අවුරුදු 15ක ආදර සම්බන්ධයක්. මයිකල් විලියම්ස් කියන යෞවනයා එතරම් ධනවත් පවුලක දරුවෙක් නොවෙයි. ඔහු ජීවත්වුණේ ට්‍රේලර් රථ දෙකක් එකතුකරලා හදපු ගෙදරක. ඒත් ඔහුට ඉලක්කයක් තිබුනා. පාසල් යන කාලෙදිම සුපිරි වෙළඳසැලක සේවය කරමින් අධ්‍යාපනයට අවශ්‍ය මුදල් හොයාගන්න තරම් මයිකල් උත්සාහවන්ත වුනා.
ඇමරිකාවේ ෆ්ලොරීඩා ජනපදයේ ජීවත් වුණු මයිකල්ට, ඩෙනීස් මෙරෙල්ව මුණගැහෙන්නේ වයස අවුරුදු 15දී. මයිකල් ඇමරිකානු පාපන්දු (American Football) ක්‍රීඩකයෙක්. ඩෙනීස් දිරිගැන්වීමේ කණ්ඩායමේ (Cheerleaders) යෞවනියක්. ඒ ගැළපීම හරියටම හරි. පාසලේ වැඩිපුරම කැපී පෙනෙන යෞවනයන් හිටියේ පාපන්දු කණ්ඩායමේ. යෞවනියන් හිටියේ දිරිගැන්වීමේ කණ්ඩායමේ. ඒ වගේම මයිකල් ශිෂ්‍ය කවුන්සිලයේ සභාපති හැටියටත් තේරී පත්වුනා. ඔහුව පාසල පුරාම ප්‍රසිද්ධ වුනේ “මයික්” යන නමින්.
මයික් විශ්ව විද්‍යාලයට තේරුනා. ඒත් මොන හැලහැප්පීම් ආවත් මයික්ගේ ආදරය වෙනස් වුනේ නැහැ. ඩෙනීස්වුත් මයික් එක්කම හිටියා. දක්ෂ සහ කැපී පෙනෙන ශිෂ්‍යයෙක් වුණු නිසා විශ්ව විද්‍යාල අධ්‍යාපනය නිම කරන්නත් කලින් මයික්ව ආයතනයක උසස් තනතුරකට තෝරාගත්තා. ඒ දේපල ඇගයීම් නිලධාරී කෙනෙකු විදියට. මයික් සහ ඩෙනීස්ගේ වාසනාව බැබළෙමින් තිබුනා.
මේ අවුරුද්ද 1994. අවුරුදු 10ක ආදරයකින් පස්සේ මේ දෙන්නා විවාහ වුනා. ඒ වෙනකොට මයික් කියන්නේ මාසෙකට ඇමරිකානු ඩොලර් 10,000කට වඩා (අද රු.1,974,000කට වැඩි) පඩියක් ගන්න තරුණයෙක්. ඔහු ගැන ආයතනයේ ප්‍රධානියා කිව්වේ, “ඒ වගේ මහන්සි වෙන තවත් සේවකයෙක් මම නම් දැකලා නැහැ” කියන එකයි. “සෑම සාර්ථක පිරිමියෙකු පිටුපසම සාර්ථක බිරිඳක් ඇත” කිව්වත් වගේ ඔහුගේ බිරිඳ ඩෙනීස් ගැනත් මයික්ගේ පවුලේ මව සහ සහෝදරයා පවා සතුටු වුනා. අවුරුදු 5කට පස්සේ මේ දෙන්නට දාව දියණියක උපන්නා.
මයික් තමන්ගේ රැකියාවට දක්වපු ආදරය වගේම තමන්ගේ දුවට දක්වපු ආදරයත් ඉහළයි. රැකියාවට ගියත් සැරින් සැරේ දුවව බලන්න ඔහු ගෙදර ආවා. හවසට ගෙදර ඇවිත්, රෑ වෙද්දී ආයෙත් ආයතනයට ගිහින් වැඩ කරන්න ඔහු පුරුදු වෙලා හිටියා. බිරිඳ ඩෙනීස් ඔහුව ප්‍රශ්න කළේ නැහැ. ඔහු හොඳ ස්වාමියෙක්.
දියණිය ඉපදිලා වසරක් ගතවෙද්දී මයික්ගේ පියා අන්තරා වුනා. ඒ නිසාම ඩෙනීස් සහ මයික් දෙන්නම කතිකා කරලා මයික්ගේ නමට ජීවිත රක්ෂණයක් මිලට ගත්තා. ඒකෙ වටිනාකම ඇමරිකානු ඩොලර් මිලියනයක්. අද හැටියට නම් ශ්‍රී ලංකා රුපියල් වලින් 72,524,500/=ක්. ඒ කියන්නෙ මිලියන 72 හමාරකටත් වැඩියි. මේකෙ රක්ෂණ නියෝජිතයා වුනේ පොඩි කාලේ ඉඳන්ම ඩෙනීස්ගේ යාළුවෙක් වුණු, පස්සේ මයික්ගේ හොඳම යාළුවා වුණු, බ්‍රයන් වින්චෙස්ටර්.
අවුරුදු ගානක්ම එකදිගට විවේකයක් නැතිව කැපවීමෙන් වැඩ කරපු මයිකල් හිතුවා මෙහෙම. “ඊළඟ අවුරුද්දේදී රක්ෂණයෙන් ඩොලර් 50,000ක් අරගෙන මම විවේක ගන්නවා” කියලා. ඔහු ඒක තමන්ගේ අම්මටත් කිව්වා. ඒත් ජීවිත රක්ෂණය අරගෙන කෙටි කාලයකදී මයික් අතුරුදහන් වුනා. ඒක හරි පුදුම සිද්ධියක්.
මයික්, තාරාවෝ දඩයමේ යන එක විනෝදාංශයක් වශයෙන් කරපු කෙනෙක්. අපේ රටේ මිනිස්සු නම් දඩයමේ යන එක මෝඩ වැඩක් කියලා දැනගෙන හිටියට ඇමරිකාව වගේ රටවල් වල බොහෝ දෙනා තමන්ගේ රැකියා පීඩනය පිටකරන්නේ සත්වයින්ගේ හිසවල් උඩට. මයික් කළෙත් ඒකමයි. ඔවුන්ගේ නිවස ඉදිරියේ තිබුනා ලස්සන, ඒත් බියජනක හැඟීම් ඇතිකරන විලක්. ඒක බියජනක වුනේ ඒ විල කිඹුලන්ගේ පාරාදීසයක් වුනු නිසා. නමුත් ඒ මයික්ට නුපුරුදු තැනක් නෙමෙයි. 2000 වසරේ දෙසැම්බර් මාසේ එක දවසක උදේ මයික් පුරුදු විදියටම විනෝදයට තාරාවන් දඩයමේ ගියා.
සාමාන්‍යයෙන් දවල් 12.00 – 1.00 වෙනකොට ගෙදර එන මයික් එදා ගෙදර ආවෙ නැහැ. ඒක විශාල විලක්. අපේ රටේ තියෙන මහ වැව් වලට වඩා පනස් ගුණයක් විතර විශාලයි. මයික්ගේ අතුරුදහන් වීම ගැන මුලින්ම දැනගන්න ලැබුනේ ඩෙනීස්ගේ පියාට ඩෙනීස් විසින්ම දුන් දුර ඇමතුමකින්. සිද්ධිය ෆ්ලොරීඩා වනජීවී කොමිසමට දැනුම් දුන්නයින් පස්සේ ඔවුන් බෝට්ටු අරගෙන ඇවිත්, පිරිස අරගෙන ඇවිත් විල වටේම මයික්ව හෙව්වා. ඔහුගේ බෝට්ටුව ඔවුන්ට හමුවුනා. ඒත් මයික් ඒක ඇතුළේ හිටියේ නැහැ.
මයික්ගේ ට්‍රක් රථය නතරකරලා තිබුණු තැන ඉඳන් අක්කර 10ක විතර භූමි භාගයක මේ පිරිස ඔහුව හෙව්වා. ඒත් ඔහුව හමුවුනේ නැහැ. සාමාන්‍යයෙන් මයික් දඩයමේ යන්න පුරුදු වෙලා හිටියේ ඔහුගේ හොඳම මිතුරා බ්‍රයන් එක්ක. එදා බ්‍රයන් දඩයමේ ගිහින් තිබුනෙත් නැහැ. ඒ නිසා කිඹුලන්ගෙන් පිරුණු විලේදී මයික්ට මොකක් සිද්ධවෙන්න ඇතිද?
දින 10කට පස්සේ මයික්ගේ දඩයම් තොප්පිය ඔහුගේ බෝට්ටුව නවත්වා තිබුණු තැනින් හොයාගත්තා. ඒ වගේම ඔහුගේ දඩයම් බලපත්‍රය, විදුලි පන්දම සහ දඩයම් ඇඳුම් කට්ටලයත් පසු දිනෙක විලෙන් හමුවුනා. ඒත් දවස් 10කදී සොයන්නන්ට මේ දේවල් හමුනොවුනේ කොහොමද කියලා සමහරු ප්‍රශ්න කළා. පුදුමයක් වුනේ ඔහුගේ විදුලි පන්දම ඒ වෙනකොටත් සක්‍රීය වීම. ඒවගේම බෝට්ටුවේ ඉන්ධන ටැංකියත් සම්පූර්ණයෙන්ම පිරිලා තිබුනා.
ඒක වෙන්න බැරි බව බෝට්ටු ගැන දන්නා අය දැනගෙන හිටියා. ඔහුව කිඹුලෙකු විසින් ගිලදැම්මා නම් බෝට්ටුව ක්‍රියාකාරීව තිබිය යුතුයි කියලයි විශේෂඥයන් කිව්වේ. එතකොට ඉන්ධන ටැංකිය සම්පූර්ණයෙන් පිරී තිබෙන්න විදිහක් නැහැ. ඒවගේම කිඹුලන් මිනිස් සිරුරක් සම්පූර්ණයෙන්ම අනුභව කරන්නෙත් නැහැ. සිද්ධිය ගැන ටිකෙන් ටික සැක පහල වුනත්, බොහෝදෙනා හිතුවේ මයික්ව කිඹුලන් විසින් ආහාරයට ගන්නට ඇති කියලයි. කොහොමටත් ඒ විල එවැනි අනතුරු වලට ප්‍රසිද්ධියක් ඉසිලුවා. මයික්ට කලින් 79දෙනෙකු ඒ විලේදී අතුරුදන් වෙලා තිබුනා.
ෆ්ලොරීඩා ජනපද නීතියට අනුව අතුරුදන් වූවෙකු අතුරුදන් වී වසර 5ක් යනතෙක් මරණයට පත්වූවෙකු බව පිළිගන්නට බැහැ. ඒත් සිද්ධියෙන් සතියකට පමණ පස්සේ ඩෙනීස් අධිකරණයෙන් ඉල්ලා සිටියා ඇගේ සැමියා මරණයට පත්වූවෙකු ලෙසට පිළිගන්නා හැටියට. මේ ගැන මයික්ගේ මව පුදුම වුනා. නමුත් දින ගණනක්ම ඔහුව සොයලා මහන්සියට පත්වූ ඔවුන් එය පිළිගත්තා.
මයික් මියගිය බව පිළිගැනීමෙන් පසුව මයික්ගේ ජීවිත වන්දිය ඩෙනීස්ට ලැබුනා. ඇමරිකානු ඩොලර් මිලියන 1.5ක් එතැන තිබුනා. මිනිසුන් විවිධ කතා කියද්දී කාලය ගතවුනා. වසර 5ක් ගෙවීගියත් මයික්ගේ සිරුර සොයාගන්නට ලැබුනේ නැහැ. ඒත් කවුරුත් නොහිතූ දෙයක් නම් සිදුවුනා. ඒ වනවිට විවාහ වී හිටපු මයික්ගේ හොඳම මිතුරා, බ්‍රයන් වින්චෙස්ටර් ඔහුගේ බිරිඳගෙන් දික්කසාද වුනා. ඒක පුදුමයක්ද? නැහැ. පුදුමය තමයි ඔහු ඩෙනීස් සමඟ යළි විවාහ වීම.
ඒත් එක්කම කාලයෙන් වැසී ගිය මයික්ගේ අතුරුදන්වීම ගැන මතකයන් සහ සැක යළිත් අවදිවුනා. ඔහුගේ මව ඔහුව සොයාදෙන්නැයි පුවත්පත් දැන්වීම් පළකළා. දැන්වීම් ඇලෙව්වා. ඒ වෙනකොට නීත්‍යානුකූලව මයික්ගේ මරණය පිළිගෙන තිබුනත් මවකට තමන්ගේ පුත්‍රයාව අත්හරින්නට පුළුවන්ද? මයික්ගේ මව තනියෙන් දැන්වීම් පුවරු උස්සාගෙන මහමඟට වී හිටියා.
2004 වසරේදී ඔහුව සෙවීමේ කටයුතු යළි සක්‍රිය කරගන්නට මයික්ගේ මව සමත් වුනේ දැඩි පරිශ්‍රමයක් දැරීමෙන් පස්සෙයි. සාමාන්‍යයෙන් තනිව දඩයමේ නොගිය කෙනෙකු හැටියට ප්‍රසිද්ධ මයික් තනිවම දඩයමේ ගියේ කොහොමදැයි ඔවුන් සොයාබැලුවා. ඒ අතරම සත්ව විද්‍යාඥයන් කරලියට ආවා. ඔවුන් කිව්වේ ෆැරන්හයිට් 58ක වගේ ශීත කාලගුණයකදී කිඹුලන් ආහාර සොයා නොයන බවයි. මයික් දඩයමේ ගියේ උදේ කාලයේ නිසා ඒ වෙනකොට තිබුණු උෂ්ණත්වය අඩුයි.
එතන කුමක් හෝ සිදුවෙන්නට ඇති බව හැමෝම විශ්වාස කළා. ඒත් කිසිවක් ඔප්පු කරන්නට ඔවුන්ට සාක්ෂි තිබුනේ නැහැ. ඒ වනවිටත් මයික් මියගියා නම් ඔහුගේ සිරුර හමුවිය යුතුව තිබුනා. සිරුර නොමැතිව කිසිවෙකුට හෝ නඩු පැවරීම කළ නොහැකි බව තමයි පොලිසිය කිව්වේ. මේ අතරේ ඩෙනීස් මයික්ගේ මවට බැනවැදුනේ නිෂ්ඵල වැඩ කරන්න එපා කියලා. ඇගේ දියණිය බලන්නටවත් එන්න එපා කියලත් මයික්ගේ මවට ඇය කිව්වා.
මයික්ගේ අතුරුදහන් වීමෙන් වසර 7කට පස්සේ ඔහුගේ සොහොයුරාට හෝඩුවාවක් ලැබුනා. තම පියා විසින් මයික්ට දෙන ලද තුවක්කුවක අනු අංකය ඔහුට ලැබී තිබුනා. මයික් ළඟ තුවක්කු එකතුවක් තිබුණු බව ඔහුට සිහිවුනා. මයික්ගේ අතුරුදන් වීමෙන් පස්සේ ඔහුගේ බිරිඳ ඩෙනීස් විසින් තම පවුලට ඒ තුවක්කු යළි භාරදුන්නේ එක් තුවක්කුවක් අඩුවෙන්. ඒ අඩු තුවක්කුව තමයි පියා විසින් මයික්ට දුන් තුවක්කුව.
අනු අංකය හරහා ගිය මත්ද්‍රව්‍ය, දුම්කොළ සහ ආයුධ බියුරෝව විසින් ඒ තුවක්කුව සොයාගත්තා. එය ඒ වෙනකොට තිබුනේ මයික්ගේ හොඳම මිතුරා, ඒ කියන්නේ දැන් ඩෙනීස්ගේ විවාහක සැමියා, බ්‍රයන් වින්චෙස්ටර් සතුව. ඒ වෙනකොට බ්‍රයන් සහ ඩෙනීස් පදිංචි වී හිටියෙත් මයික් කලින් ජීවත්වූ නිවසේමයි. ඔවුන් නීතීඥවරයෙකුගේ මාර්ගයෙන් තුවක්කුව බියුරෝවට භාරදුන්නා. ඔවුන් DNA පරීක්ෂණයක් කළා. එහි ප්‍රතිඵල රහසිගත වුනා. මාධ්‍යවේදීන් විසින් බ්‍රයන්ව ප්‍රශ්න කරද්දී ඔහු කිව්වේ “ඔය හැමෝටම වඩා මයික්ව හොයාගන්න ඕන අපටයි” කියලයි.
ඒ වෙනකොටත් මයික්ගේ සම්පූර්ණ වත්කම් බිරිඳට පවරලා නොතිබුනේ එය විශේෂ අතුරුදන්වීමක් විදියට සලකමින්. ඔහොම කාලය ගතවෙමින් තවත් වසර 5ක් ගතවුනා. 2012 වසරේදී හදිසියේම බ්‍රයන් සහ ඩෙනීස් දෙදෙනාගෙන් වෙන්වුනා. ඉන්පස්සේ බ්‍රයන් තමන්ව පැහැරගෙන මරාදැමීමට තැත්කළා කියලා ඩෙනීස් ඔහුට නඩු පැවරුවා. මෝටර් රථයට බලහත්කාරෙන් නැගලා, ඇගේ බඩට තුවක්කුව තියලා ඔහු ඇයව මරාදාන්න හැදුවා කියලයි ඇය කිව්වේ.
පැහැරගැනීමට තැත්කිරීම සහ ගෘහස්ත හිංසනය නම් චෝදනා වලට බ්‍රයන්ව අත්අඩංගුවට ගැනුනා. සිද්ධිය ඉතාම උද්යෝගිමත් තැනකට එන්නේ එතනින් පස්සෙයි. ලෝක දහම කියන්නේ හරි පුදුම දෙයක්. බ්‍රයන්ව වසර 20කට සිරගත කෙරුනා. ඩෙනීස් අධිකරණයට ඇවිත් කිව්වේ තමන්ගේ ජීවිතාරක්ෂාව ගැන සලකලා ඔහුව නිදහස් කරන්න එපා කියලා. ඒවගේම ඩෙනීස්, ඒ වෙනකොට යොවුන් දැරියක වුණු තමන්ගේ දියණිය විසින් රචිත ලිපියකුත් අධිකරණයේදී කියවනු ලැබුවේ හැඬු කඳුලින්.
මයික්ගේ මව මේ හැමදෙයක්ම බලාගෙන ඉඳලා කිව්වේ, “බ්‍රයන් ඩෙනීස්ට තනියම නම් සල්ලි ටික ගන්න ඉඩදෙන එකක් නැහැ” කියලයි. මයික්ගේ අතුරුදන්වීමට වග උත්තරකරුවන් හැටියට ඒ වෙනකොට බ්‍රයන් සහ ඩෙනීස්ව නම් කරලා නොතිබුනාට මයික්ගේ මව ඒ වෙනකොට විශ්වාස කළේ ඔවුන් දෙදෙනා ඊට සම්බන්ධ බවයි. ඒත් කිසිදු සාක්ෂියක් තිබුනේ නැහැ.
ඒත් බ්‍රයන් සිරගත වීම සහ ඩෙනීස් ඔහුට පිටුපෑම නිසා දෙදෙනා අතර ඇතිවූ අවිශ්වාසය මැනවින් ප්‍රයෝජනයට ගන්න ෆ්ලොරීඩා අධිකරණ දෙපාර්තමේන්තුව සමත්වුනා. වසර 17කට පස්සේ මයික්ගේ සිරුර මඩ වගුරක තැන්පත් කර තිබියදී සොයාගැනුනා. බ්‍රයන් පාපොච්චාරණයට එකඟ වුනා. මයික් විලියම්ස් ඝාතනයේ වැදගත්ම සාක්ෂිකරුවා මෙන්ම ප්‍රධාන විත්තිකරු බවට ඔහුගේ හොඳම මිතුරා පත්වුනා.
සිද්ධිය සැකෙවින් මෙහෙමයි. වයස අවුරුදු 15දී මයික් සමඟ ආදරයෙන් බැඳුනු ඩෙනීස්, 1997දී බ්‍රයන් වින්චෙස්ටර් සමඟ අනියම් ඇසුරක් ආරම්භ කරලා තිබුනා. මයික් ඩෙනීස්ට කොපමණ ආදරය කළත් ඩෙනීස්ට අවශ්‍ය වුනේ බ්‍රයන් එක්ක ඉන්න. ඒත් බ්‍රයන්ට වඩා මයික්ට සල්ලි තිබුණු නිසා ඇය මයික්ව විවාහ කරගත්තා. ඒත් අනියම් සම්බන්ධය නතර වුනේ නැහැ. අවසානයේදී බ්‍රයන් සූක්ෂමව මයික්ගේ හොඳම මිතුරා වුනා.
ඔහු මයික්ට ඩොලර් මිලියනයක ජීවිතාරක්ෂණය විකුණුවා. ඩෙනීස් මුදලට කෑදර වුනා. බ්‍රයන්ට ආදරය පෙන්වමින් බ්‍රයන් ලවා තම සැමියාව ඝාතනය කරන්න ඩෙනීස් සැලසුමක් හැදුවා. සැලසුම සාර්ථක වුනා. ඔවුන් දෙදෙනා විවාහ වුනා. බ්‍රයන් හිතුවේ සැලසුම එතනින් ඉවරයි කියලා. ඒත් ඩෙනීස්ට ඕන වුනේ බ්‍රයන්වත් සිරගත කරලා තනියම මයික්ගේ දේපල භුක්ති විඳින්න. ඒ නිසා බ්‍රයන්ව චෝදනාවකට පටලවලා ඔහුව සිරගත කරන්න ඇය සමත් වුනා. ඒත් අවුරුදු 17ක් මේ ඔක්කොම ඉවසපු ලෝක දහම ඒ දෙන්නටම පයින් ගැහුවා.
පාපොච්චාරණයේදී බ්‍රයන් හඬා වැටුනා. තමන්ගේ හොඳම යාලුවාව මරාදැමීමට තමන්ව පෙළඹුවේ ඩෙනීස් බව ඔහු කිව්වා. මයික්ගෙන් දික්කසාද වෙලා ඔවුන් දෙදෙනාට විවාහ වෙන්න පුළුවන් යැයි කියද්දීත්, ඩෙනීස්ට අවශ්‍ය වුනේ මයික්ගේ දේපලත් අයිති කරගෙන විවාහ වෙන්න කියලා ඔහු පාපොච්චාරණය කළා. 2019දී ඩෙනීස් විලියම්ස් හට ජීවිතාන්තය දක්වා සිරදඬුවම් නියම වුනා. ඒ මිනිමැරීමට අනුබල දීම සහ සාක්ෂි සැඟවීම යටතේයි.
ඉන් මාස පහකට පස්සේ මයික් සහ ඩෙනීස්ගේ දියණිය ඇන්ස්ලිට මයික්ගේ සියලු දේපල වල අයිතිය ලබාදීමට අධිකරණය තීරණය කළා. එයට අත්සන් කරන්න ඩෙනීස්ට සිදුවුනේ “රක්ෂණ වංචාව” කියන චෝදනාවෙන් ඇයව නිදහස් කරන පදනම මත. ඒත් ජීවිතාන්තය දක්වා සිරදඬුවම් නියම වුණු ඩෙනීස් මේ වෙනකොටත් ඉන්නේ ෆ්ලොරීඩා කාන්තා සිරකඳවුරක.
කාන්තාවකට කොච්චර දුරකට පිරිමින්ව මෝඩයන්ට අන්දන්න පුළුවන්ද? ඩෙනීස් විලියම්ස් ඒක හොඳින්ම කියාවි. නමුත් ඒක කාන්තා-පිරිමි ගැටුමකට වඩා, දුරාචාරයේ ප්‍රතිඵලයක්. අපට මේ දින කිහිපය පුරාම අහන්න දකින්න ලැබෙන ඝාතන, අනියම් සබඳතා, දුරාචාර වලට සම්බන්ධ කතාවක් නිසා මේක ඇතුළෙන් අපටත් ගොඩක් දේවල් ගත හැකියි. කිසිවක් ස්ථිර නැහැ. මේක අවුරුදු 15ක ආදරයක ප්‍රතිඵලයක්.
උපුටා ගැනීම: අසංක හදිරම්පෑල.