ලංකාවේ ගෑණු (වැල් වටාරම්)

වයින් ස්ටෝර්ස් වල පෝලිමේ ඉදලා බෝතලේ අරන් සරම අස්සේ හරි කලිසම් සාක්කුවේ හරි හංගගෙන ගිහින් බොන පිරිමි වගේ බොන්නෙ නෑ….තැබෑරුමට රෙස්ටුරන්ට් එකට ගිහින් බයිට් දාගෙන කකා බොන පිරිමි වගේ බොන්නෙ නෑ….ගමේ කසිප්පු පොලට ගිහින් බොන්නෙ නෑ…කනමදයා වගේ බීලා පාරේ බස් හෝල්ට් එකේ කාණු පල්ලේ වැටිලා මැරිලා වගේ බුදියගෙන ඉන්න පිරිමි වගේ බොන්නෙ නෑ ….සුපිරි වෙළඳසලක බාර් එකෙන් වටපිට බලලා හොරා වගේ ගිහින් බෝතලයක් අරන් සාක්කුවේ දාගෙන එහෙම එකක් ගත්තේ නෑ වගේ ලස්සන ට එලියට ගිහින් කොහෙට හරි වෙලා බෝතලේ ගහන පිරිමි වගේ බොන්නෙ නෑ…..බෝතලේ අරගෙන ගෙදර ගිහින් දරුවෝ නිදා ගත්තට පස්සේ සාලේ ටීවී එක ලගට වෙලා කකුල් දෙක උඩ තියාගෙන වැඩ කරලා පණ ගහින් ඉන්න බිරිදට කියලා බයිට් එකකුත් හදාගෙන බොන පිරිමි වගේ බොන්නෙ නෑ…

මගුල් ගෙදරක පාටි එකකට ගියත් මහත්තයා බොනකල් පැත්තකට වෙලා බලන් ඉන්නවා මිසක් මහත්තයා එක්ක හරි හරියට වාඩි වෙලා බොන්නෙ නෑ…ඒ අතරෙදි මහත්තයා හරි උජාරුවට කියන ” මගේ නෝනට මම ඩ්‍රයිවින් උගන්නලා තියෙන්නේ….ඒ නිසා මට බයක් නෑ මචං…කොච්චර බීලා වෙරි උනත් නෝනා මාව ගෙදර එක්ක ගිහින් තියෙයි ” වගේ ගොං කතා අහගෙන බෝතලේ ඔලුවේ හලන්න හිතුනත් බොන්නෙ නෑ….

ඒත් අපේ රටේ ගෑණු ෆැෂන් කරනවා..කොටට අඳිනවා….ඇගට හිරවෙන්න බෝඩ් ෂේප් එක පේන්න අදිනවා…ලස්සනට මේක්අප් කරනවා…ටැටූ ගහනවා…හෙයා ස්ටයිල් ස් දානවා….සමාජ ශීලීව ඕන කෙනෙක් එක්ක හිනා වෙනවා කතා කරනවා…යාලුවෝ එක්ක ට්රිප් යනවා සතුටු වෙනවා….හයියෙන් හිනා වෙනවා…දකින දකින තැන සෙල්ෂි ගහනවා…ඒවා සමාජ මාධ්‍ය වල ප්‍රදර්ශනය කරනවා…පිරිමි ගැහැණු බේදයක් නැතුව ඇසුරු කරනවා…ටිකක් වැඩියෙන් හිතවත් උන විශ්වාස වන්ත පිරිමියෙක් එක්ක ලගින් ඇසුරු කරනවා…ගැහැණු යාලුවෙක් එක්ක වගේම පිරිමි යාලුවෙක් එක්ක උනත් තමන් ගේ ප්‍රශ්න කතා කරනවා…..තමන් හම්බ කරන සල්ලිවලින් තමන් ට ඕන විදියට ජීවත් වෙනවා…

ඔව් දැන් ඔබේ හිතට එකගව අවංකව කියන්න….. මේ දෙ පිරිසෙන් සමාජයේ වැඩි පුරම විවේචනය කරන්නේ කාවද?

සමාජ විද්‍යා දේශකයන් සිංහල බෞද්ධ සංස්කෘති පිළිබඳව මහා ලොකු දේශන ඉදිරිපත් කරද්දී වැඩි පුරම විවේචනය කරන්නේ කාවද?

පංසලේ හාමුදුරුවෝත් බණ දේශනා කරද්දී නිවනට යන මග දේශනා නොකර වැඩි වැඩියෙන් විවේචනය කරන්නේ කාවද?

අපි වැඩි දෙනෙක් අදහන බුද්ධාගමේ පන්සිල් පද පහ ට අයත් වන්නේ මේ දෙකෙන් කොයි එකද.?

ලාංකීය සමාජයේ ගැහැණු පිරිමි දෙපාර්ශවයම අතිශය කෲර ලෙස විවේචනය කිරීම තුලින් මතු කිරීමට උත්සාහ කරන සමාජ සංස්කෘතික කුහකත්වය පිළිබඳව ඉහත කාරනයට සම්බන්ධ මා දන්නා සත්‍ය කරුණ නම්……

මෙවැනි ගැහැණුන් ලාංකීය සමාජ සංස්කෘතිය තුළ නිර්දය ලෙස විවේචනය කරන අතර මෙවැනි පිරිමින් සමග ඉවසීමෙන් යුතුව පවුල් කන ආකාරය පිළිබඳව සියලුම දේශකයන් විසින් ගැහැණුන්ට දේශනා කරනු ලැබේ.