බ්‍රහස්පතින්දා රෑ පොඩි පාටියක් තිබුනා. ඒකේ වීඩියෝ එකක් ශෙයාර් කරාම ඒකට ආව කමෙන්ට් එකක් එක්ක කතාවක් මතක් උනා. කමෙන්ට් එක මේක.
හානේ අපි වගේමයි.ලස්ස්නට සිංදු කියන කෙනාට මුලු සිංදුවම ඇදන් යන්න දීලා අන්තිමේදී
ලොවම දැකුම් කලූඌඌඌඋඉ කියල ගිරිය පුප්පන් කෑගහනවා.
ඒක දැක්කම තමයි මේ කතාව මතක් උනේ..
මම ඉස්කෝලේ යන කාලේ අපේ ගෙවල් පැත්තේ නංගි කෙනෙක් හිටියා හරියටම මට කෙලින්ම පේන ගෙදරක. මේකි මාර ලස්සනයි. ඒත් ට්‍රයි කරන්න හිතෙන්නෙත් නෑ . කොහොම උනත් අසල්වාසීන් නේ. වන උනොත් රෙදි නෑ නේ. ඒක නිසා.
කොහොම හරි මේකි එක පාරට පට්ටම ලස්සන උනා ෆොටෝශොප් වලින් හැදුවා වගේ. දැන් නම් හිතෙන්නෙම ට්‍රයි කරන්න. මගේ තියරිය තමයි ඉස්සර වෙලාම කෙල්ල කැමති අකමැති දේවල් හොයාගන්න එක. ඒ අනුව තමයි ගේම් ප්ලෑන් එක හදන්නේ.
කරුමේ කියන්නේ මේකි කැමති මට වැඩිය සෙට් වෙන්නෙම නැති ඒවට. ඒවයිනුත් ඒකි වැඩියෙන්ම කැමති ඉංග්‍රීසි සින්දු වලට. මම දන්නවා දැන් මේක හරියන්නෙම නෑ කියලා. ඒ උනාට අතාරින්න හිතෙන්නෙත් නෑ. මට සෙට් උනා එල්ටන් ජෝන්ගේ සැක්‍රිෆයිස් කියන සින්දුව. ඉස්සර මේ ලිරික්ස් ගන්න ස්මාට් ෆෝන් අනං මනං නෑ නේ. මට මේ එල්ටන් කාරයා කියන මෙලෝ මලදානයක් මතක හිටින්නේ නෑ. ඒත් ඉතින් ගේම අතාරින්නත් බෑ නේ.
මම ඒ සිදුව අරගෙන ආවා රෙකෝඩ්බාර් එකකින්. දැන් උදේ පාන්දර නැගිටලා ඒකි එලියට බහින වෙලාවට බ්‍රශ් එකට ටූත් පේස්ට් දාගෙන අර සින්දුව සද්දෙන් දාලා එලියට බහිනවා. සින්දුව යනවා, මම දත් මදිනවා, කෙල්ලා මිදුලේ ඉන්නවා පේනවා. මට ඕන මම බඩෙන් එද්දිත් ඉංග්‍රීසි සින්දුවක් කියාගෙන ආව ලයින් එකක් දෙන්න.
ඉතින් ඔය සින්දුව අහගෙන මම දත් මදිනවා. හරියට ටයිම් කරලා කෙල ගහලා හයියෙන් කියනවා “ඇන්ඩ් ඉට්ස් නෝ සැක්‍රිෆයිස්” කියලා.
එසැනින් ආයිත් බ්‍රශ් එක කටේ ගහගන්නවා. මොකද ඉතුරු ටික දන්නේ නෑ නේ. ආයිත් පොඩ්ඩක් මැදලා හරි ටයිම් එකට කෙල ගහලා සද්දෙන් කියනවා
“බට් ඉට්ස් නෝ සැක්‍රිෆයිස් ..
නෝ සැක්‍රිෆයිස් ..
ඉට්ස් නෝ සැක්‍රිෆයිස් .. ඇට් ඕල්” කියලා.
කියපු සැනෙන් බ්‍රශ් එක කටේ ගහ ගන්නවා.
තාත්තා දවස් දෙකක් විතර මේක බලාගෙන මීටර් කරගෙන ඉඳලා. උදේ කෑම කන වෙලාවක තාත්තා අම්මට කියනවා “මාලි .. දැන් අපේ කොල්ලගේ දත් කිරි පාටයි නේ..”කියලා.
අම්මා බලන් ඉන්නවා තාත්තා දිහා. හරියට වෙන ග්‍රලෝකෙකින් ආව ජීවියෙක් දිහා බලාගෙන ඉන්නවා වගේ. එහෙම ඉඳලා ඇහුවා ඇයි එහෙම කියන්නේ කියලා.
තාත්තා තව කිරිබත් කෑල්ලක් කන්න කටට කිට්ටු කරලා කියනවා.
“නෑ.. මූ දැන් සැක්‍රිෆයිස් කියන ටිකට විතරනේ දත් මදින එක නවත්තන්නේ” කියලා.
එක පාරට කකා ඉඳපු කිරිබත් කෑල්ලක් ගුරෙන් ගිහින් මුලු මොලේ වටේම රවුමක් කැරකිලා නහයෙන් පිට උනා.. අම්මෝ ඒකේ සැප.
එදා ඉඳලා ඉංග්‍රීසි සින්දු අහන එක නැවැත්තුවා.
උපුටා ගැනීම: Sajitha Roshan