මම පුන්චි කාලේ ඉදලම අපේ ගෙදර අනෙක්ස් එකක් කුලියට දීලා තිබ්බා .අඩි 10යි 10යේ පොඩි කාමරයට ඇටෑච් බාත් රූම් එකක් පෑන්ට්‍ර් එකක් සහ පිටතින් ඇතුල්ව්ම දීලා තිබුනා.තාත්තාගෙ මාසෙ පඩියට අමතරව ලැබුන ඒ අමතර ආදායම අපිට ලොකු හයියක් වුනා ..
අවුරුදු දෙකකට තුනකට සැරයක් ඔය කාමරය හිස් වුනා එහෙම දාට අපේ අම්මා සිළුමින පත්තරේ ඇඩ් එකක් දානවා.සෙනසුරාදා පත්තරේ පිට උනාම උදේ ඉදලාම කට්ටිය එනවා.කාමරේ හෝදලා, බිම පොලිෂ් ගාලා බිත්ති වල තීන්ත ගාලා ඇනෙක්ස් එක මනමාලි වගේ සරසලා තියනවා.ඒව කරන්නෙත් අපිම තමා..අපේ තාත්තා තමා අනෙක්ස් එක පෙන්නලා එකේ විස්තර කියන්නෙ..එයා ඉතින් ගෘහ මූලිකයා නේ..කොන්දේසි මාලවක් තියෙනවා ඒවා තීරණය කරන්නේ අම්මා.
මාසේ 25ට කලින් කුලිය ගෙවන්න ඕනේ.
ස්තිර පදිංචි කරයො දෙන්නයී.ඒට වඩා බැහැ.කරන්ට් එකෙන් උයන්න බැහැ.
හොට් ප්ලේට් තහනම් .මොකද අපිනේ ලයිට් බිල්, වතුර බිල් ගෙවන්නෙ..කොටින්ම දිග කොන්ඩයක් තියෙන ගෑනු කෙනෙක් ආවොත් අපෙ අම්මා ඇනෙක්ස් එක දෙන්නා නැහැ .
“අපෝ ඔය දිග කොන්ඩේ තියෙන ගෑනු පැය ගනන් නානවා.වතුර නාස්තිය ..”අපෙ අම්මා කියනවා.
“ඉතින් ඔයාගෙත් කොන්ඩෙ දිගයි නේ”තාත්තා අම්මව අවුස්සනවා. අම්මට වෙන මුකුත් නෙමේ ඉරිසියාව.අම්මා දන්නවා තාත්තාගෙ හිත ගියේ එයගෙ දිග කොන්ඩෙට කියලා.ඉතින් අයෙත් දිග කොන්ඩෙකට හිත ගියොත් එහෙම..
කියන්න ඔනේ කොන්දේසි ටික කොච්චර පාඩම් කෙරෙවුවත් අපේ තාත්තා එකක් හරි මිස් කරනවා.
“ඔයා අර කෑල්ල කිවුවෙ නෑනේ”අම්මා කෙක්ක වගේ එල්ලෙනවා.
“අනේ මේ..මීට පස්සෙ ඔයාම කියා ගන්න” තාත්තාට තද වෙනවා.
හුගක් වෙලවට බැදලා නැති ජොඩු එන්නෙ එයලගෙ අම්මලා නැන්දම්මාලා එක්ක.
වෙඩින් එකට පස්සෙ අලුත් ජෝඩුව තමයි අනෙක්ස් එකේ පදි0චි වෙන්නේ..
ඉතින් ඔය කාමරයට හුගාක්ම ආවේ අලුත බැදපු ජෝඩු.මේ වෙද්දී එතන ජෝඩු දහයක් දොලහක් ඉදලා ඇතී ,.කුලිය ගත්තා වුනත් අපි කරන්නෙ ලොකු සේවයක් ,පිනක්.. මොකද හිසට සෙවනක් හිතට නිවනක් කියනවනේ.ඒ පිනෙන් වෙන්න ඇති අපෙ අම්මගෙ ලමයි හතර දෙනාටම අලුත්ම ගෙවල් වල ඉන්න පින ලැබුනා..
ඉතින් ඔය කාමරයට අල්ලපු කාමරයේ තමයි මමයි , චුටි පුන්චියි හිටියේ.ඔය අලුත් ජෝඩු වල හුරතල් වෙන නෝනලාගෙ සිගිති වදන්,කිචි කිචි කෑලි වගේම සටන් පාඨත් අපේ කාමරයට කණ තිබ්බ වගේ ඇහෙනවා.
මේ සිද්දිය වෙද්දී මම O/L class වල වගේ..අලුත බැදපු L බෝඩ් ජොඩුවක්
පදිංචියට ආවා.
ජෝඩුව චමල් & ශානිකා..විවාහ ජීවීතේ පලමු වසර, ආදරය ඉතිරෙන පැනී බේරෙන රසවත්ම කිරි කෝඩු කාලේනේ..ඉතින් බබාලත් නැති නිසා චමල් ශානිකාට කිවුවේ බබා කියාලා..ශානිකා චමල්ට කිවුවේ බුබේ කියලා…
බබායි බුබෙයී ඔෆිස් ගිහින් එන්නෙ හවස හයට විතර ..බබාගේ කට ගන්ඨාරෙ වගේ..
“බුබේ …බුබේ..පාත්තු ගලවලා ගෙට එන්න.” බබා කෑගහනවා.
“බුබේ ඔයා නේද ජින්ජිබරස් කරන්නේ?”
උයන්න ගිය වෙලේ ඉදලා බබා බුබේට වැඩ කියනවා..
“බුබේ පොල් කුක්කු ඇතිද බලන්නකෝ”
“බුබේ ඔයා පොල් කුක්කු චුක්කන්න හොදේ..”
හුරතලේ ඉවරයක් නැහැ ..මුන් දෙන්නා දණ ගාන්නෙ නැති ටික විතරයී.
“අනේ බබා කෑගහන්න එපා.”බුබේ කියනවා.එයාට ලැජ්ජා ඇති.
මේවා අහලා පන පලයන් ලබන පෙරෙදා කියලා පුන්චියි මමයී කට තද කරගෙන හිනා වෙනවා.සමහර වෙලවට හික් ගලා හිනාව පනිනවා එලියට.
“මල කෝලන්..එයාලාගෙ බොරු ඇඩ් එක..පහු පහු වෙද්දි කොහු කොහු වෙයි”
පුන්චී කියනවා.
ඉතින් ඇවිත් මාසෙ තුනකට විතර පස්සෙ
ඉරිදා දවසක ඒ දෙන්නා ශොපින් ගිහින් එද්දී බලු කූඩුවකුයි පොමනේරියන් බලු පැටියෙකුයි අරන් ආවා.ඒ දවස් වල ලොකු ගෙවල් වල සල්ලි තියෙන පොශ් නෝන්ලාට ඔය පොමනේරියන් බලු පිස්සුව තිබුනා.
පොමනේරියන් පැටී හරි ලස්සනයි .බූල් පිරිලා ,පුලුන් බෝලයක් වගේ.අපිත් ගිහින් බලලා ආදරය කරලා ආවා.
බබයි බුබෙයි වැඩට ගියම පොමනේරියන් පැටී තනියම කූඩුවේ ඉන්නවා.
හවස හයට විතර බබයි බුබෙයි වැඩ ඇරිලා ආවා..
“බුබේ..බුබේ..” බබා සද්දේන් අඩගැහුවා..
බවු..බවූ බවූඌඌඌඌ…
බවු…බව්..බ්වූඌඌඌඌඌ..
පොමනේරියන් පැටී දිගටම උඩුබුරලනවා .
“මොන මූසල කමක්ද මේ..හවස හයට බල්ලො උඩුබුරලන්නෙ”අපේ සියා සුටු සුටු ගගා බැන්නා.
ආයෙත් පහුවෙනිදා උදේ
“බුබේ..බුබේ…”” බබාගෙ සද්දේ..
බව්..බ්ව්..බ්වූඌඌඌඌඌ.
බ්ව්..බව් බූඌඌඌඌඌ
.පැටී උඩුබුරලනවා..
මේ වැඩේ අපි දිගටම දවස් කීපයක් නෝට් කලා.
“බුබේ බුබේ ” කියලා බබා කෑගහන හැම වෙලාවකම පොමනේරියන් පැටී උඩුබුරලන්න පටන් ගන්නවා.
සමහර විට පොමනෙරියන් පැටී හිතනවා ඇති මේ කතා කරන්නේ එයාට කියලා.
එහෙම නැති නම් මේ “බුබේ” කියන වචනේ ගණ පිහිටුම , තාරතාවය එයාගේ කණට අමිහිරිව, අපහසුවක් වගේ දැනෙනවා ඇතී. බල්ලන්ගේ කණ ඇසීම අපට වඩා තියුණුයි නේ..
මේ සිද්දියෙන් පස්සෙ “බුබේ” කියන වචනෙ ඇහෙන එක අඩු වුනා..
බබායි බුබෙයී අපේ ගෙදර අවුරුදු 3ක් විතර හිටියා.කාලානුරූපීව එයලගෙ ලව් කෑලි අඩු වෙලා ප්‍රකුර්ති තත්වයට පත් වුනා..
කාලෙන් කාලෙට අනෙක්ස් එකෙ හිටපු අය ගැන මතකය අඩු වුනත් බබා – බුබේ දෙන්නව අපිට විතරක් නෙමේ අපේ නෑදෑයින්ටත් තාම මතකයී.
නිමි.. පින්තූරය අන්තර්ජාලයෙන්.
උපුටා ගැනීම: Kanchana Godamanna