දුටුගැමුණු රජුගේ මරණය සිදු වූයේ කෙසේ ද ?
ශ්‍රී ලංකාවේ අතීත රජවරු පිළිබඳව විමසා බැලීමේ දී දුටුගැමුණු රජතුමාට ලැබෙන්නේ සුවිශේෂී ස්ථානයකි . ශ්‍රී ලංකාව පාලනය කළ රජුන් අතරත් , ශ්‍රී ලංකාව එක්සේසත් කළ රජුන් අතරත් දුටුගැමුණු රජතුමා ශ්‍රේෂ්ඨ රජ කෙනෙකු බව අප දන්නා කරුණකි . දුටුගැමුණු රජතුමා පිළිබඳව වීර කතා රාශියක් අපට හමු වූවත් එතුමාගේ මරණය පිළිබඳව කරුණු අපට හමුවන්නේ හමු වන්නේ ස්වල්ප වශයෙනි . එම කතා පුවත් ද ජනප්‍රවාද වලින් මිස මහාවංශයෙන් හෝ ථූපවංශයෙන් අපට මෙතෙක් හමු වී නැත .
ජනප්‍රවාදයන්ට අනුව රුවන්වැලි මහා සෑයේ නිධන් කිරීමට ද්‍රෝණයක් පමණ ධාතුන් වහන්සේලා නාග ලොවින් වැඩමවා ඇත . නාග ගෝත්‍රිකයින් පිළිබඳව සිංහල ඉතිහාසයේ ද සඳහන් වේ . ඒ අතර ප්‍රභලත ම කතා පුවතක් වන්නේ බුදුන් වහන්සේ මහියංගනයට වැඩම කළ පසු යකුන් උන්වහන්සේට විරුද්ධ වන විට නාග ගෝත්‍රිකයින් උන්වහන්සේ පිළිගත් බව පැවසෙන කතා පුවතයි . එසේම දන්ත ධාතුන් වහන්සේ වැඩම වීමේ දී මෙන් ම ජය ශ්‍රී මහා බෝධීන් වහන්සේ ලංකාවට වැඩම කිරීමේදී ද නාග ගෝත්‍රිකයන් හා සම්බන්ධ විවිධ කතා පුවත් අපට අසන්නට ලැබේ .
දුටුගැමුණු රජතුමාගේ මරණයට ද නාග ගෝත්‍රිකයින් සම්බන්ධ බව ජනප්‍රවාදයට අනුව කියවේ . එනම් නාග ලොවින් රුවන්වැලි මහා සෑය වන්දනා කිරීමට නාගයින් පැමිණීම පුරුද්දක් ව පැවතී ඇත . එහි දී නාග රජුගේ දූ කුමරිය ද රුවන්වැලි මහා සෑය වන්දනා කිරීමට පැමිණ තිබේ . ඇය එක් දිනක් කඩුපුල් මල් රුවන්වැලි මහා සෑයට පූජා කරනු දුටු සෙනෙවියෙක් නාග ලෝකයේ කඩුපුල් මල් ඇතැයි සිතා ඇය පිළිබඳව තොරතුරු සෙවීමට පටන් ගත් බව පැවසෙයි .
එලෙස රැකවල් යොදා සිට අතර එක් දිනයක දී මෙම නාග කන්‍යාවිය මධ්‍යම රාත්‍රියේ දී රුවන්වැලි මහා සෑය වන්දනාමාන කරන බව දක්නට ලැබුණි . මෙම තොරතුරු සෙනෙවියා විසින් දුටුගැමුණු රජුට පැවසූ පසු ඇයව හිමි කරගැනීමේ සිතක් රජුට පහළ විය . එක් දිනයක දී මෙම නාග කන්‍යාව අල්ලා ගත් රාජපුරුෂයන් ඇයව දුටුගැමුණු රජතුමාට භාර දුන් බවත් , රජු ඇයව බලෙන් විවාහ කරගෙන අග බිසව් තනතුරෙහි රැඳ වූ බවත් ජනප්‍රවාදයන්හි දැක්වේ .
රුවන්වැලි මහා සෑය වන්දනා කිරීමට ගිය තමන්ගේ දියණිය නැවත නොපැමිණීම නිසා නාග ලොවේ රජතුමා ඒ පිළිබඳව සෙවීමට නාගයින් එවා ඇත . මෙම පුවත් සියල්ලම නාගයින් විසින් නාග රජුට පවසා තිබේ . එවිට දුටුගැමුණු රජු කෙරෙහි කෝප වූ නාග රජු රජතුමාගේ දිවි තොර කිරීමට නාග මානවකයෙක් යෙදවීය .
නාග මානවකයා දුටුගැමුණු රජතුමාගේ යහන යට සැඟව රජතුමාට දෂ්ට කර ඇත . නමුත් කපුරුනාද නම් වෙදැදුරා විසින් රජුට ප්‍රතිකාර කොට රජුව සුවපත් කර තිබේ . කිහිපවිටක් ම රජතුමාට දෂ්ඨ කළ ද වෙදදුරා විසින් රජු සුවපත් කළ නිසා නාග මානවකයාගේ උත්සාහය අසාර්ථක විය . නමුත් කපටි උපක්‍රමයකින් වෙදදුරාගෙන් ම දැනගත් මරයෝගයකට අනුව නැවතත් රජතුමාට දෂ්ඨ කළේ ය . එම අවස්ථාවේ දී වෙදදුරා විසින් ඒකාන්තයෙන් ම දින හතකින් රජු මිය යන බව දැනගෙන තිබේ .
මෙම අවස්ථාවේ දී දුටුගැමුණු රජතුමා විසින් තම සොහොයුරා වන සද්ධාතිස්ස කුමරුන්ට රාජ්‍යය භාරදුන් බවත් , රුවන්මැලි මහා සෑයේ ඉදිකිරීම් පැවරූ බවත් ජනප්‍රවාදයන්හි සඳහන් වේ .
තවත් ජනප්‍රවාදයක සඳහන් වන්නේ එක්තරා දිනයක දී දුටුගැමුණු මහ රජතුමාගේ හිස මැදට පැන ගත් නාගයෙක් හිසේ හරි මැදට විෂ දළින් සත් වරක් හිස මුදුනට ගැසූ බවයි . එම නාගයා විසින් ම රජතුමාගේ වෙදැදුරාට ද දෂ්ඨ කොට දෙදෙනාව ම මරණයට පත් කළ බව එම ජනප්‍රවාදයේ ම සඳහන් වේ .
එසේම ජයසේන නම් ඇමතියෙකු සමඟින් රති කෙළියෙහි යෙදී සිටී නාග කන්‍යාවක් දැක රජතුමා ඇය සමඟින් රමණය කොට ඇත . එහි දී ජයසේන නම් ඇමතියා කෝප වී රජු සමඟ ආරවුලක් ඇති කරගෙන තිබේ . එම අවස්ථාවේදී නාග දෂ්ටනකින් රජු මියගිය බව ඇතැම් ජනප්‍රවාදයන්හි සඳහන් වෙයි .
උපුටා ගැනීම: The Lanka Post