දකුණු ඉතාලියේ, රොසොලිනි ගම්මානයේ 1889 මැයි 18 වෙනිදා අපුරු බිළිඳෙක් බිහිවෙනවා. මොහුගේ විශේෂත්වය වන්නේ කකුල් තුනක් සහ ලිංගේන්ද්‍ර දෙකක් පිහිටීමයි. ෆ්‍රෑන්ක් ලෙන්ටිනී ලෙසින් ඔහුට නම් තබනවා. ඔහුගේ උපත පිළිබඳව දෙමාපියන් සතුටුවන්නෙ නෑ. ශාපලත් දරුවකු හැටියටයි ඔවුන් ඔහුව සැලකුවෙ. ඔවුන් තම දරුවාව නිවසින් ඉවත් කිරීමට බොහෝ උත්සාහ දැරුවා.
නමුත් දරුවාගේ මාමා ඔහුට බොහෝ ආදරය කරා. නැන්දා සහ මාමා ෆ්‍රෑන්ක්ව අරන් හදාගත්තා. පසුව දෙමව්පියන්ටද දරුවා ගැන අනුකම්පා සිතී දරුවාව වෛද්‍යවරුන් වෙත අරන් ගියා; පිළියමක් සොයන්න. වෛද්‍යවරු කිව්වේ ශල්‍යකර්මයකින් එක් පාදයක් ඉවත් කලහොත් ජීවිතයට හානි විය හැකි බවයි. එම නිසා, ඔවුන් ඒ අදහස අත් හැර දැම්මා.
1898 දෙමාපියන් දරුවාද රැගෙන ඇමෙරිකා එක්සත් ජනපදයට ගියා. මොවුන් බොස්ටන් හි පිටිසර ගම්මානයක පදිංචිව ගතකරේ කටුක ජීවිතයක්. ෆ්‍රෑන්ක්ට වයස අවුරුදු 9 දී ඔහුව දුටු මැග්නානෝ නම් සර්කස් කණ්ඩායමක හිමිකරුවෙක් ෆ්‍රෑන්ක්ව තම සර්කස් කණ්ඩායමට බඳවා ගත්තා. දිනෙන් දින ඔහු සර්කස් කණ්ඩායමේ ජනප්‍රිය සාමාජිකයෙක් වුනා. මේ අතර, සර්කස් නැරඹීමට පැමිණි තරුණියක් ඔහු කෙරෙහි උනන්දුවක් දක්වන්නට පටන්ගත්තා. ඇයගේ නම තෙරේසා මරේ. 1907 දී ඔවුන් දෙදෙනා විවාහ වුනා. ඔවුන්ට දරුවන් හතර දෙනෙක්ද ලැබුණා. වසර 25 ක් ඔවුන් සතුටින් විවාහ ජීවිතය ගෙනගියා. නමුත් පසුව ඇතිවුණු මත ගැටුම් නිසා ඔවුන් දෙදෙනා වෙන්වුනා.
කලක් තනිකඩව ජීවත්වුනු ෆ්‍රෑන්ක්ට හෙලන් ෂූප් නම් කාන්තාවක් හමුවුනා. පසුව ඔවුන් දෙදෙනා විවාහවී ජීවිතයේ සැඳෑ සමය සතුටින් ගත කරා. 1960 දී පමණ ඔහු පෙනහලු සම්බන්ධ රෝගයකින් පීඩා වින්දා. ප්‍රතිකාර කරත් එය සුවවුනේ නෑ. 1966 සැප්තැම්බර් මස 21 දින එම රෝගය උත්සන්නවී ඔහු මිය ගියා.
රෝ මීඩියා ලිපියක් ඇසුරින් සකස් කලා.ඡායාරූප අන්තර්ජාලයෙන්.
උපුටා ගැනීම: Chandranayana Soysa