හීනෙන් ලැබුණ ලමයි!! (වැල් වටාරම්)

එක්තරා කාන්තාවක් විවාහ වෙලා ආවෙ දුරබැහැර වෙලඳාමෙ යෙදෙන කෙනෙක් එක්ක. ඉතින් විවාහවෙල ටිකදවසකින් මිනිහ බඩුමුට්ටු පටවගෙන වෙලඳාමෙ ගියා ගියාමයි ආරංචියක් වත් නෑ! බිරිඳ ඉන්නෙ නැන්දමාමල එක්ක.

ටික දවසක් යනකොට මේ තරුණ බිරිඳගෙ පාලුව තනිකම ගැන හදවත උනුවුණු තරුණයෙක් මෙයාට කිට්ටුකලා. ඔය පුරුෂ පාර්ශ්වයට ඒ වගේ සමාජ සත්කාර කරන්න පුලුවන් විදියට අනුන්ගෙ විශේෂයෙන් තරුණ කාන්තාවන්ගෙ දුකේදි උණුවෙන හදවතක් තමයි දෙයියො දීල තියෙන්නෙ !

වැඩේ නැගල ගියා. මාසදෙකතුනක් යනකොට නැන්දම්මාට තේරුණා මොකක්දෝ අවුලක් තියෙන බව. ලේලිගෙන් මේ ගැන විපරම් කලා.

‘මොකද දුවේ මේ ටික දවසක ඉඳල වෙනසක්? පුතත් ගෙදර නැතිහින්ද අපිටත් මේක හරි අවුලක් වෙලා’

‘ ආ ඒකට බයවෙන්න එපා අම්මෙ එයා ගෙදර නැතිවුණාට හැමදාම රෑට මන් ගාවට හීනෙන් එනව. ඉතින් දැන් අපි දෙන්නට අපේම කියල දරුවෙක් ඉඳීවි!!’

‘ එහෙම දෙයක් වෙන්න පුලුවන් ද’

‘ඇයි බැරි මේ වෙලා තියෙන්නෙ ‘

දැන් නැන්දම්මටත් මේක ඇත්තද බොරුද කියල හිතාගන්න බැරි උනා. එයාට එහෙම දැනුමක් තිබ්බෙත් නෑ ,ඒ වගෙ අත්දැකීමක් ඇත්තෙත් නෑනෙ.

‘ ඒ උනාට ඒ කතාව විශ්වාස කරන්න බෑ . කොහොම උනත් ඔය දරුවා ගමේ ගිහින් පුතා ආවම ඇවිත් මේක විසඳගන්න’

ලේලි ගමේ ගිහින් සැමියා ආවට පස්සෙ ආපහු ආවා.

‘ අපි දෙන්නගෙ තියෙන ආදරේ බැඳීම වැඩිනිසා තමයි මෙහෙම උනේ. ඔයා එහේ ඉන්නකොට මන් ගැනම නේ හිතහිත ඉන්න ඇත්තෙ! ඉතින් දෙන්නටම නින්ද ගියාම අපේ ආදරේ අපිව එකතුකරල ‘

කාල වරෙන්කො! . දැන් මිනිහටත් ගිලින්නත් බැරි වමාරන්නත් බැරි ගුලියක් තමයි හිර උනේ!

ඒත් මේක එකපාරටම පිලිගන්නත් බෑනෙ. මිනිහ මෙහෙම යෝජනාවක් කලා.

‘හරි ඔයා කාලි අම්ම දේවාලෙට ගිහින් ඔය කතාව ඇත්ත කියල දිවුරන්න ඕන, කැමති ද?’

‘ මන් ඕන දේවාලෙක ගිහින් දිවුරන්නන්’

මිනිහටත් දැන් හිතට හොඳයි , ඇයි ගමේ නෑදෑයො ඉස්සරහ කාලි අම්ම දේවාලෙ දිවුරනව කියන්නෙ ලේසිපාසු වැඩක් නෙවෙයි නෙ!

දිවුරුම් දෙන දවස ආවා.තමන්ගෙ දෙමව්පියන් , එකම දරුවා ගැන කියල දිවුරන්න තමයි බිරිඳ ගෙ එකඟතාවෙ. මෙයා අම්මට රහසින් කලින්ම සිද්දිය කියල අම්මට කිව්ව තාත්තයි අම්මයි දෙන්නම මුං ඇට ටිකක් ඔතාගෙන කාටත් හොරෙන් අරන් එන්න කියල .

දැන් දරුවත් එක්ක අම්මයි තාත්තයි දේවාලෙ ඇතුලට අරන් එක පැත්තකින් හිටවල ගමේ අනිත් අයයි නැන්දමාමයි හැමෝම ඉස්සරහ දිවුරන්න ගත්ත.

කාරනේ කියල ඉවරවෙලා මෙහෙම කිව්ව.

‘මේ කියපු කාරනා සත්ත බවට මම මුන් පල්ලා දිවුරනව! මන් කියන්නෙ බොරුවක් නන් මේ මුන් දවස් තුනක් යන්න ඉස්සර විනාසවෙලාම යන්න ඕන’ . අම්මල දිහාට අර මුංඇට තියෙන අත දික්කරගෙන කිව්ව.!!’

දවස් තුනක් ගියා! කාටවත් මුකුත්ම උනේ නෑ.!!

මිනිහ බිරිඳව ගෙදර කැන්දන් ආව. ඒ උනාට දේවාලෙ කපුවට මේක ඇල්ලුවේ නෑ. මිනිහට කතන්දරේ ඇහුවම තේරුණා හොරයක් කලේ කියල. මිනිහ දේවාලෙ වැඩ කරන අතරෙ ආරූඪයෙන් වගේ කියවන්න ගත්ත!

‘ මේ පිංබිම අපවිත්‍ර කරලා දැන් මේකෙන් මුලු ගමටම විතරක් නෙවෙයි රටටම සාපවෙලා විනාසවෙනවා’

හැබැයි කපුව සිද්දිය මොකක්ද? කවුද?කියල කිව්වෙ නෑ.

මේ ආරංචිය රටපුරා ගියා . ඉතින් ප්‍රචාරයක් යැව්ව රටවටේටම මේ සාපයෙන් රට ගලවගන්න පුලුවන් කෙනෙක් ඉන්නවනම් ඉදිරිපත් වෙන්න කියල . කවුරුත් ඉදිරිපත් වුනේ නෑ. ඒත් අර කාන්තාව ඉදිරිපත් වුනා . රටේ නායකය ලඟට එක්කන් ගියාම කිව්ව.

‘ මන් මේක නතර කරන්නන්!, හැබැයි මට ඔබතුමාගෙ මැතිණිය ඇතුලු මේ රටේ ඉහලම ඇත්තන්ගෙ නෝනල මුණ ගැහෙන්න ඉඩදෙන්න ඕන!’

ඉල්ලීමට ඉඩ ලැබුණ. මුලින්ම ගියා නායකයගෙ බිරිඳ ලඟට ගිහින් කිව්ව:

‘ අපිදෙන්නගෙ පතිවෘතා බලයෙන් විතරයි මේක නතර කරන්න පුලුවන්! මොකද තමන්ගෙ ස්වාමියා ඇර වෙනත් පිරිමියෙක් ගැන අපි දෙන්නම හීනෙන් වත් හිතල නෑනෙ!!’

අර නෝන ලොකු අමාරුවක වැටුනෙ.! ‘ අනේ මන් ඒ උනාට අපේ අහවල් තුමා ගැන සමහරවෙලාවට කල්පනා කරනවනෙ. ඒකට මොකක්ද කරන්නෙ. ?’

‘ එහෙනම් හරියන්නෙ නෑ. ‘

මේ කතාව කාටවත් නොකියන පොරොන්දුව පිට මෙයාට තෑගිත් දුන්නා .එයාගෙන් පස්සෙ අනික් නායක කාරකාදීන් ගෙ බිරින්දෑවරුන් මුණ ගැහුනම ලැබුණෙත් මේ උත්තරේම තමයි !

වෙන පිරිමියෙක් ගැන හිතලවත් නැති කාන්තාවක් හිටියෙ ම නෑ! සමහර අය හිතන එකට අමතරව තවත් දුර ගිහින් !ඒ හැමෝම මෙයාට තෑගිබෝග දීල යැව්ව! මෙයා ඒව පටවගෙන ගියා ගමට. ඊටපස්සෙ කපුව ආරූඪ වෙන වෙලාව දැනගෙන ගියා දේවාලෙට. ගමේ අයටත් කතාකරල රැස්කලා.

‘ මන් දැන් තනියම දේවාලෙ ඇතුලට ගිහින් දෙවියන්ට යාතිකා කරල මගේ පතිවෘතා බලයෙන් මේ සාපෙ නැති කරනව! කාටවත් එන්න බෑ කපුව විතරයි ඇතුලෙ ඉන්න ඕන!’

කපුව ආරූඪවෙලා දේවාලෙ ඇතුලෙ ඉන්නව. මේ කාන්තාව දේවාලෙ ඇතුලට ගිහින් දේවාලෙ දොර වැහුව. දේවාලෙ අතුගාන ඉලපොත අතට ගත්ත!

‘ මේ රටේ ලොක්කගෙ ගෑනිගෙ ඉඳන් එකම ගෑනියෙක්වත් නෑ වෙන මිනිහෙක් ගැන හිතලවත් නැති. ඒ හැම ගෑනියෙකුගෙම මිනිහ ගෙදරත් ඉන්නව. මගේ මිනිහ මාව ගෙදරට ගෙනත් දාල ගියා ගියාමයි ,උගේ ආරංචියක් වත් නැතිවුණ මන් තව මිනිහෙක් එක්ක බුදියගත්තම විතරද රටටම සාපවෙන්නෙ! ඔය සාප කතාව මේ දැන් ඉඳල නතරකලේ නැත්නම් ගහන්නෙ මේ ඉලපොත කැඩෙන්න! . ඒ විතරක් නෙවෙයි කොන්ත්‍රාත් එකක් දීල තමා උඹව මරවන්නෙ!

කපුව බයවුණා! පොරොන්දු වුනා ආයෙ සාපකතාව නොකියන්නත් ඒ කාන්තාව ඒ සාපය නතරකල බව කියන්නත්!!

අන්තිමට තෑගියි ගමේ මිනිස්සුන්ගෙ පුදසත්කාරයි මැද්දෙ මෙයා ගෙදර ගියා! පතිවෘතා බලයෙන් දේවසාපය නතර කරපු වීර කාන්තාව විදියට රටේම ගෞරවය ලැබුණ !

යක්කුන්ටවත් බය නැති ගෑනු වගේම දෙයියන්ටත් බය නැති ගෑනුත් ඉන්නව.!

මෙයා ඉතින් ඊටපස්සෙ ලංකාවෙ ඉන්න ඔය දේවබලය ගැන විශ්වාස කරණ අයගෙ මෑණියන් විදියට කාලයක් හොඳට ගරුසරු ඇතුව හොඳට හම්බකලා!!

උපුටා ගැනීම: Channa Witha