මළ සිරුරු මිලියනයක් පමණ මිහිදන් කර ඇති ඉපැරණි සොහොන් බිමක් සොයාගැනීමට ඊජිප්තුවේ ෆයිරුම් කලාපයේ කැණීම් කටයුතු වල යෙදෙන පුරාවිද්‍යාඥයෝ පිරිසක් සමත්ව සිටිති.
ඊජිප්තුවේ කයිරෝ නුවරට සැතපුම් 60ක් පමණ එපිටින් පිහිටා ඇති කාන්තාර ප්‍රදේශයක මෙම සොහොන් බිම පිහිටා තිබේ.
අක්කර 300ක් පමණ වපසරියක පිහිටා ඇති මෙම සොහොන් බිමෙන් මියගිය අයගේ අස්ථි කොටස් වශයෙන් සහ මමී වශයෙන් යන දෙයාකාරයෙන්ම සොයාගෙන ඇති අතර මේ වන විට වළදමා තිබූ සිරුරු 1700 ක් පමණ පිටතට ගෙන තිබේ. එම සිරුරු රාජකීයන්ගේ නොව සාමාන්‍ය ජනයාගේ බව පුරාවිද්‍යාඥයෝ පවසති.
එම මෘත ශරීර වලට විශේෂ ඇගලූම් අන්දවා නොතිබීමෙන්, රාජකීයයන් මෙන් සිරුරු මමීකරණය කර නොතිබීමෙන් ඒ බව හොදින් සනාථ වන බව ඔවුන්ගේ අදහසයි. මමීකරණය කර නොතිබුණද කාන්තාර වැල්ලෙන් ඒවා ස්වභාවික මමීකරණයකට භාජනය වී තිබෙනු හඳුනාගත හැකිය. එම පුරාවිද්‍යාඥ පිරිසට අනුව ඉතාම හොදින් සංරක්ෂණය වී තිබූ මෘතශරීර කිහිපයක්ම මේ වන විට හමුවී ඇති බව වාර්තා වේ.
එම මෘතශරීර මිහිදන් කර තිබූ සුසානය කිරගරුඬ පර්වතයක සිදුරු තනා නිර්මාණය කර තිබෙන්නකි.එය මීට වසර 1500 කට පමණ පෙර ඊජිප්තුව රෝම හා බැබිලෝනියානු අධිරාජ්‍යයින්ගේ පාලනය යටතේ පැවැති සමයේ නිර්මාණය කෙරුණක් බවට සැළකෙන බව වාර්තා වේ.
එකම ස්ථානයක මෙසේ විශාල පිරිසක් මිහිදන් කෙරුණේ ඇයිදැයි ගැටළුවක්ව පවතී. මෙම සොහොනට ආසන්නයේ පිහිටි නගරයේ ද වර්තමානයේ මෙන්ම අතීතයේ ද විශාල ජනතාවක් සිටි බවට සාක්ෂි නොමැත.
තවද හමුවෙමින් තිබෙන මෘතශරීර එකකට එකක් සමාන තත්ත්ව වල පැවතීම හෙයින් එම සිරුරු එකම සමයේ වළදමා තිබෙන ඒවා බවට සැකකළ හැකි බව පුරාවිද්‍යාඥයෝ පෙන්වා දෙති.
මෙම බිමෙහි මෙතරම් සිරුරු සංඛ්‍යාවක් මිහිදන් කොට තිබීම අභිරහසක් වියහැකි බවයි විචාරකයින් පවසන්නේ. කෙසේ වෙතත් අතීතයේ ඊජිප්තු වැසියාගේ ජීවිතය පිළිබඳ බොහෝ කරුණු මින් හෙළිවනු ඇතැයි විශ්වාස ඔවුහු විශ්වාස කරති
උපුටා ගැනීම: රාම් වණා