සමාජීය , ආර්ථික , දේශපාලනික , ආගමික මේ කවර හෝ කාරණයක් හේතුවෙන් ලාඕ ජනතාවගෙන් අතිමහත් බහුතරය ” පොළවේ පය ගසා සිටින මේ මොහොතේ කා බී ජොලියෙන් සිටීම” හෙවත් එදාවේල කා බී විනෝදයෙන් ජීවත්වීමේ බලාපොරොත්තුව පමණක් පෙරදැරිව හෙටක් ගැන නොසිතා නින්දට යති. ශ්‍රී ලංකාවේ අප ජාති ආගම් භේද නොසළකා පොදුවේ මුහුණ පා සිටින ප්‍රබලතම අභියෝගයක් වන සීග්‍රයෙන් විවිධ පරිවර්තනයන්ට ගොදුරු වෙමින් ඉදිරියට යන සම්මත සංවර්ධන ක්‍රියාවලියයැයි හඳුනාගත් “උප නූපන් අපේ දරුවන්ගේ හෙට දවස පැහැබර කිරීමේ” නොතිත් පරමාර්ථය ලාඕසයේ සරල ජීවන රටාව යටතේ සාතිශය බහුතරයක් වූ එවැසියන්ට නැත.
එම සමාජීය තත්වයට හේතුව වන්නේ ජනතාවගේ අති ප්‍රගතිශීලී බව , උදාසීන බව සහ අධික විනෝදකාමී බව ප්‍රයෝජනයට ගනිමින් රජය සිය අභිවෘද්ධිය තකා ගෙනයන උපාය මාර්ගයක්ද නැත්නම් රජයේ අභියෝග , සම්පත් සහ හැකියාවන් ගැන වද වන ජනතාව ඔවුන්ට බරක් නොවී , ලැබූ ජීවිතය කා බී සතුටින් මියයෑමෙන් ඔවුන්ට සහය දීමට ගත් තීරණයක්ද යන්න සාකච්ඡා කිරීමට මා කටයුතු නොකරන්නේ ලාඕසය පිළිබඳ විස්තර කිරීම් අතිශය අදේශපාලනිකව කරගෙන යාමට මා තීරණය කළ නිසාත් දේශපාලනය ඈඳා ගැනීම ඕනෑම තැනක ගැටළුවකට මූලබීජය බව මා දන්නා නිසාත් එයින් සමූහයේ ඇඩ්මින්වරුන්ගේ , සාමාජිකයින්ගේ මෙන්ම මාගේද ජරාජීර්ණ දේශපාලන ගොහොරුවෙන් ඉවත්ව සිටීමේ මූලික අයිතිවාසිකම උල්ලංඝනය වන නිසාත්ය. එනයින් මාගේ සෑම ලිපියක් මතම දේශපාලනය සාකච්ඡා නොකරන ලෙස සහෘද ඔබගෙන්ද සුහදව ඉල්ලා සිටිමි.
ඉතින් කෙතරම් දුක්ඛිත ජීවන තත්වයක ගැලී සිටියද ඉතා ලාබාල නවයොවුන් වියේ අරම්භයේ සිටම තාරුණ්‍යයේ අවසානය දක්වාම වන තරුණ පරපුර හෙවත් ලාඕ ජවය රාත්‍රී විනෝද සමය හෙවත් එදිනෙදා කා බී ජොලියෙන් නින්දට යෑමේ ක්‍රියාවලියට අධිකව ඇබ්බැහිව සිටිති. කුඩා දරුවාගේ සිටම ලාඕ ජනතාව තුළට කිඳා බස්වා ඇති ස්වාධීනත්වයයැයි ඔවුන් හඳුනාගත් ලක්ෂණයද වයස් , ජාති , ආගම් භේද නොසළකා ජාතික පානය ලෙස හඳුනාගත් බීරපානයද නිසා මේ දිනචරියාවන්ට විරුද්ධ වීමට හෝ අකමැත්ත පළකිරීමට දෙමාපියන් වැඩිහිටියන් කටයුතු නොකරන අතර තමා මෙන්ම තමන්ගේ දරුවන්ද ඔවුන්ගේ දරුවන්ද ඉදිරියට යා යුතුයැයිද යනු ඇතැයිද සිතමින් කල් ගෙවති.
මේ රාත්‍රී විනෝද සමය තුළ මා දුටු විශේෂ ලක්ෂණ කිහිපයක්ම තිබේ. සැන්දෑ සමයේ හතර හෝ පහ පමණ වනවිට තනි වශයෙන් ජෝඩු වශයෙන් සහ රංචු වශයෙන් වීදියට බසින මොවුන් ඇඳිරි වැටීගෙන එන විට නගරයේ ජනප්‍රිය එළිමහන් අවන්හල් වල බියර් ලාඕ නම් සංකේතයට වටවී කමින් බොමින් මධ්‍යහන රාත්‍රී වනතුරුම ගත කරයි. ඉන්පසු මතු දැක්වෙන ආකාරයෙන් සමාජශාලා වලට රොක් වී පාන්දර වනතුරු කිටි කිටියේ නටති. මෙසේ බීමත්ව නටන ගැහැණු පිරිමි අතර පසු ගිය වසර දෙකහමාර පුරාවටම මා දුටු එකම ප්‍රචණ්ඩකාරී සිදුවීම වන්නේ බීමතින් කලහකාරීව හැසිරුණ අප ලාංකීය සගයෙකු සමාජ ශාලාවෙන් එළියට ඇද දැමීම පමණි. මේ විනෝද වීමට කිසිදු ආකාරයේ සමාජීය පරතරයන් නොමැති අතර මේ ජනතාව අතර මා දුටු වටිනාම ලක්ෂණයක් වන සමානාත්මතාවය ඉහලින්ම අගය කෙරෙති. ගැහැණු , පිරිමි සහ සංක්‍රාන්ති ලිංගික මේ කවරෙකු වුවද සමාජයේ සර්වසම අයිතිවාසිකම් ලබන අතර ඔවුහු සියල්ලෝම කිසිදු අවස්ථාවක එකිනෙකා දෙස වපරැසින් නොබලති.
මේ තාරුණ්‍යයේ චමත්කාරය අතර ඇති අංක එකේ විශේෂත්වයනම් එහි සාතිශය බහුතරය කෙසේ වෙතත් පිරිමින්ට වඩා ගැහැණුන්ගේ සහභාගිත්වය ඉහල අගයක් ගැනීමයි. දරිද්‍රතාවයෙන් මිරිකෙන පවුල් වල පවා තරුණියන් වටිනා සළුපිළි වලින් අලංකෘතව සිය තෘප්තිය ලබා ගැනීම පිටුපස ඇත්තේ ලිංගිකත්වය සහ ආදරය කිරීම ලාඕසයේ ඉතා සාමාන්‍ය දෙයක් වීමයි. ලාංකික අප ඇතුළු වෙනත් ජාතීන් ඒ දෙස බලා “ඔහ් තරුණියන් සතුව මුදල් නිෂ්පාදන මැසිමක් තියෙනවා නෙව ” යැයි පවසමින් විනෝද වුවද ලාඕ සමාජයේ ඇති ලිංගිකත්වයට ඇති අසීමිත නිදහස , ස්වාධීන බව සහ පුද්ගලිකත්වයට ගරු කිරීම යන කරුණු මත යුවතියක අවන්හලකදී මුණගැසෙන තරුණයෙකු සමඟ එදිනෙදා සබඳතා පැවැත්වීම පුද්ගලිකව මා වරදක් ලෙස නොදකිමි.
විවිධ රටවල සංස්කෘතීන්ට අනුව ලිංගිකත්වය කොටස් වලට බෙදා තිබේ. නමුත් සාධාරණව බැලූවිට අවන්හලකදී හමුවන තනිකඩ තරුණියක සමඟ සබඳතා පැවැත්වීමට තනිකඩ තරුණයෙකුට ඇති අයිතියම සමව තරුණියකටද ලැබිය යුතුය. ලංකාවේ නැති ඒ අපරිමිත සමානාත්මතාවය ලාඕ සමාජයේ මා ඉහලින්ම අගය කරන ලක්ෂණයක් වන අතර ගෝත්‍රික ලාංකික සංස්කෘතියේ ඇති තරුණිය “බඩුවක්” වී තරුණයා “පොර” වීමේ තුට්ටු දෙකේ මානසිකත්වය ලාඕ සමාජයේ නැත. ගණිකාවන් ලෙස හැසිරෙන කාන්තාවන් වෙසෙන අතර ඔවුන් ඒ සඳහා වෙනම ස්ථාන පවත්වා ගෙන යති. ඒ හැර සමාජයේදී ඔබ හමු වී කා බී සතුටූ වී අවසානයේ යහන්ගත වුවද ඇය කිසිසේත්ම “බඩුවක්” නොවේ. මන්ද යත් ඇය බඩුවනම් ඔබ භාණ්ඩයක් වීමේ සමානුපාතික සමාජීය ගුණගරුක බව නිසාය. කන්‍යා පටල පරීක්ෂාව වැනි තුනේ පන්තියේ සංස්කෘතික ලක්ෂණ ලාඕ සමාජයේ කොහෙත්ම නැත.
කෙසේ නමුත් ලාඕසය ජාතික වශයෙන් ආර්ථික පසුබෑමක සිටීමට බලපෑ මූලික ලක්ෂණයක් ලෙස තරුණ ජවය මෙසේ අයාලේ යෑම සඳහන් කළ හැකිය.
උපුටා ගැනීම: Thilina Anupriya Ariyaratha