පුංචි කාලේ ඉඳල භේදයකින් තොරව නත්තල් සමරන්න අපි හැමෝම කැමතියිනේ.එයිනුත් වැඩිපුරම කැමති නත්තල් සීයා ගේන තෑගි වලටනේ…ඉතින් තමන් කැමති තෑග්ග නත්තල් සීයාට දන්වලා යවන්න පුංචි කාලේ අපි ලියුම් ලිව්වා.ඒ හිතින් මවාගත්ත ලිපිනයකට.හැබැයි ඔබ දන්නවද නත්තල් සීයාගේ නිළ තැපැල් කාර්යාලය ගැන?
එය පිහිටා තිබෙන්නේ ෆින්ලන්තයේ රෝවනියෙමි නගරයේ නත්තල් සීයාගේ ගම්මානය තුළ. මේ තැපැල් කාර්යාලය රෝවනියෙමි නගරයේ සිට කිලෝමීටර් 8ක් උතුරු දෙසින් ආක්ටික් කවය තුළ පිහිටා තිබෙනවා. 1950 වසරේ තමයි මේ තැපැල් කාර්යාලය ආරම්භ කරලා තියෙන්නේ.එය ගොඩ නගන්න ගල් සහ පයින් දැව යොදාගෙන තියෙනවා. ලොව පුරා සංචාරක ආකර්ෂණය දිනාගත් මෙම තැපැල් කාර්යාලයේ මෙහෙයුම් සිදුවන්නේ ෆින්ලන්ත තැපැල් සේවාවේ මුලිකත්වයෙන්.නත්තල් සීයාට ආදරය කරන පුංචි දරුවන්ගෙන් වගේම වැඩිහිටියන්ගේනුත් වසරකට මිලියන ගණනක් ලිපි මෙම ස්ථානයට ලැබෙනවලු. ඒ නිසා සංකල්පයක් යතාර්ථයක් කළ ස්ථානයක් විදිහට මේ ස්ථානය හඳුන්වන්න පුළුවන්.
නත්තල් සීයාට වසරකට ලැබෙන ලිපි ප්‍රමාණය මිලියන 20ක් පමණ වෙනවා.2020 වසරේ නත්තල් සමයේ විතරක් ලිපි ලක්ෂ 5ක් පමණ නත්තල් සීයාට ලැබිලා තියෙනවා.දිනකට සමස්තයක් ලෙස ලිපි 32,000ක් පමණ මේ තැපැල් කාර්යාලයට ලැබෙනවලු . ලොව රටවල් 199 කින් ඒ ලිපි ලැබිලා තියෙන බවයි අපිට දැනගන්න ලැබුනේ. ඒ අතරින් වැඩිම ලිපි ප්‍රමාණයක් ලැබෙන්නේ චීනය, පෝලන්තය, ඉතාලිය, එක්සත් රාජධානිය, ජපානය සහ රුසියාව යන රටවලින් ලු.
මේ තැපැල් කාර්යාලයට යන කෙනෙකුට ඒ ලිපි කියවීමටත් පුළුවන්. ඒ වගේම මෙම ස්ථානයෙන් , ඔබ ආදරය කරන ලෝකයේ ඕනෑම කෙනෙකුට නත්තල් සීයාගේ තැපැල් කාර්යාලයේ විශේෂ මුද්‍රාව සමග නත්තලට සුබපැතුම් පත් යවන්නත් පුළුවන්. වෙනත් ලිපි යවන්නත් පුළුවන්. එම ලිපි සහ සුබපැතුම් පත් වසරේ කුමන කාලයක යොමුකලත් ලබන්නාට ලැබිය යුතු කාලය තැපැල් කාර්යාලයට දැනුම් දුන් විට එම අවශ්‍ය කාලයට ලිපි යැවීමට ඔවුන් කටයුතු කරනවා.
මේ කාර්යාලයට ගිය අපිට හරිම සතුටක් දැනුණේ වෙන කිසිවක් නිසා නෙමෙයි.අපේ පුංචි ශ්‍රී ලංකාව වෙනුවෙනුත් මේ තැපැල් කාර්යාලයේ ඉඩක් වෙන් කරලා තිබුණා. ඒ කියන්නේ ශ්‍රී ලංකාවෙනුත් ලිපි ලැබිලා තිබුණා. ඒ වගේම 2009 අවුරුද්දේ ශ්‍රී ලාංකික දියණියක් නත්තල් සීයාට යවපු ලිපියක් රාමු කරලා ඒ තැපැල් කාර්යාලයේ බිත්තියේ එල්ලලා තියෙනවා
උපුටා ගැනීම: Ranjana Thanthrige