කෝනර් මැක්ග්‍රෙගර් (චරිත)

මික්ස් මාර්ෂල් ආර්ට්ස් එහෙමත් නැතිනම් මිශ්‍ර සටන් කලා ගැන උනන්දුවක් දක්වන අයට කෝනර් මැක්ග්‍රෙගර් ගැන ඉතිං අමුතුවෙන් කියන්න දෙයක් නැහැ.

පසුගිය සති අන්තයේදී ලාස් වේගාස්වලදී ඩස්ටින් පොයිරියර් එක්ක තිබ්බ තරගයේ ආරම්භක වටයේදීම මැක්ග්‍රෙගර් ගේ පාදයක් වළලු කර ළඟින් බිඳිලා යනවා. මේ අනතුර නිසා මැක්ග්‍රෙගර් ට අඩුම තරමින් තව මාස 12 ක් වත් යනකම් ආපහු සටන් බිමට එන්න බැහැ කියන එක දැන් හැමෝම දන්නවා.

ඒත් දැන් මේ කියන්න යන්නේ මැක්ග්‍රෙගර් පරාජය ගැනවත්, එයාගේ අනතුර ගැනවත් නෙමෙයි. එයාගේ සුපිරි යාත්‍රාව නැතිනම් සුපර් යොට් එක ගැන.

මීට මාස කීපයකට කලින් ඇණවුම් කරපු ලැම්බෝගිනි මෝටර් යොට් එකේ ඉදිකිරීම් කටයුතු මේ වෙද්දි සම්පූර්ණයෙන්ම නිමකර ඇති බව මැක්ග්‍රෙගර් පසුගියදා එයාගේ ඉන්ස්ටග්‍රෑම් ගිණුම හරහා අනාවරණය කළා. ඒ විතරක් නෙමෙයි Lamborghini Tecnomar 63 යනුවෙන් හැඳින්වෙන මේ සුපිරි යාත්‍රාව ඉතාලියේ නැවු තටාකාංගනයේ ඉඳලා වෙනත් තැනකට ප්‍රවාහනය කරන ඡායාරූප පවා මැක්ග්‍රෙගර් ඉන්ස්ටග්‍රෑම් හරහා ප්‍රසිද්ධ කළා.

මැක්ග්‍රෙගර් මේ යොට් එක ඇණවුම් කළේ පහුගිය අවුරුද්දේ ඔක්තෝබර් මාසයේදී. මේකේ වටිනාකම පවුම් මිලියන 2.6 ක් නැතිනම් ආසන්න වශයෙන් රුපියල් කෝටි 70 ක්.

මේ ඡායාරූප එක්ක මැක්ග්‍රෙගර් “මගේ ලැම්බෝගිනි යොට් එක සූදානම්” කියන සරළ වාක්‍යයත් පෝස්ට් කරලා තිබ්බා.

ලැම්බෝගිනි සමාගම වෙනුවෙන් මේ සුපිරි යොට් එක නිර්මාණය කරලා තියෙන්නේ ඉතාලියේ Sea Group and Tecnomar කියන සුප්‍රසිද්ධ නැවු සමාගම විසින්. Sea Group and Tecnomar සමාගම මේ විදිහේ යොට් 63 යි නිර්මාණය කරලා තියෙන්නේ. ඒ අතුරින් මැක්ග්‍රෙගර් මිලට අරගත්තේ අංක 12 දරණ යොට් එක. මැක්ග්‍රෙගර් අංක 12 දරණ යොට් එකම මිලට ගත්තු හේතුව තමයි එයාගේ Proper No.12 whisky කියන විස්කි බ්‍රෑන්ඩ් එකට උපහාර දැක්වීම.

ටොන් 24 ක් බර Lamborghini Tecnomar 63 යාත්‍රාවේ දිග අඩි 63 යි. පැයට සැතපුම් 69 ක (නාවුක සැතපුම් 60) උපරිම වේගයෙන් යාත්‍රා කරන්න පුලුවන් මෙම යොට් එක 24.2-litre V-12 diesels එංජින් දෙකකින් නිකුත් කෙරෙන අශ්වබල 4,000 කින් බල ගැන්වෙනවා.

ලැම්බෝගිනි සමාගම විසින් නිෂ්පාදනය කරපු අයිකනික් කාර් එකක ආභාෂයට අනුව සැළසුම් කරපු මේ යොට් එකේ තියෙන්නේ උල්වූ හැඩයක්. ඊට අමතරව “වයි” හැඩයේ හෙඩ් ලයිට් සහ සුප්‍රසිද්ධ ලැම්බෝගිනි ලෝගෝ එක යාත්‍රාව තවත් හැඩ කරනවා.

යොට් එකේ ඩෑෂ් බෝඩ් එක සැළසුම් කරලා තියෙන්නේ ලැම්බෝගිනි සමාගමේ Sián FKP 37 හයිබ්‍රිඩ් කාර් එකේ විදිහට.

ඒ වගේම යොට් එකේ පිටත පෙනුම එහෙමත් නැතිනම් එක්ස්ටීරියර් එකට සැළසුම් කරලා තියෙන්නේ 1960 සහ 1970 දශකයේදී වෙළෙඳපෙළට නිකුත් කරපු Lamborghini Miura සහ Lamborghini Countach කියන කාර් දෙකේ පිටත පෙනුමට සමානව. 1969 අවුරුද්දේ තිරගත වුණු The Italian Job ෆිල්ම් එකේ තියෙන්නේ ලැම්බෝගිනි Miura කියන කාර් එක.

මේ සුපිරි යොට් එකේ පසුපස කොටසේ නිදන කාමරයක් තියෙනවා. ඒක නිසා යොට් එක දීර්ඝ චාරිකාවක් යනකොට මැක්ග්‍රෙගර් ඕනෑ නම් සුවපහසුව නිදාගන්නත් පුලුවන්.

මේ වගේ දේවල් අපිට නම් ඉතින් මාරම මාර විදිහට දැනුණත් මැක්ග්‍රෙගර් ට නම් එහෙම නැහැ. මොකද ජාත්‍යන්තර ෆෝබ්ස් සඟරාව කියන විදිහට මේ වෙද්දි කෝනර් මැක්ග්‍රෙගර් ගේ ශුද්ධ වත්කම යූරෝ මිලියන 101 ක් නැතිනම් ආසන්න වශයෙන් රුපියල් කෝටි 2374 යි.

ඉතිං මැක්ග්‍රෙගර් ට කෝටි 70 ක් කියන්නේ මොකක්ද…?

සමහරු කියනවා සතුට සල්ලිවලට ගන්න බැහැ කියලා. හරි අනේ එළ…