ඉස්කෝලෙ ස්පෝට්ස් මීට් තියෙන කාලෙ තමයි විනෝදම කාලෙ. හැම ඉස්කෝලෙම වගේ අපේ ඉස්කෝලෙත් නිවාස හතරකට බෙදිලා තමයි අපි සෙල්ලම් කලේ.
ක්‍රීඩා පිට්ටනියේ කෙළවරක තැන් හතරක් වෙන් කරලා තිබ්බා ඒ ඒ නිවාස වල ළමයින්ට. ඒ තැන් වල තමයි අපි අපේ හවුස් එක හදන්න ඕනි. ඒ වගේම තමයි ස්පෝට්ස් මීට් එකට කලින් දවස් ගාණක් තිස්සේ පෙර පුහුණුවීම් කරනවනේ. ( ආචාර පෙළපාලි, සරඹ සංදර්ශන ) ඉතින් ඒ වෙලාවල් වලට මුළු ඉස්කෝලෙම ළමයි ක්‍රීඩා පිට්ටනියේ කෙළවර තමන්ට අයිති තැන් වලට යනවා. සමහරු ග්‍රවුන්ඩ් එකේ තමන්ට අදාල දේවල් ප්‍රැක්ටිස් කරද්දි තවත් සමහරු තමන්ගේ වෙලාව එනකම් තමන්ගේ නිවාසෙ තියෙන පැත්තට වෙලා කල්ලි ගැහිලා කයියක් දාගෙන ඉන්නවා.
අපේ නිවාසෙට ලැබිලා තිබ්බේ ග්‍රවුන්ඩ් එක කෙළවර තිබ්බ කොට්ටම්බා ගස් තියෙන තැන ඉඩ කෑල්ලයි. ඉතින් කට්ටියක් ග්‍රවුන්ඩ් එකේ පුහුණුවීම් කරනකොට අපි කලේ කොට්ටම්බා තලන එක.
මුලින්ම සාක්කු පිරෙන්න කොට්ටම්බා එකතු කරගන්නවා. ඊටපස්සේ ගලක් අරගෙන තලනවා කනවා. සමහර කොට්ටම්බා පෙනුමට තිබ්බට ඇතුල හරි නෑ. හදිස්සියට එකතු කරගන්න නිසා කොට්ටම්බා හොල්ල හොල්ල බලන්න වෙන්නෙත් නෑ. හොඳ පිරුණු මදයක් තියෙන කොට්ටම්බා හොල්ලනකොට සද්දෙන් කියන්න පුළුවන්. සමහර වෙලාවට අපි තලන විදියට කොට්ටම්බා මදෙත් චප්ප වෙනවා. සමහර චප්ප වෙච්චි කොට්ටම්බා මද හූරගෙන කද්දි වැලිත් අපේ බඩට යන්න ඇති ඕනි තරම්. දවසකට කොච්චරනම් කොට්ටම්බා මද කන්න ඇද්ද. දැන්නම් හොයාගන්නත් අමාරුයි. මේක ටයිප් කරද්දිත් කොට්ටම්බා මදේ කිරි රස මතක් වෙනවා.
පුංචි කාලෙ පෙරේතකමට කෑවට කොට්ටම්බා මදේ තියෙන වටිනාකම ගැන පොඩ්ඩක්වත් දැනන් හිටියේ නැහැ. ඒකට දැන් කොට්ටම්බා ගහක් දකින්නත් ලැබෙන්නේ කලාතුරකින්. අද කාලේ සමහර පොඩි ළමයි කොට්ටම්බා මදයක් ආසාවටවත් කාලා ඇතිද. ගොඩක් අය කොට්ටම්බා හදන්නේ සෙවන දෙන ගහක් විදියට. හැබැයි ඉතින් ඔය ebay පැත්තේ ගිහින් බැලුවොත් කොට්ටම්බා මදේ විතරක් නෙමෙයි කොට්ටම්බා කොළ හිටන් විකිණෙන්නේ හොඳ ගණන් වලට කියලා බලාගන්න පුළුවනි.
කජු , රටකජු, ආමන්ඩ්, වෝල්නට්, හේසල්නට්, පිස්තාචියෝ මේ මොන දේ කෑවත් අදටත් මට ගොඩක්ම රස ගලක් අරන් තලලා තලලා කාපු කොට්ටම්බා මදේ තමයි.
උපුටා ගැනීම: බුද්ධි ජයවීර