නිර්මලාගේ ෆේස්බුක් එකේ ඉන්නේ කීප දෙනයි. ඒ එක්කෙනෙක් චාරුනී මැඩම්. ඒ මැඩම් වයසයි. අපි දෙන්නගෙම ගව්‍රවය දිනා ගත් කෙනෙක්. දෙන්නගෙම එෆ් බී එකේ හිටියට ඉතින් අවුරුදු ගානක් කිසිම සම්බන්ඳයක් තිබුනු කෙනෙක් නෙවෙයි. එතුමිය එෆ් බී එක වැඩිය පාවිච්චි කරෙත් නෑ.
උඹල දන්නවනේ අපේ බවලත් උදවිය හිටපු ගමන් තමන්ගේ මනුස්සයත් එක්ක මාර ලව් ෆොටෝ දානවනේ ‘මගේ පන’ වගේ කැප්ශනුත් එක්ක. ඒ මදිවට දිග සෙන්ටිමෙන්ටල් හෑලිත් ලියනවනේ සමහරක් ‘ඔයා නැත්තන් මගේ මෙව්ව එක මෙව්ව වෙන් නෑ පනේ’ වගේ. පිරිමි ගොඩ දෙනෙක් ඔය හෑල්ල කියවන් නෑ. ආයෙ ඉතින් සාලිය අසෝක මාලා හරි රෝමියෝ ජූලියට් හරි නෙවෙයිනේ. ඩාලින්, පන, මගෙ මුලු ලොවම ඔබයි, ඉඳ හිට මමද ඔබයි වගේ කෑලි එෆ් බී ලිව්වට ඉතින් ගෙදරදී පුක හමයනකන් රන්ඩුත් කරනවනේ උන්දැලම.
ඔන්න දවසක් චාරුනී මැඩම් එයාගේ අවුරුදු තුන්සීයක් විතර පරන මගුල් ෆොටෝ එකක් දාලා තිබ්බා එෆ් බී එකේ. අනේ මැඩම් පූස් පැටියෙක් වගේ එතුමියගේ මහත්තයාගේ මූන බලන් ඉන්න එකක්. හරිම ලස්සනයි දෙන්නම. උඩින් ලියලා තිබ්බා ‘මගේ මුලු ලෝකෙම එලිය කෙරූ.. ‘ ගාලා හෙන හෑල්ලක්. මම ඉතින් ඔය මගුල කියවන් නැතුව සාමාන්යෙන් මම පාවිච්චි නොකරන රතු පාට හාට් එමෝජි එකක් දාලා එතුමියලගේ ඇනිවසිරි එකට විශ් කරා ‘හැපී ඇනිවසරි මැඩම්. බෝත් ලුක් වෙරි බියුටිෆුල්’ කියලා. පැයකට විතර පස්සේ නිර්මලාගෙන් කෝල් එකක් ආවා. ‘මොනවද අනේ ඔයා අර කරල තියෙන්නේ එෆ් බී එකේ?’ ගාලා ගෑනි එයාගේ නෝක්කඩු ගියර් වල ටොප් ස්වරයෙන් ඇහුවා. අප්පට සිරි! මොන නස්පැත්තියක් වෙලාද?! වෙන ගෑනියෙකුට යවපු මෙසේජ් එකක්වත් අහු වෙලාද? සැලුන් පුලුන්ඳ? වගේ සාමන්යෙන් පිරිමියෙකුට එන සිතුවිලි එකොලොස්දාහක් විතර මගේ කුඩා මොලේ විදුලි කෙටුවා. ‘ඇයි?’ ඇහුවා. ‘අර චාරුනී මැඩම්ගේ මන්නුස්සයා ගිය සතියේ මැරිලා. ඒකට දාපු ෆොටෝ එක..’ එච්චරයි නිර්මලා කිව්වේ. තිබ්බ ෆෝන් එක රූන් ගාලා ගිහින් මැකුවා කොමෙන්ට් එක. වෙනස් කරා හාට් එක කඳුලු වලට!!
යකෝ මීට පස්සෙනනන් කියවලා මිසක් කොමෙන්ට් කරන් නෑ කියලා ප්‍රතිපත්තිමය තීරනයක් ඇරන් නිර්මලාට ගැසට් එකකින්ම පොරොන්ඳු වුනා! ඔය වගේ උඹලටත් වෙලා නැද්ද නස්පැත්ති?
උපුටා ගැනීම: Susantha Pethiyagoda