උදේ ඔෆිස් එකට යනකොට අතුගාන මනුස්සයා ඉස්සරහට හම්බුනා , වෙනදට වඩා ලෙන්ගතුව හිනාවුනා , අනේ වෙනදට අතුගාලා විතරක් යන මනුස්සයා අද මගෙ ටේබල් එකත් ක්ලීන් කරලා ගියා .ඕන වෙලාවක දුම්මල වරම අතට අරන් ඉන්න බොස් ලඟට චෙක් එකක් අත්සන් කරගන්න ගියා .වෙනදට අහක බලන් ඕනවට එපාවට දික් කරන චෙක් පොත කට පුරෝලා හිනාවෙලා බොස්ට දුන්නා .කටේ දත් නෑ කියලා හිතන් හිටියට පොරට කිරි සුදු දත් දෙපළක් තියන බවත් , හිනා වෙනකොට වම කම්මුලේ ඩිම්පල් එකක් තියන බවත් සේවයට ඇවිත් අවුරුද්දකට පස්සේ අද දැනගත්තා .මොන ඇඳුම ඇන්දත් හැමවෙලේම ඇද කියන එහා සෙක්ෂන් එකේ කුඩුකේඩු නයනා ලන්ච් වෙලාවෙදි මූණටම හම්බුනා .කටේ හැටි දන්න හින්දා වෙනදට අහක බලන් ගියත් අද එයා මන් දිහා බලන්නත් කලින් එයා දිහා බලලා කට කණට යන්න ලෙන්ගතුව හිනා වුණා .තුෂ්නිම්බුත වෙච්ච නයනාටත් කාලෙකට පස්සෙ හිනා ගියා .බස් එකේ එනකොට අම්මා කෙනෙක්ගෙ අතේ එල්ලිලා හිටපු පොඩි පුතෙක්ට ආදරෙන් හිනාවුනා .බහිනකන් පොඩි එකා පස්ස හැරි හැරි හිනාවුණා .හැමදාමත් ලෙන්ගතු කම් පාන අල්ලපු ගෙදර කුසුම් අක්කට වෙනදා වගේම හිනාවුණා .හැමදාමත් වගේ ඒ ඇස් වල සතුට දිලිසුණා .මට පේන්නත් බැරි මාව පේන්නත් බැරි අපේ නෑනා ඉස්සරහටම හම්බුනා .අබ පුපුරන ඒ මූණටම එබිල අනුකම්පාවටත් වගේ හොඳට හිනාවුණා .ඒක දැකලා තුෂ්නිම්භූත වෙලා පාරෙ තිබ්බ ගලක වැදිලා නෑනා වැටෙන්නත් ගියා .ඊයෙ පෙරේදත් බොරු කේළමක් කියලා මාවයි මගෙ යාළුවෙක්වයි අවුලවපු ගිණි බෝම්බයක් වගේ දෙලොවටම වැඩක් නැති යසෝමා කඩේදී හම්බුනා .කරපු වැරැද්දට මම බනියි කියලා ඉක්මනට ලිස්සලා යන්න හදපු ගෑනිට මම කට පුරෝලා හිනා වුනා .යසොමගේ පරාජිත මූණ මම හිතුවටත් වඩා අසරණ උනා .කාලයක් ආදරේ කරපු , කලින් පෙම්වතා අහම්බෙන් හංදියේදී හම්බුනා , ඉස්සරටත් වැඩිය සතුටෙන් හිනා වුණ මාව දැකලා මිනිහට හිනා වෙන්නත් අමතක උනා .කිහිප දෙනෙක් සහාභාගී වූ තරඟයෙන් අවසාන මොහොතේ මම පරාද වුනා , පරාජය කියන දරාගැනීමේ විභාගය හොඳට සමත් වීමේ වාසි දන්න නිසා දිනුවටත් වඩා සතුටෙන් හිනා වුනා , මම හිනා වුන විදිහ දැකලා දිනපු කෙනාට ජයග්‍රහණය සමරන්නත් එපා වුනා .සාර්ථක පවුල් ජීවිත දිහා බලන් ඉන්නම බැරි , අසාර්ථක පවුල් ජීවිතයක් ගත කරන අනුන්ගේ ජීවිතත් අවුල් කරන්න බලන් ඉන්න දුෂ්ට ගෑනියෙක් මූණටම හම්බුනා , හිනා වෙන්නත් කලින් ඉබේම හිනා ගියා .හිනාව දරාගන්න බැරුව ඒ ගෑණි හදවතින් පිච්චෙන හැටි ඇස් වලින් හොඳට පෙණුනා ..ඉතින් තව සැරයක් හිතලම හිනා වුනා ………………… මොන තරම් දියුණු පේන් කිලර්ස් හොයාගත්තත් ”හිනාව ” තරම් පොසිටිව් සයිඩ් එෆෙක්ට් තියන වේදනා නාශකයක් ලෝකෙ කොහෙවත් නැහැ ,
හිනා වෙන්න හිතෙන්නෙම නැති දරාගන්නම බැරි අමාරු මොහොතකත් කිචි කවාගෙන හරි හිනා වෙලා බලන්න ,ලොකු බරක් නිදහස් වෙලා අමුතුම සැහැල්ලුවක් දැනෙයි .
ආදරණීය මිනිස්සුන්ට , ආදරයෙන් හිනාවෙන්න ,ඒ සබඳතා තවත් පුළුල් වෙයි , ඉහලින් සිටින අයට වඩා ඔබට පහලින් සිටින අයට දයාබරව හිනා වෙන්න , ඒ ජීවිත වලට හොඳ මෝටිවේෂන් එකක් වගේම ඔබට සතුටක් ලැබෙයි ,
ජයග්‍රහණය කරපු අවස්ථාවල හිනා නොවුනත් කමක් නෑ , පරාජය වෙච්ච හැම වෙලේම කට පුරෝලා හිනාවෙන්න, ජයග්‍රාහකයාට වඩා පරාජිත ඔබට ස්වයන් තෘප්තියක් දැනෙයි ,
ඒ වගේම ,
ඇහැට පේන්න බැරි , දැක්කම පිහියෙන් අනින්න හිතෙන පජාත තරහ කාරයෙක් දැක්කම අමුතුවෙන් වයිර කරන්න මහන්සි වෙන්න ඕනෙ නැහැ , ඇස් දිහා බලලා හිනා වෙන්න , පිහි දහයකින් ඇන්නා වගේ වේදනාවක් ඒ ඇස් වලින් බේරෙයි.
සතුටෙදිත් , දුකේදීත් , කරන්නම දෙයක් නැති වෙලාවකදීත් , කරන්න ඕන මොකක්ද කියල නොත්රෙන වෙලාවෙදිත් ,වැඩිපුර නොහිතා හිනා වෙන්න ,රවන ඔරවන වට වඩා ඉතාම අඩු මාංශ පේශී ගණනක් වැයවන හිනාව නිසා ඔබට ලැබෙන කායික මානසික ප්‍රතිලාභ ඔබ හිතනවට වඩා බොහොම වැඩියි .
මූණට ඔරවලා, ගියාට පස්සේ හිනා වෙන බහුතරයක් අතර ඔබ හැමෝටම මූණට හිනාවෙන කෙනෙක් වෙන්න ,
බොහෝ අය නොදන්නවා උනාට හිනාව කියන්නෙ මැජික් ඉනාවක් , කැමති අයව නිවාලන්න වගේම අකමැති අයව දවාලන්නත් එක හිනාවකට පුළුවන් ,
දවස් 25000 ක විතර උපරිමයක් විතරක් තියන මේ කෙටි ජීවිත කාලෙදි එක එකාට ඔරවලා , අපේ ලේ පුච්චගන්නෙ මොකටද ,දත් තියනකන් හිනාවෙන්න, දත් හැලුනම ලොම්බෙන් හරි හිනාවෙන්න,
දැන් මාස්ක් දාන නිසා හිනා උනාට වැඩක් නෑ, පේන්නේ නැහැ කියන්න ලෑස්ති වෙන්න එපා, හිනාව මූණෙන් පෙනුනට ඇස්වල තමයි ලියවෙන්නෙ, ඒ නිසා මාස්ක් දාගෙන හරි
හැමෝටම හැමවෙලාවකම හිනා වෙලා ඉන්න ,
මොකද හිනා වෙන්න පුරුදු වෙච්ච මිනිස්සු මැරුණත් අඬන්නෙ නම් නැහැ .
උපුටා ගැනුනකි
මූලාශ්‍රය: බට්ටා