ළමයි හම්බවෙන්න කලිං..
බලන්නකො අප්ප අර ළමයි හදන හැටි. කෑගහනව සත්තු වගේ. මේ බලන්නකො විනාස කරනවනෙ ගෙදරම. හැමතැනම චිත්‍ර ඇඳල.. මංනං ඔහොම නටන්න දෙන්නෑ. බලන්නකො..
හම්බවුනාට පස්සෙ..
ළමයි ඉතිං කෑ නොගහ වාඩිවෙලා ඉන්නවනං ලෙඩක්නෙ. මෙහෙම තමයි ළමයි කියන්නෙ. මේවනං ඉතිං අස්කරගන්න බැරියැ.. බිත්ති වල අඳින එක නවත්තන්න හොඳනෑලු. මනස වර්ධනය අඩුවෙනවලු. ළමයි වුනාම දඟලල කරල ඉන්න එපැයි.
**********************************************
ළමයි හම්බවෙන්න කලිං..
අර ලමයි වත්ත වටේ ඇවිද ඇවිද කවන්නෙ. අර.. මොනතරං ජරාවද අප්පා මේ ළමයි නිකං ලෙඩකරනව විසබීජ කවලා. එකතැනක වාඩිකරවල කන්න පුරුදු කරන්න එපැයි පොඩි කාලෙ ඉඳන්ම. ප්‍රැක්ටිස් එකක් විදියට හැමදාම එකම පුටුවක එකම තැනක කෑවනං ළමයි වුනත් පුරුදු වෙනව අප්ප. ළමා විසේසඥයො කොච්චර කියනවද. මං ඊයෙත් ටීවී එකේ දැක්ක.. අපරාදෙ මේ ළමයි.. පව්..
හම්බවුනාට පස්සෙ..
මේ මං උඹට කියන්නෑ. කනවනං කාපං. මේක මල කරුමයක්නෙ. එක තැනක ඉන්න බැරිද..
මොනාහරි කරල මුන්ට කවන්නත් ඕන. නැත්තං මුංගෙ අඬවැඩියාව ඉවරයක් නෑනෙ. (හිතිං)
දුවලනං බේරෙන්න හදන්නෙපා පුතෝ කොහෙගියත් මං මේ ටික කවල තමයි පස්ස බලන්නෙ.. යකෝ මෙච්චර තියෙන පෝසන සේරම දාලා දෙන්න පුලුවන් හොඳම විදියට මහන්සිවෙලා හදන කෑම එක විසිකරන්න පුලුවන්ද.. මෙහෙ එනවද මං ඔතනට එන්නද?? ආ…
**********************************************
ළමයි හම්බවෙන්න කලිං..
ඇත්තටම ළමයින්ට ෆෝන් දෙනව කියන්නෙ කරන්න පුලුවන් අන්තිම නරක වැඩක්. තනිකරම කුඩු ගැහුව වගේ ඇබ්බැහිවෙනවලු නේ. මොලේ විකාර වෙනව ඕව බැලුවම. බලන්නකො තියෙන ඒව ඒවගෙ.. දෙන්නෙනං නෑ මං කොහොමවත්. මගෙ ෆෝන් එකත් අයින් කරානං හරිනෙ. එතකොට ළමයි එහෙම එකක් දකින්නෙවත් නෑනෙ..
හම්බවුනාට පස්සෙ..
මේක දුන්නොත් විතරනෙ මේකා ටිකක් හරි වාඩිවෙලා ඉන්නෙ. යක්සාවේස වෙලා වගේ ගේ වටේ දුවනව දුවනව. මාත් මනුස්සයෙක්නෙ අප්පා. ෆෝන් එක දුන්නම ඉන්නව හෙලවෙන්නැතුව. ඔය කියනතරං අවුලක් නෑ. හොඳට බලල හොඳම ඒව විතරක් බලන්න දුන්නම හරිනෙ. මං ලඟ ඉන්නවනෙ. අනික ඉතිං මුං මෙල්ල කරන්න මීටවඩා එකකුත් නෑනෙ. අනේ මේ ෆෝන් හොයාගත්ත එකානං බුදුවෙන්නෝන..
**********************************************
ළමයි හම්බවෙන්න කලිං..
බලන්න අර සමන්තිගෙ ලමයිනං මරවනව අප්පා. හැමදාම ක්ලාස් ක්ලාස් ක්ලාස්.. එක නාඩියක් නිවනක් නෑ. එහෙම කරන්න හොඳනෑනෙ අප්ප ළමයින්ට. ඒ ළමයිංගෙ ලමාකාලේ කාමර අස්සෙම ගෙවිල යනව. කිසිම සෙල්ලමක් පිටස්තර දෙයක් නෑ. පව් අප්පා.. මංනං ජීවිතේට මගෙ ළමයින්ට එහෙම කරන්නෑ..
හම්බවුනාට පස්සෙ..
මේ කොහෙද දුවන්නෙ. මෙන්න මෙතන වාඩිවෙලා මේක කරනව. කොච්චරවත් දුවන්නමයි හදන්නෙ. ලොකුවුනාම ගැරේජ් එකක් කරන්නද හිතාගෙන ඉන්නෙ. තව ටිකකින් ක්ලාස් එකක් තියෙනව නේද. ඒකෙ වැඩ ටික බලාගත්තද. ඊයෙ 10ට ඉවර වුනු එකේ පොත බලාගන්න. සර් කිව්වනෙ උදේම පංති කියල. අධ්‍යාපනයෙ වටිනාකම ඔයාලට තේරෙන්නෑ දැන්ම. අවුරුදු 13යිනෙ තියෙන්නෙ. ඒ ටික මහන්සි වෙලා කරන්නෝන. නටන්නනං බැරියැ කවදහරි..
**********************************************
ළමයි හම්බවෙන්න කලිං..
අයියෝ පුදුම වදයක්නෙ අර ලමය දෙන්නෙ. දකින දකින එක ඉල්ලල අඬනව. මගෙ එහෙමනං දෙනව ආයි. ඇයි අප්ප. විලි ලැජ්ජයිනෙ. මිනිස්සු ඉස්සරහ. හුරතල් කරනවනෙ එයාලත්. පුදුම මුරණ්ඩුයිනෙ ඒ ළමයා..
හම්බවුනාට පස්සෙ
හරි හරි අඬන්නැතුව ඉන්න ඉතිං. අරං දෙන්නං. ඔයාට අපි හැමදේම දෙනවනෙ පුතේ. කෑගහන්නැතුව කියන දේ අහන්නකො.
ඇයි ගෙදරත් මේකම තියෙනවනෙ මගෙ පුතේ.. (රහසින්)
බුදු අම්මේ සද්දෙ.. කෑගහන්නෙපා.. ලැජ්ජාවෙ බෑ.. ඉන්න ඉන්න අරං දෙන්නං.. ආ මේකද.. ආ ආ.. දැං හරිද..
**********************************************
ළමයි හම්බවෙන්න කලිං..
අර බලන්නකො අර ලමයා කොච්චරවත් චොක්ලට් කන එකමයි වැඩේ. දෙමව්පියොත් දැනගන්න එපැයි අප්පා. දත් ටිකත් ඉවර ඇති. කොච්චරවත් kfc, පීසා හට් එකෙං කකා පුදුම වසනෙ අප්පා. ගෙදරක හදල හොඳට කාලම නැතුව ඇති ඔය ලමයි. විස කවල අනේමංද පව් ඒ ලමයි..
හම්බුනාට පස්සෙ..
අදත් මොනාහරි අරං යන්නෝන. ඊයෙ ගෙනිච්ච චොක්ලට් ටික කෑවෙ පැනගෙන.. පව්.. අද පීසා එකක්වත් ගෙනියන්නෝන. පව්නෙ අප්පා අර ගෑණි හදන ජරාව කකා හැමදාම ඕකුංගෙ දිවවල් කුණුවෙනව ලඟදිම. ඉඳල හිටලවත් රස කෑමක් කෑවෙ නැත්තං පව් ඒ ළමයි..
