අපි කාටත් අඩුවැඩි වශයෙන් කේන්ති යනවා, සමහරුන්ට කේන්ති යන් නෑ මළ පනිනවා.
සමහරුන්ට තදින්ම මළ පනින වෙලාවක් තමයි වාහන එළවනකොට අනික් ඩ්‍රයිවර්ස්ලා කරන වැරදි. විශේෂයෙන් නීතිගරුකව එළවන මිනිස්සුන්ට සෑහෙන්න කේන්ති යනවා. ඒ අතරෙ සමහරු ඉන්නවා ඉතාම අශීලාචාර ටයිප් එකට වාහනේ එලවලා තමන්ගේ අතින් වැරැද්දක් උනාමත් අනික් මිනිස්සු එක්ක පැටලෙන්න හදන.
බල්ලොත් එක්ක බෑ, චරිතෙ හොරු අරං වගේ වේදිකා නාට්‍ය නිර්මාණය කරපු අපේ මිත්‍ර රවීන්ද්‍ර ආරියරත්න මේ වගේ දේවල් දිහා වෙනස් විදිහකට බල චරිතයක්. ලංකාව වගේ රටක පාරෙ වාහනයක් පදිනකොට අපි කා අතිනුත් වැරදි වෙන්න පුලුවන් නිසා ඒ වගේ වෙලාවල් වලදි මහපාරෙ රණ්ඩු වෙන එක බැනගන්න එක නෙවෙයි හොඳම දේ ප්‍රශ්නයක් ඇති කර නොගෙන ඒ ගැටළුව අතෑරලා දාන එක කියලා තමයි රවී හිතන්නෙ. ඔහු කොහොමත් සාමාන්‍ය ජීවිතේදිත් කේන්ති නොගන්න කෙනෙක්.
වැඩට යන්න පරක්කු වෙච්ච දවසක උදේ වැඩට යන්න කලින් සුපුරුදු කොළ කැඳ එක බොන්න නුගේගොඩ ඉඳලා කලුබෝවිල පැත්තට ට්‍රැෆික් එකේ එහෙට මෙහෙට දදා රවී යන අතරෙ ඒ වගේම රිංගන හදිස්සි කාර ත්‍රීවීලර් එකකුයි බයික් එකයි හැප්පෙන්න ගිහින්, හැප්පුනා නං වැරදි කාරයා අසවලා ය කියලා කියන්න බැරි තත්වයක් තමයි එතන තිබිලා තියෙන්නේ. දෙන්නම වෙට්ටු දාලා.
හැබැයි ත්‍රීවීලර් එකේ ආපු මනුස්සයා මහ හයියෙන් කෑ ගහලා ඇහුවලු “අම්මට හු-න්න යනවද හු-තෝ” කියලා. ඒ කෑ ගැහිල්ලට ට්‍රැෆික් එකේ තිබුන අනික් වාහන වල මිනිස්සුත් හැරිලා බලද්දී රවී බයික් එක නවත්තලා පොඩ්ඩක් ඉස්සරහට නැමිලා කටපුරා හොඳට හිනාවෙලා ” නෑ මේ කොළ කැඳ එකක් බොන්න කලුබෝවිලට යනවා” කියලා කිව්වලු.
වටේ පිටේ මිනිස්සු විතරක් නෙවෙයි ත්‍රීවීලර් එකේ පිටිපස්සෙ හිටපු ගෑනු කෙනත් හිනාවෙද්දි ඒ උන්නැහේත් කට තද කරගෙන ත්‍රීවීලර් එක පැත්තකට කරලා ඉඩ දුන්නලු.
උපුටා ගැනීම: Sanjeewa Thushara