කලක් විදේශගත වී සිටි චාරුණී නැවත ලංකාවට පැමිණ ඇතැයි නදීකාට දැනගන්නට ලැබුණේ තවත් මිතුරියකගේ මාර්ගයෙනි. පාසල් කාලයේ සිටම තමා ළඟින්ම ඇසුරු කළ මිතුරිය වූයේ ඇයයි. පස් වසරකට පෙර, බිඳී ගිය ප්‍රේමයක නටඹුන් හිතේ දරාගෙන චාරුණී ලංකාව හැර ගියේ යළි නොඑන්නෙටම සිත දැඩි කරගෙනය. නමුත් කුමක් හෝ හේතුවක් නිසාවෙන් ඈ යළි පැමිණ තිබේ. පිටරට වෙසෙන තම නැන්දා සමඟ විසීමට ගිය පසුව චාරුණී තම දෙමව්පියන් හැරෙන්නට ලංකාවේ වෙනත් කිසිදු අයෙක් හා සම්බන්ධකම් පැවැත්වූයේ නැත. තම හොඳම යෙහෙළිය වූ නදීකාට වුව කතා නොකළේ තම සමීපතම යෙහෙළිය වූ ඇයටත් හොරෙන් පවත්වාගෙන ගිය පෙම් සබඳතාවය තමාට මහා කැළලක් ඉතිරි කරමින් බිඳී ගිය නිසා ඇති වූ ලැජ්ජාව නිසාමය.
චාරුණී කෙතරම් තමා මඟහැරියද නදීකාට චාරුණී මඟහැර සිටීමට අවශ්‍ය වූයේ නැත. චාරුණි කුමන හේතුවක් නිසා හෝ තමාට ඒ සියල්ල හැංඟුවද දැන් ඒ සියල්ල සිදු වී හමාරය. බොහෝ කලෙකින් නොදුටු තම මිතුරිය දැක ගැනීමේ උවමනාවෙන් නදීකා, තමාට වෙනත් මිතුරියකගෙන් ලැබුණු දුරකතන අංකයෙන් චාරුණී ඇමතුවේ ඈ කුමන ප්‍රතිචාරයක් දකවනු ඇත්දැයි යන සිතිවිල්ලෙනි.
චාරුණී දුරකතනය හා සම්බන්ධ වූයේ නොදන්නා අංකයකින් පැමිණෙන දුරකතන ඇමතුම කාගේදැයි නොදැනය. නමුත් කතා කල පළමු වචනයෙන්ම ඒ තමාගේ මිතුරිය බැව් වටහාගන්නට ඇයට අපහසු නොවීය. චාරුණී එක් වරම ගොළු වී ගියාය. තමාගේ හොඳම යෙහෙළිය..! තමා කෙතරම් දෑ ඇයට සැඟෙව්වාද…කෙතරම් කල් ඈ මඟ හැරියාද…එහෙත් ඈ තමා අමතක කොට නැත…
දුරකතන ඇමතුමට පිළිතුරු දෙනු වෙනුවට නදීකාට ශ්‍රවනය වූයේ සිහින් ඉකිබිඳුම් හඬකි. චාරුණී තවමත් අතීතය අමතක නොකළ හැඩය. මේ කඳුලු ඒ නිසාවෙනි. නදීකා සෙමින් සෙමින් ඇගේ කටහඬ අවදි කලාය. දුරකතන ඇමතුමකින් කතා කළ නොහැකි තරම් බොහෝ දේ දෙදෙනාගේම සිත් තුළ සිරවී තිබිණි. තවදුරටත් චාරුණී නොහැඬවීමට සිතූ නදීකා, හමුවීමට හැකි දිනයක් පවසා කෙටි පණිවිඩයක් යොමු කරන්නැයි ඉල්ලමින් ඇමතුම විසන්ධි කලාය.
චාරුණී නදීකා සමඟින් කතා බස් කරගත් පරිදි හමුවීමට යොදා ගත්තේ නගරයට මදක් එපිටින් නිදහස් තැනක පිහිටා තිබූ ආපන ශාලාවකදීයි. පසුගිය සිදුවීම් නිසා මිතුරියට මුහුණ දීමේ අපහසුතාවකින් චාරුණී පෙලුන මුත් නදීකා ඈ පිළිගත්තේ පෙර සේම සිනහ මුසු මුහුණින් සහ ආදරයෙන් යුතුවමය. නදීකාගේ මේ හැසිරීම නිසා චාරුණීගේ සිතෙහි වූ චකිතයද බිඳෙන් බිඳ පහව යන්නට විය.
” නදී…මට සමාවෙයන්..මං හිතුවෙ උඹ කවදහරි හම්බුනාම මට නොසෑහෙන්න බනියි කියලා. මම මගෙ ළඟින්ම ඉඳපු උඹට හැමදේම හැංඟුවනෙ…”
” අමතක කරල දාපන් චාරු…මොකද කොල්ල මම අල්ලගයි කියලද ඒව නොකීවේ. පිස්සුනෙ උඹට. උඹ ගියාම තමා ගෙදරින් මට හැමදේම කිව්වෙ කවුද කොල්ලෙක්ට රැවට්ලා කියල…විස්තරේම මට ආරංචි උනා…ඉතිං උඹ ගැන බොරු කියපු එකා අල්ලගත්තෙ නැද්ද…?”
“නෑ නදී…තේරුමක් නෑ… එයා මාව විශ්වාස කලේ නෑ. ගෙදරට එඩිට් කරපු ෆොටෝස් පවා යවලා. එයා ඒවා ඇත්ත කියල හිතුවෙ. ඒ අම්මලා ඇවිත් මුළු ගමටම ඇහෙන්න අපට කෑගහල ගියේ…හ්ම්ම්”
” හ්ම්ම් දැන් ඉතිං වෙලා ඉවරනේ. උඹ ගිහින් මාස දෙකකින් වගේ මාත් මැරි කරේ. දවසක අපේ ගෙදර යමු. මං කියන්නම්කො..”
පැය කිහිපයක සුහද කතාබහකින් පසුව දෙදෙනා වෙන්ව ගියේ හමුවීමට පෙර සිටියාට වඩා සැහැල්ලු මනසකිනි.
නදීකා සහ චාරුණීගේ මිත්‍රත්වය යළිත් අළුත් විය. දිනපතා දුරකතන සංවාද වලින් මඟ හැරුණු පසු ගිය තොරතුරු කතා බහ කල දෙදෙනා යළිත් වරක් හමුවන්නට දිනයක් යොදා ගන්නට වූහ.
” කොහෙවත් ඕන නෑ චාරු..අපෙ ගෙදර එන්න මේ ඉරිදා. හස්බන්ඩ්ටත් එදාට නිවාඩු. ඔයා ඇවිත්ම නෑනෙ අපෙ ගෙදර…”
චාරුණී නදීකාගේ ඇරයුම සතුටින් පිළිගත්තාය. නෑදෑ හිතවතුන් මඟ හරිමින් ලෝකයට සැඟවී ජීවත් වූ කාලය නිමා කල යුතු යැයි චාරුණි නිතර සිතුවාය. තම යෙහෙළියගෙන් ඊට ලැබෙන උපකාරය මෙතැකැයි කියා නිම කළ නොහැකිය. ඈ කිසිවිටකත් තමා පිළිකුල් නොකළාය. තමා වැරදි යයි නොසිතුවාය. තමා විශ්වාස කලාය…
ඊළඟ ඉරු දිනයේ චරුණී නදීකා කී මඟ සළකුණු ඔස්සේ ඇගේ නිවස සොයා ගියාය. පාර අද්දරම නිවස පිහිටි බැවින් සොයා ගැනීම අපහසු නොවූවත් චාරුණී පැමිණෙන විට නදීකා ගේට්ටුව අසලම රැඳී මඟ බලමින් උන්නාය. සිනහ පිරි මුවින් තම යෙහෙළිය පිළිගත් නදීකා චාරුණී සමඟින් අත්වැල් පටලාගෙන නිවස දෙසට ඇදුනාය.
” නදී මාර ලස්සන ගෙයකුයි ගාඩ්න් එකකුයි තියනවනෙ උඹට. හොඳ බර අත්තක් අල්ලලා වගේ. බිස්නස් නේද කරනව කිව්වේ…?”
” අනේ අනේ උඹ මට විහිළු කරනව නේද…? යං යං ගෙට ගිහින් කතා කරමු…”
තමා කී දෙයට ලොකු ප්‍රතිචාරයක් නොදැක්වුවද ඒ කතාවෙන් නදීකාගේ සතුට ඉතිරී ගිය බව ඇගේ මුහුණ දුටු චාරුණීට සිතුනි. සාලයේ වූ සැටියෙහි චාරුණී වාඩි කරවූ නදීකා නිවස තුළට පිවිසියේ සිය සැමියාට තම යෙහෙළියගේ පැමිණීම දැනුම් දීමටයි.
ආගිය තොරතුරු කතා බස් කරමින් උන්නද චාරුණීට නිවසට පැමිණෙන විට තිබූ ප්‍රබෝධමත් බව මේ වන විට සිඳී ගොස් තිබුණි. ඇයට හැකි ඉක්මනින් මේ නිවසින් පලා යන්නට උවමනා වී තිබුණි. හදිසියේ ආ ව්‍යාපාරික ඇමතුමක් නිසාවෙන් නදීකාගේ සැමියාද ඔවුන්ගෙන් සමුගෙන නිවසින් පිටත් වූ නිසා නදීකාගේ පෙරැත්තය මත දහවල් ආහාරයටද ඈ සමඟින් හිඳ ගන්නට චාරුණීට සිදුවුනි. තම මිතුරිය රස කරමින් පවසන තම විවාහ දිවියේ තොරතුරු ඇසීම චාරුණීට දැන් තිත්ත වී තිබිණි. නිසි වයසේදි විවාහ වන්නට නොහැකි වූ ප්‍රේමය අහිම්ව ගිය තමාට නදීකාගේ සුන්දර විවාහ දිවිය ගැන ඊර්ෂ්‍යාවක් ඇති වී දැයි ඇය තම සිතෙන්ම ප්‍රශ්න කළාය. නමුත් ඊටත් එහා ගිය රිදුමක් සිත තුළ ඇති බව දන්නේ තමා පමණි.
නදීකාගේ පෙරැත්තය නිසාම සවස් වන තෙක් නිවසේ රැඳී උන් චාරුණී පිටත් වන විට සැඳෑ අඳුර ගලා එමින් තිබුණි. මඟින් මගට නදීකා කියා සිටියේ යළිත් වරක් තම නිවසට පැමිණෙන ලෙසයි. නමුත් යළිදු කිසි දිනෙක මේ නිවසට නොපැමිණෙන්නෙමි යි සිතට සපථ කර ගත් බව දන්නේ චාරුණීම පමණි.
තමා සමඟින් කතා බහේ යෙදී සිටියද චාරුණී උන්නේ කොහේදෝ ලෝකයක අතරමං වී බව නදීකාට නොදැනුනා නොවේ. සවස් වන තෙක් නිවසේ රැඳී උන් චාරුණි සිර කඳවුරකින් මිදී යන්නාක් මෙන් සැහැල්ලුවෙන් මෙන්ම කලබලයෙන් පිටවී යන අයුරු දුටු නදීකා සිත යටින් තම යෙහෙළියට සිනාසුනාය.
නදීකාත් චාරුණීත් හමුවී දින කිහිපයක් නික්ම යන තෙක් චාරුණී විසින් නදීකාට ඇමතුමක් හෝ ලබා ගත්තේ නැත. නදීකා විසින් චාරුණී සම්බන්ධ කරගන්නට උත්සහ ගත් සෑම වාරයකදීම දුරකතනය විසන්ධි වී තිබිම ඇගේ මුවට සෝපාහාස සිනහවක් එක් කරන්නට විය. දින කිහිපයකට පසු උදෑසන නදීකාගේ නිවසට තැපෑලෙන් ලැබුනු ලිපිය දුටු විගසම ඒ චාරුණීගේ අත් අකුරු බව නදීකා මැනෙවින් හඳුනාගත්තාය. සැමියා දින කිහිපයක ව්‍යාපාරික කටයුත්තක් වෙනුවෙන් නිවසින් පිටවී සිටීම නදීකාගේ සිතට සැනසුමක් ගෙන ආවේ ඔහු සිටියානම් ලිපිය පිළිබඳව විමසිලිමත් වන බැවිනි.මඳ සිනහවකින් යුතුව ලිපිය කඩන අතරතුර එහි ඇත්තේ කුමක් විය හැකිදැයි නදීකා අනුමාන වශයෙන් සිතුවාය. ලිපිය නදීකා සිතූ තරම් දිගු වූයේ නැත. නදීකා සිතූ කිසිවක් එහි සඳහන්ව තිබුණේද නැත. එය පේලි කිහිපයක කුඩා ලිපියක් විය
ආදරණීය නදී,
මං දන්නවා මේ වන ව්ට මගේ හදිසි වෙනස් වීම ගැන ඔබට ප්‍රශ්නයක් ඇති වෙන්නට ඇති. සමහර විට එයට හේතුව ඔබ මේ වන විට දන්නවාත් ඇති. නො එසේ නම් ඉදිරියේදි දැනගනු ඇති. කෙසේ වුනත් මා තීරණය කලා පසුගිය කාලයේ සැමගෙන් වෙන් වී ගත කල ජීවිතය මට සුදුසු බවට. මම ලංකාවට නැවත පැමිණියේ නම් යළි පිටරට නොයන අදහසින් බව සත්‍යක් .නමුත් දැන් මට හිතෙනවා සැම දෙනාගේම යහපත වෙනුවෙන් මා නැවත යා යුතු බව. මේ ලිපිය ඔබට ලැබෙන විටත් මා මෙරටින් පිටව ගොස් හමාරයි. මේ ලිපිය ලීවේ යළිත් වරක් ඔබට නොදන්වා යන්නට නොහැකි බැවනි. තෙරුවන් සරණයි..!
මීට ,
මිතුරිය,
චාරුණී.
ලිපිය කියවූ නදීකා දත්මිටි කමින් එය තම අතෙහි ගුලිකර මේසය මතට දැම්මාය.
“මේකි තවමත් මට හංගනවා හැමදේම…!”
දත්මිටි කමින් තමාටම කියාගත් නදීකා යලිත් අතීත සිදුවීම් සිහිකරන්නට විය.
නදීකාගේ හොඳම යෙහෙළිය චාරුණී වූයේ පාසල් සමයේ සිටමය. එය එසේ වුවද දෙදෙනාගේ ගතිපැවතුම් වල වූයේ පරස්පර බවකි. චාරුණී මෙන්ම නදීකාද රූමත් වුවත් නදීකා සිටියේ ඒ පිළිබඳව ඇති කරගත් උඬගු සිතිනි. කෙතරම් දේවල් තමා සතු වුවද නදීකා අන් අය සතු දෙයට ඊර්ෂ්‍යා සහගත බව චාරුණී මැනවින් දැන උන්නාය. එනිසාම කොතරම් හොඳ වුවත් තමාට නොමැති අන් අය සතු දෙය පහත් කොට කතා කරන්නට නදීකා පසුබට වූයේ නැත. චාරුණී නදීකාගේ මේ හැසිරීම් උපේක්ෂාවෙන් විඳ දරාගත් එකම යෙහෙළිය වූවාය.
පාසල් කාලයෙන් පසුවත් චාරුණීගේත් නදීකාගේත් මිතුදම නොබිඳී පැවතුනේ දෙදෙනාට එකම ආයතනයක සේවයට යන්නට හැකිවූ බැවිනි. කෙතරම් සමීපව යහළු මිත්‍රකම් පැවැත්වුවද නදීකාගේ ස්භාවය දන්නා චාරුණි.තම පෞද්ගලික ජීවිතයේ යම් යම් දේ ඇගෙන් සඟවා ගත්තේ ඇය දක්වන ප්‍රතිචාර දරාගැනීමට නොහැකි නිසාවෙනි. රැකියාවට එන අතරතුරේ දැක හඳුනාගත් තම පෙම්වතා ගැනද නදීකාගෙන් සඟවන්නට සිතුවේ සැබවින්ම ගුණ ගරුක යහපත් පවුල් පරිසරයක හැදුනු මිල මුදලින්ද අඩුවක් නොවූ පෙම්වතාගේ නැති නුගුණ පවා නදීකාගේ මුවින් අසන්නට ඇති අකමැත්ත නිසාවෙනි.
කැස්සත් ආදරයත් හංඟන්නට නොහැකි බව සනාථ කරමින් වැඩිකල් යන්නට මත්තෙන් චාරුණීගේ ප්‍රේම සම්බන්ධතාව කනින් කොනින් රැකියා ස්ථානයේ කිහිප දෙනෙකුටම ආරංචි වන්නට විය. සමහරුන් ඒ පිළිබඳ විහිළුවෙන් තහළුවෙන් විමසූවද චාරුණී ඒ සියළු කතා බොරු යැයි කියමින් ප්‍රතික්ෂේප කළාය. මේ ආරංචි නිසා නදීකාටද චාරුණී ගැන ඇති වූයේ සැකයකි.
” මොනවද චාරු මේ කට්ටිය කියන කතා…?ඔයාට කොල්ලෙක් ඉන්නව කියල..”
” අනේ පිස්සුද නදී… මම යාළුවෙක් එක්ක කතා කරනව දැකල ඔය කියවන්නෙ…එහෙම දෙයක් තියෙනවනම් මම ඔයාට නොකිය ඉන්නවද..?”
චාරුණී දෑස් සඟවා කී කතාව තුල තමාට සඟවන යමක් ඇති බව වටහා ගන්නට නදීකාට අපහසු නොවීය. තවත් කිසිවක් නොවිමසූ නදීකා කෙසේ හෝ මිතුරියගේ හොරය අල්ලා ගන්නට අදිටන් කරගත්තාය.
එක් නිවාඩු දිනයක තමා සෙවූ දේ දෑසින්ම දැක ගැනීමට නදීකාට හැකිවිය. රැකියා ස්ථානයට අඳින්නට ඇඳුම් පැලඳුම් කිහිපයක් ගන්නට ගිය නදීකාට දැක ගන්නට හැකි වූයේ තරුණයකුගේ අතේ එල්ලීගෙන ඇඳුම් තෝරමින් උන් චාරුණීවය. අති විශාල නිමිඇඳුම් ප්‍රදර්ශනාගාරයේ දෙවෙනි මහලේ අත්වැට අල්ලාගත් නදීකා , පහළ මාලයේ සෙනඟ අතරේ රෙදි තෝරමින් උන් යුවල දෙස බලා උන්නේ දත්මිටි කමිනි. තරුණයා කඩවසම්ය…පෙනුමට නම් මිල මුදලින්ද අඩුපාඩුවක් නැති සේය. පිටුපසින් දුටු තරුණයාගේ මුහුණ බලාගනු රිසියෙන් නදීකා සෙරක මෙන් සැඟවී යුවල දෙස බලා උන්නාය. එවන් එක් අවස්ථාවක නදීකා සිටි දෙසට හැරුණු තරුණයාගේ මුහුණ දුටු චාරුණී ව්ශ්මයට පත් වූවාය.
නමින් කවුරුදැයි දැන නොසිටියත් ව්‍යාපාරික කටයුතු වල යෙදෙන තම සොහොයුරාගේ ළඟම මිතුරකු වූ තරුණයා හැඳින ගැනීමට නදීකාට අපහසු නොවීය. තරුණයාගේ වත්කම් පිළිබඳව යම්තාක් දුරට දැනගෙන උන් නදීකාට තම මිතුරිය ගැන සතුටක් ඇති වනු වෙනුවට ඇති වූයේ තදබල ඊර්ෂ්‍යාවක් සහ කෝපයකි.
” මට හැමදේම හැංගුවනේ…හිටපන්කො මම කරන දේ බලන්න…!”
තනිවම මුමුණාගත් නදීකා වෙළඳසලෙන් පිටවූයේ ගන්නට ආ කිසිවක් දෙස හැරී වත් නොබලමිනි.
එදා සිට නදීකා තම මිතුරියට ඇඟෑලුම් පාන්නට වූයේ සිත යට සඟවාගත් කෝපයකින් යුක්තවය. කිසියම් හෝ අවස්ථාවක තම් පෙම්වතා ගැන වදනක් හෝ චාරුණීගේ මුවින් පිටවෙතැයි බලාපොරොත්තු වුවද කිසිදා ඈ එවැන්නක් ගැන ඉඟියක් හෝ නදීකාට ලබා දුන්නේ නැත. මේ අතරතුර නදීකා තම නිවසට පැමිණෙන සොයුරාගේ මිතුරන් ගැන කාටත් හොරෙන් අවධානය යොමු කලාය. නදීකා නිවසේ සිටි එවන් එක් දිනෙක චාරුණීගේ පෙම්වතා වූ සමීර නිවසට පැමිණීම නදීකාගේ සිත සතුටින් පුරවන්නක් විය. වාසනාවට මෙන් සහෝදරයා නිවසේ නොසිටීමද නදීකාගේ වාසියට හේතු විය. වෙනදා සොයුරාගේ මිතුරන් සමඟ වැඩි ඇඟෑලුම් කම් නොපාන නදීකා මෙදින සමීර සමඟින් කතාබහ කරන්නටත් ඔහුට සංග්‍රහ කරන්නටත් උනන්දු වීම මවගේද පුදුමයට හේතු විය. ආගිය තොරතුරු පමණක් කතාබහ කර යම් මිතුදමක් ගොඩනඟා ගත් නදීකා රහසේ තම සැලැස්ම ක්‍රියාවට නංවන්නට පටන් ගත්තාය.
තවත් දින කිහිපයක් ඉක්ම ගිය තැන චාරුණී රැකියාවට පැමිණියේ මැළවී ගිය වතිනි. සිදුවන්නට ඇත්තේ කුමක්දැයි නිවැරදිවම දැන උන්නත් නදීකා ආදරණීය මිතුරියගේ චරිතය රඟ දක්වමින් චාරුණීගෙන් තොරතුරක් දැන ගැනීමට උත්සහ කලාය. එහෙත් චාරුණීගෙන් කිසිදු කරුණක් දැන ගැනීමට නොහැකි වූ තැන නදීකා තව තවත් කෝපයෙන් ඇළලී ගියාය. චාරුණීගේ චරිතය කෙළෙසමින් නැති වැරදි පවා හුවා දක්වා ලියන ලද නිර්ණාමික ලිපිය සොයුරාගේ ලිපිගොනු තුලින් සොයා ගත් සමීරගේ ව්‍යාපාරික ස්ථානයේ ලිපිනයට යොමු කල නදීකා , ඉන් පසුවත් චාරුණී තමා අභියස අනුගමනය කරන මේ නිහඬ පිළිවෙතින් ඇවිලී ගියාය.
දින කිහිපයක් තිස්සේ නදීකාගේ සිතේ ඇතිවූ කෝපය ඇයට රාත්‍රී නින්ද පවා අහිමි කරන්නට විය. අවසනදී නදීකා දැඩි තීරණයක් ගත්තාය. දුරකතනයේ වූ ඡායාරූප ගොනුව පිරික්සා බැලූ ඈ චාරුණීගේ ඡායාරූප කිහිපයක් සොයා ගත්තාය. ඇගේ මුවේ මතු වූයේ කුරිරු සිනහවකි. ඔව්… තමාට ඇති දැනුමෙන් යමක් කර ගැනීම අපහසු නොවනු ඇත…!
මහත් සිත් තැවුලෙන් පසු වූ චාරුණී රැකියාවෙන් ඉවත් වූයේද නදීකාට පවා දැනුම් දීමක් නොකරමිනි. චාරුණී කිහිපවරක් ඇය දුරකතනයෙන් සම්බන්ධ කර ගැනීමට උත්සාහ කලද චාරුණී පරණ සිම් පත ඉවත් කර දමා තිබුණෙන් එම උත්සහය ව්‍යර්ථ වී ගියේය. චාරුණීගේ නිවසට ගොස් තොරතුරු දැන ගැනීමේ හැකියාවක් තිබුණද නදීකා එය හිතාමතාම මඟහැරියාය.
නදීකාගේත් චාරුණීගේත් සම්බන්ධය දුරස් වී යන අතරතුර නදීකා දුකට පත්ව සිටින සමීර වෙත කෙමෙන් කෙමෙන් සමීප වූවාය. සමීර මෙතෙක් කල් සඟවාගෙන සිට තමා රැවටීමට ලක් වූ ප්‍රේම කතාව බ්ඳෙන් බිඳ නදීකාට පවසන්නට වූවත් නදීකා වැඩිදුර විස්තර නොඅසාම සමීර සනසන්නට ඉදිරිපත් වූයේ වැඩිදුර විස්තර ඇසීමෙන් චාරුණී තම මිතුරිය බව හෙළිකරන්නට වේවි යන සිතිවිල්ලෙනි. සම්බන්ධය දුර දිග යන්නට මත්තෙන් නදීකා රැකියාවෙන්ද ඉවත් වූයේ චාරුණීගේත් තමාගේත් ඇඳුනුම්කම පිළිබඳව සමීරට දැන ගැනීමට නොහැකි වන්නටයි. මිල මුදල් අතින් අඩුවක් නොමැති පවුලක් බැවින් නදීකාගේ දෙමව්පියන්ද ඈ රැකියාවෙන් ඉවත් වීම ගැන තැකීමක් නොකළහ.
වැඩි කල් යන්නට මත්තෙන්ම චාරුණීගේ ප්‍රේමයෙන් හිස්වූ සමීරගේ ජිවිතයේ අඩුව පුරවන්නට නදීකාට හැකියාව ලැබුණි. නදීකා තම අතීතයේ බොහෝ සිදුවීම් කපටි ලෙස සමීරගෙන් වසන් කර ගත්තේ චාරුණී සහ තමා පිළිබඳව ඔහුට දැනගැනීමට ඇති ඉඩද අහුරාලමිනි. මාස කිහිපයක් ගත වූ තැන සමීරගේත් නදීකාගේත් විවාහය තින්දු වූයේ දෙපසින්ම ලැබුණු ආශිර්වාදය මතයි.
විවාහ උත්සවයට සූදානම් වූ නදීකා චාරුණීට රිදවිය හැකි හොඳම අවස්ථාව තම විවාහ උත්සවය බව තේරුම් ගත්තාය. තනිවම සූදානම් වූ ඈ මෙතෙක් වදනකින් හෝ සොයා බලන්නට උත්සහ නොකළ චාරුණීගේ නිවස කරා ගියේ විවාහයට ඇරයුම් කිරීම සඳහාමය. එහෙත් ඇගේ කුරිරු බලාපොරොත්තුව සුන් වී ගියේ චාරුණී ඒ වන විටත් විදේශගත වී තිබුණ බැවිනි. චාරුණි රට හැරදා යන තුරුත් තමා කිසිවක් නොදැන සිටීම නදීකාගේ කෝපය තව තවත් වඩවන්නට විය.
විවාහයෙන් පසුවත් නදීකා නිතර නිතර චාරුණී පිළිබඳව සොයා බැලුවත් තොරතුරක් දැන ගන්නට හැකි වූයේ නැත. චාරුණීගේ දෙමව්පියන් පවා ඈ පිළිබඳව කිසිවකුටත් විස්තර කියන්නට අදි මදි කලහ. නමුත් චාරුණිට රිදවීමට ඇගෙන් පළිගැනිමට ඇති වූ සිත නදීකා කෙරෙන් කිසි විටෙකත් පහව ගියේද නැත. පස් අවුරුද්දකට පසු චාරුණී නැවත ලංකාවට පැමිණ ඇතැයි ඇසීමෙන් නදීකා වඩාත් සතුටු වුයේ එබැවිනි.
කෙසේ හෝ තමාගේ ව්‍යාජ සිනවෙන් කතාවෙන් සහ අනුකම්පාවෙන් චාරුණීගේ සිත දිනාගත් නදීකා ඇයව තම නිවසට කැඳෙව්වේ ඇගේ සිත රිදවීම අරමුණු කරගෙනමය. චාරුණී නදීකාගේ නිවසට පැමිණිය දා චාරුණී මෙන්ම සමීරද තුෂ්ණීම්භූත වූ බව නදීකා දුටුවත් ඈ ඒ කිසිවක් නොදුටු ලෙසින්ම සිටියාය. තම මිතුරියක ගැන පවසා තිබුණත් ඒ චාරුණීම බව නොදත් සමීර හදීසි ව්‍යාපාරික කටයුත්තක් යැයි හඟවමින් නිවසින් පිටවී ගියේ එබැවිනි.
දිනය පුරා චාරුණී තම නිවසේ රඳවාගනිමින් තම සැමියාගෙන් ලැබෙන ආදරයත් පවුල් ජීව්තයත් ගැන නොයෙකුත් දෑ කියමින් ඇගේ සිත රිදවූ නදීකා බලාපොරොත්තු වූයේ ඉන් පසු හෝ චාරුණී තමාට සත්‍ය පවසනු ඇති බවයි. ඇගේ කතාව අසා ඈ පිළිබඳව දුක් වන්නටත් අනුකම්පා කරන්නටත් නදීකා මඟ බලා උන්නේ සිත යටින් සිනහසෙමිනි.
නමුත් දැන් සිදු වී ඇත්තේ කුමක්ද…! කිසිවක් නොපවසාම ඈ යළිත් රටින් පිටවී ගොස් ඇත. නදීකා තව තවත් කෝපයෙන් දැවුනේ තම පළිගැනීම අසාර්ථක වූ බව දැනීමෙනි.
දවස පුරා කෝපයෙන් දැවෙමින් උන් නදීකාට නිවසේ වැඩපල හෝ නිවැරදිව කිරීමට සිහි කල්පනාවක් නොවීය. සිතිවිල්ලේම නිදන කාමරයට ගිය නදීකා ලැප් ටොප් පරිඝනකය අතට ගත්තේ අරමුණකින් නොවේ.
තම නොසන්සුන් සිත සැහැල්ලු කර ගැනීමට සිතා මුහුණු පොතේ සැරිසැරූ නදීකා තමාට ඊමේල් පණිවිඩයක් ලැබී ඇති බව දුටුවේ අහම්බෙනි. කුහුලෙන් යුතුව එය විවර කර බැලූ නදීකා දුටුවේ එය තම සැමියාගෙන් ලැබුණු පණිවිඩයක් බවයි.
නදීකා. මේ පණිවිඩය එවන්නේ බොහෝම හදිසියෙන්. මෙය කියවන විටත් ඔබට චාරුණී එවන ලද ලිපිය ලැබී ඇතැයි මම සිතමි. එම ලිපිය මා චාරුණි හමුවන විටත් ඔබට එවා අවසන්.
ඔබ අපගෙන් සැඟවූ සියල්ල මා විසින් සොයාගත්තේ කලකට ඉහතදීයි. ඔබේ පරිඝනකය මා පාවිච්චි කල එක් දිනෙක එහි ඔබගේත් චාරුණීගේත් ඡායාරූපත් මා වෙත එවන්නට සකසන ලද බොරු ඡායාරූපත් සඟවා තිබෙනු මම දුටුවෙමි. ඒ හැරුණු කොට මා වෙත එවන ලද නිර්ණාමික ලිපියේ කොපියක්ද සොයාගන්නට මට හැකිවිය. ඔබට ඒවා මකාදමන්නට අමතක වීම මගේත් චාරුණීගේත් වාසනාව විය යුතුය. මා සත්‍ය දැන ගත් වහාම චාරුණීගේ දෙමව්පියන් හමුවී සමාව අයැද ඇගේ දුරකතන අංකය ලබා ගෙන ඇය හා කතා කළෙමි. නමුත් ඒ කිසිම අවස්ථාවක ඔබ ගැන හෝ මා විවාහක බව හෝ ඇයට නොකියා සිටියේ ඇගේ සිත රිදවීමට නොහැකි බැවිනි. අවසනදී ඇයව කෙසේ හෝ ලංකාවට ගෙන්වා ගැනීමටද කැමති කරවා ගත්තේ මා විසිනි. එහෙත් ඇය ලංකාවට පැමිණි පසු මම මාගේ ව්‍යාපාරය සමඟ කාර්යබහුල වන අතරතුර ඔබ මට ඉස්සර වී තිබුණි. එදා නිවසට මිතුරියක් පැමිණෙන බව ඔබ කීවත් ඒ පැමිණෙනේ චාරුණී බව මම කිසිලෙසකින් වත් නොසිතුවෙමි. මා ලෙසින්ම ඇයද එදා යලිත් වරක් අපහසුතාවයට ලක් විය. මට ඉඩ ලැබුණු මොහොතේම යළිත් ඈ හමුවට ගියත් ඒ වන විටත් ඈ ඔබට ලිපියක් එවා යළිත් විදේශගත වන්නට සූදානමින් උන්නාය. ඔබේ කපටිකම් ඔබ අප රැවටූ අන්දම ඇයට ඒත්තු ගන්වන්නට මට මහා වෙහෙසක් දරන්නට සිදු විය.
මේ වන විට සියළු සත්‍ය දන්නා ඈ මෙන්ම මමද ඔබ පිළිබඳව සිටින්නේ මහා කලකිරීමෙන්. ඔබ හා විසීමට මට තවදුරත් සිත හදාගන්නට නොහැකියි. මගේ නීතීඥයා විසින් අපගේ දික්කසාද ලියකියවිලි හැකිතරම් ඉක්මනින් ඔබ වෙත ලැබෙන්නට සලස්වනු ඇති. තවදුරටත් චාරුණීටත් මටත් ඔබ කරදරයක් නොවනු ඇතැයි මම විශ්වාස කරමි. මේ සියල්ල එකලාසයක් කරන තුරු මම කෙටි කලකට චාරුණී සමඟින් විදේශගත වෙමි. ඔබට සුබ අනාගතයක් ..!
මීට ,
සමීර දසනායක.
ඊමේල් පණිවිඩය කියවූ නදීකාගේ දෑස නිලංකාර වී ගියේය. පළිගැනීමේ චේතනාවෙන් අන්ධ වී උන් තමා නැවත හැරෙන්නට නොහැකි ලෙස අතරමං වී ඇති බව ඇයට අවබෝධ විය.
නිමි
උපුටා ගැනීම: පුෂ්පිකා විජේරත්න.