ලොව පුරා රටවල් 189 ක ජාතික රතු කුරුස සමාජ, රතු අඩසඳ සමාජයන්, අන්තර් ජාතික රතු කුරුස කමිටුව හා අන්තර් ජාතික රතු අඩසඳ සමාජ සම්මේලනය, ලෝක රතුකුරුස හා රතු අඩසඳ දිනය ලෙස සෑම වසරකම මැයි 08 දා සමරයි. ලෝක රතුකුරුස හා රතු අඩසඳ දිනය යෙදී ඇත්තේ රතුකුරුස නිර්මාතෘ හෙන්රි ඩුනාන්ට්‌ මහතාගේ ජන්ම දිනය මැයි 08 දාට යෙදී ඇති බැවිනි.
මෙම දිනය සැමරීම තුළින් එදා මෙදා තුර රතුකුරුස ව්‍යාපාරය ලොව පුරා බිලියන ගණනක ජනතාව වෙත සිදු කරන ලද මානුෂීය මෙහෙවර සිහිපත් කිරීම සහ ඒ වෙනුවෙන් තම ශ්‍රමය ධනය කැපකළ සාමාජික සාමාජිකයන් සිහිපත් කිරීම සිදු වේ.
1859 ඉතාලියේ සොල්රිනෝ සටනේදී තුවාල ලත් සොල්දාදුවන් දුක්‌ වේදනා විඳිමින් සිටි අයුරු හෙන්රි ඩුනාන්ට්‌ සියෑසින් දුටුවේය. යුද්ධයේදී තුවාල වූ හා රෝගාතුර වූ අයටත්, අන් අයට මෙන් මානුෂීයව සැලකිය යුතු බවට ලොවට ඒත්තු ගැන්වීමට ඔහුට අවශ්‍ය විය. එම අදහසින් ඔහු ඇරැඹි රතුකුරුස ව්‍යාපාරය එතැන් සිට ලොව මානුෂ ආධාර සපයන විශාලතම සංවිධාන ජාලය බවට පත්විය.
මෙම සංවිධානයේ මෙහෙවර අගය කරමින් ප්‍රථම නොබෙල් ත්‍යාගය හෙන්රි ඩුනාන්ට්‌ හා ප්‍රංශ ජාතික ෆෙඩ්රික් යන අයට ප්‍රදානය කෙරිණි. මීට අමතරව 1917 හා 1944 අන්තර් ජාතික රතුකුරුස සංවිධානය උපහාරයක්‌ ලෙසද නොබෙල් ත්‍යාග පිරිනමා ඇත.
ලොව කොතැනක හෝ රටක ජනතාවට වසංගතයක්, ජල ගැලීමක්, සුළි සුළගක් හෝ ස්වභාවික විපතක් වූ විට මුලින්ම සහන කටයුතු වලට ඉදිරිපත් වන්නේ රතු කුරුස සංවිධානයයි. ලොව පුරා ඇතිවන අන්තර් කණ්ඩායම් ගැටීම් වලදීත් රටවල් අතර ඇතිවන යුද්ධ වලදීත් දෙපාර්ශවයේ මරණ හා පීඩාවට පත් වන අයට අවශ්‍ය කටයුතු සැලසීමේ වගකීම දැරීමට සිදුවන්නේද රතු කුරුස සංවිධානයටයි.
යුද වැදුනු රටවල විරුද්ධතාවයන්ට මුහුණ පෑමට සිදුනොවීම නිසා වෙනත් සංවිධාන වලට වඩා වැඩි සේවාවක් සැපයීමට රතුකුරුස සංවිධානයට හැකිය. බරපතල තුවාල ලැබූවන්ට ප්‍රතිකාර කිරීම, යුද සිරකරුවන් හුවමාරු කිරීමේදීත්, මුදාහැරීමේදීත්, ඒ ඒ රටවලට රෝගී වූවන් භාරදීම වැනි කටයුතු සිදුකරන්නේද රතු කුරුස සංවිධානයේ දායකත්වයෙන්ය
ශ්‍රී ලංකාව ජාත්‍යන්තර රතු කුරුස සංවිධානයත් සමඟ අත්වැල්බැඳ ගත්තේ වර්ෂ 1959පෙබරවාරි මස 28වැනිදාය.රතු කුරුස සංවිධානයේ මූලස්ථානය ස්විස්ටර්ලන්තයේ ජිනීවා හි පිහිටුවා ඇත…
======================
උපුටා ගැනීම: දැනුම සොයන්න මේ පාරෙන් එන්න