අනාගතයේ දී ලෝකයේ සිදුවන සිදුවීම් ගැන අනාවැකි පළ කරන්නන් අදටත් ලෝකයේ සිටිනවා. ඇතැම් අය මේ ලෝකය විනාශය වන කාල වකවානු ගැනත් බොහෝ අනාවැකි පළ කරලා තියෙනවා.ඒ අනාවැකි ඇතැම් ඒවා සත්‍ය බවට තහවුරු වුණත් ඇතැම් අනාවැකි පදනමකින් තොරව පලකරන ඒවා ද වෙනවා. මෙවැනි අනාවැකි ප්‍රකාශ කර අය අධි මානසික ශක්තියක් ඇති අය විදියට සලකනු ලබනවා. බෞද්ධ, හින්දු, කතෝලික හා ඉස්ලාම් යන සෑම ආගමකම ලෝකයේ ආරම්භය පැවැත්ම හා විනාශය සම්බන්ධයෙන් විග්‍රහ කරලා තියෙනවා. ඒත් අද කතා කරන්නේ නම් මේ විවිධ දර්ශනයන් පිළිබඳව නම් නොවෙයි.මේ කතා කරන්න යන්නේ ස්වයං මෝහනයෙන් අන් අයගේ පෙර භවය ගැනත්,රෝගවලට කරන ප්‍රතිකාර ගැනත්, කර්මය පුනර්භවය විස්තර කිරීමටත් හැකියාවක් තිබුණු පුද්ගලයෙක් ගැන.
ඔහු නමින් එඩ්ගා කේසී. නැත්නම් බොහෝ අය ඔහුව දන්නේ නිදිගත් දාර්ශනිකයා විදියට.ඔහු ඇමරිකානු ජාතික ආධ්‍යාත්මවාදියෙක්. ඒවගේම ක්‍රිස්තියානි ජාතිකයෙක්.ඔහු ක්‍රිස්තියානි ජාතිකයෙක් වුණාට ඔහුගේ කියවීම් බොහෝමයක අන්තර්ගතවෙලා තියෙන්නේ නම් බෞද්ධ හින්දු වගේ පෙරදිග ආගම්වල කියවෙන කර්මය හා පුනර්භවය ආදී කරුණු. විසිවන සියවසේ බිහි වුණු අසාමාන්‍ය හැකියාවන්ගෙන් පිරුණු පුද්ගලයෙක් විදියට මොහු ලෝකයේම ප්‍රසිද්ධියට පත්වෙලා සිටියා.
මෙතුමාගේ බොහෝ කියමන් විවිධ පර්යේෂණවලට භාජනය වුණු අතර ඒවා බොහෝමයක් සනාථ වන සාධකත් ලැබී තියෙනවා.මොහුගේ පෞද්ගලික තොරතුරු ටිකක් හොයලා බැලුවොත් මොහු ඉපදිලා තියෙන්නේ 1877 මාර්තු 18 දින ඇමරිකාවේදී.ගොවි පවුලක ඉපදුණු කේසී කුඩා වයසේ ඉඳලම ඉතාමත් භක්තියෙන් බයිබලය කියවන්නට පටන් ගත්තා.ඉතින් දෙවියන් ගැන දැඩි විශ්වාසයක් මොහුට ඇති වුණා.
වයස වුරුදු හයක් පමණ වුණු කුඩා කේසී දිනක් තම දෙමවුපියන්ට අමුතු කතාවක් කිව්ව.ඒ තමයි ඔහුට අනිත් අයට පේන්නේ නැති දේවල් පේන බවත්, මැරුණු ඥාතින් සමඟ ඔහුට කතා කළ හැකි බවත්.කුඩා දරුවා මේ කියපු කතාව ගැනත් මේ දෙමාපියන් එච්චර හිතලා නැහැ.කොහොම වුණත් දවසක් ගසක් යටට වෙලා බයිබලය කියවමින් ඉඳපු කේසීට බොහෝම සුන්දර හැඩරුව තියෙන ලස්සන කාන්තාවක් පේන්න ගත්තා.
ඒ කාන්තාව ඔහුට කැමති වරයක් ඉල්ලන්න කියලා පැවසුවා. ඒ වෙලාවේ කේසී තමන්ට මිනිසුන්ට විශේෂයෙන් දරුවන්ට උදව් කරන්න අවශ්‍ය බව පැවසුවා. එවිට ඒ කාන්තාව එවැනි උදව්වක් අවශ්‍ය වූ විට ඔබ මදක් නිදාගන්න .එවිට ඔබට අවශ්‍ය දේ කෙරෙනු ඇත “ යැයි ප්‍රකාශ කරමින් ඒ සුන්දර කාන්තාව අතුරුදහන් වුණා.
මේ ගැන වැටහීමක් නොවුණු කේසී එදායින් පස්සේ කිසි දවසක පොතක් කියවලා නැහැ. ඔහු කළේ ඔහුට කියවන්නට අවශ්‍ය පොත් රාත්‍රියේ දී කොට්ටය යටින් තියාගෙන නිදාගන්න එක.ආයේ නැගිටිද්දී පොතේ සඳහන් හැමදෙයක්ම පොතේ පින්තූර සටහන් පවා ඔහුගේ මතකයේ තිබුණා.ඔහු ඉගෙනීමට ඉතා දුර්වල දරුවෙක්. ගුරුවරු නිතරම කේසිගේ දුර්වලතා ගැන දෙමව්පියන්ට පැමිණිලි කළා.
ඉතින් නිතරම ගුරුවරුන්ගේ වගේම දෙමාපියන්ගේ දෝෂාරෝපණයට ලක්වෙන්න මේ කේසිට සිදු වුණා. දිනක් ඔහුගේ පියා ඔහුට ඉංග්‍රීසි අක්ෂර වින්‍යාසය කියාදෙමින් හිටියා. එත් ඉතින් මේ කේසීට නම් එක වචනයක්වත් නිවැරදිව ලියන්න බැරි වුණා. පෙර සිදුවීම මතකයට ගත්තු කේසී තමන්ගේ පාඩම් පොත හිස මත තියාගෙන සුළු නින්දකට වැටුණයින් පසුව ඔහුට සියලු වචන නිවැරදිව ලියන්න හැකිවෙලා තියෙනවා.ඒ විතරක් නොවෙයි ඔහු පංතිභාර ගුරුවරයාගේ දක්ෂතම සිසුවා බවටත් පත්වෙලා තියෙනවා.
වයස අවුරුදු 16 දී පවුලේ ආර්ථික තත්ත්ව නිසා අධ්‍යාපනය අතරමග නතර කළ අතර මොහු රැකියාවල නිරත වුණා. වයස අවුරුදු 23 දී ඔහුගේ කටහඬ අහිමි වුණා. අලි ලේන් යන මෝහන ශිල්පියෙකුගේ මඟපෙන්වීමෙන් ස්වයං මෝහනයට පත්ව කේසී ප්‍රතිකාර කරගත්තා.ඔහුගේ කටහඬ ඔහුට නැවත ලැබුණා. ලේන්ගේ මඟපෙන්වීමෙන් කේසි සතු ස්වයං මෝහන හැකියාවෙන් ලෝකයේ මිනිසුන්ගේ යහපත උදෙසා කටයුතු කරන ආකාරය වටහා දුන්නා.
ඉන්පසුව කේසී රෝගීන්ට ප්‍රතිකාර කිරීමට මේ ස්වයං මෝහනය යොදා ගනු ලැබුවා. ප්‍රතිකාර සඳහා කාමරයට රෝගියා පමණක් ඇතුල් කර ගත් අතර කේසිට රෝගියාගෙන් දැන ගැනීමට අවශ්‍ය වන්නේ ඔහුගේ නම සහ දැනට ජීවත් වන ප්‍රදේශය පමණයි.ස්වයං මෝහනයට පත්වන කේසි රෝගියාගේ සියළු විස්තර ප්‍රකාශ කරනු ලබනවා.
කේසිගේ හැකියාව ගැන වෛද්‍ය පරීක්ෂණ පවා සිදු කරලා තියෙනවා. කේසි කියන ආකාරයට ඔහු ගැඹුරු නින්දකට වැටෙන බවත්,ඒ වෙලාවේ දී මේ කියවීම් කරන බවත් එය සාමාන්‍ය රාත්‍රී නින්දකට වඩා වෙනස් බවත් ය. වෛද්‍යවරුන්ට අනුව මෙය මෝහන නිද්‍රාවක් බවත් එහිදී උඩු සිත නින්දට ගියත් යටි සිත අවදිව පවතින නිසා ඔහු ප්‍රතිකාර ලබා දෙන්නේ යටි සිතෙන් බවත් සඳහන් කරනවා.
කාලයක් ගතවන විට කේසී මුළු ලෝකයම දන්නා කෙනෙක් බවට පත් වුණා. නමුත් ඔහු ඔහුගේ හැකියාව මුදලට විකුණුවේ නැහැ. බොහෝ අය දඩයම් සඳහා සුදුසු ප්‍රදේශ දැන ගන්නට,අශ්ව ධාවන තරගවල දිනන අශ්වයන් දැන ගැනීමට ඔහු හමුවට ආවත් ඔහු තම හැකියාව එවැනි අය සහ එවැනි දේ වෙනුවෙන් යෙදෙව්වේ නැහැ.රෝගීන්ට ප්‍රතිකාර කිරීම් පමණක් සිදු කළ මොහු ධනවතෙක් හා උගතෙක් වුණු ආතර් ලැමර් හා එක්ව කර්මය හා පුනර්භවය ගැන තොරතුරු විමසමින් පර්යේෂන සඳහා සහාය ලබා දුන්නා.
ගෞතම බුදුන් වහන්සේ දේශනා කරපු ආකාරයටම කේසි විසිනුත් කර්මය හා පුනර්භවය පිළිබඳව විග්‍රහ කළා. පෙර කරන ලද කර්මයන්ගේ ස්වභාවය අනුව සත්ත්වයා භවයෙන් භවයට ගමන් කරන බව කේසි ප්‍රකාශ කරලා තියෙනවා.ඔහු පුනරුත්පත්තිය සනාථ කළා.1900 දී කේසීගේ කථන හැකියාව සම්පූර්ණයෙන්ම නැති වුණා.නමුත් ඉන් වසරකට පමණ පසුව ගුප්ත විද්‍යාඥයන් දෙන්නෙකුගේ මෝහන ප්‍රතිකාරයකින් ඔහුට නැවත කතා කිරීමේ හැකියාව ලැබුණා.ඉන් පසුව කේසි ඔහුගේ උපත් හැකියාවෙන් ලෝකය ගැන විවිධ අනාවැකි පළ කළා.
ඔහු 1938 වසරේ දී ප්‍රකාශ කළේ බිමිනි දූපත් ආශ්‍රිතව මුහුද යටින් සිද්ධස්ථානයක් මිනිසාට මුණගැහෙන බවයි. අත්ලාන්තික් මහද්වීපයේ කොටසක් මිනිසාට මුණගැහෙන පළමු අවස්ථාව විදියට ඔහු අනාවැකි පළ කළා. එය බෝහෝ අය තැකීමට ලක් නොකළත් 1969 දී බිමිනි දූපත් ආශ්‍රිතව මුහුද යට තිබුණු ප්‍රාකාරයක කොටස් කිමිදුම්කරුවන්ට හමුවෙලා තියෙනවා.
ප්ලේටෝ විසින් අත්ලාන්තිකාව ගැන මුල්ම හෙළිදරව්ව කරනු ලැබුවා.ඉන් පසුව මේ අත්ලාන්තික් මහද්වීපය ගැන විස්තර බොහෝමයක් කේසි අනාවරණය කළා.ඔහු කියන ආකාරයට ඒ මහද්වීපය පොසේඩියා,ඕග් සහ ආර්යන් විදියට ප්‍රධාන දූපත් තුනකට බෙදී පැවතුණා. ක්‍රි.පූ. 10000 දී පමණ පෙර අත්ලන්තික් ශිෂ්ටාචාරය විනාශ වන බවට බුද්ධිමත් ජීවින් ප්‍රකාශ කළ බවත් ඉන් බියට පත් අත්ලන්තික් වැසියන් ඊජිප්තුවට සංක්‍රමණය වී එහි ශිෂ්ටාචාරයක් ගොඩනගා ගත් බවත් ප්‍රකාශ කරනු ලබනවා.එකල අත්ලන්තික් වැසියන් ශක්ති ප්‍රභවය ලෙස භාවිතා කරපු පළිගු නිසාම එක රැයකින් අත්ලන්තික් ශිෂ්ටාචාරය විනාශ වූ බවත් ඉන් නැගුණු මුහුදු ජලය ඊජිප්තු පිරමිඩවල සටහන්ව ඇති බවත් කේසී පෙන්වා දී තිබෙනවා.
බයිබලයේ මහා ගංවතුර ලෙස සඳහන් වෙන්නේත් අත්ලාන්තික් මහද්වීපයේ විනාශය වන බව ඔහු පෙන්වා දුන්නා.මොහු ප්‍රකාශ කරපු අනාවැකි අතර බොහෝ ඒවා නිවැරදි බවට ඔප්පුවෙලා තියෙනවා. විශේෂයෙන්ම 1930 ගණන්වලදී ඇමරිකා එක්සත් ජනපදයේ ජනාධිපතිවරු දෙන්නෙකුගේ මරණ ගැනත් ඔහු එවැනිම අනාවැකියක් ප්‍රකාශ කරනු ලැබුවා.එක් ජනාධිපතිවරයෙක් ධූරය දරමින් සිටියදී මරණයට පත්වන බවත් අනිත් පුද්ගලයා ඝාතනය වන බවත් ඔහු ප්‍රකාශ කළා. එය සෑබෑවක් බව තහවුරු කරමින් ෆ්රෑන්ක්ලින් ඩී රූස්වෙල්ට් ධූර දරමින් සිටියදී මියගිය අතර ජෝන් එෆ් කෙනඩි ඝාතකයෙකුගේ වෙඩි පහරින් මරණයට පත් වුණා.
ඒවගේම 1924 දී කේසි හමුවට ආ ව්‍යාපාරිකයන්ට ඔහු ප්‍රකාශ කළේ ඇමරිකානු කොටස් වෙළෙඳපොළ බිඳ වැටෙන බැවින් ඒ සඳහා සූදානම් වන ලෙසයි .උද්ධමනයත් සමඟ බිඳ වැටෙන රටේ ආර්ථිකය නැවත යථා තත්ත්වයට එන වර්ෂයත් කේසී සඳහන් කළා.
1935 වසරේ දී කේසී ප්‍රකාශ කළේ ඉදිරි වර්ෂවලදී ලොව පුරා විවිධ ගැටුම් ඇතිවන බවයි.ජපානය හා චීනයේ ගැටුම්, ස්පාඤ්ඤයේ සිවිල් යුද්ධ, ජෝසෆ් ස්ටාලින්ගේ මර්දනකාරි වැඩ පිළිවෙල, සෝවියට් රුසියාවේ බිඳවැටීම,හිට්ලර්ගේ නැගීම හා වැටීමත් ඔහු නිවැරදිව ප්‍රකාශ කළා.
අත්ලාන්තික් සාගරය සහ පැසිෆික් සාගරය පිහිටි කලාප අනාගතයේ දී ගොඩබිම් ප්‍රදේශ වන බව ඔහු ප්‍රකාශ කළා. මේ සම්බන්ධව නිශ්චිත පර්යේෂනයන් විද්‍යාත්මකව සිදුව නැතත් ඔහුගේ අනාවැකි සැබෑවක් කරමින් යම් යම් පාරිසරික වෙනස්වීම් ඇතිවෙමින් පැවතීම දකින්න පුළුවන්. වර්තමාන පරිසර විද්‍යාඥයන් බියවී සිටින මුහුදු මට්ටමේ වෙනස්වීම ගැන කේසී දක්වා ඇත්තේ අනිවාර්යයෙන්ම සිදුවන තත්ත්වයක් බව ප්‍රකාශ කරමින් . ඔහුගේ අනාවැකිවලට අනුව අද මිනිසුන් වාසය කරන සුපිරි බලවත් ධනවත් කලාපයක් වන ඇමරිකා මහද්වීපය වගේම යුරෝපා රටවලුත් බොහෝ ප්‍රමාණයක් මුහුදට ගිලී යනු ඇත.
මේ විනාශයෙන් පසුව නැවත මිනිස් වර්ගයාගේ නව ආරම්භයක් සනිටුහන් වන බවත් ලොව පුරා සාමය හා සමෘද්ධියක් ඇති වන බවත් ඔහු තවදුරටත් ප්‍රකාශ කර තියෙනවා. බුදුන් වහන්සේත් තම දර්ශනය තුළ මේ අයුරින්ම ලෝකයේ ඇතිවීම් හා නැතිවීම් විග්‍රහ කරලා තියෙනවා. චක්‍රවර්ති සූත්‍රයට අනුව පරම ආයුෂ අවුරුදු 10 වූ විට එකිනෙකා කාකොටා මරා ගන්නා කාලයක් එළඹෙයි. පාලකයාගේ සිට මිනිසුන් දක්වා සියලු දෙනා අධාර්මිකවීමෙන් ක්‍රමයෙන් ලෝකය විනාශ වේ. ඍතු විපර්යාස, පරිසර විකෘතිවීම්, විෂම වූ සුළං ඇතිවේ. එය ක්‍රමයෙන් සිදුවෙන ක්‍රියාවලියක්. ඒ අනුව මීට වසර ගණනාවකට කලින් බුදු දහම ඇතුළුව අනෙකුත් සියලු ආගම් අනාගතය ගැන පැවසූ අනාවැකි කෙසී ද ප්‍රකාශ කර ඇති බව පැහැදිලි.
ඉතින් කේසීගේ අනාවැකි මේ වන විට බොහෝමයක් නිවැරදි බවට තහවුරු වී අවසන්. ලොව අනාගත ඉරණම ගැන ඔහු විසින් ප්‍රකාශ සටහන් 22000ක් පමණ ලබා දී තිබුණත් අද වන විට ඉතිරිව පවතින්නේ නම් 14000ක් පමණයි.
කේසිට තිබුණු දැඩි ඉල්ලුම නිසා දිනකට අට වතාවක් පමණ මෝහන නිද්‍රාවේ යෙදුණු නිසා ඔහුගේ ශරීර සෞඛ්‍ය දැඩි ලෙස පිරිහුණා.ඔහුට ඔහුගේ මරණය ගැන අනතුරු ඇගෙව්වා.ඉතින් ලොවට අනාවැකි ප්‍රකාශ කරමින් තම මෝහන නින්ද්‍රාවෙන් රෝගීන් සුවපත් කළ කේසී 1945 ජනවාරි 3 වෙනි දින මරණයට පත්වුණා.
උපුටා ගැනීම: Hela Rahas