මේ සටහන කළු ජාතික ජෝර්ජ් ෆ්ලොයිඩ් හෝ එදා ඔහු මිය යන තෙක් ඔහුගේ ගෙළ විනාඩි 9 යි තත්ත්පර 29 ක කාලයක් තිස්සේ පාගෙන සිටි ඩෙරෙක් චෝවින් නම් සුදු ජාතික දාමරික පොලිස් නිලධාරියා ගැන නොවේ.
මේ සටහන එදා ඒ කෲර සිදුවීම තමන් අත ඇති ජංගම දුරකථනයෙන් පටිගත කළ 17 හැවිරිදි ඩානෙලා ෆාසියර් නම් තරුණිය ගැනය. ඇය එදා ක්ෂණිකව ක්‍රියාත්මක නොවූයේ නම් මේ සුදු දාමරිකයා සමහර විට අදටත් මෙනියාපෝල්ස් පොලිසියේ පොලිස් නිලධාරියෙකු ලෙසින් සේවය කරනවා වීමට බොහෝ දුරට ඉඩ තිබුණි.
එහෙත් ඒ වෙනුවට සියලුම චෝදනාවලට වැරැදිකරු වූ ඩෙරෙක් චෝවින්ට වසර 40 ක සිර දඬුවමක් නියම විය.
පසුගිය වසරේ මැයි 25 වැනිදා දෙනෝ දාහක් ගැවසෙන මහා මාර්ගයේදී දිගහැරුණු ජෝර්ජ් ෆ්ලොයිඩ්ගේ අවසාන මොහොත, පදික වේදිකාවේ සිටිගෙන තම අත ඇති ජංගම දුරකථනයෙන් වීඩියෝ කළ මේ තරුණිය, තම ක්‍රියාව අධිකරණයේදී සුදු ජාතික චෝවින්ට විරුද්ධව ප්‍රබල හා බිඳිය නොහැකි සාක්ෂියක් වෙතැයි සිහිනෙන් වත් සිතන්නට ඇතිදැයි සැක සහිතය. එහෙත් එය එසේම සිදු විය.
චෝවින්ට අධිකරණයෙන් දඬුවම් ලැබුණු පුවත අසා මහත් ප්‍රීතියට පත්ව සිටින ලක්ෂ සංඛ්‍යාත ඇමෙරිකානුවන් අතර ෆාසියර් ද අයෙකි.
“ඒක අහලා මට හයියෙන් ඇඬුණා…” ෆාසියර් පවසයි.
“මම ගොඩක් කණස්සල්ලට පත්වෙලා හිටියේ. ඒත් ඔහු සියලුම චෝදනාවලට වැරැදිකරු වුණා කියලා දැනගත්ත ගමන්ම මම දෙවියන්ට ස්තුති කළා. දෙවියන්ට ස්තුති වේවා. ජෝර්ජ් ෆ්ලොයිඩ්, අපි ඒක කළා… ඔබට යුක්තිය ඉටුවුණා” යැයි ෆාසියර් සිය ෆේස්බුක් ගිණුමේ සටහනක් තබමින් පවසා ඇත.
ෆ්ලොයිඩ්ගේ ජීවිතය අහිමි වීම සියසින් දකින අවස්ථාව කොතරම් වේදනාත්මක එකක් වුවත් ෆාසියර් එය වීඩියෝ කිරීම නවතා දැමුවේ නැත.
“මට ඇහුණා ජෝර්ජ් ෆ්ලොයිඩ් “මට හුස්ම ගන්න බැහැ. කරුණාකරලා මාව අතහරින්න…, කියනවා. පස්සේ එයා අම්මේ අම්මේ කියලා ඇඬුවා…” යැයි ෆාසියර් අධිකරණයේ සාක්කි ලබාදෙමින් පැවැසුවාය.
“එයා ගොඩාක් වේදනාවෙන් හිටියේ. මට හිතුණේ තමන් මියයනවා කියලා එයා ඒ වෙලාවේ දැනගෙන හිටියා”
චෝවින්ව අධිකරණය ඉදිරියේ වැරැදිකරුවෙකු කිරීමට බලපෑ ප්‍රබලම සාක්ෂියක් වන මෙම වීඩියෝව සම්බන්ධයෙන් ජෝර්ජ් ෆ්ලොයිඩ්ගේ නැන්දණිය වන ඇන්ජෙලා හැරල්සන්, ෆාසියර්ට සිය ස්තුතිය පුදකර සිටියි.
“මෙතැන තියෙන කණගාටුවට කාරණය තමයි, එදා ඒ 17 හැවිරිදි කෙල්ල හිටියේ නැතිනම්, මේ මරණය බොහෝ විට සුදු ජාතික පොලිස් නිලධාරියෙකු අතින් මියගිය තවත් කළු ජාතිකයෙකුගේ මරණයක් වීමට ඉඩ තිබුණා. එහෙනම් ඔවුන් “මේක මත්ද්‍රව්‍ය නිසා වුණා, මේක අහවල් දේ නිසා වුණා” කියලා කියාවි” හැරල්සන් පවසයි.
“එහෙනම් අපිට කවදාවත් මේ සිද්ධියේ ඇත්ත දැනගන්න ලැබෙන්නේ නැහැ”
ෆාසියර් ගේ වීඩියෝවේ බලපෑම චෝවින් ට දඬුවම් ලබාදීමෙන් පමණක් නැවැතුණේ නැත. ෆ්ලොයිඩ් මිය යන අවස්ථාවේදී අසළ සිටි අනෙක් පොලිස් නිලධාරීන් තිදෙනාව සේවයෙන් පහ කිරීමටද ඇයගේ වීඩියෝව උපකාරී විය.
ඉතිං අවසන් වශයෙන් කිවයුතු යමක් ඇත. ඒ ඔබ අත ඇති ජංගම දුරකථනයෙන් අරුමෝසම් ඡායාරූප සහ සෙල්ෆී පමණක් නොව, අවශ්‍ය නම් පුරවැසි වගකීම ඉටු කිරීමට හැකි ඡායාරූප සහ වීඩියෝද ලබාගත හැක.
අවශ්‍ය වන්නේ ඩානෙලා ෆාසියර් ට මෙන් නිර්භීත හිතක් පමණකි.
ඉතිං හැකි සෑම විටම සමාජයට ඔබෙන් ඉටු විය සේවය ලබාදීමට තරම් නිර්භීත වන්න.
උපුටා ගැනීම: – අනිල් කරුණාරත්න –