ඉස්කෝලෙ යන කාලෙ කියල නෑ අපිට ඔය පොඩි පොඩි ව්‍යාපෘති කරල කීයක් හරි හොයාගන්න ඝන දෙයියො චෑන්ස් දීල තිබුනෙ. මේ කතාව සිද්ධ වෙන්නෙ 96 – 97 කාලෙ ලංකාවෙ දිගම බස් ස්ටෑන්ඩ් එකේ.. හරිය.
අපි A ලෙවෙල් කරන කාලෙ. ඉස්කෝල ඇරුනම බස් ස්ටෑන්ඩ් එකට බහින සුවහසක් කැත කෙල්ලන් අතරේ ඉඳහිට දෙව්ලොවින් බහින දෙවඟනන් බඳු කෙලි පැටික්කියන්ද නැතුවා නොවේ.
එවන් එකියක් අපේම පාසැල් බස් රියේ යෑම ඒම උන්ට පැනි හලන සුවහසක් කොල්ලන් අතරේ අපටද ආඩම්බරයකි.
රතු පාට ටයි පටියක් පැලඳ, ගාල්ලේ ඕලන්දකාරයොන්ට අයිති බිම් තීරුවක වූ බාලිකාවක අකුරු කෙරූ ඇය, වැලිගමට නුදුරු ගම්මනයක ජීවත් වුනි. අගේ රූ සපුව වර්නණා කිරීම මා සම වයසේ අනෙකුත් කැත, ඉරිසියාකාර කෙල්ලන්ගේ වෛරයට පාත්‍ර විය හැකි බැවින් ඇගේ රූප කාය වර්ණනාවෙන් ඔබව මනමත් කිරීමට නොහැකිවීම පිලිබඳ මම කනගාටු වෙමි.
“ප්‍රොබ්ලම්ස් ක්‍රියේට්ස් ඔපචුනිටීස් ” කිව්වෙ කට කහනවට නෙවෙයිනෙ.
ඉතිං අපේ බස් එකේ ආව ගිය ඔය චංගුමීට කෙල හලාගෙන එන උන්ගෙ ඇවිටිලි වලින් අපේ කන් පිරිල තිබුනෙ.
“අනේ මචං .. අරකිව යාලු කරල දියන්..”,,
අනේ බ්‍රෝ මේ ලියුම අරකිට දියන්”
“ඒ අරකි බහින්නෙ කොහේද බං”
“මචං.. අරකිට අයියල ඉන්නවද බන්”
“ඒයි අරකි කවුරු හරි එක්ක යාලුද?’
“මචං අරකි පංති යන වෙලාවල් එහෙම දන්නවද? ආදී වූ අනේකවිද වූ ඇවිටිලි ඒ අතරය.
පැනි හලන්නන්ගේ එවන් අවශ්‍යතා ඉටුකරදීමේදී එහි අවධානම සැලකිල්ලට ගෙන අප විසින් ඔවුන්ට විවිද සහන පැකේජ හඳුන්වා දී තිබුනි. ටොෆියේ, බුල්ටො එකේ සිට ගල් බනිස්, මාලු පාන්, අලියා බීම බෝතල් දක්වා දිගු පරාසයක අපගේ අයකිරීම් පැවතින. දින හතර පහක් මෙසේ සප්පායම්ම් වූ පසු ඇයට දෙන මුවාවෙන් පැනියාගේ ලියුම ඉල්ලගන්නා අප එය ඇයට දෙන්නේ නැත. සතියක හමාරක විරාමයකින් පසු ඒ ගැන විමසීමට ගිය බොහෝමයක් පැනි හලන්නන්, ඇයගේ රැවුම් , ගෙරවුම් හමුවේ පසු බැස ගියද, කොයිසා එසේ නොවීය.
කොයිසාගෙන් අප දෙදෙන මේ වන විටත් වේල් හත අටක්ම බඩ පිරෙන්නට කා බී ඇත්තෝය. කොයිසා දෙවන ලියුමද ඇයට දෙන ලෙස අපට ලබා දුන්නයි කියමුකො. මේ ඩීල් එක කතාකරපු ටයර් කඩේ මහත්තය ( වර්තමාන ) කොයිසට මාව අඳුන්වල දෙන්නෙ අර චංගුමීගෙ නැන්දගෙ පුතා හැටියට. මේවගේ වැඩවලදි අපි ඝන දෙවියන්ටත් බුල්ටො එකක් හරි පූජා කරා.
දැන් ඉතින් දෙවෙනි ලියුමට උත්තරයක් අරන් දීපා..න් කියල කොයිසගෙන් බේරිල්ලකුත් නෑ.. අපි උගෙන් කෑමෙ අඩුවකුත් නෑ..
එක බස් එකේ හැමදාම යන හින්ද කොච්චර ආඩම්බර උනත් චංගුමීගෙ අපට පොඩි මෙව්ව එකක් තිබුන.. ලස්සන කොල්ලොනේ.. ( හරි හරි ඒ කාලේ )
බැරිම තැන දවසක් අපි චංගුමීට කතාකරල කිව්ව අනේ මේ.. ච….. අපේ යාලුවෙක් ඔයාව යාලු කරල දෙන්න කියල හරි වදේ.. අඩු ගානෙ පොඩ්ඩක් උගේ දිහා බලල හිනා වෙන්න වත් කියල. මේකිත් ඒක අහල හිනා උනා.. එච්චරයි..
මෙච්චරකල් පාන් බනිස් අරන් දීපු අපිට මූ ටික දවසකින් Fried Rice අරන් දුන්න. එතකොට ඔය Sea Line එක දාපු අලුතම අපිත් හොල්මන්…
කන්නත් බැරි කාලෙ හින්ද ගිල්ලෙ ඉතින් බොකු බඩවැල් ඇඹැරිල නියපොතුත් ඉදිමෙන ගානට. ඔන්න බලන්න ප්‍රිය හිතවත.. හිතවතිය… කෙල්ලෙක්ගෙ එක හිනාවක ආනුභාවය…
සතියකින් හමාරකින් තුන්වෙනි ලියුමත් කොයිස ගෙනැත් දුන්න කියමුකො. දැන් මූ පට්ට මොරාල්… ඇඹලය වගේ පස්සෙන් යනකොට කෙල්ල කින්ඩියට හිනාවුනත් මූ හිතන්නෙ ලවු කියල.
“උන්මාද වූ ප්‍රේමාදරේ… සමනල වසන්ත යවුවනයේ…
“සිතින් විතරක් පෙම් කරන්නම් …. දූරින් හිඳ ඔබ දෙස බලන්නම්,,,,..”
බැරිම තැන මෙහෙම වැඩක් කරා.. නෙලුවෙ ප්‍රසන්න ඉඳියෙ සම්පත් කඩේ ගාව .. හැබැයි ඉස්කෝලෙ ගියෙ අපිත් එක්ක අපේ පන්තියේ.. මුතු කැට අකුරින් ලියන්න පුලුවන් එකෙක්….. ඌට කියල ලියෙව්වෙ මෙහෙම…
….. අයියෙ …………..,
ඔයාගෙ ආදරය මට නොතේරනව නෙවෙයි අයියෙ. මම තවම විභාගෙවත් නොකර ඕව ගැන හිතන්න බෑ. ඒකෙන් කියන්නෙ නෑ ඔයාට මම අකමැතියි කියල . තව පොඩි කාලයක් ඉවසන්නනම බැරිද අයියෙ? ඔයා මගේ පස්සෙන් එන්කොට මගෙ යාලුවො මම ගැන වැරදියට හිතාවි.. මම ඔයාට එක දවසක දෙන්නම් කතා කරන්න.
ඔයා සෙනසුරාද ක්ලාස් ඉවරවෙල මම ගියාට පස්සෙ පාර්ක් එකේ සමනල පාලම ලඟ කොනේ බන්කුවට එන්න. අපි කතා කරමු . හැබැයි ආපහු විභාගෙන් පස්සෙ..
බ්ලා.. බ්ලා
නම්කී.. චංගුමී..
ඉතිම්.. පින්වතුනි අපි දන්නවනෙ මේකිගෙ ඇත්තම චරිතේ.. පත්තිනි අම්මල හතක් නෙවෙයි දහයක් කියහල්ලකො….
එතකොට ඔය බද්දෙ සර්ගෙ පංති තිබුනෙන් සෙනසුරාද උදේ වරුවෙ ( ඔව් යකුනේ කොග්ගල කඩේ හන්දියේම තමයි ). එයා ඒක ඉවරවෙල පාක් එකට යනව ඉතින් එයාගෙ බෝයි එක්ක පොඩි වැඩ ටිකක් කරගන්නත් එක්ක. අපිත් ඉතින් මොසාඩ් එකටත් එහා චංගුමීගෙ රහස් දන්න මිනිස්සු.
ඉතින් ප්‍රිය හිතවතුනි, එම ලියුමෙන් කුල්මත් වූ ඔහුගෙන් අපි මොනවා ගලවාගන්නට ඇතිද?සෙනසුරාද වෙනකල් කෑව බොලව් ඉස්මුරුත්තාව හැදෙන්න…
අවසන කොයිසා දහසක් බලාපොරොත්තු ඇතුව යන්නේ, සිය පෙම්වතා සමග පෙම් සැප විඳින චංගුමීගේ බංකුව අසලටයි…
ඉතුරු ටික Asanka Indunil ගෙන් අහගන්න…
ප. ලි;
සති හතරක් ගාල්ලට නොපැමින සිසුන් දෙදෙනෙක් මාලු කඩේ ගාවින් බැස පාසල් යයි. ( එහෙම ගියපු එකම උන් අපි නෙවෙයි )
උපුටා ගැනීම: පුෂ්පිත ජයසේකර