ගුණමකුවොන්ගේ ග්‍රහනයෙන් මිදෙන්නට නම්… (වැල්වටාරම්)

පුළුවන් තරම් දේවල් කරල කරල එක දශමෙකින් කල හොඳ සේරම නැති වෙනව නම් විශ්වාස කරන්න ඔබ ඉන්නේ සැනසීමක් ලැබෙන ඉසව්වක නෙමෙයි.. මොකද මේ කෙටි ජීවිත කාලෙ ඇතුලෙ හිතේ සැනසීමෙන් සතුටින් ගත කරන්න බැරි නම් ඔබට වගේම ඔබ වටේ ඉන්න අයටත් වෙන්නෙ ජීවිතේ කියන ලස්සන අත්දැකීම දවසින් දවස නීරස වෙන එක..

අපේ ජීවිත වල අපි ආදරේ කරන මිනිසුන් ගොඩාක් සහ අපිට ආදරේ කරන මිනිසුන් ගොඩකුත් ඉන්නව.. නමුත් ඔය දෙගොල්ලන්ටම බැරි නම් අපිට අවශ්‍යම එක මොහොතකදී සහයක් වෙන්න හොඳම දේ ” ක්‍රිකට් ක්‍රීඩකයෙක් අමාරු පන්දු වලට පහර නොදී නිදැල්ලේ යවමින් කඩුල්ලේ රැඳී ඉන්ම ගමන් තමන්ගේ ඉලක්ක ගත ලකුණු වලට යනව වගේ ” එයාලටත් නිදැල්ලේ යන්න දෙන්න..

ඉතිං ඔබට ඕනෙ සතුටින් ඉන්න නම් ඉඟියකින් හරි ඔබව ප්‍රතික්ෂේප කල අය පස්සේ කිසිම දවසක යන්න එපා.. මොකද ඒකාන්තයෙන්ම ඔබේ කන්නලව්ව ඔවුන් තේරුම් ගන්නේ නැහැ.. ඒ වගේම මොන කැපකිරීම කළත් අගයක් නැති අය වෙනුවෙන් තවත් කැප කිරීම් කරන්න එපා.. මොකද එහෙම මිනිසුන්ට ඔබව පයට පෑගෙන දූවිලි තරම් වත් වටින්නේ නැහැ..

ඒත් එක්කම ඔබේ මානසික නිදහස නැති කරන , එයට බාධා කරන අයවලුන්ට වගේම කිසිම දේක හොඳක් නොදැක හැම දෙයකම අඩුපාඩු විතරක් දකින මිනිස්සුන්ට ඔබේ වටිනා කාලය , මුදල , ශ්‍රමය වැය කරමින් කැපකිරීම් කරන්නත් එපා. මොකද ඔවුන්ට එයින් එක සත පහක වැඩක් වෙන්නේ , දැනෙන්නේ නැහැ..

මිනිසුන් හැමදාමත් තමන්ට පහසු සහ තමන්ගේ හිතු මනාපයට සම්බන්ධතාවයන් හසුරවනවා වගේම අවසන් කරනවා.. ඉතිං ඒ මත්තේම නැහෙමින් ඔබේ සතුට ඔබ ඔවුන්ගේ දෑත මත නම් තබන්නේ කිසි දවසක සතුටින් ජීවත් වෙන්න ඔබට බැරි වේවි.. කාලය බොහොම ඉක්මනින් ගත වෙලා යන ලෝකයක බැඳීම් එක්ක ඔට්ටු වෙවී ඔබ නිර්දෝෂයි කියල ඔප්පු කරන්නට කාලය වැය නොකර මීලඟ මොහොතේ ජීවිතයෙන් සමු ගන්නා කෙනෙකු මෙන් ජීවිතය දකින්න..

විශ්වාස කරන්න ඔබට ඉන් සතුටක් ලැබේවි.. මුලදී කොතරම් නම් අපහසු උනත් අවසානය සතුටින් කෙරවල වෙනවා ඒකාන්තයි.. මොකද කන්දක් නගින්න අමාරු උනාට ඔබට පල්ලමක් අවශ්‍ය නම් කන්දේ මුදුනටම යන්න වෙනව.. ඉතිං අද දවසේ ඔබ ඔබේ වටිනාකමට අගයක් දුන්නොත් හෙට දවසේ ඔබේ මහන්සියට ඇගයීමක් දෙන මිනිසුන් ඔබට නොවැරදීම මුණ ගැසේවි.. එතකම් ඔබ ජීවිතය නැමැති කන්ද සතුටින් තරණය කරන්න..

උපුටා ගැනීම:

Girls Magazine වෙනුවෙන්,

ශාෂු අමරසේන