ටෙලිවිෂන් නැති කාලයේ හැත්තෑව දශකයේ රේඩියො එක පැය විසි හතරේම ඇහෙන්න තිබුන නිසා, කාන්තාවන්ට විශේෂ වූ වැඩ සටහන් පවා කනට ඇසෙන එක නවතන්නට නොහැකි විය. එයින් මට වඩාත් මතක ‘කාන්තා කලඹ’ වැඩ සටහනයි.
එයිනුත් මම අද කියන වැඩ සටහන කිසිදාක අමතක නොවන එකකි. මෙය කියවූ පසු ඔබටත් එය අමතක නොවෙනවා පමනක් නොව ඔබ මෙයින් කියවෙන කෑම එක හදන හැම වෙලාවේම මට පින් දේවි මා ජීවතුන් අතර සිටියත් නැතත්.
‘අද කාන්තා කලඹ වැඩ සටහනෙන් ඔබ වෙතට ගෙන එන්නේ ගෙදරින් ඉවත දමන දෙයින් රසවත් කෑමක් සාදා ගන්නා හැටියි. ඔබ කවුරුත් දෙනා පාහේ වැටකොලු පොතු ඉවත දමනවා නේ ද?
අපි පොඩි කාලේ ඒවා තම්බලා පොල් එක්ක කෑවා, ඒවා හරිම රසයි වගේම ගුනයි.
අද මේ වැටකොලු පොතු වලින් කෑම සාදා ගන්නා හැටි අපට ලියා එව්වේ තිඹිරිගස්‍යායේ මහසෙන් මාවතේ තලතා පෙරේරා.
අපි කැම සාදා ගන්නා හැටි කීමට පෙර ගීතයකට සවන් දෙමු. මේ ගීය ඉල්ලා එවා තියෙන්නේ නුගේගොඩ ෂරීනා, ෆරීනා, ශහීනා, මාතර රාහුල පාරේ ලක්මාලි ද අල්විස්, මොරටුවේ දේවිකා මෙන්ඩිස්. මෙන්න ඔබ වෙනුවෙන් ඇබා ගේ ෆනැන්ඩො ගීතය.’
ගීතයෙන් පසු,
‘මම හිතනවා ඔයාලා ගීතය රස විඳින්න ඇති කියලා. දැන් මම ඔයාලට වැටකොලු පොතුවලින් රසවත් කෑමක් සාදා ගන්නා හැටි කියා දෙන්නම්.
වැටකොලු හීනියට කපා, මිරිස් කුඩු කහ සහ ලුනු සමග මිශ්‍ර කරන්න. ඉන්පසු බී ලූනූ බාගයක් කපා කරපිංචා රත් වූ පොල්තෙල් මේස හැඳි දෙකක දමා රන්වන් පාට වෙනතුරු බැදෙන්නට හැර, වැටකොලු පොතු එයට එකතු කරන්න.
ඉන්පසු සුද්ද කරනලද ඉස්සෝ ග්‍රෑම් පන්සීයක් එයට එකතු කරන්න. ඉස්සන් යන්තමට බැදෙන්නට හැර තක්කාලි සෝස් මේස හැදි දහයක් එකතු කර මනාවට හැඳි ගාන්න.
මේ අතරතුර ඔබගේ අවන් එක සෙන්ටිග්‍රේට් අංශක 220 රත් කර තබා, තරමක ප්‍රමානයේ කුකුලකුගේ ඇතුලට අර මිශ්‍රනය ඇතුලුකොට, කුකුලාගේ හමේ ලුනු, ගම්මිරිස් සහ බටර් වලින් අතගා, අවන් එකේ පැයක් රෝස්ට් කරන්න.
පැයකින් එය බා ගෙන අලංකාර භාජනයකට දමා, බාස්මතී හාලෙන් පිසූ බත්, සහ අනෙක් පිසූ එලවලු සමග මේසයට යවන්න.
ඔබගේ සැමියා සහ ඔහුගේ මව මේ ඉවත ලන වැටකොලු වලින් සෑදූ කෑම කා, ඔබ ගැන ඉතාම සතුටු වෙන බව අපට ඉතාම විශ්වාසයි. ඔබ අදම මේ කෑම අත් හදා බලන්න.
හෙට ඔබ වෙතට ගෙන එන්නම් ඉවත දමන දේවල් වලින් අතුරු පසක් සාදා ගන්නා ආකාරය. දැනට ඔබෙන් සමු ගන්නා මා චන්ද්‍රා සේරසිංහ. ආයුබෝවන්’
ඔයාලත් මේ කෑම එක හදලා කියන්නකෝ හබීගේ ප්‍රතිචාරය කොහොමද කියලා.
උපුටා ගැනීම: Devapriya Siriwardena