වයස 13- 14 වනවිට කෙල්ලන් රතු ජම්බු ගස්වලින්ද, කොල්ලන් පිනි ජම්බු ගස්වලින්ද වැටීම සාමාන්‍ය සිරිතයි. වැඩිය උඩකින් නොවැටීම නිසාදෝ කෙල්ලන් මෙන් නොව, කොල්ලන් වැඩි තුවාලයක් සිදු නොකරගන, උගුරු දණ්ඩ කඩාගැනීම පමණක් සිදුකරගනිති. නිවාස අඩස්සියේ තැබීම්, නෑවීම්, මගුල් කෑමවල් වැනි විකාර කොල්ලන්ට නැත. මෙයින් පසු සිදුවන්නේ කන්‍යා භාවය ආරක්ෂා කරගැනීමේ සටනයි. මෙය විවිධ තැන්වල ; තරු 1 සිට 5 දක්වා ඇති හෝටල් තුල, ගෙදර මැද සාලේ, කුස්සියේ, නිදන කාමරේ මෙන්ම ගස් යට, වහලේ උඩ, පන්ති කාමරේ, විවිධ පුද්ගලයන් සමග නැති විය හැක. ගෑනුන්ගේ කන්‍යාබාවය එක තැනක පිහිටියද, පිරිමින්ගේ පිහිටන්නේ එක එක තැන් වලය. අතේද කටේද, පපුවේද, ඕනෑම තැනක විය හැක.
අවාසනාවක මහත, එය මගේ පිහිටියේ හිතේය. හිතේ තියෙන දෙයක් නැති උනොත්, ශල්‍යකර්මයකින් යථා තත්වයට පත් කල නොහැක. කුඩා කල සිට මගේ සිහිනය වුයේ නියම සුදුස්ස හට ප්‍රධානය කිරීමයි. කන්‍යාභාවය මා පසුපස වැටුනේ මෙතැන් සිටයි. මෙම අදහස කෙතරම් හිතට කා වැදුනේද යත්, අන්‍ය ක්‍රමයකින් නැති වුවහොත්, පසු දින වරදකාරී හැගීමෙන් මිදීම සදහා මා සිය දිවි නසා ගනී යයි මට මා ගැනම බියක් පහල විය. මෙය මා බොහෝ මිතුරන් පැවසු , ඔවුන්ටද දැනුණු දෙයකි.
මෙලෙස මොලය සෝදා ගෙන සිටි මට, අධ්‍යාපනය සදහා විදේශ ගතවූ පසු මහා අකරතැබ්බයකට මුහුණපාන්නට සිදු විය. සමහර දිනවල, සවස් කාලයේ අවන්හලකට එක්රැස්වී, අධ්‍යාපනයට අදාළ නොවන වල් පල් දෙඩවීමට අප පුරුදු වී සිටියෙමු. අප කණ්ඩායම 20 කගෙන් පමණ යුක්ත වූ විවිධ රටවලින් පැමිණි කොල්ලන් කෙල්ලන් විය. මේ අතර ලිංගිකත්වය පිළිබද මාතෘකාවක් එලියට ඇදිනි. ලංකාවේ මෙන් නොව, සියල්ලෝම විවෘතව අදහස් පල කළහ. කවදත් කට වැඩි බක පණ්ඩිතයකු වූ මා, මෙවන් අත්දැකීම් නොලැබූ බව ප්‍රකාශ කලෙම්. තත්වයේ බරපතලකම වැටහුනේ, එතන සිටි කන්‍යා භාවය සහිත එකම එකා මා යයි හෙලිවීමත් සමගය. බොහෝ යුරෝපීයයන්ට මෙය කෙසේවත් අදහාගත හැකි කරුණක් නොවිය. ඔවුන් මා අමුතු සත්වයෙකයි සිතුහ. එහෙත් සමහර කෙල්ලෝ මා අගය කළහ.
පසුදින දේශන වලට සහාගිවීමට ගිය විට තත්වය තවත් දරුණු අතට හරි තිබුණි. කොල්ලෝ මට “PURE MAN” යැයි නම තැබුහ. මා ලගට පැමිණි ග්‍රීක කෙල්ලකු ඇසුයේ මම සමලිංගික ද කියාය. ජර්මන් කෙල්ලකු මා දෙස අමුතු ආකාරයෙන් බලන මට සිහිවුයේ කළු නික දෙස ආසාවෙන් බලන වේද රාල කෙනෙකුය. ඇය ඕනෑම ලෙඩක් සුවපත් කල හැකි “කන්‍යා තෙල” මා යොදාගන සිදීමට සිතුවා විය හැක. තවත් කෙල්ලකු මා විගස පෙම්වතියක් සොයා ගත යුතුයයි නිර්දේශ කලාය. ඒ අතර රස්තියදුකරයෙකුට රැවටී සිටි ඉන්දියානු කෙල්ලකු මගේ කන්‍යාභාවය නැතිකොට කුසලානය දිනා ගැනීමට මාන බැලිය. මේ කරදරය, පාඨමාලව අවසාන වනතෙක් නොනවතිනි. හමුවන සෑම උදැසනම තවමත් “PURE MAN” දැයි ඇසීමට ඔවුන් අමතක නොකළහ. එය එතැනින්ද නොනැවතී, මා කොහේදී හෝ හමුවන විට, දුරකතනයෙන් හෝ සමාජ මාධ්‍යයෙන් සම්බන්ධ වන විට, තැන නොතැන නොබලා තවමත් මෙය සැක හැර දැනගැනීමට ඔවුන් දැනුදු උනන්දු වෙති.
කන්‍යාභාවය මෙන්ම ගොන්කන්ද ,වද දෙමින් ,ගැලවීමක් නොමැතිව පසුපස එන්නේ එසේය.
උපුටා ගැනීම: Sajith Karunaratne