගහලා ,ගෙදරට කෝල් කරනවා කියලා ඒකිව තියාගත්තා…. චුලුබුලී ඇතුලු පිරිසටත් මහප්‍රානෙන්ම අවවාද කරලා “”ශිපුහ්”” කියලා පැන්නුවා. වැස්සකටවත් පප්පා ගමකට නොගිය චුලිබුලි ලොකු පප්පා මගක් දේශනේ දෙනකොටම ලග හිටපු එකාවත් ඇදගෙන එතනින් වාස්ප උනා පස්ස නොබලාම. ඔය සේරම සියැසින් බලාන හිටපු කුන්ඩවාලිය ලග තිබ්බ මේසෙ බදාගෙන වීදුරු හපාගෙන කොන්ක්‍රීට් තලාගෙන උන්නු හැටි තාමත් චුලුබ්ලීගෙ යටි සිතේ කොනක තැන්පත් කරලා ඉබ්බෝ දාලා තියනවා. මොකද නිකමට හරි ඉබ්බා ඇරුනොත් ඊටපහුවදා දවසක කුන්ඩවාලිය ඇවිත් කැන්ටීන් එක මැද්දේ මල්මාල දාලා චුලුබුලී ගැන ගුණකතනයක් කරලා තව මදිවට ස්තූති කතාවකුත් කරලා ගියපු ඒ සොදුරු මොහොත මතකෙට එන වාරයක් පාසා අදටත් මේ දැනුත් චුලුබුලීගෙ ඇහේ කෝන්දුරුවො වහනවා.

පලි -: කොහොමහරි වෙලා තිබුනෙ මේකයි. ඒ දවස් වල අහුමුලු වල පෙම් කිලින ඈයන්ව එක්කන් යනවලු පොළිසියට. ඊටපස්සෙ අම්මලාට බාර දෙනවලු.. කුන්ඩවාලියව බේරගන්න කියලා ඒකිගෙ හොදම යාලුවා ලොකු පප්ප්ට කියලා තිබ්බා.. මෙයා මේ ගිහින් තියෙන්නෙ පෙම් කෙලින්න නෙමෙයි. පස්සෙන් පන්නන අයියා කෙනෙක්ට බෑ කියලා එන්නය… මේයා හොද යහපත් ළමයෙක්ය…. අපේ ගෙවල් ලගය… අම්මට අමාශේ ඔක්සිජන් හිරවෙලාය… දැන් බෙහෙත් කරනවාය…තාත්තා ත්තුතිරි ගහකින් වැටිලා අංසබාගෙ හැදිලාය.. කියලා ලොකු පප්පාගෙ හදවතට ඩයිනමයිට් පොකුරු පිටින් වැදිලා තිබිලා තියෙන්නේ. චුලිබුලිගෙන් ලබාගත් ප්‍රකාශ වලින් පොකුරම එකපාර පුපුරවාගත් පප්පා ගමම.. ආයෙත් කුන්ඩවාලෙව පප්පා ගමේම තියගෙන. කොහොමින් කොහොමහරි ඒ නරකාදි ආශ්‍රයෙන් චුලුබුලි ඇතුලු පිරිස බෙදීමෙ තිත තියලා යන්න ගියා.