ලංකාවේ මිනිස්සු අත්විඳින මාරම පහසුකම් ගැන අපිටත් වඩා දන්නේ පිට රට රස්සා කරන අය. ඒ ගොල්ලෝ කියන විදිහට අපි හරිම සතුටින් ලංකාවේ ජීවත් වෙන්නේ. කිසි ප්‍රශ්නයක් නැහැ. හැම දේම නිකන් වගේ අපිට ලැබෙන්නේ. මොකක් හරි ගෙවීමක් කරන්න වුණත්, ඒ ගෙවීම ලෝකේ අනෙක් රටවල් එක්ක බලද්දි හරිම අඩුයි.
පැට්‍රෝල් දකුණු ආසියාවේ අනෙක් රටවල්වලට වඩා ලාභයි. අපි පන්සල් ගියාම පහන් පත්තු කරන්නේ ඔක්ටේන් 95 දාලා. පහන ඉතින් හෝ ගාලා ඇවිලෙනවා. සාදුටත් සතුටුයි… අපිටත් සතුටුයි. සතුටු සිනා මල් වැහි වැහැලා.
හෝඩියෝ ඉඳන් උපාධිය වෙනකම් අපේ ළමයින්ට නිකන් අධ්‍යාපනය දෙනවා. අපිට තියෙන්නේ ළමයව ඉස්කෝලේ යවලා ඔහේ පාඩුවේ ඉන්ඩ. ඉස්කෝලවල නියමිත කාලයට විෂය නිර්දේශ ආවරණය කරන නිසා ළමයි ටියුෂන් පංති යන්නේ නැහැ. ඒ නිසා ටියුෂන් ගුරුවරු දැන් හන්දියක් හන්දියක් ගානේ කේ.එන්. 95 මාස්ක් විකුණනවා.
ගොවියන්ට පොහොර නිකන් දෙනවා. බීජ නිකන් දෙනවා. උපදෙස් නිකන් දෙනවා. ගොයම පැළ වුණාම පලිබෝධ නාශක නිකන් දෙනවා විතරක් නෙමෙයි කෘෂිකර්ම නිලධාරියා ඇවිත් ඒවා ගහලා දීලත් යනවා.
කිසිම බඩුවකට ටැක්ස් නැහැ. කොච්චර හොඳද කියනවා නම් ලංකාවේ බදු සංයුතිය ගත්තාම පුද්ගලික ආදායම් බදු ප්‍රමාණය සමස්ථ බදුවලින් සියයට 16 යි. ඒ තරම් ලංකාවේ ඒක පුද්ගල ආදායම ඉහළයි.
හැමදේම නිකන් දෙන නිසා මාසේ අන්තිමට පඩිය ගත්තා මළ පනිනවා. ඇයි වදේ ඒ පඩියෙන් හැමදේම කරලත් තව භාගෙකට වැඩිය ඉතුරුයි. පොතේ දානවා කියලා ඔහොමත් දාන්ඩ පුලවන්ද?
පාරට බැස්සොත් හැම තැනම ලෑන්ඩ් රෝවර්, ප්‍රාඩෝ, වී 8 සහ අවුඩි වගේ සුඛෝපභෝගී වාහන වැහිවැහලා. අද උදෙත් මාව ෆෙරාරි එකකට හැප්පෙන්න ගියා. වාහනේ ගිය අයියට මම මැද ඇඟිල්ල උස්සලා ආචාර කළා. ඒ අයියා මට ස්තුතියි කිව්වා.
විස්කි බීලා එපා වෙලා ඉන්නේ. ආසාවට ගල් බෝතලයක් හොයා ගන්ඩ නැහැ. කෑමට බීමට නම් ටැක්ස් කියලා ජාතියක් ගහන්නෙම නැහැ. අපේ පුතා හැපි කවු තුන්හුලස් චීස් කෑලි කැටපෝලෙට දාලා කුරුල්ලන්ට විදිනවා. පිස්සු කොල්ලෙක්… තාත්තාට ඉතින් ලක්ෂ 4-5 ක් පඩි හම්බ වෙන නිසා හොඳයි.
ලංකාව මේ තරම් දියුණු වෙන්ඩ වැඩිම දායකත්වයක් දෙන්නේ ඔය පිට රට රස්සාව කරලා ලංකාවට සල්ලි එවන රට විරුවෝ. මොකද ඒ ගොල්ලෝ උපයන විදේශ විනිමය නිසා තමයි ලංකාව දුවන්නේ. ඔය තේ දළු සහ ගාමන්ට් ෆැක්ටරිවල මහන ඇඳුම් අපි නිකන් සමාජ සේවයක් විදිහට තමයි රට අරින්නේ… ඒ අංශවල වැඩ කරන කෙල්ලෝ කරන කෙන්ගෙඩියක් නෑ අනේ.
කොටින්ම ඉතින් “රට අයියලා” කියන විදිහට ලංකාව කියන්නේ මිනිහෙක්ට ජීවිත් වෙන්න තියෙන හොඳම රටවල්වලින් එකක්. අපේ රටට බෝට්ටුවෙන් හරි එන්න ඕස්ටේ්‍රලියන් කාරයෝ, සුද්දෝ සහ ඇමෙරිකන්කාරයෝ පොරකනවා.
අපේ විදේශ අමාත්‍යාංශය ඒ රටවල පත්තරවල ටීවීවල ඇඩ් දානවා නීතිවිරෝධීව බෝට්ටුවලින් ලංකාවට එන්ඩ එපා. ආවත් රස්සා දෙන්නේ නැහැ. කෙලින්ම කච්චතිවු හරි නයනතිව් හරි දූපතකට යවලා කරෝල වාඩිවලට වැඩට දානවා කියලා.
ඔය ඔක්කොම හරි කියමුකෝ.
නිකමට වගේ ඔය අයියා කෙනෙක්ට කියපන් ලංකාව ඔච්චර හොඳ නම් රට රස්සාව දාලා ඇවිත් ලංකාවේ ජොබ් එකක් කරපන් කියලා…
හම්මෝ ඉතින් හරියට කේන්ති යනවා…