මේක මේ මහා අතීතයක් තියන මතකයකුත් නෙමෙයි.පෙබරවාරි වල වගේ වුනේ.මගේ ආදරණීය යක්ෂණිය මාත් එක්ක දෙවැනි ලෝක යුද්ධ ප්‍රකාශ කරලා තිබුණා දවස් කිහිපයක ඉදන්.ඒත් හරිම නිහඬයි.නිසලයි.ඒක තමයි භායානකම.පෙම්වතිය හෝ බිරිඳ කියව කියව රණ්ඩු වෙවීම ඉන්නවා නම් ගාණක් නෑ.හැබැයි පුතේ අර මුහුද වගේ නිසලව නිහඬව දවස් දෙකක් වගේ ඉන්නවා නම් ඒ සුදානම බියකරු සුළි කුණාටුවක් එවන්න නෙමෙයි.මොන පිස්සුද ඒ නිසල බවේ අවසානය නොකඩවා පහර දෙන සුනාමියක්.
ඔන්න දවසක උදේ පාන්දරම නිවිතිගල යද්දී මගේ වචනයක් වැරදුනා.පටන් ගත්තා නේද සුනාමිය මට පහර දෙනවා දුවන්න පාරක් නෑ..ඒ වතුර පාර මාව යටකරගෙන අඩි ගාණක් උඩින් යනවා.පෙර වැරදි ඉදන් අද දක්වාම සුළු සුළු අතුපසුවීම් දක්වා ඔක්කොම කියවනවා මට කට අරින්න සිහියක් නෑ.සිහියක් එයිද යකෝ මේ කටෙන් වචන එන වේගයට කපුවෙක්ටවත් බෑ ආවේශ වෙලාවත් එච්චර වේගයෙන් ජප කරන්න.අනේ කාර් එක එළවන දනේෂ් මේ ඔක්කොම ඉවසීමෙන් අහගෙන පරිස්සමින් කාර් එක එළවනවා..මාත් කතා නෑ.කතා කරන්න විදියක් නෑ.මොනවා කියන්නද?
“තමුසේ දැන් ආවාද මාසයක් තිස්සේ මාව බලන්න? නෑ.බිස්නස් බිස්නස් බිස්නස්.මොකක්ද මිනිහෝ මේකේ තේරුම? තමුසෙට මෙහෙ ගෑණියෙක් ඉන්නවා කියලා මතක නැද්ද?”
“ඉතින් බබා ඔයාමනේ කිව්වේ මහන්සි වෙලා බිස්නස් කරන්න කියලා”
“ඉතින් මිනිහෝ මම කිව්වද මාව අමතක කරලා ඕවා කරන්න කියලා.තමුසෙට තේරෙයි මම වෙන මිනිහෙක් එක්ක ගියා නම්.මම හොඳ වැඩි ඕයි තමුසෙට.තමුසෙව බලන්න මම තනියම කාර් එකේ එනවා වත්තල ඉදන් රත්නපුරටම”
“ඉතින් බබෝ මමත් ආවේ”
“ඉස්සර ආවාට දැන් ආවාද මිනිහෝ.මෙච්චරයි මට තමුසෙව එපා.තමුසේ බිස්නස් කරගෙන රත්නපුරේන්ම කෙල්ලෙක් හොයාගෙන බැඳෙගෙන ඉන්නවා”
ෆෝන් එක කට් කරලා ඉවර වෙලා මැසේජ් එවනවා මට හුස්ම ගන්න ඉඩ නෑ.
“මම හිතන්නේ මම කොහෙද බං මේ ලොකේ ගෑණිගෙන් වැඩියෙන්ම බැණුම් අහන පිරිමියා”
මම දනේෂ්ට කිව්වා..ඌ ඒත් නිහඬයි නිසලයි.(පස්සේ ඌගේ වයිෆ් ඌට බණින හැටි අහන්න ලැබුනා.මම පස්සේ සතුටු වුනා.මම තමයි දැන් දෙවනියට ලෝකේ වැඩියෙන්ම බැණුම් අහන පිරිමියා)
කොහොමහරි නිවිතිගලටත් ආවා.ඒත් මේක ඉවරයක් නෑ.අද නම් ගලක් ගන්න වෙන්නේ නෑ මේ කියවන කියවිල්ලට.ඔළුව විකාර වෙලා පාඩුත් කන්න වෙන්නේ.මම දනේෂ් ට කිව්වා උඹලා ගනින් මම මේක ඉවර කරලා එන්නම් කියලා.
පස්සේ ඉවර වුනා ශබ්ධ පූජාව
“මේක මෙතනින් සදහටම ඉවරයි.තමුසෙව මට එපා.ආපහු මට කතා කරන්නවත් එපා.මම මේ ඔක්කොම බ්ලොක් කරලා දාලා යනවා යන්න”
අන්න එහෙමයි ඉවර වුනේ.දැන් මේක ශේප් කරන්නත් එපැයි.ආවා අයිඩියා එකක්.ඔෆිස් එකට යවන්න ඕනී රෝස් මල් පිරුණු ලස්සන මල් බොකේ එකක්.එහෙමවත් ශේප් කරගන්න බලන්න එපැයි දැන් ඉතින්.බැලුවා ඔන්ලයින් මල් යවන ආයතන ඔක්කොටම කතා කරලා.එකක් නෑ අදම යවාගන්න පුළුවන්.
“අද නම් බෑ සර් හෙට තමයි”
“පිස්සුද මල්ලී කසාදේ කැඩෙනවා මේක යවන්නම ඕනී අද.මොකක් හරි කරලා දෙන්න”
“සොරි සර්”
කෙළියානේ මූණටම.ඒ වැඩෙත් හබක් දැන්.ඔන්න ඒ වෙලාවේ තමයි සමුද්දී අයියා පිහිටට ආවේ.
“මගේ යාළුවෙක් ඉන්නවා දෙහිවල. ඌට කතා කරලා කියමු වැඩේ ගොඩ දාලා දෙන්න කියලා”
“මේ බැලැකී ඔය වැඩේ කෙරෙන අතරේ කොළඹ ගිහින් එමු එතකොට උඹට එයාව බලලම ඕක විසඳගන්න පුළුවන්.මටත් වයිෆ් අරන් රත්නපුරේ එන්න පුළුවන් එයා අද කොහොමත් එන එකනේ”
අම්මෝ මෙවන් යාළුවෝ ඉන්න එක කොයිතරම් වාසනාවක් ද.ඔන්න අපි දැන් කොළඹ යනවා.යන අතරතුරේ සමුද්දී අයියාගේ රත්තරං යාළුවා දවල් දෙක වෙද්දී ලස්සන මල් බොකට් එකක් මිනිස්ට්‍රි එක ඇතුලටම ගිහින් දුන්නා.වැඩේ සීයට පනහක් ගොඩ.දැන් බලමු ප්‍රතිඵලය..
විනාඩි දහයක් විතර යද්දී මැජික් කෝල් එක එනවා
“මොකද මල් එව්වාම මම ශේප් වෙයි කියලා හිතුවද?”
“ඈහ් මොකක්ද මට තේරුණේ නෑ”
“අනේ නිකම් ඉන්න බබෝ.ඔයා නැතුව මට මල් එවන්නේ කවුද ඔෆිස් එකට”
මිනිහෝ එක බබා වෙලා.ශේප් වෙයි වගේ.මම නිහඬවම හිටියා.
“කවුද ඒක අරන් ආවේ?”
“මගේ යාළුවෙක්.ඇයි?”
“එයත් හිනාවෙවී දිලස් ගියේ.මොකද අපි රණ්ඩු කියලා දන්නව ද?”
“හ්ම් හ්ම්”
ඔන්න ඉතින් නොකියාම දෙවැනි සර්ප්‍රයිස් එක කරන්න 4.30 ඉදන් ඔෆිස් එක ගාවට ගිහින් බලන් ඉන්නවා මෙයා එළියට එනකම් නෑ.පහ වෙද්දී කෝල් එකක් දුන්නා.
“කෝ බබෝ?”
“මම ගෙදර අද කලින් ආවා”
“අයියෝ මම ඔෆිස් එක ගාව ඔයාලාගේ”
“මොකක්?පිස්සුද මනුස්සයෝ එනවා නම් කියන්න එපැයි”
“ඔයාව සප්‍රයිස් කරන්න ආවෙ”
“තමුසෙට නම් මොංගල් ඕයී.ඉන්න ඔතන මම කාර් එක අරන් එන්නම්”
“නෑ නෑ.මම පික් මී එකක් දාගෙන එන්නම්”
හබක් වුනා දෙවනි පුදුම කිරීම.දනේෂ්ලාට යන්න කියලා මම පික් මී එකක් දාගෙන වත්තල ගියා.යන ගමන් වයින් එකකුත් මඟින් අර ගත්තා.මත් කරලා හරි පවුල එකතු කරගන්න එපැයි.
එතනින් පස්සේ ඉතින් වලි ඉවරයි.රෑ නිදාගන්න යද්දී තමයි ආතල්ම කෝල් එක ආවේ.එයාගේ ඔෆිස් එකේ යාළුවෙක්
“අනේ වයි..අර මල් ටික ඔයාට එව්වේ කවුද කියලා කියන්න.නැත්නම් ඕක කල්පනා කරලාම මට රෑට නින්ද යන එකක් නෑ”
අනේ අම්මපා මෙහෙමත් ගෑණුනම් අනුන්ගේ දෙයක් නම් ඊට වඩා දෙයක් නෑ.
“හස්බන්ඩ් අනේ හස්බන්ඩ්” කියලා ෆෝන් එක තිබ්බා මෙයා..
රෝස මල් කළඹක් කියන්නේ ප්‍රශ්න විසඳන අපූරු උත්තරයක් ඒකට රෙඩ් වයින් එකකුත් එකතු වුනොත් උඹට හොඳටම පාස් වෙන්න පුළුවන් විභාගෙන්.
ට්‍රයි එකක් දාලා බලන්න.
උපුටා ගැනීම: Nimna Nadeesh