හදනවා නම් ගට ඇති පුතෙකුයි රුව ඇති දුවෙකුයි හදපන් කියා ප්‍රස්තාව පිරුලක් ද ඇත.
ගට නැති උන්ගේ ශෝචනීය ඉරණම ගැන කතා කොතෙකුත් ඇත. ඒකෙන් ගට ඇති පුතුන් සදා ගොඩ ගිය බවට වැරදි මතයක් සමාජගත විය හැකි නිසා ගට ඇති පුතෙකු මුහුණ පෑ ඛේදනීය ඉරණම පිළිබඳව හුදී ජන පහන් සංවේගය පිණිස මෙසේ ලියා තබමි.
මේ කියන තැනැත්තා ද එවකට සරසවි සිසුවෙකි. අපට වඩා ජ්‍යෙෂ්ඨ බැච් එකක අයෙකි. අහිංසක පෙනුමක් ඇති අයෙකි. දෙවැනි වසරේ මුල් හරියේ දී ඔහුට කිසියම් (ඔහුගේ) බැචියෙකු පිලිබඳ පිලිබඳ සිතක් පහල විය. හරියටම කියතොත් බැචියන් දෙදෙනෙකුම පිළිබඳව යම් යම් මෘදු හැඟීම් ඔහුට ඇති වී තිබිණි.
ඔහු සිය රූමාට නොසඟවා තමාගේ සිතු හෙළි කළේය.
“මචං කල් දාන්නේ නැතුව එකෙක් ගෙන් අහපන්. හරි ගියොත් එහෙමයි. අප්සැට් ගියොත් අනිත් එකීගෙන් අහපං,” මිතුරා උපදෙස් දුන්නේය.
ප්‍රේමවන්තයා පසුදාම මේ දෙදෙනාගෙන් තමන්ට මුලින්ම හමු වූ එකියට ප්‍රශ්නය ඉදිරිපත් කළේය.
ඇයගේ මුහුණ රතු වූවා වෙන්නට බැරිය. ඇය තරමක් තලඑළලු පැහැයකින් යුත් යුවතියක් නිසාය. කෙසේවෙතත් ඇගේ හද ගැස්ම නම් වැඩි වන්නට ඇත.
“අම්මගෙන් අහලා කියන්නම්,” යැයි වදෙන් පොරෙන් කියා ගත් ඕ එතැනින් පැන ගත්තාය.
සතියක් යන තුරු ඇය මෙය කිසිවෙකුටත් නොකියා සිතේ සඟවා ගෙන සිටියාය. අම්මාගෙන් අසන්නම් කීවද එසේ අසන්නට ද හිත හදා ගත නොහැකි විය.
මේ අතරතුර අක්බාර් ශාලාවේ දෙමිතුරෝ ප්‍රගති සමාලෝචන රැස්වීමක් පැවැත්වූහ.
“මොකද වුනේ ?”
“………..ගෙන් ඇහුවා. අම්මගෙන් අහලා කියන්නම් කිව්වා.”
“දැන් කොච්චර දවසක් ද?”
“සතියක්.”
“එහෙනම් මචං ඒ බලාපොරොත්තුව අත ඇරපන්. එයාගේ කැමැත්තක් තිබුනා නම් ඊළඟ වීක් එන්ඩ් එකේ ගිහිල්ලා අම්මගෙන් අහනවා. එහෙනම් මෙලහකට උඹට වචනයක් දීලා. උඹ අනිත් එක්කෙනාගෙන් අහපන්.”
ඔහු පසු දා උදයේම ඒ මහදැනමුත්තාගේ උපදේශය අනුව ක්‍රියා කළේය.
එදා හවස වන විට අර මුලින්ම ඇසීමට භාජනය වූ ගැහැණු ළමයාගේ පෙම් හැඟුම් මුවවිට උතුරා යමින් ඇගේ දෑස් තෙත් කරන්නට ආසන්න වෙමින් තිබිණ. තවදුරටත් මෙය තනිව උසුලා ගත නොහැකි වූ අසරණිය තම රූමියට මේ කතාව හෙළි කරමින්, “හැබැයි හරි අහිංසකයි, නේද? මට හා කියන්න හිතෙනවා,”යැයි කීවාය.
දෙයියන්ට විහිලු කරන්නට හිතුනාම අන්දරේ කැලේය. දෙයියෝ දෙන්නේ හොඳම විහිලුය. මේ රූමිය අර අහිංසකයාගේ හිත ගිය දෙවැනි යුවතියයි!
“අපෝ, ඔව්. මාර අහිංසකයි! අද උදේ මගෙනුත් ඇහුවා,” ඕ කීවාය.
ගට වුනත් නරකට හිටින වෙලාවල් ඇත!!!!
උපුටා ගැනීම: Parakrama Kuruppu