The Golden Lion with Roysen
කොවිඩ් වසංගතයේ භීතියෙන් ඇලලී ගොස් සිටි සමස්ථ ලෝකයම කෙමෙන් කෙමෙන් සුවය ලබමින් සිටින බව COPA America සහ Euro කුසලාන පාපන්දු තරඟාවලි සඳහා තිබූ ප්‍රේක්ෂක ආකර්ෂණයෙන් මොනවට පැහැදිලි විය. ක්‍රීඩාව, කලාව, සංගීතය මිනිසුන්ගේ කායික, මානසික සුවය වඩවන දිව ඔසුවක් ලෙස සැලකුවද, ලෝකයම එකම කෙලිබිමකට කැඳවන ඔලිම්පික් තරඟාවලිය සඳහා එල්ල වූයේ සුළු පටු විරෝධතාවයක් නම් නොවේ.
කවුරුන් කෙසේ විරුද්ධ වූවත් අවිනිශ්චිතතා රාශියක් මැද 2020 ට නියමිත ඔලිම්පික් උළෙලෙහි සමාරම්භක උත්සවය උත්සවශ්‍රීයෙන් ඊයේ දින ටෝකියෝ නුවරදී පැවැත්වුනා .
ඒත් මේ ලිපියෙන් කියන්නෙ ඊට වඩා රසවත් කලාව සහ ක්‍රීඩාව එකතු කරපු අමුතුම විදියේ මාතෘකාවක් ගැන. ඔලිම්පික් හැමදාමත් ලෝකයට අලුත් අත්දැකීම් ගෙන එනවා. ක්‍රීඩා උළෙල වෙනුවෙන් ලාංඡනය සකස් කිරීම මනඃකල්පිත සුරතලෙක් නම් කිරීම ලොකු කුඩා කාගෙත් අවධානය යොමු වෙන දේවල්.
ඉතිං මෙවර ඔලිම්පික් උළෙල පවත්වන ජපානය කියන්නෙ ඇනිමෙ (Anime) නිර්මාණ කලාවෙ රජවරු කීවොත් වැරදි නැහැ. සමුරායි සටන් කලාව සහ අතීත පුරාවෘත්ත වලට ජීවය දෙන්නට ජපන් කලාකරුවන්ට තියෙන්නෙ සහජ හැකියාවක්.
මෙන්න මේ කලාකරුවො තමන්ගෙ රටේ ඓතිහාසික අනන්‍යතාවය ලොවට ඉදිරිපත් කරන්නටත්, ක්‍රීඩා උළෙලට නව මුහුණුවරක් එක් කිරීමට ලොකු කුඩා රටවල්,ජාතීන් වෙනුවෙන් සමුරායි පුරාවෘත්ත චරිත නම් කිරීමට කටයුතු කරන්නේ ක්‍රීඩාලෝලි සමස්ථ ලෝකවාසී ජනතාව අමන්දානන්දයට පත්කරමිනුයි.
ඉන්දියාව, දකුණු අප්‍රිකාව, මහා බ්‍රිතාන්‍ය, ශ්‍රී ලංකාව, සැල්වදෝරය සහ තුර්කිය ඇතුළු ආකර්ෂණීය එක් එක් රටවල ජාතික ධජයේ වර්ණයන් එම චරිතවල ඇඳුම් (costumes) හැඩගන්වා තිබෙනවා.
අනෙක් හැම රටකටම වඩා ලස්සන, අභිමානවත් ජාතික ධජයක් තියෙන අපේ රට වෙනුවෙන් නිර්මාණය කල Samurai Character එක තමයි ” දරුවනා” ” Daruwana” කියලා කියන්නෙ. ඔහු ඉංග්‍රීසි බසින් Nick name එක වශයෙන් නම් කර තිබෙන්නෙ “Golden Lion” “ගෝල්ඩන් ලයන්” කියන නම.
මෙහි නිර්මාණකරු අපේ කොඩියේ සිටින සිංහයා ඔහුගේ සුරතල් සිංහ පැටවා ලෙස එක් කර සිටීමත් ඔහුව Roysen ලෙස නම් කිරීමත් අන්තර්ජාලය පුරා එම චරිතය රසික හදවත් ඉතා සීඝ්‍රයෙන් වැළඳ ගැනීමට හේතුවුනා.
” අපිට උවමනා වුනේ අපේ රටේ සංස්කෘතිය ලෝකෙටම පෙන්වන්න.
මේක දැකපු ගොඩක් ශ්‍රී ලාංකිකයෝ මේක ආදරයෙන් වැළඳ ගත්තා, ඒ වගේම ගොඩාක් අගය කලා.
අපි මේ ගැන අධ්‍යයනය කලා, රටක ජාතික ධජයක ලොකු අරුතක්, ඉතිහාසයක් තියනවා. ජීවත් වෙන ජාතීන් ගැන කියවෙනවා.
මේ චරිතවලට වෙන වෙනම profile එකක් තියනවා. හරියට වීඩියෝ ගේම් චරිත වගේ.ඒකෙ එයාගෙ දක්ෂතා, විශේෂත්වයන්, දුර්වලතාවයන් ගැන සටහනක් තිබෙනවා. මේ චරිතය හරහා අපි අදාල රට ගැන ලෝකයට කියනවා. “
යමාමොටෝ මහතා ප්‍රකාශ කරන්නෙ ඉතාමත් ආඩම්බරයෙන්.
“මේක රටක් ගැන ලොකු කුඩා ඕනෑම කෙනෙක්ට දැනගන්න පුළුවන් නව ක්‍රමවේදයක් .
ඇත්තෙන්ම ඔලිම්පික් කියන්නෙ ඒක. එහෙම නේද? “
නිර්මාණකරුවන් අතරින් තවත් එක් අයෙකු වන කොසෝ යමාඩා මහතා අදහස් දක්වමින් කියා සිටියා.
මෙහි ලොවට නොකියවුණු , හෙලි නොවූ වැදගාත්ම කරුණ ක්‍රීඩා උළෙලට සහභාගොඉ වෙන 200ක් රටවල් අතුරින් රටවල් 84ක් වෙනුවෙන් මෙම අනර්ඝ නිර්මාණය කරන ලද්දේ නිර්මාණකරුවන් 15 දෙනෙක් විසින්.
අන්තර්ජාලය හරහා මෙවැනි නිර්මාණයක් සඳහා අයකරනු ලබන මිලගණන් ගැන සරල හෝ අදහසක් තිබෙන ඔබ මේ සඳහා ඔවුන් කොපමණ මුදලක් අය කරන්නට ඇතැයි ඔබ සිතනවාද ?
අව්‍යාජ කලාකරුවන් තවදුරටත් ලෝකයෙන් වඳවී නැතිබවට පණිවිඩයද ලෝකයට උගන්වමින් මෙම නිර්මාණය ඔවුන්ගේ නිදහස් කාලය කැප කර සිදුකල බව නියතවම ඇදැහිය නොහැක් වුවත් සත්‍ය එයයි.
“දරුවානා – Daruwana (Golden Lion) ගැන වැඩිදුර තොරතුරු ලින්ක් එක comment section එකේ පල කරන්නම්.
Daruwana වගේ ශක්තිමත් අපේ ශ්‍රී ලාංකික ක්‍රීඩක ක්‍රීඩිකාවන්ට ලක්මව ඔලිම්පික් පදක්කමක් දායද කරන්න හැකියාව, ශක්තිය , ධෛර්ය , වාසනාව ලැබෙන්න ඕනි.
මොකද ඒ ඇඟවල්වල දුවන්නෙ Golden Lion blood. ඒකට ජාති ආගම් භේදයක් නෑ.
උපුටා ගැනීම: ~එරන්° සම්පත්°~