අද උදෑසන ගෙදර අයත් එක්ක ගමනක් යන්න ලෑස්ති වෙලා එලියට බහින කොටම මට දුරකථන ඇමතුමක් ආවා.
” ඕන් ඉතිං දැන් අද දවසත් ඉවරයි… කිසි වැඩක් නෑ කෝල් එකේම එල්ලිලා ඉඳියි…. නිමාඩුවයි දවසයි දෙකම ඉවරයි…”
නාඳුනන දුර කථන අංකය දිස්වන තිරය දෙස බලමින් නෝක්කාඩු බස් කියමින් නිර්මළී මට දුරකථනය අතට දුන්නා…
හැමදාම මේ වගේ නන්නාදුන අයගේ ඇමතුම් වලට මගේ වෘත්තියට අදාල දේ කතා කරමින් බොහෝ කාලය වැය කරන බව මට ඇති බරපතලම චෝදනාවකි…..
මමත් ඉතින් ටිකක් හොල්මං වෙලා දුර කථනය අතට ගත්තා ඉතිං.
” ආ … සුභ උදෑසනක් වේවා….. ඔබ තුමාට පොඩ්ඩක් කතා කරන්න පුළුවන්ද ?”
” පොඩ්ඩක් නෙමේ මට හොඳට කතා කරන්න පුලුවන් …. මොකක්ද උවමනාව…? හදිස්සි බෙහෙතක් ගැන නම් ඉක්කමනට කියන්න… අපි පොඩි ගමනක් යන්නයි හදන්නෙ…”
“ඔව් මට මේ ලොකු හදිස්සියක්… හැබැයි බේත් ගැන නෙමයි….”
” එහෙනම්…?”
“මේ මහත්තය අනිවාර්යයෙන්ම දෙවනි ඉනිම බලනවා ඇති නේද ?”
“මට ඕව බලන්න වෙලාවක් නෑ…පස්සෙ කතා කරමු…”
” නෑ… නෑ…මට පොඩි වෙලාවයි ඕනෙ… ඔයා පලවෙනි කොටස බැලුවද ?”
” ඔව් ඒවගේ මතකයි…”
” මට ඒකෙ තිබුන සිදුවීම් පොඩ්ඩක් මතක් කරන්න පුලුවන්ද ?”
” අනේ මට මතකනෑ…”
” ඔබ තුමාගෙ නෝනටවත් මතක නැද්ද දන්නෙ නෑ නේහ්…”
” මොන කෝලමක්ද මේ….. නිර්මලී ඔයාට මතකද මේ අර මොන ඉනිමද මන්ද නාට්ටියෙ පලවෙනි කෑල්ල…”
ඔහුගේ අසරන ඉල්ලීම නිසා මම නිර්මලීට ෆෝන් එක දුන්නා.
නාදුනන කටහඬක් නිසා අපව විහිළුවකට අරන්ද කියල හිතුන නිසා මම දුරකථනයේ ශබ්ද විකාශනය දාලා දුන්නා…
” මොකක්ද අර දෙවනි ඉනිමද …”
” අනේ ඔවු නෝනා… මතක නම් කියන්නකො කරුණාකරලා…”
” ඒකෙ මට මතක හැටියට පලවෙනි ඉනිම ඉවර වෙලා අනිත් කණ්ඩායම පංදුවට පහර දෙන්න යන දර්ශනයයි… ඊට පස්සෙ ඒක ඉවර වෙලා දෙවනි ඉනිම පටන් ගන්න දර්ශනයයි….. තාම මම හිතන්නෙ දෙවනි ඉනිම ඉවර නෑ… අනුහසුයි අවන්තයි තාම නොදැවී පංදුවට පහහර දෙනවා…….”
” ඇහුන නේද මහත්තයා…. ඕක තමා එයාට මතක හැටියට …”
” හරි බොහොම ස්තූතියි… ලොකු උදවුවක් ඔයාල මට කලේ… මට නෝනගෙ නම පොඩ්ඩක් කියන්න පුලුන්ද…?”
” ඒ මොකටද …?”
” නෑ… මේ නෝනට තෑග්ගක් දෙන්න වටිනවා ඒකයි….මම මේ හදිස්සියෙ අවශ්‍යතාවයකට ඕනෙ වෙලා කතා කලේ…. දැන් සති තුනක් තිස්සෙ කෝල් බර ගානක් දීල උත්සාහ කලා අහගන්න… පලවෙනි කොටස කාටවත් මතක නෑනෙ…. ලොකු උදව්වක් මේ නෝන මට කලේ…”
” කවුද මේ කතා කරන්නෙ….? මොනව හරි තෑගි අදින තරඟයකට දාන්නවතද ?… “
” ආ… මට කියන්න බැරි උනා…මම සමන් කියල කෙනෙක් කතා කරන්නෙ… දැන් යන කොටස් වලට පලවෙනි කොටසෙ තියන සම්බන්දෙ ගැන අපේ ගෙදර එක්කෙනා සති ගානක් තිස්සෙ අහනවා… ඒකයි…”
“කවුද අපේ නොම්බරේ දුන්නෙ…?”
” නෑ…. නෑ… කවුරුවත් නොම්බරේ දුන්නෙ නෑ…. මම අහම්ඹෙන් කතා කරලා ඇහුවේ…”
” ඉතින් ඕකට එක එකාට කතා කර කර ඔක්චර දඟලන්න ඕනෙයැ…. කෙලින්ම එදිරිමුනිට කතා කරල අහගන්න තිබුනනෙ… මිනිහනෙ ඕක ලියන්නෙ….”
” එදිරිමුණි තමා මේ කතා කරන්නෙ…”
————————————————————-
මෙය මගේ නිර්මාණයක් පමණි…
රසික ඔබේ හිත රිදවිනි නම් සමාව දෙනු මැනවි.
උපුටා ගැනීම: Prasad Jayasuriya