” කෝ ඔය ළමයා තාලෙට ඇවිදලා පෙන්නන්න.” ඒ අපේ නැටුම් මිස්.
මං ඉතින් මට පුළුවන් විදියට වටයක් ඇවිදලා පෙන්නුවා.
” හ්ම්ම්ම්ම් මැන්ඩියට ඉන්න බලන්න “
කලින් හිටපු කට්ටිය කරපු විදියට මැන්ඩියටත් හිටියා.
මං දිහා ටික වෙලාවක් බලන් හිටපු මිස් මට ,
” ඔය ළමයා අර පැත්තට යන්න ” කියලා කිව්වා. බැලින්නම් මට යන්න කියලා තිබ්බේ නැටුම් වලින් අයින් කරන ළමයි හිටපු ගොඩට.
දැන් මට ඉතිරි වෙලා තිබ්බේ චිත්‍රයි, සංගීතෙයි, ඩ්‍රාමායි විතරයි. මොකක්ද කරන්නේ කියලා හිත හිත ඉන්නකොට මං වගේම අණ්ඩපාල සෙට් එකේ එකියක් කිව්වා ඕලෙවල් වලට ප්‍රැක්ටිකල් නැත්තේ ඩ්‍රාමා වලදි විතරයි කියලා. ආයෙ ඉතින් තව මොනවා හිතන්නද. මං තෝරගත්තා ඩ්‍රාමා.
අපිට ඩ්‍රාමා කරපු මිස් හරිම ශෝක්, මාර ෆ්‍රෙන්ඩ්ලියි. ඒ පීරියඩ් එක තමයි මං ඒ දවස් වල කැමතිම.
කැමතිම පීරියඩ් එක කිව්වට ඉතින් මං ඔහේ පැත්තකට වෙලා හිටපු එක තමයි කලේ. මොකද මට සින්දු කියන්න රඟපාන්න බෑනේ. මං හිතන් හිටියේ තියරි වලින්ම ඩ්‍රාමා වලට A එකක් ගන්නවා කියලයි.
ඔන්න ඉතින් ඕලෙවල් වලට ලං වෙද්දී පොඩියට කසු කුසුවක් ගියා ඩ්‍රාමා වලටත් ප්‍රැක්ටිකල් තියෙනවා කියලා.
ඉතින් ඒකට අපි ලෑස්තිද බලන්න ඩ්‍රාමා මිස් ප්‍රැක්ටිකල් ටෙස්ට් එකක් තියන්න හැදුවා. ඒ දවසට ඇබ්සන්ට් වෙනවා කියලා කලින්ම හිතාගෙන හිටියට මිස් හදිස්සියෙම දවස වෙනස් කරපු නිසා ඒ වැඩේ හරිගියෙත් නෑ.
මිස් කියන චරිතේ තමයි අපි කරන්න ඕනි. එක සැරේ දහදෙනෙක්ට චරිත දහයක් කියලා එයාලට ලෑස්ති වෙන්න පොඩි වෙලාවකුත් දුන්නා. මට හම්බුනේ කොන්දොස්තරවරයෙක්ගෙ චරිතෙ. මිස් දුන්න චරිත වලින් ලේසිම චරිතෙකට තිබ්බෙත් ඒක තමයි.
ඔන්න මගෙ වාරෙ ආවා. මං මිස් ඉස්සරහට ගියා. කට්ටිය වටවෙලා බලාගෙන ඉන්නවා.
” හරි බුද්ධි පටන්ගන්න, ඔයාට විනාඩි පහක් දෙනවා ” මිස් කිව්වා.
” මොකද ළමයෝ පටන්ගන්න ” මිස් ආයෙ කිව්වා.
” බුද්ධි ” ඒ පාරනම් තරහත් ගිහින්.
මිස් කොච්චර කෑගැහුවත් මං නෙමෙයි කටක් ඇරියේ. ඔහේ හිටගෙන බලන් හිටියා.
අන්තිමටම මිස් කිව්වා ” හරි එහෙනම් කැමති චරිතයක් කරන්න ” කියලා.
ඒත් ඉතින් එච්චරම තමයි , ඔහේ හිටගෙන හිටියා.
” දැන් කොහොමද ළමයෝ මං ඔයාට ලකුණු දෙන්නේ ? “
” මිස් “
” ම්ම්ම් “
” මං ගොළුවෙක් වගේ …….. ” කියලා මෝඩ හිනාවක් දාලා එතනින් මාරු වුනා.
එහෙම කතාවක් කියන්න හයියක් ආවේ අපේ ඩ්‍රාමා මිස් හොඳ බව දන්න නිසාමයි. වෙන කෙනෙක්ට එහෙම ඔහොම කියලා තිබ්බනම් කෙලින්ම පන්තියෙන් එළියට.
කොහොම හරි ඕලෙවල් වලට අපිට ප්‍රැක්ටිකල් තිබ්බේ නෑ. තියරි පේපරයක් විතරයි ආවේ.
ඔන්න ඔහොමයි අපි ඕලෙවල් ඩ්‍රාමා වලට A ගත්තේ.
උපුටා ගැනීම: බුද්ධි ජයවීර