උදේට ස්කෝලේ යන්න බැරිව හොර ලෙඩ ගත්ත කට්ටිය ඉන්නවා ඕනි තරම්. ඒ වගේම තමයි ස්කෝලේ ඇතුලට ගියාට පස්සෙ කලින් එන්න ඕනිවට හොර ලෙඩ ගත්ත අයත් ඉන්නවනේ. මේ ඒ වගේ කතාවක්.
රංගිකාගෙ ගෙවල් තිබ්බේ එයා යන ස්කෝලෙට ගොඩාක් දුරින්. එයා ස්කෝලෙ ඇරිලා ගෙදර එද්දී හවස තුනහමාර විතර වෙනවා. හවසට ටියුෂන් ක්ලාස් තිබ්බොත් ගෙදර එද්දී හවස හයහමාර හතවත් වෙනවා. සෙනසුරාදා ඉරිදා කියලත් ඉතින් ගෙදර ඉඳිල්ලක් නෑ. ක්ලාස් තමයි ,ඒ ලෙවල් ලියන්න ඉන්න දොළහ වසරෙ ළමයෙක්නේ.
හැබැයි මෙයාගෙ තාත්තා නිවාඩු දවස් වලට මෙයාත් මොනාහරි බොරුවක් කියලා ගෙදර නතර වෙනවා. ඒත් ඉතින් හැමදාම ඔය වැඩේ වෙනවට රංගිකාගෙ අම්මයි තාත්‍තයි කැමති වුනේ නෑ. ඔන්න ඔහොම බොරුවක් කියලා නතර වෙන්න හදපු දවසක මෙයාට ස්කෝලෙ යන්න වෙනවා.
රංගිකා ස්කූල් වෑන් එකේ යන ගමනුත් කල්පනා කර කර ගියේ ඉක්මනට කොහොමද ගෙදර එන්නේ කියලා. එදා උදේ වරුවේ පන්තිය භාර සර් උගන්න උගන්න ඉද්දි , උදේ අටහමාරට විතර රංගිකාට බඩේ කොරයක් හැදෙනවා. ඉතින් ළඟ හිටපු යාළුවෝ සර්ට මේ ගැන කියනවා. මෙයා වේදනාව ඉවසගන්න බැරිව අඬනවා. මෙයාට නැඟිටගන්නත් බෑ. සර් ඉක්මනට ස්ටාෆ් රූම් එකට ගිහින් තව ටීචර්ස්ලා දෙන්නෙකුත් එක්ක ඇවිත් කියනවා, අපි මේ දරුවව ඉක්මනට පහලට අරගෙන යන් කියලා. ඒ මොකද රංගිකාගෙ ක්ලාස් එක තිබ්බේ තුන්වෙනි තට්ටුවේ. මෙයාට දැන් නැඟිටගන්නවත් බෑනේ. ස්කෝල වල ලිෆ්ට් තියෙන එකක්යැ. ඉතින් පන්තියේ යාළුවෝ හතර පස් දෙනෙක් මාරුවෙන් මාරුවට රංගිකා වාඩි වෙලා හිටපු පුටුවත් එක්කම මෙයාව උස්සගෙන පඩි පෙල් බහින්න ගන්නවා.
ඒ වෙලාවෙ නම් යාළුවෝ ගැන පව් කියලා හිතුනත්, තාත්තා නිවාඩු දවසට ගෙදර ඉන්න ඕනි කියන සිතුවිල්ල දරුණු වුන නිසා සද්ද නැතිවම ඉන්නවා. ” සර් තාත්තට කෝල් කරලා කියලා ඇති. තාත්තා එනකම් මාව සික් රූම් එකට ගෙනියන්න වෙන්න ඇති හදන්නේ ” කියලා හිත හිත එළියෙන් මූණ බෙරි කරන් , ඇතුලෙන් සතුටෙන් පුටුවට වෙලා පඩි පෙල් බහිනවා.
පහලට ආපු ගමන් සර් කෙනෙක්ගේ වාහනේකට මෙයාව දාගන්නවා. පන්තිය භාර සර් එක්ක තව මිස්ලා දෙන්නෙකුත් වාහනේට නඟිනකොට රංගිකා කල්පනා කරනවා මේ කොහෙ යන්නද කියලා. විනාඩි දහයක් විතර යද්දි වාහනේ නවත්තපු තැන දැක්කම තමයි රංගිකාට දෙවියෝ සිහිවෙන්නේ.
ස්කෝලෙන් දඩි බිඩියේ එක්කන් ඇවිත් තිබුනේ ඉස්පිරිතාලෙට. දැන් යන්න බෑ කියන්නද, එහෙම කලොත් බොරුවක් කියලා අහුවෙනවනේ. වැඩිදුර ප්‍රතිකාර වලට වාට්ටුවකටත් දානවා. ටික වෙලාවක් යද්දි අම්මා එනවා. තාත්තා නෑ. රංගිකා අහනවා අම්මගෙන් තාත්තා කෝ කියලා.
” තාත්තට උදේම කෝල් එකක් ආවා පුතේ, නිවාඩු කැන්සල් හදිසි ඩියුටියකට එන්න කියලා.”
අන්තිමේදී හොර ලෙඩේ විපාක විදියට දවසක් ඉස්පිරිතාලෙ නතර වෙන්නත් මෙයාට සිද්ධ වෙනවා.
උපුටා ගැනීම: බුද්ධි ජයවීර