ඉමක් කොණක් නැති මහ මුහුද ජීවිතය කරගත් ධීවරයන් නාවුකයන් මුහුණදුන් ත්‍රාසජනක සිදුවීම් ගැන බොහෝ කතා පුවත් ඔබ අසා ඇති. සැබැවින්ම මහ මුහුදක යාත්‍රා කිරීම එක්තරා විදියට ත්‍රාසජනක අත්දැකීමක්. කාලගුණික දේශගුණික වෙනස්වීම් හමුවේ නිමේෂයකින් වෙනස් වන සාගරයේ යාත්‍රා කිරීමට ඉතා හොඳ දැනුමක් හා පලපුරුද්දක් තිබිය යුතුයි.
ඉතින් මහ මුහුදේ යාත්‍රා කරන්නන් ත්‍රාසජනක අත්දැකීම්වලට විතරක් නොවෙයි නොයෙක් අද්භූත සිදුවීම්වලටත් මුහුණදෙන බව බොහෝ අවස්ථාවල අසන්නට ලැබෙනවා. එවැනි අද්භූත ප්‍රදේශ මේ සාගරයේ සැඟවී තියෙනවා වගේම අබිරහස් අද්භුත යාත්‍රා පවා මේ නාවුකයන්ට හමුවුණු පුවත් ගැන සඳහන් වෙනවා . නමුත් මේ මාතෘකාව පිළිබඳව බොහෝ අය කතා කරන්නට නම් වැඩි කැමැත්තක් දක්වන්නේ නැහැ. මොකද මහ මුහුදේ හොල්මන් නෞකා හමුවීම සැබැවින්ම බොහෝ අය පිළිගන්නට මැලිවෙන විශ්වාස කරන්නට අපහසු කාරණයක් නේ. ඉතින් එහි ඇත්ත නැත්ත ගැන කියන්නටයි මේ සූදානම් වෙන්නේ.
ඉතින් බොහෝ පළපුරුදු නාවිකයන් අත්දැකපු නමුත් බොහෝ නාවිකයන් පවසන්නට මැලිවන මහ සයුරේ සැරිසරන අද්භූත නෞකා ගැන මේ ලිපියෙන් කතා කරමු. ඉතින් මේ වගේ මහ සයුරේ සැරිසරන අතිභයංකර හොල්මන් නෞකා එකක් පමණක් නොවෙයි එවැනි යාත්‍රා කිහිපයක් ගැනම තොරතුරු අනාවරණය වෙලා තියෙනවා. ඒවායේ ඇති භයානකකම නිසාම ඒ නෞකාවල නම ඇහුවත් නාවුකයන් බියට පත්වෙනවා. ඉතින් ඒ නෞකා මොනවා ද යන්න දැන් බලමු.
- The Ourang Medan
මේ සිදුවීම 1947 වසරේ දී සිදුවුණු එක්තරා අද්භූතජනක සිදුවීමක්. මේ අද්භූත සිදුවීමට මුහුණ දෙන්නට සිදුවුණේ ඇමරිකානු නාවික යාත්‍රා දෙකකට. ඉතින් මේ නාවික යාත්‍රා දෙක මලක්කා සමුද්‍ර සන්ධිය පසු කරමින් තිබියදීම The Ourang Medan නම් යාත්‍රාවෙන් අද්භූතජනක පණිවුඩයක් ලැබී තිබුණා. ඒ නෞකාවේ සිටි අයෙක් නෞකාවේ කපිතාන්වරයාගේ කැබින් කාමරයට පැමිණ එහි තිබුණු සංඥා ලබාදෙන උපකරණය හරවා “ නැවේ සිටි සියලුම දෙනා මියගොස් සිටින බවත් වහාම තමාව බේරා ගන්නට පැමිණෙන්න ” යනුවෙන් පවසා තිබුණා. ඇමරිකානු නෞකා දෙකේ කාර්ය මණ්ඩලයට බොහෝ බැගෑපත් වුණු ඔහු කතාව නිම කරන්නේ මාත් මැරෙන්න ද කොහෙද යන්නේ යනුවෙන් දුර්වල හඬකින් පවසමින් .
ඉතින් කිසිවක් පැහැදිලිව තේරුම් ගන්නට නොහැකි වුණු ඇමරිකානු යාත්‍රා දෙක ඒ සංඥා ලැබුණු දිශාවට ගමන් ගනු ලැබූ අතර එවිට ඔවුන්ට වඩාත් අද්භූතජනක අත්දැකීමකට මුහුණ දෙන්නට සිදුවුණු බව සඳහන්. ඒ නෞකාවට කිසිදු හානියක් සිදුව නැතිවුණත් එහි සිටි සියලුම දෙනා, සුරතල් බල්ලන් පවා මියගොස් තිබුණා. ඔවුන්ගේ මුහුණුවලින් පෙණුනේ අති ත්‍රාසජනක අත්දැකීමට මුහුණ දී අවසන් හුස්ම හෙළූ ආකාරයක්. ඊටත් වඩා භායානකම දේ වුණේ මේ සම්බන්ධව කිසිම පරේෂණයක් කරන්නටත් පෙරම නෞකාවේ අබිරහස් ගින්නක් ඇතිව එයින් මුළු නැවම ගිනිගෙන විනාශ වීම.
ඉතින් එදා අබිරහස් විදියට මිනිසුන් මියගොස් ගිනිගත් නෞකාව අදටත් බොහෝ යාත්‍රාවන්ට මුණගැහෙන බව සඳහන් වුණත් පර්යේෂකයන්ට අනුව මේ නෞකාව සහ එහි ගමන් කළ අය විනාශ වෙලා තියෙන්නේ නෞකාවේ ගබඩා කර තිබුණු යම් විෂ රසායනික ද්‍රව්‍යයන්වල බලපෑමෙන්. නමුත් අදටත් නාවිකයන් දකින මේ නැවේ අද්භූත රහස ගැන නම් තවමත් හෙළිදරව්වක් නැහැ.
- The Flying Dutchman
ඉතින් අද්භූත නෞකා අතරින් වැඩි වශයෙන් කතාබහට ලක්වෙන ජනකතා සාහිත්‍යයේ නිතර කියවෙන සිනමාපට සඳහා තේමාවන් සැපයූ අද්භූත නෞකාවක් තමයි මේ .1790 දී පමණ මුලින්ම මේ නෞකාව දුටු බවට වාර්තා වෙනවා. මෙය ඕලන්දයට අයත් නෞකාවක් වූ අතර එය සාගරය මැදදී ඉතාම අවාසනාවන්ත ඉරණමකට ගොදුරුවීමෙන් පසුව මේ The Flying Dutchman නමින් ඉදිරියට පැමිණෙන බවයි විශ්වාස කරන්නේ. ඒ වගේම මේ නෞකාව දුටු අය අතර ප්‍රබල රාජ්‍ය නායකයන් පවා සිටීම විශේෂත්වයක්.එංගලන්තයේ 5 වන ජෝර්ජ් රජු රජවීමට පෙර සිදු කළ නාවික සංචාරයක දී ඔහු මේ නැව දුටු බව පවසා තියෙනවා.
- The Joyita
මේ නෞකාව 1955 සිටම තවමත් නොවිසඳුණු අබිරහසක් බවට පත්ව තියෙනවා. මේ නෞකාව මසුන් ඇල්ලීමට ගිය නෞකාවක් වුණත් එයින් සති 5 තිස්සේ කිසිදු හෝඩුවාවක් නොමැතිවීම නිසා නෞකාවේ හිමිකාර සමාගම පවා කලබලයට පත්වුණා. ඒ නිසාවෙන් ඒ යාත්‍රාව සොයාගන්නා ලෙස අදාළ බළධාරීන්ට නිතරම ඉල්ලීම් කළා. අවසානයේ දී වෙළඳ නෞකාවක් මගින් දකුණු පැසිෆික් මුහුදේ දී සොයාගත් ඒ යාත්‍රාවේ කිසිවෙක් සිටියේ නැහැ. ඒ වගේම ඔවුන්ට එහි දකින්නට ලැබුණේ යාත්‍රාවට බාහිරින් පැමිණි වෛද්‍යවරයෙකුගේ ගමන් මල්ලක් වගේම ලේ වැකුණු වෙළුම් පටි රාශියක් පමණයි. නමුත් අදටත් එහි සිටි නාවිකයන්ට සිදුවුණු දේ ගැන තොරතුරක් හමුවෙන්නේ නැහැ.
- The Caleuche
පැනමා ඇළ නිර්මාණයට පෙර ඇමරිකා මහද්වීපයේ බටහිර වෙරළ තීරයේ රටවල්වලට යුරෝපය දෙසට යාත්‍රා කරන්නට නම් දකුණු ඇමරිකාවේ චිලී රටේ දකුණු දිග තුඩුව හරහා යාත්‍රා කිරීම හැර වෙනත් විකල්පයක් තිබුණේ නැහැ. මේ නිසාම චිලී ප්‍රදේශයේ වරාය කලක් ලෝකයේ කාර්යබහුල වරායක් බවටත් පත්ව තිබුණා. ඉතින් මේ චිලී රටේ ජනතාව නාවික ක්ෂේත්‍රයත් එක්ක තියෙන බැඳීම වඩාත් සවිමත් වගේම දීර්ඝ ඉතිහාසයක් සහිත එකක්. නමුත් චිලී රටේ කොතරම් පළපුරුදු දක්ෂ නාවිකයෙක් වුණත් වඩාත් බියට පත්වෙන යාත්‍රාවක් තමයි මේ The Caleuche නෞකාව. ඒ නම ඔවුන් මහත් තැති ගැන්මකට පත්කරනවා.
මේ නෞකාව සම්බන්ධ සටහන්වලට අනුවත් මේ නෞකාව සියැසින් දැකපු අය පවසන ආකාරයටත් මේ නෞකාව පෙනුමෙන් ඉතාමත් අලංකාර නෞකාවක්. මේ නැව ගොඩබිමට ආසන්නයෙන් ගමන් කරද්දී සංගීතය වගේම මිනිසුන් පිරිසක් විනෝදයෙන් සතුටින් හිනැහෙන හඬ ඇසෙන බවත් ඉන් මද වේලාවකින් ඒ සිනාහඩ විලාපයක් බවට පත්වන බවත් පැවසෙනවා. ඉතින් එයට හේතුව වෙන්නේ මේ නෞකාව සාගරයේ ගිලීයාම නිසා. ඉතින් චිලී රටේ බොහෝ ජනතාව කතෝලික අය. නමුත් ඔවුන් විශ්වාස කරන විදියට මේ නැවේ ශාපලත් ආත්ම වාසය කරනවා. ඒ විතරක් නෙවෙයි ඔවුන් විශ්වාස කරන විදියට මුහුදට අධිපති භූතාත්ම තුනක් විසින් ඒ ශාපලත් ආත්ම නැවතත් ඒ රටට කැඳවාගෙන යනවා. නමුත් කතෝලික ජනයා වාසය කරන රටක මෙවන් විශ්වාස පැවතීම තවත් බොහෝඅය පුදුමයට පත් කරන්නක්.
- The Mary Celeste
මේ නෞකාව 1872 අත්ලන්තික් සාගරයේ පාවෙමින් තිබියදී සොයා ගනිද්දී එය ඉතාමත් හොඳ තත්ත්වයෙන් පැවතුණු බවට වාර්තා වෙනවා. මේ නෞකාවේ කාර්ය මණ්ඩලයත්, කපිතාන්වරයාගේ ලොග් සටහන සහ ජීවීතාරක්ෂක බෝට්ටු ආදී බොහෝ දෑ කිසිදු සලකුණක් නොමැතිව අතුරුදන්ව තිබුණත්, නෞකාවේ කාර්ය මණ්ඩලයේ බඩු භාහිරාදිය, ඔවුන්ගේ භාවිතය සඳහා තිබුණු ඇල්කොහොල් බැරල් 1500 ක් හානියට ලක්නොවී දකින්නට ලැබුණු බව සඳහන්. නමුත් එහි කාර්ය මණ්ඩලයට අත්වුණු ඉරණම අදටත් අබිරහසක්.
- The Octavius
මේ නෞකාව මළවුන් සමඟ සයුරේ යාත්‍රා කරන තවත් අද්භූත යාත්‍රාවක්. මේ නෞකාව ප්‍රථම වරට හමුව තිබුණේ 1775 දී ග්‍රීන්ලන්තය අසල පාවෙමින් තිබිය දී තල්මසුන් දඩයමේ නිරත වුණු හැරඩ් නම් නෞකාවේ නාවිකයන්ට. ඉතින් ඒ නැවේ සිටි සියලුම පුද්ගලයන් ඒ වෙද්දී සීතලට ගල්ගැසී මරණයට පත්ව සිටි අතර නැවේ කපිතාන්වරයා ලොග් සටහන තබමින් සිටිය දී මරණයට පත්ව තිබුණා. නමුත් අද්භූතජනකම කාරණය වෙන්නේ ඒ සටහනට අනුව මේ නැව ඛේදජනක ඉරණමකට ගොදුරුව ඇත්තේ 1762 දී වුවත් වසර 13 ක් පුරා කිසිවෙක්ගේ ඇස නොගැටී මේ යාත්‍රාව මුහුදේ පාවෙමින් තිබීමයි .
- The Carrol A Deeering
මේ නෞකාව අද නෞකා බොහෝමයක් අද්භූත ඉරණමකට ගොදුරු කරගන්නා බර්මියුඩා ත්‍රිකෝණයේ සිදුවීම් ගොන්නට ඇතුළත් කර තිබෙනවා. කොහොමනමුත් මේ නෞකාව 1921 දී උතුරු කැරොලින් අසල මුහුදේ යාත්‍රා කරමින් තිබිය දී එහි ස්වභාවයෙන්ම යම් ගැටළුවක් ඇති බව හඳුනා ගන්නට එහි වෙරළාරක්ෂක භටයන් සමත් වෙලා තියෙනවා. ඒ නිසාවෙන් ඒ භටයන් බෝට්ටු කිහිපයක් භාවිතා කරමින් යාත්‍රා වෙත ලඟාව ඒ නෞකාව සම්බන්ධ කරගන්නට උත්සාහ කළ නමුත් ඒ උත්සාහයන් සියල්ල නිශ්ඵල වූ අතර ඒ නෞකාව ගැන තවදුරටත් පරීක්ෂා කිරීමේ දී එහි කිසිම කෙනෙක් සිටියේ නැති බවත් පෙනීගියා. ඒ වගේම ඔවුන්ට නිරීක්ෂණය වුණේ ලොග් සටහන සහ ජීවීතාරක්ෂක බෝට්ටු දෙකක් ද අතුරුදන්ව ඇති බවත් ය. කෙසේවෙතත් අද ඒ සිදුවීමත් බර්මියුඩා ත්‍රිකෝණයේ අද්භූත සිදුවීමක් බවට විශ්වාස කරනවා.
- The Lady Lovibond
ඉතින් මේ නෞකාව හා බැඳුණු කතා පුවත වර්ෂ 1748 දක්වා දිව යනවා. මේ නැවේ කපිතාන්වරයා ඔහුගේ මංගල උත්සවය මුහුදේ දී සමරන්නට සියලු කටයුතු සිදුකර තිබුණා. නමුත් ඒ වෙද්දී ඒ නෞකාවේ සිටි ඒ මනාලියට පෙම්බැදි තරුණයෙක් ද සිටි අතර ඔහු ඊර්ෂ්‍යාවෙන් සහ පළිගැනීමේ චේතනාවෙන් සිටි නිසා ඔහු නෞකාව විශාල ගල් පරයක ගැටීමට සලස්වනු ලබනවා. ඉතින් එහි ප්‍රතිඵලය වුණේ නෞකාවේ ගමන් ගත් සියල්ල මරණයට පත්වීම. ඉතින් වසර ගණනාවක් ගතවීමෙන් පසුව 1798 දී එම්ප් නගරය ආසන්න මුහුදේ දී මේ නැව නැවත දකින්නට ලැබුණා. එතැන් සිට සෑම වසර 50 කට වරක්ම විවිධ නාවිකයන්ට මේ අද්භූත නෞකාව දකින්නට ලැබුණු බව සඳහන්. නමුත් 1998 වසරේ දී එය කිසිවෙක් දුටු බවක් නම් වාර්තා වෙන්නේ නැහැ.
- The SS Valencia
මේ නෞකාව මහ සාගරයේ දී අනතුරට පත්වුණු නෞකාවක් විදියට ඉතිහාසයට එකතු වෙනවා. නමුත් ඉන් පසුව නැවත මේ නෞකාව ගැන කතා කරන්නට වෙන්නේ අද්භූත සිදුවීම් හා සමඟ. ඉතින් බ්‍රිතාන්‍යයන් වර්ෂ 1906 දී කොලොම්බියාවට පැමිණියේ වෑන්කෝවර් වෙරළ තීරය ආසන්නයට . නමුත් ඉතාමත් අවාසනාවන්ත ලෙස මේ නෞකාව සාගරයේ දී මුහුදුබත් වුණා. ඒ වෙද්දී ඒ නෞකාවේ මගීන් 107 ක් ගමන් කළත් ජීවිත ආරක්ෂක බෝට්ටු මගින් බේරාගන්නට හැකිව තිබුණේ මගීන් 37 දෙනෙක් පමණයි. ඇතැම් වාර්තාවල සඳහන් වෙන ආකාරයට ඒ ජීවීතාරක්ෂක බෝට්ටු අතරින් එකක් හදිසියේම අතුරුදන්වීමකට ලක්වෙලා තියෙනවා.ඉතින් අවාසනාවන්ත සිදුවීමෙන් පසුව යළි යළිත් මේ ගැන සොයා බලන්නට කතා කරන්නට අවස්ථාව ලැබෙන්නේ දශක ගණනාවකට පසුව. ඒ ධීවරයන්ට වගේම නාවුකයන්ටත් මිනී ඇටකටු සහිත Valencia නෞකාව දකින්නට ලැබීමත් සමඟින්.
- The Baychimo
හඩ්සන් බී නාවික සමාගමට අයත් නෞකාවක් 1931 දී ඇලස්කා ප්‍රදේශයේ දී අයිස්පර අතර සිරවුණු බවත්, එය මුදාගන්නට එකල පැවති තාක්ෂණය දියුණු නොවීමත් නිසා හිමිකාර සමාගමට මේ නෞකාව අත්හැර දමන්නට සිදුවෙනවා.නමුත් ඊළඟ වසර 38 පුරාවටම මේ නෞකාව මුහුදේ එහා මෙහා පාවීයන ආකාරය නාවිකයන් බොහෝදෙනෙක් දැක තියෙනවා. කොහොමවුණත් 1960 වසරේ දී අවසන්වරට නාවිකයෙක් මේ නෞකාව දුටු බවට වාර්තා වුණත් ඉන්පසුව මේ අද්භූත යාත්‍රාව දුටු අයෙක් ගැන වාර්තා වෙන්නේ නැහැ.
ඉතින් මේ මහ සයුරේ පාවෙන අද්භූත නෞකා ගැන බොහෝ අය සාක්ෂි ඇතුව පැහැදිලි කළත් බොහෝ අය පිළිගන්නට මැළිකමක් දක්වනවා. මොකද වැඩි කතාබහට ලක්නොවෙන කාරණයක් නිසා වගේම සත්‍යයට එහායින් යම් අද්භූත කතා ඒ සමඟ බැඳී තියෙන නිසා. නමුත් අපි සාමාන්‍යයෙන් දකිනදේට වඩා නොදකින දේවල් නොපතන දේවල් සිදුවන බව නම් අපි අමතක නොකළ යුතු කාරණයක්.
උපුටා ගැනීම: VOICE Official Lanka Post Blog