දෙදහස් හය වසරේ මාර්තු මාසයේ සිට මා එක්කරන ලද දත්ත ආශ්‍රයෙන් වැදගත් ප්‍රකාශයක් කරන්න තියනවාය. ඒ අපගේ විගොඩ ජන්ෂන් එකේ පවතින භූ විද්‍යාත්මක වටිනාකම ගැනය. විගොඩ ජන්ෂන් එක කියන්නේ ගම්පහය. ගම්පහ කිවුවට හෙන ඩොටේය.මෙකී විගොඩ ජන්ෂන් එකත් හරියට බර්මියුඩා ත්‍රිකෝණය වාගේ, මේ පෘතුවි තලයේ පවතින අභිරහස් ස්ථාන වලින් එකක් බව මට පැහැදිලිය. දැන් ඉතින් ඇස් දෙක අංශක තුන්සිය හැටට කරකවාගෙන පෝය ලඟයිදෝ කියා කැලැන්ඩරය බලන්නට එපාය. මේ මම හොඳ සිහියෙන් වගකීම් සහඟතව කරන ලද ප්‍රකාශයක් ය.
මම හා හා පුරා ජංගම දුරකථනයක් අතට ගත්තේ දෙදාස් හයේ මාර්තු මාසයේය. එදා සිට අද දක්වාම මේ දෙරණි තලයේ එක ලෙසම කිසිම අඩුවක් නැතිව දුරකථන සංඥා එක ලෙසම දුර්වලව පවතින ස්ථාන කීපයෙන් එකක් ලෙස අපේ විගඩ ජන්ෂන් එක හැදින්විය හැකිය. ෆෝන් එකක් මටම කියා අරගෙන මා එදා ගෙදර ආවේ ලැම්බෝගිනියක් අත්පිට මුදලට ගත්තා වගේ පුදුම මෙවුවා එකකිනි. මෙවුවා එක ලත් තැනම ලොප් වුනේ ඔන්න ඔය දුරකථන සංඥා නැමති බඩකඩිත්තුව නිසාය. හා හා පුරා ආපූ මංගල දුරකථන ඇමතුමට ආන්සර් කර ගන්නට මම නොනැග්ගේ වහලෙට විතරය. අපේ ගෙදරට සිග්නල් තියෙන්නේ එක්කෝ තාප්පෙට නැඟ බෙල්ල අංශක තිහක් වයඹ දෙසට හරවා ඉස්සරහ ගෙදර සත්නායක අන්කල්ලාගේ වල්දෙල්ගසේ කෑරල් බෙනය දිහා බැලුවොත්ය, එක්කෝ අපේ ගේ පිටිපස්සේ ඇති රඹුටන් ගසේ වම් පැත්තට වෙන්නට ඇති අත්තෙන් පියවර දෙකක් බස්නාහිර දෙසට වන්නටය, සමහරවිට ළිඳට එහා පැත්තේ වතුසුඳු ගහට පිටිපස්සේ ඇති කහඹිලියා ගාල අස්සේය, නැතිනම් ඇඳ විට්ටමට නැගී කෙලවරේ ජනෙල් කූර එක අතකින් අල්ලාගෙන මුණ මදක් ඉදිරියට නැවූ කලය, ඔය ඔක්කොටම වඩා සිග්නල් තියෙන්නේ අපේ අල්ලපු ගෙදර වතුමුල්ලේ ඇන්ටිලාගේ ගේ දොරකඩට වන්නට තියන තාප්පේ අයිනේය. එතනට ගොස් කෝල් එකක් ගන්නවාට වඩා සයනයිඩ් කාලා මැරෙන එක සැපය. ඇන්ටී පැපරාසීන්ටත්, පුවත් මැවීම සම්බන්ධව ත්‍රෛමාසික පාඨමාලාව සීඝ්‍රගාමීව එක මාසෙන් සිඳු කිරීමට සමත්කම් දක්වන ඇසූ පිරූ තැන් ඇත්තියක නිසා මාගේ උගත් බුද්ධිමත් විනීත සුව්නීත චරිත ස්වභාවය අරළු බුලු සහිතව ගම පුරා වනා ගෙන යන්ට ඉඩ තිබුණාය. ඉතින් මම දෙදාස් හයේ සිට මේ දක්වා වතු මුල්ලේ ප්ලේස් එකේ ඇර අනිත් ස්ථාන වල සිට ලැබෙන දුරකථන ඇමතුම් ආන්සර් කරනවාය. ඒ නිසා මම කියන මෙලෝ මලදානයක් පැහැදිලි නැතිවුනා කියාවත්, දෙතුම් පාර හෙලෝ හෙලෝ ගෑවා කියාවත්, ඔබ අමතන ග්‍රාහකයා කිසිම චාරයක් නැති එකියක් කියා කට කැඩිච්ච ඇන්ටී කෙනෙක් කටමැත දෙඩෙවුවා කියාවත් සැලෙන්න එපා කියා දන්නා කියන උන්දෙලා දැණුවත් කරන එක මගේ දිනචරියාවේම කොටසක් වෙලාය. ඕවා ඔහොම කිවුවාට මට වෙන්නේම නස්පැත්තිය. කොරෝනා නිසා ගෙදර ඉදන් වැඩ කරන රාජ්‍ය සේවකයන්ගේ කාර්‍ය්ක්ෂමතාවය මනින්න ජනාධිපතිතුමා අපේ අධ්‍යක්ෂක ජනරාල් තුමාගෙන් වාර්තාවක් ඉල්ලලාය, වාර්තාව කඩිමුඩියේ සැකසීම සම්බන්ධව උපදෙස් ලබා දෙන්නට අපේ අධ්‍යක්ෂ ජනරාල් තුමා මට අමතලාය, මට චාරයක් නැති බව ඇන්ටී කියලාය, සර් ඒ ගමන අපේ බ්‍රාන්ච් එකම අමතා ගුණ දේසනාවක් තියලාය, ෆෝන් ඔෆ් කරගෙන ගෙදරට වෙලා සිටීම ගැන තරයේ අවවාද කර ලියුම් ගහන්නට කියලාය…මේ මොකුත් නොදත් මම නිකන් ෆෝන් එක අතේ තියන් ” මන්ද පමා, වැඩ නැද්ද මෙදා “ගගා ආතල් එකේ ඉදලාය…අපේ බ්‍රාන්ච් එකේ එකෙක් අන්සක එකසිය දෙකටම කේන්ති ගොස් අපේ ගෙදර ස්ථාවර දුරකථනයට අමතා ඇලෙක්සැන්ඩර් ග්රැහැම්බෙල් මහතාගේ හතර වරිගයෙන් පටන් ගෙන ජීවනී හරුසාගේ නෑසිය වන්දනාවක් සංස්කෘතික භාසාවෙන් කරලාය. අන්න ඒම ඔක්කොම වුනහම තමයි පින්වතුනි මේ ජීවනී හරුසා වහලෙ උඩට නැගලා හරි “බුදු සර් වෙන්ට සමා” කීලා අදාල වැඩේට එන්ටර් වෙන්නෙ.
ඒ දවස්වල දුරකථන සමාගම් හිටියේම වළවුවේ ළමාතැනීගේ හොඳම මිතුරිය වගේ හෙනම ගැට්ටෙන්‍ ය. දැන් වගේ තවුසන්ඩ් මිනිට් ෆ්‍රී ටෝක් ටයිම්, අන්ලිමිටඩ් ඩේටා, ෆ්‍රී එස්.එම්.එස්. ඒ කාලේ දුන්නේ නැතිය. එන ඇමතුමකට හෙලෝ කිව්‍වත් විනාඩියට සතේට කපනවාය. දැන් පඳුරකට ගැහුවත් නොමිලේදෙන කපල් සිම් පොරකකා එළියට විසිවුනාට ඒ කාලේ සිම් එකක් ගන්නටත් දාහක් බදින්නට ඕනෑය. පස්සෙන්පහු විනාඩියට අයකිරීම තප්පරේට බැස්ස අතර, ඉන්කමින් හෙවත් ලැබෙන ඇමතුම් වලට අය කෙරුවේ නැත. ඊටත් පසු තෝරාගත් අංක පහකට මිනිත්තු දාහක නොමිලේ ඇමතුම් කාලයක් සහිත බ්ලාස්ටර් පැකේජ සමාජ ගත වූ අතර, කොල්ලො කෙල්ලේ යාන්තම් නිදහසේ මලක් දෙකක් කඩා ගන්නට ජංගම දුරකථනය වැඩි වසයෙන් භාවිත කරන්නට ගත්තේ එතැන් සිටය. ඒ කාලේ කෙටි පණිවිඩ සඳහා අය කලේ සත ගණන් ය. සත ගණන්නම් මොකෑ කියා අපේ උන්දෙලා ඒ කාලේ කෑවේත් “බබා අපි කමුද?” අහලා මැසේජ් කරලාය. ඒ උණ තදටම තිබූ ඇයෝ ඒ කාලේ අහක බලන් පත මාගල් මැසේජ් ටයිප් කිරීමට තරම් විසේස ප්‍රාගුණ්‍යය ක් ලබා සිටියාය. අපේ අම්මාට ජංගම දුරකථන ඇලජික් වුයේ එක්තරා දුරකථන සමාගමක නොහොබිනා අදූරදර්ශි ක්‍රියා කලාපය නිසාය. අපේ අම්මාගේ, දුවගේ පළමු දුරකථන බිල සියැසින් දුටු දවසේ සිටය. අද කාලේ වගේ දුරකථන සමාගම් ඒ කාලේ මුද්‍රණ ගාස්තු , තැපැල් ගාස්තු පැන්සයකට මායිම් කලේ නැතිය.රුපියල් තිහක් බැන්දහම මාසික විස්තරාත්මක බිල්පතක් ලබා දෙනවාය. පිටු සීයක් ගියත් නොසැලී ඔක්කෝම විස්තර මුද්‍රණ ය කර එවනවාය. මාත් ඉතින් උපන්ගෙයි මෝඩකම දෝතින් දරා උපන් එකියක නිසා අදාල විස්තරාත්මක බිල්පතට එකඟතාවය දක්වන කොළයක් සිම්පත ලබා ගන්නා අවස්ථාවේ ලබා දුන්නේ රුපියල් තිහනම් මොකක්ද කියලා හිතලාය. කෝමත් මගේ නමට කුමනාකාරයේ රහස්‍ය ලේඛනයක් ආවත් නිසි බළධාරියාගේ පූර්ණ අධීක්ෂණයකට පසු මාගේ අතට පත්වෙන බවක් එවෙලේ මගේ අලයක් තරම් මොළයට කල්පනා වූයේම නැත. මගේ මංගල දුරකථන බිල්පතේ, පිටු හයක් පුරා කෙටි පණිවිඩ වාර්තා සටහන දුටු අපෙ අම්මා තෙදිනක් තිස්සේ මා වැනි රන් කදක් සිය දියණිය වසයෙන් මෙලොවට එවීම ගැන තිස්තුන් කෝටියක් දෙවියන් වහන්සේලාට හා තවත් දාහකට විතර පින් දුන්නාය. එදා ඉදන් අපේ අම්මාට ජංගම දුරකථන ඇලජික්ය. එදා ඉදන් මා අද දක්වාම අපෙ අම්මාගේ වැඩිම වාර ගණනක් සුද්ද සිංහල බසින් ඉහල පැසසුමට ලක්වී තියෙන්නේම මේ ජංගම දුර හා මා අතර පවතින දෛවෝපගත සම්බන්ධය පිළිබදවය. මෑණියනි මේ බිල්පත මගින් බොහෝදුරට දැක්වෙන්නේ මා කැඩූ මල් සම්බන්ධව නොව රට දැය සමය නග්වන්නට මා විසින් ගෙවූ බදුමැයි කියා කොතෙක් කීවද ඔවුවා ඒ කාලේ අපෙ අම්මාට ඇහුනේම නැතිය. දැන් ඉතින් විවිධාකාර පැකේජ් තියනවාය..බබා කොහොමද ගා, විනාඩි ගානෙන් කොහොමද බබා ගාගෙන කෝල් ගන්නට හැකියාව පවතිනවාය. කොහොමත් සිම් පතක් ගන්නා කොට ජංගම දුරකථනයක් නොමිලේ දෙන දවස වැඩි ඈතක නොවේය.
අද වනවිට ජංගම දුරකථන භාවිතය ශ්‍රී ලාංකීය ජන සමාජය තුල වෙනම උප සංස්කෘතියක් වී හමාරය. එය සන්නිවේදන මෙවලමකට වඩා එහා ගිය බහු කාර්‍ය මෙවලමක් වී අවසානය. භාවිතයේ පවතින පහසුව, විවිධාංගීකරණය, වැඩ රාශියක් කළමණාකරනය කරගැනීමේ හැකියාව, පුද්ගල කාර්‍ය්බහුලත්වය, හුදෙකලාව හා චිත්තාකර්ශනීය දුරකථන සේවා පහසුකම් යන බොහෝ දේ ජංගම දුරකථනය මිනීසාට සමීප වීමට හේතු වන්නට ඇතිය. ඔබට ජංගම දුරකථන ය හරහා දුර බැහැරව හා විදේශ ගතව සිටින ඔබේ ලැබදියන් හා අඩු වියදමකින් හා පහසුවෙන් අදහස් හෝමාරු කර ගත හැකිය. ඉන් නොනැවතී තප්පරේට ඕනෑම විස්තරයක් විනාඩි ගාණක අන්තර්ජන්ජාලයකට පසු සොයා ගත හැකිය. යූ ටියුබ් හරහා ඔබට පොල් සම්බෝලේ සිට ඉතාලි ලසන්ඤා දක්වා ඉන් නොනැවතී චීන ගෙබි සුප් , ඉන්දියන් ගුලාබ් ජමූන්, අප්‍රිකා පස්තෑල ආදී ඕනෑම එකක් නොවැරදී හදා ගන්නා හැටි කියාදෙන කුකින් චැනල් එමට සොයා ගත හැකිය. කිරිහොද්ද කැටි නොගහා හැදි ගෑමට පළමු පෙන බුබුල පැන නඟින අවස්ථාවේ සිට ගතයුතු ක්‍රියාමාර්ග ඉතා සරලව කියා දෙන අපූරුව නිසා වර්තමාන දියණිවරුන්ට දෑවැද්දට අන්තර්ජාල පහසුකම් සහිත ජංගම දුරකථනයක් දුන්නත් පාඩු නැතිය. රුව අලංකරණය, ඇදුම් මැසීම, ස්ථුල තාව පාලනය ආදී එකී නොකී බොහෝ කාරණා සදහා මෙන්ම බ්‍රිතාන්‍යයයේ ක්‍රේම්බ්‍රිජ් විශ්වවිද්‍යාලයයේ නවතම පර්‍යේෂණ වාර්තා,නාසා ආයතනයේ ඉදිරි සැලසුම් ආදී ඕනෑ එකක් තප්පරෙන් ඔබ දෑස මානයේ තැබීමට හැකි ආදාන මෙවලම් ස්මාට් දුරකථන වල පවතිනවාය. හමනා සුළගේ නැලවෙන කෙහෙරැලි ගස්සා ෆීලින්ග් ඕසම් විත් නිරිත දිග මෝසම් සුළං කියා සෙල්ෆියක් ගසන්නට ඕනෑනම් මුහුණු පොතේ දමන්නටත් ඔබට හැකියාව තියනවාය. කිරිඅම්මාගේ ඉලව් ගෙදරදීත් සෙල්ෆි ගසා ඕසම් කියා පෝස්ට් දමන පොඩි එවුවෝ මේ කාලයේ ඉන්නවාය.
“මාක් අයියාට පිංසිද්ධ වෙන්න අපි ගොඩගියා මල්ලි” කියන අළුත බැදපු ජෝඩු මෙකල සුලභය. මුහුණු පොතින් දැන හදුනාගත් මිතුරුකම් විවාහයෙන් කෙලවර වෙන මෙවන් අවස්ථා මෙන්ම දික්කසාදයෙන්, ජීවිත හානි වලින් පවා කෙලවර වූ අවස්ථා අද කාලයේ එමට අසන්නට තියනවාය. මුහුණු පොත යනු අපූරු ස්ථානයකි. එතුලින් අපූරු මිනිසුන් හමුවේ. අපූරු මිතුදම්, සහෝදරකම් ගොඩනැගේ. ඉද හිට හෝ ඔබේ පාසැල් මිතුරියන් නැවත හමුවන්නේ මුහුණු පොත හරහා විය හැකිය. ඒ දයාද්‍රිතකම්, අපේකම් අරුමැසිය. ඔබේ මුහුණු පොතට එක්කාසු කරගන්නා කවරෙක්ද යන්න ඔබ දෙවරක් සිතිය යුත්තේ නට් ලූස් උන්දෙලා, මෙන්ම මංපහරන්නෝද ඒ අතර සිටින නිසාය.
අද කාලේ පොඩිඑවුන් ඉපදෙන්නේම නවීන තාක්ෂණය , ජංගම දුරකථන ආදිය ගැන හසල දැණුමක් ඇතිවය. මා මගේ දියණිය පාසලට ඇතුලත් කරන දවසේ ප්‍රධාන ආරාධිත අමුත්තාගේ කතාව සිහි කරමි. තුන වසරේ දරුවෙකු සිය පියාගේ ජංගම දුරකථනයේ තිබු නිල් චිත්‍රපටියක් නරඹා මානසික වියාකූල භාවයට පත් වූ සිද්ධියක් එහි අන්තර්ගතය විය. මේ ඉතින් අන්තර්ජාලය හරහාම බොහෝ අධ්‍යාපන කටයුතු සිඳුකිරීමට සිඳුවන කොවිඩ් සමයයි. අන්තර්ජාලය, දුරකථනය භාවිතයට දරුවා යොමු කිරීමේදී දෙමාපියන් යම් අවධානයකින් පසුවිය යුත්තේ එහෙයිනි. මෙවන් අපට මගහැරෙන බොහෝතැන් පැවතියද මේ කියෙවුවා ඇතිය. මේ ස්මාට් දුරකථන , නවීන තාක්ෂණය අපූරු දැලිපිහිය. උයන්නට පිහන්නට, සොදුරු දේ තනන්නට මෙන්ම මිනීමරන්නටද හැකිය. වඳුරෙක් වෙනවාද නැද්ද යන්න තීරණය කල යුත්තේ ඔබය.
උපුටා ගැනීම: ජීවනී පෙරේරා