ජහුටා යනු මා පාසල් කාලයේ හඳුනාගත් මාගේ මිතුරෙකි. අප කිසි දිනක ඔහුට ඔහුගේ නියම නමින් අමතා නැති අතර ඔහුද තම නමට වඩා ජහුටා යන නාමයට බෙහෙවින් ප්‍රිය කලාය.
එවකට අප අට වසර පංතියේ ඉගෙනුම ලැබූ ලා බල කොල්ලන්ය. මේ අවදියේ දහය වසරේ ඉගනුම ලැබූ බබුවා නම් කඳ බඩ මහත එකෙකු දිනපතා අපව බය කර අපේ අතේ තිබූ රුපියල දෙක ඩැහැ ගැනීමටත් කැන්ටිමට කඩාපැන අප කන පාන් කාලට, මාළු පාන් එකට, බීම බෝතලයට කෙලින්නත් පුරුදුව සිටියේය . මෙය නොරිස්සූ ජහුටා
“මම ඕකට හොඳ පාඩමක් උගන්වනවා”
යැයි අප සමඟ කිහිප වරක්ම පැවසා සිටියේ අප හිත් තුලටද ප්‍රීතියේ හිරු කිරණ පතිත කරවමිනි.
කිසිදාක කැන්ටිමෙන් බීම බෝතල් නොබොන ජහුටා දිනක් කැන්ටිමට වී බීම බෝතලයක් තම ඉදිරියෙන් තබාගෙන හුලංවිස්කෝතුවක් කනයුරු දුටු අප විශ්මයට පත්විය. මොහොතකින් එම ස්ථානයට පැමිනි බබුවා
“ආ බීම නේද එහෙනම් මම මේක බොනවා”
යැයි පවසා උගුරට දෙකට ජහුටාගේ බීම බොතලයම අහවර කරන අයුරුද අප බලා සිටියෙමු. කිසිත් නොකියූ ජහුටා පංතියට පැමින වාඩිවී සිටි අතර අප පංතියට ඉදිරියෙන් දහයේ වසරේ පංති පිහිටා තිබුණි.
මොහොතකින් අප ඉදිරියෙන් විදුලි වේගයෙන් දිව යන ජොල් බබුවාගේ රුව අපට දැක ගත හැකිවිය. හීයක් සේ ගිය බබුවා ආපසු ආවේ කේඩෑරී වී ගිය පුවක් ගසක් මෙන් හැකිලී ඇදී පැදී ගොසිනි. නැවත මොහොතකින් හී වේගයෙන් විශාල බඩ පද්දමින් දිවයන බබුවාගේ රුව අපට දැක ගත හැකිවූ අතර ජහුටාගේ බක බක සිනා හඬින් පංතිය පිරී යන්නට විය.
“මම අර බීම බෝතලේට ජාපාල ඇට හතරක් දාලා තිබුනෙ ඕකා තව පැය දෙකක්වත් ඔහොම දුවයි” යැයි ජහුටා සිනාසෙමින් පැවසීය.
එදින බබුවාගේ කෑ ගැසිල්ල සහ දිවීම අපට මහත් විනෝදයක් ගෙන දුන් අතර වරක් තදියම වැඩි වූ බබුවා කාන්තා වැසිකිළියට ඇතුල් වීම නිසා ගැහැණු ළමුන් පිරිසකගෙන් ලැට් බාල්දි සහ වතුර සංග්‍රයක් බුක්ති විඳි බවට අපට ආරංචි විය. එදිනෙන් පසු බබුවාගේ නම ඉදිරියට ලැට් යන මුලකුරු එකතු වූ අතර ජහුටා අප අතර වීරයෙක් විය.
පාසලේ නම දිනූ ගුරුවරියකට හදිසියේ ලැබුන මාරුවීමකට එරෙහිව සිසුන් සහ ගුරුවරුන් විසින් උද්ගෝෂණයක් සංවිධාන කර තිබූ අතර එවකට නමය වසරේ සිටි අපට එය මහත් විනෝදයක් විය. තැනින් තැන රතිඤ්ඤා දමමින් කෑකෝගසමින් උද්ගෝශනයේ යෙදුන සිසුන් අතර අප හිතවත් ජහුටාද වූ අතර ඔහුගේ අතේගමේ වැල ගමේ කපුටන්ට යනුවෙන් ලියූ බෝඩ් ලෑල්ලක්ද විය. උද්ගෝශනයට පසු දින උදේ වරුවේ ජහුටා පංතියෙන් අතුරුදන්ව සිටි අතර මද වෙලාවකට පසු හිනාපිරි මුවෙන් ජහුටා පංතියට පැමිනියේය.
ඉන් මොහොතකට පසු මහා හඬක් නන්වමින් යම් පිපිරීමක ශබ්දයක් ඇසුන අතර එය කැංටිම තුලින් නිකුත් වූ බව අපට දැනගන්නට ලැබුනි .
කැන්ටිමේ මේසයක ලෑල්ලක හඳුන්කූරකට සවිකර තිබූ රතිඤාවක් පුපුරා යාමෙන් ඒ හඬ නිකුත් වූ බවත්, එවෙලෙහි එම මේසය අසල තේ බොමින් සිටි සංගීත මිස් එම හඬත් සමඟ පුටුව පෙරලාගෙන බිම වැටුණු බවත් , තරබාරු ගුරුවරියක් වූ විද්‍යාව මිස් කමින් සිටි කිඹුලා බනිස ඇගේ හැට්ටය අතරට වැටුන බවත්, අවස්තාවාදියෙකු වූ කැඩෙට් සර් එම කුඹුලා බනිස ගැනීමට හැට්ටය අස්සට අත දමනාවත් සමඟ මහා හඬින් තවත් රතිඤ්ඤාවක් පුපුරා ගිය බවත්, විද්‍යාව ම්ස්ගේ වම් අත කැඩෙට් සර්ගේ දෙකකුල් අතරට වේගයෙන් වැදීම නිසා දෙවැනි ශබ්දය නිකුත් වූ බවත්, එම සද්දයට බියවූ ඒ වනවිට කැන්ටිමට පැමින සිටි විදුහල් පතිවරයා කැන්ටිමෙන් එළියට පැනීමට ගොස් පාන් කෑමට කැන්ටිමේ සාදා තිබූ පරිප්පු භාජනය මත පතිත වූ බවත් කැන්ටිමේ කොල්ලාගේ පුවත්සේවය ඔස්සේ අපට පසුව දැනගන්නට ලැබුනි.
එම මුල් ත්‍රස්තවාදී ප්‍රහාරයට සැකපිට ජහුටා විදුහල්පති ග්‍රහනයට පත්වූ අතර ඇසින් දුටු සාක්ෂි නොමැති නිසා පැය දෙකක් දනගසාගෙන සිටීමෙන් පසු ජහුටාව නිදොස් කොට නිදහස් කරන ලදි. හැට්ටය අස්සට අත දැමීමට වරදකරුවු කැඩෙට් සර් සති කිහිපයක් සිංහල බෙහෙත් කරමින් නිවසේ කාලය ගත කරබවද අපට සැලවිය.
උපුටා ගැනීම: සමීර මධුසංක.