ඉතින් මේ ගෙවෙන්නේ 2021 වර්ෂය. ගෙවෙන වසරක්, මාසයක්, දවසක්, පැයක්, විනාඩියක් හෝ එක තත්පරයක්වත් අපිට ආයේ ලැබෙන්නේ නැහැ.ආපස්සකට යන්නට තරම් දියුණු ක්‍රමවේදයක් තවමත් ලෝකය විසින් සොයාගෙන නැහැ. අතීතයට යා හැකි කාලතරණ යන්ත්‍රයක් තවමත් සොයාගෙන නැති නමුත් අතීතයට ඔබට යන්නට හැකියාවක් ලැබුණොත් ? ඉතින් ඔන්න අපිට අතීතයට යන්නට ටයිම් කැප්සියුල් උපකාරී කරගන්න පුළුවන්. ලෝකයෙන් එවැනි ටයිම් කැප්සියුල් හමුවී ඇති බවට වාර්තා පවතිනවා.
ටයිම් කැප්සියුල් එකක් කියන්නේ යම් දිනෙක පෘථිවිය මත තත්ත්වය කෙබදු වීදැයි විස්තර ගොනුකර ඉතාමත් ආරක්ෂිතව තැන්පත්කර පොළව යට ගබඩා කිරීමක්.ඒ අනුව ඒ කැප්සියුලය විවෘත කරගත හැකි වෙන්නේ අනාගතයේ දවසකයි. මේ ටයිම් කැප්සියුලයක් තුළ පුවත්පත්, ගීත, චිත්‍රපටි, හඬ පටි, කාසි ආදී මෙකී නොකී සියල්ලම ගබඩා කර තිබෙන නිසා අනාගතයේ එය සොයා ගන්නා අයට ඊට වසර ගණනාවකට පෙර පෘථිවිය පැවති ආකාරය නිවැරදිව දැන ගන්නට හැකියි.
මුලින්ම මේ වගේ ටයිම් කැප්සියුල් එකක් හමු වෙන්නේ 1914 වසරේ දී. ඒ The Lower Wall Street Business Men’s Association විසින් මිහිදන් කළ එකක්. මෙය ලෝකඩවලින් නිර්මාණය කළ පෙට්ටියක්. එහි ඉතාමත් වටිනා ලියකියවිලි බොහෝමයක් ඇතුළත් වෙනවා. ඔවුන් ඒ වැදගත් දේවල් එහි තැන්පත් කර සීල් තබා තියෙනවා. එයින් ඔවුන් අපේක්ෂා කළේ ඔවුන්ගේ නාමය ඉතිහාසගත කිරීම. පසුව ඔවුන් ඒ පෙට්ටිය නිව්යෝර්ක් Hisorical Society වෙත ලබාදුන් අතර ඒ 1974 වසරේ දී එය විවෘත කර නැවත මිහිදන් කිරීම සඳහායි.එදා සිට 1990 වනතෙක් ඒ ලෝකඩ පෙට්ටිය ගැන කිසිවෙක්ට මතකයක් තිබුණේ නැහැ.
කාලය ක්‍රමයෙන් ගෙවී යද්දී ඒ පෙට්ටියට නැත්නම් ටයිම් කැප්සියුලයට වසර 100කුත් ගතව තිබුණා. ඒ අනුව 2014 වසරේ දී ඒ පෙට්ටිය නැවත විවෘත කරනු ලැබුවා. ඒ පෙට්ටිය තුළ තිබී හමුවුණු දේවල් අතර පදක්කම් කිහිපයක් නගරාධිපතිගේ ලියුමක් සහ පත්තර මිටියක් හමුව තිබුණා. 1774 ගණන්වල විප්ලවාදීන්ගේ ලිපියක් ද ඒ තුළ අන්තර්ගතව පැවති අතර ඉන්පසු නැවත මේ ටයිම් කැප්සියුලය මිහිදන් කරනු ලැබුවා.
මේ පෙට්ටියට පාසල් සිසුන් විසින් ලේඩි ගාගාගේ විවිධ ප්‍රසංගයක ටිකට් පත් සහ තවත් නවීන උපකරණ කිහිපයක් ද ඇතුළත් කරනු ලැබුවා. නැවත එය විවෘත කරන්නේ 2114 වසරේ දී.
ඒ වගේම ස්ටිව් ජොබ්ස් විසින් ද මෙවැනි ටයිම් කැප්සියුලක් නිර්මාණය කළා. 1983 වසරේ දී ඇෆ්ගන්වල පැවැත්වූ විශාල සමුළුවේ දී ඔවුන් ටයිම් කැප්සියුලයක් මිහිදන් කරන්නට කටයුතු කළා. එය නම්කර තිබුණේ “The Future is not what it used to be ” යන නමින්. ඉතින් මේ තුළට 1980 දශකයේ ජනප්‍රියම දේවල් බොහෝමයක් ඇතුළත් කළ අතර එවක ස්ටිව් ජොබ්ස් මහතා ඇපල් සමාගම වෙනුවෙන් මවුසයක් ද ඇතුළත් කර මිහිදන් කළා. නමුත් එය 2000 වසරේදී ගැනීමට හාරා බැලුවත් එය හමුව තිබුණේ නැහැ.එය අඩි 13 ක් පමණ දිග නලයක් වුණත් සොයා ගන්නට නොහැකිවීම පුදුමයට කරුණක් වුණා. නමුත් එය මිහිදන් කළ නිවැරදි ස්ථානය දැන ගනු ලබන්නේ වසර 13 කට පසුවයි. ඒ 2013 වසරේ දී. එවිට ගොඩට ගත් මේ තුළ අපූරු දේවල් කිහිපයක්ම දකින්නට ලැබුණා.ඒ අතර රූබීස් කියුබ් එකක් සහ මූඩි බ්ලුස් සංගීත කණ්ඩායමේ තැටියක් ද බියර කෑන් 6 ක් ද වුණා. ඒ වගේම මේ තුළ 1980 දශකයට අයත් එකිනෙකට වෙනස් දේවල් 1000කට වඩා හමුවූ බව සඳහන්.
ඒ වගේම 2957 විවෘත කරන්න යනුවෙන් සඳහන් කළ ටයිම් කැප්සියුලක් ගැන ද වාර්තා වෙනවා.මැසචුසෙට්ස් තාක්ෂණික විද්‍යාතනය සතු එකක් වන මෙය 1957 වසරේ දී මිහිදන් කර තිබුණා. 2015 වසරේ දී ඒ විශ්ව විද්‍යාල පරිශ්‍රයේ ඉදිකිරීම් කටයුත්තක් කරමින් සිටි අතරේ දී හමු වී ඇති මේ ටයිම් කැප්සියුලයේ “කරුණාකර එය 2957 වනතුරු විවර කිරීමෙන් වළකින්න” යනුවෙන් සඳහන් කර තිබුණා. ඒ නිසාම මෙය නැවත මිහිදන් කරන්නට ඔවුන් කටයුතු කළා.
එය වීදුරු සිලින්ඩරයකින් ආවරණය කර ඇති නිසා එහි ඇතුළත ඇති දේවල් දකින්නට හැකියාව පවතින අතර ඒ පෙනෙන ආකාරයට විද්‍යාලීය පුවත්පත් ලිපියක්,පෙනිසිලින් අන්තර්ගත බහාලුමක් සහ පරිගණක ට්‍රාන්සිස්ටර් එකක් ද ඇතුළත් බවයි වාර්තා වෙන්නේ. මේ ඇතුළත් දේවල් වසර දහස් ගණනාවක් ආරක්ෂා කරන්නට එහි ඇතුළත වායුව ඉවත් කර ආගන් පිරවීමට කටයුතු කර තිබුණා.
වර්ෂ 8113 ටයිම් කැප්සියුලය එවැනි තවත් එකක්. Crypt Of Civilization ලෙස හඳුන්වන මෙය විවෘත කළ නොහැකි ටයිම් කැප්සියුලයකි. එය නිර්මාණය කළේ 1936 වසරේ දී වන අතර ඒ තෝන් වේල් ජේකප් මහාචාර්යවරයා විසින්. එය වසර 6177 කින් විවර කළ යුත්තක්. ඉතින් ඒ නිසාම එය කිසිවෙක්ට විවෘත කරන්නට හැකියාවක් නැහැ.ඔහු එයට මයික්‍රො ෆිල්ම් පිටු 6 40 000 ක්, සුළං බල ජනක යන්ත්‍රයක්, මයික්‍රො ෆිල්ම් රේඩියෝවක් ද ඇතුළත් කර තියෙන බවයි පැවසෙන්නේ. ඒ විතරක් නොවෙයි අනාගත මිනිසුන්ට ඉංග්‍රීසි ඉගැන්විය හැකි යන්ත්‍රයක් ද එහි ඇතුළත් බවයි සඳහන් වෙන්නේ. එහි වින්ස්ටන් චර්චිල්ගේ හඬ පටි ද පවතින අතර ඒවා ශ්‍රවණයෙන් ඉංග්‍රීසි භාෂාව තේරුම් ගත හැකි බවයි පැවසෙන්නේ. ඒ විතරක් නොවෙයි බග්ස් බනී වැනි කාටූන් චරිතවල කටහඩ ද 1930 දශකයේ තවත් බොහෝ දේ ද එයට ඇතුළත් වෙනවා.
කැනඩාවේ කැල්ගරි නගරයේ විශාල සුපිරි වෙළද සංකීර්ණයක එවැනි ටයිම් කැප්සියුලයක් ඇති අතර එය විවර කරන්නට යෝජිතව ඇත්තේ 2999 වසරේ දී.
ඉහත එක් එක් ටයිම් කැප්සියුල් ගැන සඳහන් විස්තරවලට අනුව නොයෙකුත් පැරණි දේවල් අඩංගු එය පොළව යට මිහිදන් කරන ලෝකඩ පෙට්ටියක් වගේ දෙයක් වුනත් එසේ නොවන ටයිම් කැප්සියුල් ගැනත් අසන්නට ලැබෙනවා. ඉතින් ඒ සඳහා කදිම උදාහරණයක් වෙන්නේ ද පළමුවන ලෝක යුධ සමයේ ප්‍රංශ හමුදා නිළධාරියාගේ කාමරයයි. එදා සිට අද දක්වාම ඒ කාමරය ඒ ආකාරයෙන්ම පවතින අතර ඒ සෙබලාගේ කබාය කාමරයේ කොනක එල්ලා තිබෙනු දකින්නට හැකියි. ඒ වගේම ඔහු භාවිතා කළ දුම්කොළ පයිප්පය එදා වගේම තවමත් ඔහුගේ මේසය මත දකින්නට පුළුවන්. ඒ වගේම ඔහුගේ මිතුරන්ගේ පින්තූර, මේසය මත තැබු කුරුළු පිහාටුව සහිත හිස් ආවරණය ද එහි පවතිනවා.
ඔහු 1918 දී සටන්බිමේ දී මරණයට පත්වුණු නිසා ඔහුගේ දෙමාපියන් තම දරුවාගේ සියලුම මතකයන් තවමත් මේ විදියට ආරක්ෂා කරනු ලබනවා. ඔහුගේ දෙමාපියන් මරණයට පත්වීමෙන් පසුව එම නිවසේ අයිතිය බොහෝ අය අතර හුවමාරු වුණත් කිසිවෙක් ඒ කාමරයට අත තැබුවේ නැහැ. ඉදිරියේදී එය කෞතුකාගාරයක් බවට පත් කරන්නට රජය කටයුතු කරාවි.
ඒ වගේම 2018 වසරේ දී නිව්වෝලීන්ස්වල පැවති ජෙනරල් බෝරගාඩ් පිළිමය එයින් ගලවා ඉවත් කිරීමේ දී හමුව තිබුණේ තවත් ටයිම් කැප්සියුලකි. එය 1913 වසරේ සිට පිළිරුව තුළ සැඟවී තිබුණු මේ පෙට්ටිය වසර 100කට වඩා පැරණි එකක්. ඒ නිසා එහි ඇතුළට වූ දේවල් බොහෝසෙයින් දිරාපත්ව තිබූ අතර එහි ඉතාමත් පැරණි මුදල් නෝට්ටු,ලියකියවිලි,පොත්පත් හා පදක්කම් ආදී දේවල් දකින්නට ලැබුණා.1862 වර්ෂයට අයත් මුදල් නෝට්ටු ද ඒවායේ තිබූ අතර මුදල් නෝට්ටු අනෙක් භාණ්ඩ සමඟ ගත්විට හොඳ තත්ත්වයෙන් දකින්නට ලැබුණා. නමුත් මේ දේවල් අනාගත පරපුර වෙනුවෙන් තැන්පත් කර ඇත්තේ කවුරුන්ද යන්න නම් දැන ගන්නට හැකියාවක් නැහැ. තවමත් මේ නෂ්ටාවශේෂ ගැන පර්යේෂණ කරමින් පවතිනවා.
මෙවැනි තවත් ටයිම් කැප්සියුලයක් බොස්ටනයෙන් හමුවෙනවා. මැසචුසෙට් ස්ටේට් හවුස්හි ජලනල පද්ධතිය අලුත්වැඩියා කරමින් සිටියදී හමුවුණු එය එහි මිහිදන් කර තිබුණේ 1795 ගණන්වල ඇමරිකානු විප්ලවයේ වීරයන් දෙන්නෙක් වුණු පෝල් රිවියර් සහ සැමුවෙල් ඇඩම්ස් විසින්.ඔවුන් එවැනි ටයිම් කැප්සුලයක් එහි මිහිදන් කළ බවක් කිසිවෙක් දැන නොසිටි බවයි සඳහන් වෙන්නේ. කිලෝ ග්‍රෑම් 4 ½ බර ඒ පෙට්ටිය ආරක්ෂිතව එළියට ගන්නට වැඩි කාලයක් වැය කරන්නට සිදුවුණා. එහි ඇණ විවර කර ගන්න අන්තර්ගතය බලන්නට පැය 4 ක කාලයක් ගතවුණු අතර අවසානයේ දී පෙනීගියේ එහි ඇතුළත 1652 සිට 1855 කාලයට අයත් රන් රිදී සහ කාසි දුසිම් ගණන් සහ ජෝර්ජ් වොෂින්ටන්ගේ පින්තූරයක් සහ ලෝකඩ පදක්කමක් ද පැවති බවයි.ඒ වගේම පැරණි පුවත්පත් හා පැරණි නිල ලාංඡනයක් ද එයින් හමුව තිබුණා.
ඉතින් වසර දහස් ගණනක් පිටුපසට යන්නට කාල යන්ත්‍ර නොමැති අපට ටයිම් කැප්සියුලය වැදගත් වෙනවා.
උපුටා ගැනීම: The Lanka Post