මේ තියෙන්නේ චීනයේ Maxus කියන මෝටර් රථ නිෂ්පාදන සමාගම එළිදක්වපු හරි අපූරු වාහනයක්.
Recreational Vehicle (RV) එහෙමත් නැත්නම් විනෝදාත්මක වාහන කියන කැටගරිය යටතේ එන මේ වාහනය විශේෂයෙන්ම හදලා තියෙන්නේ කොවිඩ්-19 වගේ වසංගත කාලයකදී හෝටල්වල නතර වෙලා අවධානමක් ගන්න බැරි අය වෙනුවෙන්. ඒ නිසාම තරු පංතියේ හෝටල් කාමරයක තියෙන හැම අංගයක්ම මේ වාහනයෙත් දකින්නට ලැබෙනවා. ඒ වගේම තමයි මිලත්. ඩේලිමේල් පුවත්පත කියන විදිහට මේ RV එකේ වෙළෙඳපොළ වටිනාකම ඩොලර් 413,000 ක් හෙවත් ආසන්න වශයෙන් රුපියල් කෝටි 8 ක් විතර වෙනවා. ලංකාව වගේ රටකට ගෙනාවොත් ටැක්ස් එකත් එක්ක මේ ගාන ඩබල් ත්‍රිබල් වෙයි.
මෙම වාහනයේ දෙවැනි තට්ටුවේ ඇති ඉහළට විහිදෙන වහළය සහ බැල්කැනිය නිසා වාහනයේ ගමන් කරන මගීන්ට ඉතාමත් හොඳින් අවට සිරි නැරඹීමේ අවස්ථාවත් හිමි වෙනවා.
AIC Maxus Life Home V90 Villa Edition RV යනුවෙන් හැදින්වෙන මෙම වාහනයේ පහළ කොටසේ ලිවිංග් ස්පේස් එකේ විශාලත්වය වර්ග අඩි 215 යි. ඒත් එංජින් එක් පණ ගැන්නුවට පස්සේ එහි වහළය ස්වයංක්‍රීව ඉහළට එසැවීමෙන් රූෆ්ටොප් එකක් නිර්මාණය වෙනවා. අවට සිරි නැරඹිමට හැකි ආකාරයෙන් නිර්මාය වෙන මෙම බැල්කනි එකේ විශාලත්වය වර්ග අඩි 133 ක්.
හොඳින් ඉඩ කඩ ඇති නිදන කාමරය තියෙන්නේ ඩ්‍රයිවර් කැබින් එකට ඉහළින්. යට තට්ටුවේ කෙළවරට වන්නට ඇති “එල්” හැඩයේ ඉඩක තමයි කුස්සිය තියෙන්නේ. මේ කුස්සියේ “ස්ටෝව්”එකක් වගේම “අවන්” එකකුත් තියෙන නිසා එහි ගමන් කරන මගියට තමන්ට කැමැති දෙයක් උයාගෙන කන්න පුලුවන්.
මීට අමතරව ශීතකරණයක්, සින්ක් එකක් වගේම ෂවර් එකක් සහිත බාත් රූම් එකක්ද ඒ කොටසේ තියෙනවා. වාහනයේ බොහෝ දේවල් පාලනය වෙන්නේ ටච්ස්ක්‍රීන් එකකින් සහ වොයිෂ් ඇක්ටිවේට් පද්ධතියක් හරහායි.
ලෝකයේ තියෙන ගොඩාක් RV වාහනවල උඩ තට්ටුවට නගින්න ඉණිමගක් ඕනෑ වුණත් Life Home V90 Villa Edition වාහනයේ ගමනක් යන අයට නම් ඉනිමං හොය හොය ඉන්න වෙන්නේ නැහැ. මොකද වාහනයේ පළවැනි තට්ටුවේ ඉඳලා රූෆ් ටොප් එකට යන්න ලිෆ්ට් එකක් තියෙනවා. හැබැයි ඒ ලිෆ්ට් එකේ එක පාරකට යන්න පුලුවන් එක්කෙනාටයි.
දැනට මේ වාහනය ගන්න පුලුවන් චීනයෙන් විතරයි. පස්සේ ලෝකයේ වෙනත් රටවල වෙළෙඳපොළටත් මේක හඳුන්වලා දෙනවා කියලා Maxus සමාගම කියනවා.
(ඩේලිමේල් ඇසුරෙනි)