බිරිඳක් ව ඇයගේ නිවෙසේ, ඇයගේ නිදන කාමරයේ ඇයගේ සැමියා අතින් දූෂණයට ලක්වෙන්න පුලුවන්ද? පුලුවන්. එහෙනම් මේ විදිහට තමන්ගේ සැමියා අතින් දූෂණයට ලක්වන බිරිඳට ඒ වෙනුවෙන් නීතිමය පියවර ගන්න පුලුවන්ද…? ඒක තීරණය වෙන්නේ අපි ජීවත් වෙන රට අනුව. උදාහරණයක් විදිහට ඇමෙරිකාව සහ යුරෝපයේ වගේම ඕස්ට්‍රේලියාවේ Marital Rape නැතිනම් විවාහ දූෂණය නීතිය ඉදිරියේ අපරාධයක්. ඒත් ඉන්දියාවේ විවාහ දූෂණය අපරාධමය වරදක් විදිහට ගැනෙන්නේ නැහැ. ශ්‍රී ලංකාවෙත් දණ්ඩ නීති සංග්‍රහයේ 363 වැනි වගන්තියට අනුව සැමියයි බිරිඳයි නීත්‍යානුකූලව වෙන්වෙලා නැතිනම් විවාහ දූෂණය අපරාධයක් විදිහට සැළකෙන්නේ නැහැ.
ඈත අතීතය පුරාම තමන්ට හිතුණු වෙලාවට තමන්ගේ බිරිඳව සමග ලිංගික සම්බන්ධතා පැවැත්වීමේ අයිතිය කසාද ගිවිසුමේම කොටසක් විදිහට විවාහක සැමියට ලැබුණා. ඒත් 1970 දශකයේදී මේ තත්ත්වය වෙනස් වුණා. මේ කාලයේදී කාන්තාවෝ සහ කාන්තා අයිතිවාසිකම් වෙනුවෙන් පෙනී හිටපු සංවිධාන කාන්තාවන්ගේ ශරීරයේ ලිංගික අයිතිය කාන්තාවටම හිමි වෙන්න ඕනේ කියලා අරගල කළා. මේ අරගලවල ප්‍රතිඵලයක් විදිහට තමයි සමහර රටවල් විවාහ දූෂණය අපරාධයක් කියලා තමන්ගේ නීති වෙනස් කළේ. එහෙම නොකළ රටවලුත්, විවාහ දූෂණයට ලක්වෙන කාන්තාවන්ට ගෘහස්ථ අපහරණය යටතේ නීතිමය සහනයක් දෙන්න පියවර අරගෙන තියෙනවා.
මේ විවාහ දූෂණය ගැන ටිකක් කතා කරන්න ඕනේ කියලා හිතුවේ පහුගිය දවස්වල නරඹපු හින්දි වෙබ් සීරිස් එකක් නිසා. මේක ලීගල් ඩ්‍රාමා ගණයට වැටෙන සීරිස් එකක්. නම Criminal Justice: Behind Closed Doors. සීරිස් එකේ ප්‍රධාන චරිත 3 ක් තියෙනවා. පළවැනියා තමයි නීතිඥ මාධව් මිශ්‍රා. ඔහු කිසිම කීර්තියක් සහ වෘත්තීය පිළිගැනීමක් නැති නීතිඥ කුලකයෙක් නෙරපපු ඩිෆෙන්ස් ලෝයර් කෙනෙක්. දෙවැනි ප්‍රධාන චරිතය බික්‍රම් චන්ද්‍රා. ඔහු ඉන්දියාවේ ඉන්න අතිශය ජනප්‍රිය වගේම සාර්ථක නීතිඥයෙක්. ලෝකය ඉදිරියේ ඔහු සමාජශීලි මිනිහෙක්. දයාබර සැමියෙක් වගේම ආදරණීය පියෙක්. තුන්වැනියා එයාගේ බිරිඳ අනුරාධා චන්ද්‍රා. ඇය විශාෂයෙන් පෙළෙන (සීරිස් එක මුලදී අපිට හිතෙන්නේ එහෙම) කාන්තාවක්. අනියම් සම්බන්ධයක් හේතුවෙන් ගැබ් ගත්තු කාන්තාවක්. දවසක් ඇය සිය සැමියව පිහියෙන් ඇනලා ඝාතනය කරනවා. අච්චර ප්‍රසිද්ධ සහ සුදු චරිතයක් ඇති නීතිඥයෙක් ඝාතනය කරපු එක ගැන මුළු සමාජයම ඇයට විරුද්ධව නැගී සිටිනවා.
මියගිය පුද්ගලයා රටේ නම ගිය නීතිඥයෙක් නිසා, අනුරාධා වෙනුවෙන් පෙනී සිටින්න කිසිම නීතිඥයෙක් කැමැති වෙන්නේ නැහැ. ඒත් මාධව් මිශ්‍රා කියන්නේ කිසිම කීර්තියක් නැති මිනිහෙක්නේ. කොහොමත් නැති වෙන්න දෙයක් නැති මිශ්‍රා මේ නඩුවේ විත්තිය වෙනුවෙන් පෙනී සිටිනවා. ඔහුගේ උදවුවට නිකත් හුසේන් කියලා තරුණ නීතිඥවරියක් ඉදිරිපත් වෙනවා. සීරිස් එකේ එපිසෝඩ් 8 ම දිග හැරෙන්නේ මේ නඩුව සහ ඊට ඈදුණු සිදුවීම්.
2020 දෙසැම්බර් 20 වැනිදා විකාශය ආරම්භ කරපු Criminal Justice: Behind Closed Doors සීරිස් එක 2019 අප්‍රේල් මාසයේ විකාශය වුණු Criminal Justice සීරිස් එකේම (පුලුවන් නම් ඉස්සෙල්ලම ඒක හොයාගෙන බලන්න… පට්ට) සීසන් 2 විදිහට තමයි නිෂ්පාදනය වෙලා තියෙන්නේ. මේ පළවැනි සීසන් එක 2008 අවුරුද්දේ විකාශය වුණු Criminal Justice කියන බ්‍රිතාන්‍යය ටී.වී. සීරිස් එකක කොපියක්.
මාධව් මිශ්‍රා ගේ චරිතය පුරුදු විදිහටම කරන්නේ පංකජ් ත්‍රිපාති. හින්දි ෆිල්ම් බලන අයට මිනිහගේ වැඩ ගැන අමුතුවෙන් කියන්න ඕනේ නැහැනේ. බික්‍රම් චන්ද්‍රා විදිහට ජිෂූ සෙන්ගුප්තා සහ අනූ චන්ද්‍රා විදිහට කීර්ති කුල්හාරි ඉන්නේ.
Criminal Justice: Behind Closed Doors කියන්නේ ඔක්කොම වැඩ අමතක කරලා එක පිම්මේ එපිසෝඩ් 8 ම බලන්න පුලුවන් විදිහේ සීරිස් එකක්. පුලුවන් නම් හොයාගෙන බලන්න. එක එපිසෝඩ් එකක් ඉවර වෙන්නේ බලන කෙනාට අනික් එපිසෝඩ් එක බලනකම් නින්ද යන්නේ නැති විදිහට.
