මොකද පුතේ හැමදාම කෑම ඉතුරු කරගෙන එන්නේ ඇයි බඩගිනි නැද්ද ඔච්චරම නටලත් ඉස්කෝලෙදි…
මම බඩපිරෙන කම් කෑවා. අම්මා මට හාල්මැස්සෝ පාන් හදලා දෙනවද…මේනු අම්මා දිහා බලලා මිමිනුවා.
අම්මා ඊලඟ දිනේ හිතුවා කෑමේ වෙනසක් කරලා බලන්න. අම්මා කැමති වුනේ නැහැ හාල්මැස්සෝ දාලා පාන් හදන්න. පාන් වෙනුවට බත් තෙම්පරාදුවක් දැම්මා. එදානම් කාලා තිබුණා.
ටික දවසක් යනකොට පෙට්ටියේ වෙන වෙන කෑම ජාති වල වැටිනු කෑලිත් තියෙනවා. ළමයි මාරු කරගෙන කනවා ඇති.
කොහොම හරි බෙදාගෙන හරි කනවනම් ලමයිනේ… අම්මා හිතුවා.
අම්මේ වාර විභාගයට අත්වැඩක් හදාගෙන එන්න කිව්වා. ඉස්කෝලෙ බෑග් එක ගලව ගලවා ගෙදරට ඇතුළු වෙනකොටම මේනු කිව්වා. තව ඒවා හදන හැටිත් ඉගෙනගෙන එන්න කිව්වා.
පුතා කාලා ඉන්නකෝ අපි හවස් වෙලා හදමු.
අම්මා මේනුත් එක්ක ලස්සන පැස්බරෙක් හැදුවා. සුදු කොළ හතරක් අරගෙන මේනුට කිව්වා කහ පාටින් පාට කරලා අවාන වගේ නවන්න. ඊලඟට අවාන්වල කොන් එකිනෙකට අලවලා ලස්සන රවුමක් හැදුවා. ඒක තමයි පැස්බරාගේ ඇඟ ඊට පස්සෙ කහ පාටින් පාට කල පටි තුනක් අරගෙන අවාන වගේ නවලා ස්ප්‍රින් එකක් වගේ දිගෑරෙන පටි බෙල්ලයි කකුල් දෙකටයි ඇලෙව්වා. ඔලුවට පුන්චි රව්මක් අලවලා හොටෙය් ඇසුත් තිබ්බා. හරිම ලස්සන පැස්බරෙක් හැදුනා. අම්මා මේනුට කොලාජ් ක්‍රමයට අත් වැඩකුයි තව කොල ගුලි කරලා හදන අත් වැඩකුයි කියලා දුන්නා.
ඊලඟ සුමානයම වාර විභාගේ තිබුනා. අම්මා මේනුට උදව් කලා පාඩම් වැඩ වලට. අම්මා රස්සාවෙන් ගෙදර නැවතුනෙත් මේනුව බලාගන්න කෙනෙක් නැති නිසා.
දැන් වාර විභාගෙ අවසන් නිසා මේනු ගෙදර එන්නේ කාක් පැටියෙක් වගේ හඩු වෙලා නටලා නටලා දවස පුරාම. අම්මට ඇ‌දුම් පිටින්ම රෙදි හෝ‌දන යන්ත්‍රයට දාන්න හිතෙන තරමටම ඇ‌දුම් සහ මේනු කුණු පාටයි.
අම්මේ සදුදා අපේ දෙමාපිය රැස්වීම. දැන්වීම් කොලේ දෙන ගමන්ම මේනු කිව්වා.
සදුදා අම්මා මේනුත් එක්ක උදෙන්ම ගියා ඉස්කෝලෙට. පන්සිල් ගත්තට පසු ලමයින්ට පිට්ටනියට යන්න කියලා තම පුතුගේ පුටුවෙන් දෙමව්පියන්ට වාඩි වෙන්න කියලා ගුරුතුමී කිව්වා.
ගුරුතුමී හැම සුමානෙම ලමයි වාඩි වෙන තැන මාරු කරනවා. එක්කෙනෙක් එක්කම වාඩි වෙන්න දෙන්නෙ නැහැ.මේනු ලඟ වාඩි වෙලා හිටියේ තුමුල. තුමුලගේ අම්මා මේනුගේ අම්මාට සුහඳව හිනාවෙලා පුතාලා දෙදෙනාගේ පුංචි පුටු දෙකේ වාඩි වුණා. ඇය තමයි මේනුගේ අම්මාට මුලින්ම හමුවුනේ පළමුවෙනි ශ්‍රේණියට බාර දෙන්න ආ දවසේ අවුරැදු හතරකට පෙර. ඇය මේනුගේ අම්මා සමඟ කුළුපඟ කෙනෙක්.
ගුරුතුමිය ලකුණු කල ප්‍රශ්ණ පත්‍ර ෆයිල් ටික දෙමව්පියන්ට බෙදා දුන්නා. දෙමව්පියන්ට සතුටටත් දුකටත් හේතු කාරනා පහල වුණා ලකුණු වල තරම අනුව.
ප්‍රශ්ණ පත්‍ර පෙරලමින් අඩු වැඩි ලකුණු අතර දෝලණය වෙමින් සිටින දෙමව්පියන්ගේ සද්දයකුත් නැහැ. ටික වෙලාවකින් තුමුලගේ අම්මාට ලොකු හිනාවක් ගියා. ඉතින් මේනුගේ අම්මාටත් සතුටක් ඇතිවුනා තුමුලත් හොදින් ලකුණු අරගෙන ඇති කියා.
තුමුලට ඉංග්‍රීසි වලට ලකුණු අසූවක් තිබුණා. එහෙත් තුමුලගේ අම්මාට ඒ ගැන පුදුමයි. ඔහු ඉංග්‍රීසි වලට දුර්වල බවත් පන්තියකට යවන්න අවශ්‍ය බවත් මට පැවසුවා ප්‍රශ්න පත්‍රය බලන්න කලින්ම. මේනුට අනූඅටක් තිබුණා. දෙදෙනාම අනෙක් පත්‍රත් හොදින් කර තිබුනා.
ළමෝ කර තිබූ අත්වැඩ බිත්තියේ ප්‍රදර්ශනය කර තිබුහ. මේනු ගෙදරදී පුරුදු වූ කොලාජ් පින්තූරයක් කර තිබුනා. ඊට ටිකක් එහායින් ගෙදරදී හැදූ පැස්බරාත් ප්‍රදර්ශනය කර තිබුනා.ඒකෙ තුමුලගේ නම ලියා තිබුණා.
ගෙදර එන ගමන් අම්මා මේනුගෙන් පැස්බරා තුමුලගේ නමින් ඇති කතාවේ සුලමුල ඇහුවා. ඒ ගැන කියන්න මේනු එතරම් කැමැත්තක් දැක්වූයේ නැහැ. ඒත් එහෙම වැරදි කිරීමේ භයානක කම ගැන අම්මා මේනුට කියා දුන්නා. ලොකු විභාග වලදී කො‌පි කලහම පෙන්නුව කෙනාගේ සහ කො‌පි කල යන දෙදෙනාගෙම ලකුණු නො‌දෙන බව අම්මා මේනුට පැහැදිලි කලා.
තුමුල මේනුගෙන් බලන්න කියලා ඉල්ලගෙන එයා ඒ වගේ එකක් හදන්න උත්සාහ කලත් බැරිවුනු බැවින් මේනුගේ කැමැත්තෙන් එය ඉදිරිපත් කල බව පැවසුවා.
ඉතින් යාලුවන්ට උදව් කල යුතු බවත් මේක නම් යාලුවාට කල වැරද්දක් බවත් අම්මා මේනුට පැහැදිලි කලා. අම්මාට මේනුගේ වෙනසක් දැනුනා. මේනුව තුරුලු කරගත් අම්මා ආයෙත් ඒ වගේ දේවල් නොකරන ලෙස පොරොන්දු කර ගත්තා.
අම්මා තව දෙයක් කියන්නද? මේනු මිමිනුවා.
තුමුල ගේන හාල්මැස්සො පාන් හරිම රසයි.
ඉතින් එයාගේ හාල් මැස්සො පාන් එක මට දෙනවා කිව්වා ඉන්ග්‍රීසි ප්‍රශ්න පත්තරේ පෙන්නුවොත්.
උපුටා ගැනීම: නිලන්ති ජයවර්ධන